Войти на сайт
27 Июня 2026 года

 

  • Ауузу аманнга «иги», деме.
  • Билим ат болуб да чабар, къуш болуб да учар.
  • Акъыл къартда, джашда тюйюлдю – башдады.
  • Тойну къарнашы – харс, джырны къарнашы – эжиу.
  • Эки элинги тыйсанг, джети элде махталырса.
  • Сормай – алма, чакъырылмай – барма.
  • Бир абыннган – минг сюрюнюр.
  • Аллахдан тилесенг, кёб тиле.
  • Арбаз къынгырды да, ийнек сауалмайма.
  • Кёпюр салгъан кеси ётер, уру къазгъан кеси кетер.
  • Ат да турмайды бир териде.
  • Байлыкъ адамны сокъур этер.
  • Тюкюрюк баш джармаз, налат кёз чыгъармаз!
  • Сютню башын джалагъан къутулур, тюбюн ичген тутулур.
  • Джаралыны джастыгъында сау ёлюр.
  • Башы джабылгъан челекге, кир тюшмез.
  • Тай асырагъан, атха минер.
  • Аз сёлеш, кёб ишле.
  • Къарнынг ауруса, ауузунгу тый
  • Бети – къучакълар, джюреги – бычакълар.
  • Аджашхан тёгерек айланыр.
  • Ханнга да келеди хариблик.
  • Тынгылагъан тынгы бузар.
  • Иги адамны бир сёзю эки болмаз.
  • Къанны къан бла джуума, аманны аман бла къуума.
  • Ёзденликни джайгъан – джокълукъ.
  • Чабакъсыз кёлге къармакъ салгъанлыкъгъа, чабакъ тутмазса.
  • Тёзгеннге, джабылгъан эшик ачылыр.
  • Уллу атлама – абынырса, уллу къабма – къарылырса.
  • Кёб джашагъан – кёб билир.
  • Ачылгъан эт джабылыр, кёрген кёз унутмаз.
  • Сангырау къулакъ эл бузар.
  • Ойнай билмеген, оюн бузар.
  • Малны кют, джерни тюрт.
  • Ана къойну – балагъа джандет.
  • Джолда аягъынга сакъ бол, ушакъда тилинге сакъ бол.
  • Асхат ашлыкъ сата, юйдегиси ачдан къата.
  • Ауругъан – джашаудан умутчу.
  • Агъач халкъгъа алтынды, иссиликге салкъынды.
  • Намысы болмагъанны, сыйы болмаз.
  • Зар адам ашынгы ашар, кесинги сатар.
  • Берекет берсин деген джерде, берекет болур.
  • Тамбла алтындан бюгюн багъыр ашхы.
  • Тешик этген тынчды, аны джамагъан къыйынды.
  • Аш кетер да бет къалыр.
  • Кёрмегеннге кебек – танг, битмегеннге сакъал – танг.
  • Акъыл сабырлыкъ берир.
  • Аш хазыр болса, иш харам болур.
  • Чоюнну башы ачыкъ болса, итге уят керекди.
  • Кёзю сокъурдан – къоркъма, кёлю сокъурдан – къоркъ.

 

Архив Форума » Бёлюмле :: Тематические разделы » Санат бла маданият :: Искусство и культура
   RSS
Для любителей творчества Сапара Узденова....
 
#1
Джаратама0
20.05.2007 18:47:47
http://www.youtube.com/watch?v=peJl2PXCDWA
 
 
Страницы: Пред. 1 ... 24 25 26 27 28 ... 112 След.
Ответы
 
#626
Джаратама0
16.12.2010 08:29:26
Салам, Билал !
Эсен болурса ?
Биягъынлай, тилегим барды сеннге. Нюрбекге бир билдир:

Бу эки кюнде Орта Къарачайгъа барлыкъма. Анда мени сакълаб тургъан адам барды, джазмаларымы хакъындан.
Иншаллах, джумуш иги болур деб, турама.
Мадары бар эсе Нюрбек энтда звонит бир этер.
Юйде, уллугъа - гитчеге да менден Салам.
 
 
 
#627
Джаратама0
17.12.2010 01:11:09
Cалам !



34
Бу кёкню тюбюнде джырлагъан улугъан да толуду
Игилик, аманлыкъ да келеди бизге къуру ёргеден
Ауазынг бир джарыкъ, къонгурауча, алай огъурлуду
Ёмюрле сен джырла, ой алыб макъамла ёмюрден.

Чыгъа бер ёргеге, абынсанг да, тохтама сен чырт да
Алайда, мийикде, аламгъа ашыкъмай иги тынгыла
Бир ашыкъма сен бек, акъны къарадан сен айыр да
Эштирикди Тейри, сен Анга да джердеча джырла.

Сен таралма ызгъа, кетгенни джангыдан да джокълама
Джол болса да къыйын, таукеллен да, атла аллынга
Бу кёкден сора, сен кишиден бир себеб да сакълама
Ол берир беририн, ол сангача, болсанг сен анга.

