Войти на сайт
27 Июня 2026 года

 

  • Чёбню кёлтюрсенг, тюбюнден сёз чыгъар.
  • Ётюрюкню къуйругъу – бир тутум.
  • Этек чакъмакълары баш джаргъан, сёлешген сёзлери таш джаргъан.
  • Кёкдеги болмаса, джердегин кёрмейди.
  • Рысхысына кёре, джаш ёсер, къышлыгъына кёре, мал ёсер.
  • Сагъыш – къартлыкъгъа сюйюмчю.
  • Аш хазыр болса, иш харам болур.
  • Ётюрюк хапар аякъ тюбю бла джюрюйдю.
  • Тойгъандан сора, ашны сёкме.
  • Биреуню къыйынлыгъы бла кесинге джол ишлеме.
  • Кёлю джокъну – джолу джокъ.
  • Билимсиз иш бармаз.
  • Ким бла джюрюсенг, аны кёзю бла кёрюнюрсе.
  • Биреуге аманлыкъны тилеме да, кесинге ашхылыкъны тиле.
  • Эл тойса, тоймагъан, эл къойса, къоймагъан.
  • Айырылгъанланы айю ашар, бёлюннгенлени бёрю ашар.
  • Джюрек кёзден алгъа кёрюр.
  • Кесинг сынамагъан затны, адамгъа буюрма.
  • Къобан да къуру да къобханлай турмайды, адам да къуру да патчахлай турмайды.
  • Эрни эр этерик да, къара джер этерик да, тиширыуду.
  • Бичгенде ашыкъма, тикгенде ашыкъ.
  • Тилсиз миллет джокъ болур.
  • Ёпкелегенни ашы татлы болады.
  • Кёлсюзден сёзсюз тууар.
  • Бал чибинни ургъаны – ачы, балы – татлы.
  • Кийим тукъум сордурур.
  • Адеб базарда сатылмаз.
  • Адам туугъан джеринде, ит тойгъан джеринде.
  • Юйлю уругъа ит чабмаз.
  • Телини эшигин, махтау джабар.
  • Бастасын ашагъан, хантусун да ичер.
  • Ариу сёз аурууунгу алыр.
  • Къонакъ кёб келюучю юйню, къазаны отдан тюшмез.
  • Аууз сакълагъан – джан сакълар.
  • Чабакъ башындан чирийди.
  • Билмезни кёзю кёрмез, этмезни къулагъы эшитмез.
  • Сормай – алма, чакъырылмай – барма.
  • Адамгъа аман кюн соруб келмейди.
  • Таш бла ургъанны, аш бла ур.
  • Накъырданы арты керти болур.
  • Къонагъынгы артмагъын алма да, алгъышын ал.
  • Эте билген, этген этеди, эте билмеген, юретген этеди!
  • Адамны джюреги нени кёрюрге сюйсе, кёзю да аны кёрюрге ёч болады.
  • Тюзлюк тас болмайды.
  • Адеб джокъда, намыс джокъ.
  • Сёлеш деб шай берген, тохта деб, сом берген.
  • Гугук кесини атын айтыб къычыргъанча, мен, мен деб нек тураса?
  • Онгсузну – джакъла, тенгликни – сакъла.
  • Аманнга алтын чыдамаз.
  • Суугъа – чабакъ, къаягъа – ыргъакъ.

 

Архив Форума » Бёлюмле :: Тематические разделы » Санат бла маданият :: Искусство и культура
   RSS
Для любителей творчества Сапара Узденова....
 
#1
Джаратама0
20.05.2007 18:47:47
http://www.youtube.com/watch?v=peJl2PXCDWA
 
 
Страницы: Пред. 1 ... 25 26 27 28 29 ... 112 След.
Ответы
 
#651
Джаратама0
24.12.2010 12:45:29
Кетдик арлакъгъа.

55
Ёзденланы Асиятха.