1996. къачда.





35
Чурум болмай а джукъ да туумайды
Кесинден туугъан табчы джукъ.
Сен а барса да сенден джукъгъанды
Бу, сюймеклик деген худжулукъ.

Кёкдеги булут болур да суулу
Андан тууады джай джангур
Ышара озсанг сен кюнча къутлу
Дуниям анданды, ма дауур.

Бу чексиз кёкню барды да къарны
Эй, андан а тууалла джулдузла.
Сени кёргенлей джашнай да ангы
Туууб башлайла умутла.

Кеси аллына джукъ да туумайды
Кюндюз да тууады кечеден.
Джер юсюнден а джукъ да учмайды
Бир джукъ а тюшмей кёкледен.

Кеси аллына джукъ да болмайды
Чёп да туумайды бош алай
Бирси къолунга бюртюк къонмайды
Бирсиси къалмай джаланлай.

Джууукъ къара да, сен кёрчю мени
Ой, сен этдирдинъ бу джырны
Тутдура келиб а, къача да кери,
Бошха ийдиртдинг он джылны.

Сен а барса да сенден джукъгъанды
Бу, сюймеклик деген худжулукъ.
Чурум болмай а джукъ да туумайды
Кесинден туугъан табчы джукъ.
Февраль. 1996 дж.
 
 
 
#628
Джаратама0
17.12.2010 16:20:00
Салам !

36
Кесекден, былай да, ма, боллукъду
Къыл къобуз къаллыкъды букъуда
Бир акга, кёкге къараб, сорлукъду
- Нек джокъду ана тил джуртумда.

Кесекден, былай да, ма, боллукъду
Дуниялыкъ боллукъду бир къатыш.
Аджирни байтал тюбге урлукъду
Джаш къартха барлыкъды,эй,чалдыш.

Кесекден, былай да, ма, боллукъду
Къойчугъа этер оноу къою.
Келинчик тёрге патчах боллукъду,
Некяхсыз болса да, ма, тою.

Кесекден, былай да, ма, боллукъду
Ийманлы боллукъду кюлкюлюк
Акъылман, телича, къозуллукъду,
Бёрюге ханлыкъ этер кючюк.

Кесекден, былай да, ма, боллукъду
Чырт тёзюб болалмай болгъаннга
Джашауум ,сагъыш да оюллукъду
Узакъгъа, тебрейме мен джолгъа.

Кесекден, былай да, ма, боллукъду
Джер санны аллыкъды кесине
Сора, джан, неден да, солурукъду
Къатышыб кёкню теренине.
17.04.96. Къарчастан














37
Эй, мени, джарлы таулу аякъларым
Бир кёб джюрюй къуру да сиз терде
Алдады сизге мен джыр джазарым
Тынчлыкъ табалсам мен кёрде.

Эй, мени, джарлы таулу аякъларым
Сиз кёрмеген ой не къалды джерде
Кийик джолланы тубан тангларын
Шайтан джолланы джелледе.

Эй, мени джарлы таулу аякъларым
Ма, тамбла да, алгъады джолугъуз
Сиз кёб джашагъыз, тулпар атларым,
Сакълайла, энтда, от бла буз.
17.04.1996.
 
 
 
#629
Джаратама0
18.12.2010 02:05:34
Биреуленнге, джылдан артыкъны мундан алда, хайыр тюш айтхан эдим. Энди, бюгюн, аны къууанчы уллуду. Меннге уа, сау бол хайыр хапар ючюн, демеди.
Къууансын, мундан да кёб болсун къууанчлары,дейме.
 
 
 
#630
Джаратама0
18.12.2010 11:20:27
38
Айланса да джаным мени джулдуз кюте
Эки саным сууукъ юйде джаталла.
Къарайд, менге, къара кече къара кюле
Джюрекде да къара отла джаналла.

Къарангыда киши кёрмейд джылаууму
Джарсыууму бир инсан да билмейди
Бюгюгюнлюкде кимим эштсин бу даууму
Бир къыз мени мен сюйгенча сюймейди.

Атыб кетди мен бек сюйген бир адамым
Этсин, Аллах, ол сюйгенча, хар затын
Мен сау эсем, турур энтда мени дамым
Энтда керир къууанч сезим къанатын.

Ёлгеннге да, тёзе шойду, адам улу
Шо, некме да, былай мыдах бир бошха.
Эй, мени уа, союб баргъан, буду, къуру
Берилгенни джыйалмадым мен къолгъа.

Тёзейимчи, джарсымайым, тёзейимчи
Сабыр деген, сары алтын бир затды
Джарсыуланы, эм ачысын, кёрейимчи,
Берген-алгъан, мен билеме, Аллахды.

Къарай берсин, къара кече, къара кюле
Ойнай берсин джыламугъум джюрекде.
Айланады джаным мени джулдуз кюте
Эртде-кеч да мен да барлыкъ бир кёкде.

26.02.1996. Къарчастан.
 
 
 
#631
Джаратама0
18.12.2010 22:18:03
39
Атайланы Юсюбге

Айланады калак булут, кёкде, джангыз
Джелле аны этгендиле, ой, зыкгыл.
Кёрюнсе да ол бизлеге джарлы джакъсыз
Хар не бла да, менден эсе, ол такъыл.

Сюргенликге сууукъ джелле ары ? бери
Башха бошду, джурту аны къыйырсыз
Телли эсе, къууанчданды, ма ол тели
Насыблыды, аны билмейд, хайырсыз.

Эркинликни кенг джолунда сагъыш бир аз
Джумуш азды, ой, анданды, ол калак.
Джер юсде уа, болмаз эди, алай, джууаш
Ичи ? тышы болмаз эди алай акъ.

Былайда уа къаты джерде хар не къатыш
Бу иги деб, кёлюнг алыр джукъ да джокъ
Къалайда да бир бетлиди алгъыш-къаргъыш
Бирча тюлсе, бирде ачса, бирде токъ.

Булутну уа, кече ? кюн да джаны сабыр
Ол кериди джер джашауда хар затдан
Зыкгыл булут, нёгерликге сен бир чакъыр
Эркин кёкде, шо, бир бездир калакдан.
1996дж. Къарчастан.
 
 
 
#632
Джаратама0
19.12.2010 01:47:11
40
Бош ойнайса
Халкъ айтыу бла, ойнай келиб кёз чыгъады.
От къозгъайса
Кёзюуледе, джилтинден да, эл джанады
Кирсиз эсем нек джыймайса сен джанынга
Тюз иннет бла келген эсе джаш аллынга

Бош къайнайса
Къайнагъаннга сейир тюлдю къайнагъанынг
Бош алдайса,
Насихатгъа ушамайды хар айтханынг.
Джашырсанг да ачыкъ турад наршанлыгъынг
Кёзлеринге сыйынмайды намартлыгъынг.

Бёрюленме,
Бёрю халдан кёралмайма бир деб ышан.
Ёкюлленме,
Тюбден башлаб, башха дери, сен наршан.
Тауукъ эсни, джуусанг эди, хар тешигин
Билир эдинг, ма къаллайды, кертилигим.
11.07.1996.





41
Лайпанланы Расулгъа

Намарт Ёмюр бир кесекден тюзелир да
Джылагъанны ол кюлюрге юретир
Ачдан ёлген джаз алалай тюкленир да
Джегиучюге къышхыр бюртюк кюсетир.

Юрсюр Ёмюр бир кесекден тюзелир да
Юйсюзлеге нюр джарыгъын кёб тёгер
Ачха сокъгъан ачхасызгъа джегилир да
Ай, алайды, кеси кирин ол чёплер.

Эрек Ёмюр бир кесекден тюзелир да
Къуртбашлагъа ийнам джолун кёргюзюр
Джекирилген джекиргеннге джекирир да
Эки кёзге тюз дунияны кёргюзюр.

Джалгъан Ёмюр бир кесекден тюзелир да
Арыгъанны джоргъа атха миндирир.
Таулу халкъ да ташы кибик кёбейир да
Хар бир джауун кеси тюбге сийдирир.

Дамсыз Ёмюр бир кесекден тюзелир да
Ана тилим энтда халкъгъа баш болур.
Заман бизни Тейри кюннге тюбетир да
Джарлы халкъым адам кибик бир солур.
1996 Къарчастан





42
Шо, Аллах, бери бир къара.
Тюзге бир бурсанга чотну
Халкъгъача манга да джара,
Берсенг а гырджын бла отну.

Джыл атласа да къыркъдан
Юй деб джашар юйюм джокъ.
О немди файда джырымдан
Джырчы да болса эди токъ.

Джукъ танысам джыртыудан
Ай, мен да, болур эдим бай
Безгенме, ийнан, джаяудан,
Къансытма, мундан ары, ай.

Джайда да бузлайды джаным,
Саным терлесе да кюнлей.
Неденди былай къадарым,
Къычыртма кёкге бёрюлей.

Бошламачы чырт кесиме,
Эздирме былай заманнга.
Сен иймей бошха терсине
Оноу бир этсенг а манга.

Халкъгъача манга да джара,
Берсенг а гырджын бла отну
Шо, Аллах, бери бир къара.
Тюзге бир бурсанга чотну.
13.02.96.





43
Тюш арада ауанала
Джанны къыйнар тюрлю хапар айтсала
Тюнледе уа ма адамла
Джашауума заран къарам атсала
Кече болса мен кюн джарыкъ кюсейме
Кюндюзде уа адам ичден юркеме.

Себеб джокъду бир кишиден
Эсде сагъыш, джанда тубан къайгъыдан.
Чыкъгъан сёз да буду тилден
Ёлтюр Джашау, не да туудур джангыдан.
Ёлеме да, тынч къоярмы ма сагъыш
Джашайма да эки дуниям бир къатыш.