Ёмюр джолунг узакъ болсун,ой эгечим
Заран кёзю джолукъмасын кёзюнге
Аз эсе да, буду, сеннъе, акъ тилегим
Мийикледен сен кюч алгъын кёлюнге.

Эртделеден биз келебиз башны тута
Той-джылау да сынагъанбыз кёзюуде
Аллындан да биз билебиз терсни къууа
Намысны да биз билебиз кётюре.

Бу халда да, этмез джашау сени аман
Ат тутарса, сен, насыбны кесинден
Зар юзюк а джылай берсин ма ызынгдан
Сен да тиле, ол затланы, Тейриден.

Таулу къызгъа андан башха не айтайым
Ёрге эсенг, атлам болсун табыракъ
Айтыргъа да сен унутма атлам сайын
Я Аллахым, ёре джолгъа бол чыракъ.
11.08.97. Батал паша.








56
Танг бла тенг арбаз ичге киргенме
Тюйюмюн тешгенди къарамым
Кертисин, эи бюгюн, мен билгенме
Ма юйюм, ма, джан ашха ашым.

Алдауну, тюзню да сынагъанма
Сынадым, шо неди, ма, къадар
Мен кёкню джерде да ызлагъанма
Башхагъа уа болмадым мен зар

Дунияда кёрдюм аны - муну да
Джумушакъ къаты да болалдым
Тебледим сууну ташны къумну да
Мен хакъда джанны да ойнатдым.

Джашауну игиди хар неси да
Барындан юйюнгдю аламат
Багъалыды туз да ма тебси да
Джюрегинг сабий кюнча урад.

Бюгюн мен айтама сандырамай
Джан ичи джарыкъды да тюнлей
Джашасын Джашау ёлюм сынамай
Джашасын Ёлюм ёлюмсюзлей.

Джашасын эсим да арбазым да
Джашасын халкъым да ёмюрле
Бюгюнча, былай турсун халым да
Кирейим, джаша деб, юйюме.
12.08.97.

Басханстан Сапар Ёзден.
 
 
 
#652
Джаратама0
24.12.2010 23:23:51
Салам !


57
Тюшлеримде айлансам да джырла кюте
Тюнюмде уа кютген затым назмула
Бир къауумла къарайдыла итлей юре
Теблерге да хазырдыла къауумла.

Къарыулугъа, онгсузгъа да сёзюм бирди
Мени сюре чынгамагъыз сиз джардан
Хар кимни да джашау джолу белгилиди
Джыкъсагъыз да къобарыкъма джангыдан.

Мен башхама, кюрешмегиз керексизге
Умутларым башхадыла сизледен
Къоймайсыз да, мен айтама энтда сизге
Мен бёрюден, ой сиз къауум итледен.

Джырчы тили керек болса бёрю азау
Сиз алайын унутмагъыз замансыз
Бирер джерде сиз къаллыкъсыз армау-армау
Аллахлыны къалай хорлар аллахсыз.

Ойлашыгъыз, ангылагъыз сёзню тюзюн
Кюл булгъаучу къул эталмаз джырчыны
Телисиз да, сиз билмейсиз аны кючюн
Джыр ауаз бла зыкгыл этед сынджырны.
12.08.97.

Басханстан. Сапар Ёзден.
 
 
 
#653
Джаратама0
25.12.2010 12:55:02
58
Атама. Муссагъа

Ёмюрлюкню излемеген къайсы барды
Аны джокълау башланады бешикден
Ол буз тюлдю, не от тюлдю, туурадады
Ёлюм къатыш кириб къалад эшикден.

Ёмюрлюкню излемеген къайсы барды
Излейдиле сакъат, джарты, акъылман
Къаты тюлдю, хауачады,бир бош затды
Кече-кюн да тургъан джери къабырстан.

Ёмюрлюкню излемеген къайсы барды
Излейд аны бузлай къатхан хар джаннган
Аны излей башны атма тюзге джары
Джууукъдады, тургъан джери къабырстан.

Ёмюрлюкню излемеген къайсы барды
Излейд аны, адам кибик, хар шайтан
Джан кёзле бла, иги къара, туурангдады
Майна анда, тургъан джери къабырстан.