Ал джаныма къарайма да
Эс ётмезлик, учсуз - чексиз бир чунгур.
Къайтыудан да, о не файда
Анда хал да къутургъанны къутуртур.
Мен Джашау бла ой кёб тюрлю талашдым
Бош къарышдым, ой мен кесим таландым.

Тюш арангда ауанала
Джанны къыйнар тюрлю хапар айтсала
Тюнледе уа ма адамла
Джашауунга заран къарам атсала.
Ой не этгин, къалай къачхын кесингден
Къалай къыргъын сен сагъышны эсингден.
11.06.96.



44
Кёзюмден джашайса джашыртын.
Мен да, ташадама, ма санга.
Кёбдю да, санга да, айтырым,
Дау уллуду, бюгюн, заманнга.

Ол, меннге, бералмайды сени,
Мени да этгенди сенден кенг.
Сагъышны чексиз болуб эни,
Ахыры,болгъанма джер бла тенг.

Джер замана, барса да акъыртын,
Ахыргъа къалгъанды бир атлам.
Алайда да, не да, джашыртын,
Шау шаугъа бералмайды салам.

Джашлыкъда эрши да бир ариу
Танг юсча джарыкъды ингирги
Сюймеклик береди да къарыу,
Джыр сёзге бураса тилинги.

Кесекден къарыу да тюрленир
Кёз кёрген болмаз былай сыйлы.
Джан сезим кесингча кюзленир,
Ёлюмню джетер да къыйыры.

Алайгъа, болсакъ а, биз къонакъ
Ой, табмаз киши да бир- бирин.
Былайдача, тюлдю, чот, омакъ
Ийесин къой, ит табмаз итни.

Ахырда къалмаз ючюн худжу,
Бюгюннге ийсенг эди къулакъ.
Къарт тангла атар ючюн хурлу,
Кел, ара болсунчу бир чууакъ.

Баш булгъай, ышарма бошуна,
Къаллайды, кёргюзчю ахырны.
Не къора, не къончу къолума-
Не джырла, о не да юз къылны.

Бошалдым, бошалтма кесинги.
Таукелни джанады джолу нюр
Джокълугъум -барым да, сеники
Бер джашау, ой не да, ма, ёлтюр.
 
 
 
#633
Джаратама0
19.12.2010 09:46:09
Салам !


45
Былай ары джут кёзле бла бош къарама
Тауладан да, хайыр джокъду къараудан.
Сагъышланы бир-бирине кёб къалама
Къуру менме, сеннге, нёгер сауладан.

Дангыл тюзден киши келмез сени сора
Ётюрюкдю, излей келлик тауладан.
Башха джары, сен этмечи, иги джора
Къуру менме, сеннге, нёгер сауладан.

Кёзлерингде акъыл ышан кёб болса да
Аллахданма, нек къачаса саугъадан.
Эсли джаным джырла эте тотланса да
Къуру менме, сеннге, нёгер сауладан.

Амандан да, игиден да, бирди сёзюм
Излей эсенг, татыу алгъа джашаудан
Былай бери, мени таба, керти бёлюн
Къуру менме, сеннге, нёгер сауладан.

Къууанч эте, джаша, дейме сен хаман да
Ышар дейме кери болуб къаугъадан.
Эштемисе сен кёк ауаз джанынг барда
Къуру менме, сеннге, нёгер сауладан.
14.07.97.




46
Атайланы Юсюбге ( Ёскагъа )

Мен тюшде эштеме алгъынлай
Тау таугъа айтады шыбырдаб
Бюгюнча барса ма Къарачай
Джарлыны сакълайды минг азаб.

Джарлыны сакълайды минг азаб
Джаш тёлю чыгъалмайды алгъа
Бюгюлюб, барады чыкъырдаб
Эменден тартады бу талгъа.

Эменден тартады бу талгъа
Юзюгю болса да бёрюден
Тирелибди бюгюн бу джаргъа
Ой, алгъын шашса да кючлюден.

Ой, алгъын шашса да кючлюден
Бюгюню кюлкюдю Джашаугъа
Думп болду ёхтем тин кёлюнден
Энди, къуш джесирди тауукъгъа.

Энди, къуш джесирди тауукъгъа
Оноуун этеди хар муртат.
Джау болду таулу да таулугъа
Бир болду сылыкъ эшек бла ат.

Бир болду сылыкъ эшек бла ат
Башханы киргенди да дини.
Бизники къайдады сен бир айт
Къарчалы сатханды Тейрини.

Къарчалы сатханды Тейрини
Кяфыргъа тутханды бу согъум
Энди халкъ сыйлайды телини
Игини къагъады да тонун.

Игини къагъады да тонун
Баштюбге болгъанды хар бир зат
Халкъ эсден кетермесе тотун
Ал нечик, алда уа минг азаб.

Дагъы да, эштеме алгъынлай
Минги тау айтады таулагъа
Меникиди, энтда, Къарачай
Ма, менденди, не да, таулугъа

Ма, менденди, не да, таулугъа
Болумну кёреме мен ачыкъ
Чот джетсе уа туура къаугъагъа
Семизни этерме мен арыкъ.

Семизни этерме мен арыкъ
Ышыкъгъа къысарма игисин
Игиге себерме да джарыкъ
Кирлини джууарма мен кирин.

Кирлини джууарма мен кирин
Залимге къошарма энтда джан
Сыйлыны сыйларма этгенин
Къоркъууун алырма къанаудан.

Къоркъууун алырма къанаудан
Хар нени салырма орнуна
Кесекден, ма, сора, Къарачай
Оноуун аллыкъды къолуна.

Оноуун аллыкъды къолуна
Алгъынлай, табарча ол тёрюн
Хар несин джыяр ол къойнуна
Кесимлей этерме да кёлюн.

Кесимлей этерме да кёлюн
Акъ къардан берирме анъа джан.
Бир душман урмазча ёшюнюн
Деу болур,алгъынча, Къарчастан.

14.07.97. Къарчастан.
Орта Къарачай

Сапар Ёзден. Басханстан
 
 
 
#634
Джаратама0
20.12.2010 01:18:28
Салам !

Джуртунгу бек сюйесе деб, меннге дай этедиле.
Сора,Джуртну, башха тюрлю сюерге боламыды..

Басханстан.
 
 
 
#635
Джаратама0
20.12.2010 02:03:15
Салам !

Джуртунгу бек сюйесе деб, меннге дай этедиле.
Сора,Джуртну, башха тюрлю сюерге боламыды..

Басханстан.



Ас Салам,

Пайгамбарны сёзю болганы да айтылады (хадис болмаганын айтканла да бардыла): ДЖанглыз Имам Раббани бле Мевлана ДЖелаледдин Руми'ни китапларындан хадис болганы джазылыймыш. "ДЖурт сюймеклик ийманданды."

(vatan sevgisi imandandır) hadis-i şerifi, islam âlimlerinin en büyüklerinden ve ikinci bin yılın müceddidi olan imam-ı rabbani hazretlerinin, mektubat kitabının 155. mektubunda ve hümanistlerin bile sevdiği evliyanın büyüklerinden mevlana celaleddin i rumi hazretlerinin mesnevi'sinde vardır." http://www.itusozluk.com/goster.php/vatan+sevgisi+ imandand%FDr/sayfa/1
 
 
 
#636
Джаратама0
20.12.2010 18:06:43
Cаламынг узакъ болсун, Тинибек !
Айтхан сёзюнгю бек джаратдым - Джурт сюймеклик ийманданды,-дегенинги.
Айтхан сайдынгы ачдым ,алай а джукъ ангыладым десем, алдарыкъма,тюркчады болгъан.
Сора дагъы да:
Юнюс Эмоени орус тилде назмуларын къайтарыб окъудум, керти джырчы.
Молла Къасым налатха уа, джууабха Эмрени ол тас болгъан назмуларыны магъанасын, Аллах айтса, орнуна саллыкъма.
Керти, таза суфий, ол а биле болур эди Чапракъланы бояулары къайры кетгенин.
Уллугъа- гитчеге да Салам бер.
Эсен тюбешейик ! Мен да, энтда, кесек затчыкъ джазайым.
-47-
Муратыма мен джакъсам а шибижиден
Джетер джерден озуб кетер узакъгъа
Замансызлай, алыб кетер миллетимден
Бек насыб да ушаб къалад тузакъгъа

Джырларыма мен джакъсам а шибижиден
Сюйгенлени душманланы кюлдюрюр
Уча кетиб, джыгъылсала бир мийикден
Ёлюб кетген, ма, мени да, кюйдюрюр.

Джашауума мен джакъсам а шибижиден
Артда боллукъ дженгил джетер кюушене
Ой бюгюнча ауаз чыкъмаз ма тилимден
Тёрт санымы, бир терк, джутар кешене.

Сора, энди, джашайымчы, ашыкъмайын
Ашыкъгъанлыкъ, ой бермейди эсге кюч
Хар муратха мен джорукъ бла талпынайым
Джашау бирди, алмагъанма мен ёлкюч.
15.07.1997.





48
Мен, кимме деб, сорама да эртденнгиге
Сагъынама кетген кюнню, келгенни.
Ма, бу сез а, шууулдайды джюрегимде
Нартладанса, джашым, дейди эртденги.

Мен, кимме деб, сорама да кюндюзгюге
Эс къармайды бармагъымы - тюгюмю.
Мен излеген зынгырдайды джюрегимде
Нартладанса, джашым, дейди кюндюзгю.

Мен, кимме деб, сорама да хар ингирде
Джан, къозгъайды, хар терсими, игими
Ма, бу джууаб, джылтырайды ма ичимде
Нартладанса, джашым, дейди ингирги.

Мен, кимме деб, сорама да мен кечеде
Бир бек битиб, сагъыш кёзюм, кёклеге
Зауукъдама, ой, бир табды хал да менде
Нартладанса, джашым, дейди, ма, кече.