Ёмюрлюкню излемеген къайсы барды
Туугъунчу да излей болур хар бир джан
Кёк башында бош излесе, бурнунгдады
Аны джурту, тургъан джери къабырстан.

Ёмюрлюкню излемеген къайсы барды
Аны излей кюн да джанад сагъышдан
Аны бизге саугъа этген ма Аллахды
Аны джурту, тургъан джери къабырстан.

Ёмюрлюкню излемеген къайсы барды
Джан киргенли бу барысы алгъындан
Эртде ? кеч да, ахыр атлам къуру ары
Ёмюрлюкню ма чынг аллы къабырстан
13.08.97.
 
 
 
#654
Джаратама0
25.12.2010 18:49:26
Муну да орну былайдады.

59
Мен турама кёкге къарай арбазымда
Болуб халым келлик кибик сен бери
Билемисе бир ариуду бюгюн мында
Бир ариула джулдузланы кёзлери.

Булутла да къалкъыйдыла бирер джерде
Алагъа да тюбден къараб ма таула.
Меннге кибик акъса элле бюгюн сеннге
Таза кёкден акъсыл-акъсыл тартыула.

Джан киреди быллай кече джюрегиме
Мени кибик гитарам да алайды
Бу таб кюнде тюшгенсе да сен эсиме
Сен болурса кёкден бир къыз къарайды.

Башха элде бир башхагъа сен бийчесе
Мен да мында башха блама байланыб
Ай, араны бошха буздукъ сабийлеча
Келир кеюннге къарамадыкъ сагъайыб.

Джылауумдан хайыр болмаз сенге чыртда
Джылауунгдан ма меннге да хайыр аз
Кетерикле тюз бу халда джай да, къыш да
Кетерикле энтда былай къач бла джаз.

Мен турама кёкге къарай арбазымда
Сеннге ушаш, къараб турад къыз бери.
Я Аллахым не зат дейим мен ма мынга
Джылай турад ариу къызны кёзлери.
14.08.97.
 
 
 
#655
Джаратама0
26.12.2010 14:05:27
Энтда, кетдик арлакъгъа.

60
Болма тели, ингир кёз бла бош къарайса
Алай этсенг кёче кёз бла къарарма.
Хар къуру да аманымы нек марайса
Мен джырчыма, къалай эсем алайма.

Мен кесимде тюрлю ышан кёб кёреме
Мен кесиме ма кёк кёз бла къарайма
Тёбен тюлме, сен айтхандан ёргедеме
Мен джырчыма, къалай эсем алайма.

Ингир кёз бла кесинге да бир къарачы
Ауурдула, хар бир сёзюнг бир къазыкъ
Субай сандан о не келсин джанынг ачы
Акъыл болуб, о не кёб эсе бир къашыкъ.

Сени кибик онгджюрекле кёб кёргенме
Адамсыз деб мен сый бердим кёзюуде.
Башыгъыздан ийнар саугъа кёб тёкгенме
Ай, артда уа, сиз кюйдюгюз кюуледе.

Кете эсенг, джалла кёзден, къорай берчи
Мен похгъа да санамайма сизлени
Мундан башха, не айтайым, мискин, энди.
Сакъла - сакъла, джаргъа элтед тил сени.

Къорай эсенг, нек ёлеме джаным барда
Болгъан ишни билиб болад хар заты
Джашасынчы кёлню ала джырчы джанда
Ма, Джашауду сюйгеними ма аты.

Акъ сезимни, эм маджалы, къуру анга
Джан берлигим къуру олду, къуру ол
О гакгыбаш, сен а чабыш къара танга
Силкин алгъа, сакълаб турад ары джол.
19.08.97.









61
Джата - къоба буду хаман тилек менде
Я Аллахым, уланыма болуш Сен.
Джашаб турад иги умут джюрегимде
Алан балам боллукъду деб эсленнген.