Эштгеними, кимге айтхын, ким ангылар
Сансыз болсам кёлюм къалыр кесимден
Не уа артда мен айтханны кимим сынар
Къалай эштир керти сёзню Тейриден.
21.07.1997дж.
 
 
 
#637
Джаратама0
21.12.2010 01:15:47
49
Гитарама

Букъугъа батханса сен терен
Не медет,къалгъанса сансызлай
Ой, алгъын, тири эдинг, ма, сен
Тохтаусуз,джашай эдинг джырлай.

Ой, алгъан, тири эдинг, ма, сен
Джырынгы излей эди хар къыз
Сен джерге келгенча ёргеден
Дун - дуния айта эди алгъыш.

Сен джерге келгенча ёргеден
Къайгъысын чача эдинг джанны
Ол кюнде онглу эдим кёбден
Бюгюнден кюшлю эди ангы.

Ол кюнде онглу эдим кёбден
Къууанчны кёрюнмейин учу
Алыргъа уста эдик кёкден
Макъамны ма эмда ма къутну.

Алыргъа биз ёч эдик кёкден
Заманны нюрюн эм къудретин
Энди не къарайса мюйюшден
Бир мыдах, букъу болуб бетинг.

Энди, не, къарайса мюйюшден
Тюз сенлейди бюгюнде халым
Къарамны басханды да кюрен
Акъ мурат этелмейди ангым.

Ой, алгъын, тири эдинг ма сен
Тохтаусуз,джашай эдинг джырлай.
Букъугъа батханса сен терен
Не медет,къалгъанса сансызлай

22.07.1997дж.
 
 
 
#638
Джаратама0
21.12.2010 03:13:15
Саубол ШАТ !

"ДЖурт сюймеклик ийманданды" сёз мени тюлдю ). Пайгамбар Хз. Мухаммед (Аллахны рахматы юсюне болсун) ни сёзю болганы айтылады, хадис-и шериф. Бир каумла аллай хадис джокту дерге де кюрешелле.

Тюркче джазыуну translate.google.com 'ла орушчага кёчюрюрге кюрештим. там англашыла да болмаз.
ватан севгиси имандандыр) хадис-и шерифи, ислам âлимлеринин ен бюйюклеринден ве икинджи бин йылын мюджеддиди олан имам-ы раббани хазретлеринин, мектубат китабынын 155. мектубунда ве хюманистлерин биле севдигьи евлиянын бюйюклеринден мевлана джелаледдин и руми хазретлеринин месневи'синде вардыр.
(Любовь к стране имандандыр) хадис-я шерифа, мусульманские ученые, основатель крупнейшей и второго тысячелетия перья Имам Раббани, Письма книге 155 гуманистов в письме и даже большие любимого святого Мевланы Джалаледдина Руми я Маснави имеет перья".

Хадис'ни арапчасы: 'Хуббюл ватан мине'л-иман'. 'хадисов Мухаммед любовь к своей стране' деп google'де изленсе, кёп сайт чыгьады, джанглыз кайсы тюз кайсы джанглыш, алдаук ким биледи. сен кесинг де айырык болурса. Маганасын бизледен иги биле болурса. Имам Раббани деп уллу алим болганды, аны 115. мектубунда бу хадис джазылып тураймыш. Бир де уллу суфиледен Мевлана ДЖелаледдин Руми'ни Месневи денилген китабында да бармыш.

Мевлана ДЖелалледдин Руми уллу алим, поет болганды. Юнус Емре бле айны джыллада джашагьандыла. Тюз джанглыш есе де; тюбешгенлери де айтылады. Бир де Мевлана'ны Юнус Емре ючюн былай айтканы да джазылады: Маневиятта (мана алемде) калайга бардыесем, бир Тюркмен улуну (Юнус Емре) ызын таптым, хайхай аны озалмадым." (Халк Юнус ичин Мевлана'я << Маневи конакларын хангисинин ёнюне вардыйсам бир Тюркмен коджасынын изини булдум, ону гечемедим. >> дедиртмиштир.)

Юнус Емре халкны сёлешкен тилибле (Тюркче), херкес англарыкча джазганды, бек саде, маганалары терен болса да. Назмуларындан кёп джырла, илахиле етилгенди.

"Илим билим билгенди,
Илим кесин билгенди,
Сен кесинги билмеесенг,
Бу не окумаклыкты." Бу тёртлюк енг кёп билингенледенди.

джууабха Эмрени ол тас болгъан назмуларыны магъанасын, Аллах айтса, орнуна саллыкъма. Да, тюз айтаса. ДЖапракланы кетген бояуларын ызына алып келирге де болурса.
Керти, таза суфий, ол а биле болур эди Чапракъланы бояулары къайры кетгенин. Биле болур еди.

Алейкюм Салам. Сизге де, уллулага, гитчелеге саламла!

Аллахха аманат !
 
 
 
#639
Джаратама0
22.12.2010 12:19:15
Аламат, бир деб бир адам аууз джетдирмей, ох деб турама.
Эсим эски джазгъанларымдады.
Аллахгъа Шукур !


50
Ёзденланы Магамет бла Аскерге.

Ёмюрлюкню келген эсек теренинден
Заман бизни этген эсе ёзденджан
Дыртдымайла не излейле сора бизден
Эринлени чайнайдыла зарлыкъдан.

Нартладан да биз келгенбиз баш кётюре
Къарчастанда эм кёблени бирибиз
Къууанчха да бушуугъа да кёб кёмюле
Джашауда да, ёлюмде да, тирибиз

Къаргъышланы биз ётгенбиз ичлери бла
Алгъышда да биз джюзгенбиз кемелей
Шыбыланы ёрлегенбиз тиклери бла
Тарихледе ыз къойгъанбыз биз эрлей.

Манкъушла уа сюймейдиле бизни энтда
Излейдиле къычырыргъа огъартын
Зар къауумну эси бирди эртдеден да
Башха бирни ол сюймейди онгарын.

Кёб затлагъа сукъланмайбыз къауумлача
Намыс кючю уллуду да рысхыдан
Ой алада дуния къарам тауукъдача
Ой алада кёрюнмейди къушдан къан.

Аллах айтса энтда бизни джукъ джунчутмаз
Бара эсе тукъум джюрюш тёртгюллей
Акгаланы иннетлерин кёк къурутмаз
Джашаб турур ёзден юзюк ёзденлей
25.07.97.












51
Ма энтда атханды бир танг
Ма энтда кетди бир кече
Таярча болдум акъылдан
Джеталмайма энтда сеннге.

Къайдаса бир айтчы бир зат
Зауукъмуса сен юйюнгде
Тансыкъ бла сынамай азаб
Кюлемисе сен кюзгюде.

Менде уа къайгъы эм сагъыш
Бир кёбдю менича бирге
Билесе мен энтда джангыз
Хар нем да алгъынча чюйре.

Билеме джукълайса къаты
Кёресе тюшде сен къала
Биреу бла кириб сен ары
Айтаса джууаш сёз анга.

Ма ол да джарыкъды сенлей
Сылайды тюзге чачынгы
Чыртдан да тюлдю менлей
Кёбге кюшлегенд джанынгы.

Билеме айтады бай ? бай
Къысыб бетинги бетине
Башда да джашнайды ма ай
Нюрюн себелейд кенгине.

Болурса тюшде къууанчлы
Ой, болчу, къуру да алай
Тангынг да атсынчы ашхы
Кирсин юйюнге джылтырай.

Ма энтда атханды бир танг
Кёб турмай келликди ингир
Ёлсем да сеннге тансыкъдан,
Игиди, джашау бир сейир.
27.07.97.

Тырны Аууз. Басханстан.
 
 
 
#640
Джаратама0
22.12.2010 12:27:59
ШАТ
Салам Алейкум Сапар!
Къалайса, саулугъунг игимиди? Айыб этме талай замандан бери селешмегеними... Не хапар джашауда!
Е-Н.
 
 
 
#641
Джаратама0
22.12.2010 13:15:01
Алейкум Салам !
Игиме,джокъду хатам.
Мени нек атыб кетдинг.
Тынчлыкъмыды, кёрюнмегенинги чуруму неден болду.
Кесингден бир хапар билдир. Бу эки кюнде меннге керек боллукъса
 
 
 
#642
Джаратама0
22.12.2010 13:30:53
Аллах айтса тынчлыкъды, алайа аманат, борч, иш-джумуш деген затла адамны замансыз этип къоядыла. Аллах сакъласын бир бирни атхандан, разы бол.
Мени къарыуумдан келгени этерме.
 
 
 
#643
Джаратама0
22.12.2010 13:38:19
А маарджа, ишни аллын сен башлагъанса,ахырына джетдирейик.
Мен да игиме,алгъынча, былайгъа, тилин ургъан да аз болгъанды.
Джюрек сезимлерим да ариулана башлагъандыла.
Эринмесенг бери къарай бир тур. Къарачайдан хайыр хапар сакълаб турама.
Юйде, уллугъ- гитчеге да, менден Акъ Салам бер,мен да ёхтем тауларыбызгъа сенден Салам бергениме ийнан.
Басханстан. Сапар Ёзден
 
 
 
#644
Джаратама0
22.12.2010 20:43:42
Былай бир джазыла барсынла,артда айрырбыз маджалын.

52
Мынга бир кесек сагъышлан
Менича, сюйерми киши
Мен бюгюн болсам да аман
Ма тамбла болурма иги

Биреу къыйнаса джанынгы
Кюсерсе мени дарманнга
Дуниянг кёрюнсе къарангы
Джарыкъча болурма санга.

Безиб кюнюнден мен джерни
Кетсем джашаргъа ёргеге
Табармыса, ол кюн, мени
Аны бир келтир сен кёзге.

Кетгинчи джаным Тейриге
Къарачы, айтама ачыкъ
Ашыкъ, болайыкъчы бирге
Кетсем келелмезме къачыб.
27.07.97.
 