Сенден башха кимге айтхын джарсыуунгу
Айтхандан да боллукъмуду чырт файда
Къууанч къолгъа о ким алсын джазыууму
Ауругъаннга саулукъ берлик,эй,къайда.

Аллах мени джакълай эсенг балангыча
Улума да болсанг эди кесек сакъ.
Сора мен да болур эдим алгъыннгыча
Къарынг кибик, таза акъсыл,джумушакъ.

Кечеден да къара болду акъсыл джаным
Гитараны туталмайла къолларым.
Къанау болду ёрге учхан ёхтем ангым
Эсден атдым мийик кёкню джолларын.

Джарлы сабий къобса эди аякъ юсге
Къарамындан учса эди бир джарыкъ
Мени джаным ёмюрлюкге джырла бюрке
Таза кёклей, болур эди, бир ачыкъ.
21.08.97.
 
 
 
#656
Джаратама0
26.12.2010 22:28:29
62
Бушуу, бизге, келеме деб, сормагъанды
Алгъа атлар къалмагъанды чырт къарыу
Нарт уланым, айтчы бери, не болгъанды
Тохташмагъан, бу, не затды, бу ауруу.

Айтчы бери, былай тюрлю не къыйнайды
Уулу кёзмю, шайтанмыды къыйнагъан
Сеничама, джюрек кёзю къан джылайды
Ит халиде, алай къансыйд менде джан.

Ични тартсанг, ичим мени алай тартад
Ичсиз ? тышсыз алай болад хар тангым
Эс джарлы да къара отда къара джана
Тангым кибик, джылай озад ашхамым.

Сен тирил да, бери, манга, бир къарачы
Сёзчюк айт да джюрегими бир джабхар
Сеннге кюйе татлы джашау бир бек ачы
Ёлелмейди, не сау тюлдю, ма, Сапар.
21.09.97.





63
Туугъаным а, алай анда, къумлу къачда
Къумлу белляу ёсдюрмеди ышартыб
Къайтханда да саман юйде мутхуз тангла
Кёралмадым къарт атамы мен джарыб.

Джашлыгъым да болалмады мен сюйгенча
Сюймекликден табалмады кёл ышыкъ
Экиси да джокъ болдула джау сюргенча
Ой, энди уа, халал тенгим джангызлыкъ.

Джангызлыкъ а, не затха да, тюлдю иги
Темирни да джууаш этед къанджаллай.
Кёзюуледе джылау беред тюлкю тили
Сагъыш эте болур кибик алджарлай.

Мундан ары къайдам энди не сакълайды
Джангызлыкъ бла кёбгемиди барлыгъым
Ой, билеме, джанны берген ангылайды
Намаз къыла кимге болад алгъышым
10-20.09.97.
 
 
 
#657
Джаратама0
27.12.2010 02:19:46
Ай да джокъду,къарангыды. шахарда шошду....
 
 
 
#658
Джаратама0
27.12.2010 20:55:24
64
Сакълаб турдум эшиклени кенге ачыб
Терезем да къучакъ джайыб кенгине.
Ай сакъладым гитарамы къолгъа алыб
Сени ючюн алгъыш айта Тейриме.

Эй иги къыз, былай этиб кёбню турмам
Гитарам да сакълаб турмаз адамлай
Сен кесинги уллу этиб джулдузлансанг
Джыла-джарыл, болмаз эсим бир да сай.

Кете эсенг, кете берчи сен къайтмаздан
Артда, манга, насыб болмаз къайтханынг
Мен адамма, юрен къоркъа сен Аллахдан
Шайтан джелде учмаз ючюн къадарынг.

Ай сакъладым гитарамы къолгъа алыб
Сени ючюн алгъыш айта Тейриме.
Сакълаб турдум эшиклени кенге ачыб,
Терезем да къучакъ джайыб кенгине.
27.08.97.
 
 
 
#659
Джаратама0
28.12.2010 02:20:31
Энтда былай барады....