 
 
#645
Джаратама0
22.12.2010 23:47:14
Турсун, бу да, былайда

53
Ачыуланмай къалай этигин сен бу ишге
Бирер джанбаш аркъан атса джашаугъа
Бизничала, чабсала да тюзлюк тикге
Минелмейле, не эсе да, чырт таугъа.

Алдай билген патчах болду хар неге да
Бир деб джукъдан ол билмейди уяла
Эртденнге да, сюйсе минер кечеге да,
Сюйсе ол таш, сюйсе болад мияла.

Айырмазлай, ай къатышды акъсыл къара
Бекден-бекди ма бу болум кюн- кюнден
Эй, тот болуб джата болур тюзлюк къама
Ол харибни ким чыгъарсын кюбюрден.

Алай, ёзге энтда барла керти тенгле
Керек кюнде джау турурла джауума
Мийикдеги тирил дер да тебленнгеннге
Тебленирле, аякъ тюбде, къауумла.
06.08.97.
 
 
 
#646
Джаратама0
23.12.2010 01:08:56
Темирчини таныгъан бар эсегиз, менден Салам бир беригиз.
 
 
 
#647
Джаратама0
23.12.2010 06:22:36
ШАТ

Илму-излем институтда ишлеген сагъатынгда джазгъан болурса, Джырчы Сымайылны юсюнден сен джазгъан бир статьяны джибергендиле.
Электрон адресинг бла джиберейим да, къошарынг-къоратырынг болса, къара да, сора, разы болсанг, "Семенланы Джырчы Сымайыл" темагъа салырбыз.

Айтханымча, Сымайыл сагъынылгъан неда аны юсюнден джазылгъан затланы бир джерге джыя барайыкъ - китаб-зат чыгъаргъан сагъатда джараб къалыргъа да болурла.
 
 
 
#648
Джаратама0
23.12.2010 11:59:16
Cалам, Билал !
НИИ де джазгъан затларымы, сен Исмаилни юсюнден джазгъанынга таяна, алай джазгъан эдим,кесимики азды ол ишде.
Таблыгъын кёре эсенг,учхара джерлерин редактир. этда анга кёре салырса.Ашыкълыкъ этмейик, Сымайылны юсюнден ёретин айтылгъан сёз болмазгъа керекди.
Къарачайдан джангы хапар джокъду.Болгъанлай билдирирме.
Мурадинни да унутмагъанма, Ары баргъанлай, бир къауумлагъа,- Кто сказал что я не Карачаевец,- дерик болурма....
Эсен кёрюшейик !
Аллаху Акбар !
 
 
 
#649
Джаратама0
23.12.2010 15:57:53
ШАТ
Салам, Сапар!

Ол статья бла кюрешмей къояйыкъ - ол эртде джазылгъанды - бюгюн Сен башха тюрлю джазарыкъса. Сени къол ызынг энчиди, аны себебли мен редактировать этиб да кюрешмейим.
Кесинг заманы бла, Джырчы Джырчыгъа тыйыншлы сёз айтсанг - адабиятда къаллыкъ олду.
Акъ сёзден хапарсыз къара адамчыкъланы Аллах кеси тюзетир.
Кёлюнге - рахатлыкъ, къанатлы сёзюнге - чууакъ Кёк.
Алгъыш биргеди.
 
 
 
#650
Джаратама0
23.12.2010 21:57:09
Саламынг узакъ болсун !
Ол айтханынг табыракъды,кёзюу джетсе бир затла джазаргъа кюреширме. Къарачайдан энтда джангылыкъ джокъду,кечирек эте звонит этерге деб турама. Билдирирме.
Сени да, Аллах, этген муратларынга, джетдирсин !
Эсен тюбешейик !

Энтда бир эки затчыкъ тюшюрейим бери.


54
Ингирледе мен келсем да аунай- аунай
Ичгенликге хар атламым ашыгъыш
Айлансам да хар неден да насыб даулай
Сен саулукъдад бу барысы таулу къыз

Шукурлайма мен джашауну чюйресин да
Аманнга да айтыучанма мен алгъыш
Кёзюуледе, бузлауум да - кюйгеним да
Сен саулукъдад бу барысы таулу къыз.

Кюлгеним да,джылауум да,ахсыннган да,
Къууанчда да, бола эсем, мен дамсыз,
Ийнаннганым, шайтаннга да, Аллаха да,
Сен саулукъдад, бу барысы, таулу къыз.

Кетгеним да, келгеним да сени ючюн
Джаным сауда сени ючюнд джерде ыз
Къулакъгъа да ой кирмейди ахыр кюнюм
Сен саулукъдад, бу барысы, таулу къыз.
07.08.97.
 
 
 
Страницы: Пред. 1 ... 24 25 26 27 28 ... 112 След.
Читают тему (гостей: 8)

 

Написать нам

Фонд «Содействие развитию карачаево-балкарской молодежи «Эльбрусоид»

© 2003-2026 Elbrusoid.org  |  Все права защищены Законами Гор.