65
Майна, анда, энтда чыкъды ариу Чолпан
Акъсыл кимит, джылтырайды ёргеде.
Башхала да, бютеу бары джулдуз богъан
Себедиле джарыкъ нюрню кёкледен.

Не эсе да, сен а, джокъса къачхы кёкде
Алгъында уа, къарай эдинг хар кече
Хайда, кёрюн, тоханангда - хауа тёрде
Сен бир джибер къарамынгы энгишге.

Тилекчиме, энтда бир чыкъ, энда кёрюн
Къайдагъынгдан айтсанг эди сен хапар
Ёмюрлюкню, энтда кёргюз, ёлмез ётюн.
Джаны джана сакълаб турад ма Сапар.

Сени кёрюб, энтда, эсим кючлю болса
Табыучумча, мен кёк сёзле табарма
Сен билесе, къууана да эмда къоркъа
Къарамынгы акъ джырла бла джасарма.
22.09.97.
 
 
 
#660
Джаратама0
28.12.2010 20:04:32
Джаз. Окъусунла.

66
Джарлыса деб, джюрегими бош эзесе
Къайтараса, ол сёзюнгю, кече ? кюн.
Болумуму, ай иги къыз, терс эслейсе
Байлыгъымы, ой эндиди, кёрюрюнг.

Хо,алайды, ачхасызма къыркъ тёртде да
Тутуб кесер мени джокъду къумурсхам
Тургъаныча, къуру сагъыш джюрекде да
Кёрюрюмю кёралмадым джуртумдан.

Кёб джерледе артха тартды гузабалыкъ
Бошбоюнлукъ, бирде, элтди аллыма
Алай, ёзге, мен джашайма энтда джарыб
Бир кёб келе ашхы умут джаныма.

Джарлыма деб, нек айтама мен кесиме
Мен да саума, ма саудула минг джырым
Сагъышларын саугъа этген миллетине
Айтырыкъды кёб турмайын айтырын.

Джарлыма деб, нек айтама мен кесиме
Кёк ташаны кёре эсем акъылын
Тылпыуундан юлюш этген хар телиге
Билиб турад джан кючюню байлыгъын.

Джарлыса деб, джюрегими бош эзесе
Къайтараса, ол сёзюнгю, кече ? кюн.
Джашырсанг да, кесекчик а, эскересе
Менден байны ётюрюкдю кёрюрюнг.

29.09.97. Къарчастан.
 
 
 
#661
Джаратама0
29.12.2010 10:45:58
67
Къачхы кёкню хар неси да кеси бетли
Шылпысы да кеси кибик бир мыдах
Сагъышлыма, джауа тургъан, о бу неди
Хар гюнахны джууа турад, ма, Аллах.

Не затха да, джан, ёлюм да къуру Олду.
Хар къурамын кеси салад масхапха
Бол дегени, сюйсе джашау, сюйсе отду
Кимни ёрге, кимни теджер ахратха.

Хауа ичде толу болуб гюнах сагъыш
Кирсиз шылпы джууа турад кирликни
Мен да джибий, эте ? эте иги алгъыш
Сыйпалайма джибкил юсюн кирпикни.

Къачхы кёкню хар неси да кеси бетли
Шылпысы да джауа турад шууулдаб.
Тохтамайын, джауа берчи, танга дери
Кёб болурча сыйсыз джерде ма сууаб.

29.09.97. Къарчастан.
 
 
 
#662
Джаратама0
29.12.2010 21:01:37
Тереннге кирме,бек теренде джарыкъ болмайды...
 
 
 
#663
Джаратама0
29.12.2010 22:09:20
Къарны кюсеген бир кёбдю,джауа берсин сора.
 
 
 
#664
Джаратама0
30.12.2010 00:17:53
Келе турад, къарчыкъ себе,
Джангы джыл таулагъа. Келе берсин.
 
 
 
#665
Джаратама0
30.12.2010 12:07:36
Шошду,Тырны Аууз тубаннга кёмюлгенди.
 
 
 
#666
Джаратама0
30.12.2010 13:01:45
68
Дуния ичде кёб айландым кёб джерледе
Аман ? иги, бир кёб болду сынамым.
Шайтан джели ачы улуй джюрегимде
Кёзюуледе джылау эди джырламым.

Санга тюбеб, джылыу табыб санга ушаш
Санга ушаш джылы болду ма юйюм
Хар кюн сайын игиликге джюрек уулаб
Алай ётед джарыкъ тангым кюндюзюм.

Джазыу болуб Къарачайгъа келин болдунг
Къуу джанымы джашил этдинг ёсюмюн
Юйюмюча, сылаб турсун кирсиз къолунг
Босагъам бла тыбыр ташны хар тюгюн.

Арбазымдан къурумасын къарач тили
Ол борчунгду, байла джаннга сен муну
Алхам къатыш алай башла хар ишинги
Алхам къатыш, алай боша джумушну.

06.10.97. Къарчастан.
 
 
 
#667
Джаратама0
30.12.2010 19:39:17
Магамет, кёлюм бла сакъладым. Кесингден бир хапар билдирмединг.
 
 
 
#668
Джаратама0
31.12.2010 11:41:16
69
Шау да этди, оу да этди мысты джазыу
Аз - буз къалдым мен асаргъа кесими
Ой энди уа барды менде кесек къарыу
Ийман болду кючлю этген эсими.

Тышым кибик, энди, ич да агъаргъанды
Табан тюбден ёргерекди джашауум
Шукур дейме, ангнгы деген джазланады
Аздан - азды, бир кёб затха, ма дауум.

Аллах айтса, мен болама джангы адам
Джангы кёз бла къарар кибик эскиге
Къарамымдан узакъ бола эски дуниям
Аз кюймезле чакъгъаныма бирсиле.

Ачылгъанма, ачылгъанды джаным керти
Учуннганма мен джарыкъгъа, джангыгъа
Джашау,-дейме,-бир онгдурчу энтда мени
Джакъ болурлай ачыгъаннга джарлыгъа

Итлени уа, джокъларма да бир кесекден
Хакъ бла бирге бёрю болуб чыгъарма
Ой, ол кюнде, кёл берир да кёк ёргеден
Хар маскени маске къабха джыйарма.

07.10.97. Къарчастан.
 
 
 
#669
Джаратама0
31.12.2010 18:32:13
Эски джыры джангы болуб джырланады

Мен джангызма ма энтда, кёресе чотну сен - ДжангаДжыл,
Сюйгеним, тенглерим а тепсей болурла бурула.
Кечеге, кесиме да, турама айта, мен эски джыр,
Джюрегим а урады, къоркъурча, бир бек къуджурла.

Кечени шошлугъу джаныма бир тынчлыкъ юлюш этмейд,
Узакъда, сюйгеним а, болур дауурда тынчлыкълы.
Тенгледен да салам бере бюгюн бири да бир келмед.
Кёл къалса да кесек, болсунлачы ала насыблы.

Сокъ гитарам мени, зынгырдат джанымы, кечени да.
Мен билеме аны, сен атмазса къауумча былай.
Чыгъайыкъ биз тангнга, алгъышлай халкъымы, элими да,
Эшталса ма Аллах ол бизни чырт къоймаз сансызлай.

Тенглерим, сюйгеним, хар бири узакъда болсала да,
Къатымдады джырым, ?Алгъышым? бек кескин джырланад.
Эркекле, тишиле джырчыны унутуб къойсала да,
Ол ёлмез алай бош, тюзлюкню мёлеги къатындад.

О Джангы джыл, сау кел, бери кир, керексиз Сен уялма,
Бир къара халыма, джырыма да иги тынгыла.
Къауумлача, мени сансыз этме, кёлню Сен булгъатма,
Алгъышла анамлай, Сен къошулчу мени джырыма.

Кечеге, кесиме да турама айта мен эски джыр,
Джюрегим а урады, къоркъурча, бир бек къуджурла.
Мен джангызма ма энтда, кёресе чотну сен Джангы Джыл,
Сюйгеним, тенглерим а тепсей болурла бурула.
 
 
 
#670
Джаратама0
01.01.2011 02:17:02
Ышар, Къууан.
 
 
 
#671
Джаратама0
01.01.2011 02:49:44
ШАТ

Къарайма да Джырчы-Назмучу болуб форумда башха адам эслемейме.
Джырчы Сымайыл бла Джырчы Сапар джетише болурла.
Келе тургъан джыл керти Джырчыланы-Назмучуланы да къууандырсын.
Сымайылны, Сапарны да китаблары чыгъыб, барыбыз да къууанайыкъ.
Сабий, къарт да ёлмесинле, джаш, къыз да насыблы болсунла, таш-агъач да тургъаныча турсун. Алгъышларынг толсунла, Сапар.
Джангы Джыл бла!
 
 
 
#672
Джаратама0
01.01.2011 02:59:42
ШАТ
Сапар, салам!)))
Джангы джыл бла алгъышлайма! Джашауунгда джырларынг бла, назмуларынг бла ненча адамгъа ненча кере эсеб болгъан эсенг, анча кере къууанчлы болсун кесинги джюрегинг! Семенов Руслан Зекерьяевични эсинге тюшюраламыса? Бывший начальник налоговой полиции, сейчас директор судебного департамента КЧР. Тюнене сени эсине тюшюре эди: "Тургъаныча турсун таш-агъач, - дегенинги да айтыб, - ооооййй, терен магъаналы уа терен магъаналы джазады," - дей эди.Ма алай, сен кесинг джукълаб эсинге келтиралмазлыкъ бир талай адам джер-джерде сени эслерине кеб тюшюредиле, бюсюреу эте, алгъышлада атынгы сагъына. Сапар, джангы джылда джангы джырла сакълайбыз сенден барыбыз да. Хаман "давай-давай" деб да тура болурбуз, кеЦхиллик алайчыгъына)), алай болса да, не этериксе, бир къауумла берирге деб джаратыладыла)), сен да аладан болгъанса - эсеб бериучюледен, насыб чачыучуладан)). Керти Чомартдан Сыйлы Аллахдан къайтсын адамлагъа этген игилигинг! Кеб джаша! Аллахны аманатында бол не заманда да!
Разылыгъымы билдире, окъуучуланы, тынгылаучуланы бири, Эльба - Сэстренка
 
 
 
#673
Джаратама0
01.01.2011 04:06:36
Салам !
Этген муратларыбызны Аллах берсин!
Алгъышларынг барыбызгъа да джетсин!
Кёб джаша,мени творчествома къайгъыргъанынг ючюн а, менден къайтмаса да, Аллахдан къайтыр!!!

Келир бу заманнга да къууанч бла джетейик!!!!!!!!!!!!!!!!!!!!!!!!!!

Басханстан. Сапар Ёзден.
 
 
 
#674
Джаратама0
01.01.2011 04:14:00
Багъалы Сестра, Джангы джылынг огъурлу болсун !
Сенича, Акъ бла Къараны ангылагъан адамыбыз кёб болса,халкъыбызгъа онг боллугъуна кишини ишеги болмаз.
Не муратынг бар эсе,Аллах аны берсин.
Джарыкъ бетде тюбешейик.

Басханстан. Сапар Ёзден.

( Къалайгъа джазаргъа билмеген эдим, ол себебли болду мычыгъаным,ансы джазаргъа деб тура эдим Сеннге )
 
 
 
#675
Джаратама0
01.01.2011 10:44:09
ШАТ
Сапар, сау бол. Аллах разы болсун. Биргелей.
 
 
 
Страницы: Пред. 1 ... 25 26 27 28 29 ... 112 След.
Читают тему (гостей: 2)

 

Написать нам

Фонд «Содействие развитию карачаево-балкарской молодежи «Эльбрусоид»

© 2003-2026 Elbrusoid.org  |  Все права защищены Законами Гор.