Войти на сайт
4 Сентября 2026 года

 

  • Баш болса, бёрк табылыр.
  • Айраннга суу къош, телиге джол бош.
  • Ханы къызы буюгъа-буюгъа киштик болду.
  • Джырчы ёлсе, джыры къалыр.
  • Къарнынг къанлынга кийирир.
  • Уясында не кёрсе, учханында аны этер.
  • Халкъны юйю – туугъан джери.
  • Насыб бютеу халкъны юлюшюдю.
  • Байма, деб да, къууанма, джарлыма, деб да, джылама.
  • Ойнаб айтсанг да, эслеб айт.
  • Танг атмайма десе да, кюн къоярыкъ тюйюлдю.
  • Игилик игилик бла сингдирилиучю затды.
  • Хазыр ашха – терен къашыкъ.
  • Сыфатында болмагъаны, суратында болмаз.
  • Чомартха Тейри да борчлуду.
  • Джашны джигитлиги сорулур, къызны джигерлиги сорулур.
  • Къыз тиширыу кеси юйюнде да къонакъды.
  • Эркишиге тары кебек танг кёрюнюр.
  • Ашда уялгъан – мухар, ишде уялгъан – хомух.
  • Сёлеш деб шай берген, тохта деб, сом берген.
  • Къонагъынгы артмагъын алма да, алгъышын ал.
  • Тешик этген тынчды, аны джамагъан къыйынды.
  • Акъылсызны джууукъгъа алма, акъыллыны кенгнге салма.
  • Бермеген къол, алмайды.
  • Джауумдан сора, кюн кюйдюрюр, ётюрюкден сора, айыб кюйдюрюр.
  • Байлыкъ адамны сокъур этер.
  • Къартны сыйын кёрмеген, къартлыгъында сыйлы болмаз.
  • От этилмеген джерден тютюн чыкъмайды.
  • Байлыкъ болгъан джерде, тынчлыкъ джокъду.
  • Таукелге нюр джауар.
  • Айран тёгюлсе, джугъусу къалыр.
  • Аш хазыр болса, иш харам болур.
  • Элде адам къалмаса, ит тахтагъа минер.
  • Атлыны ашхысы, ат тизгининден билинир
  • Узун джолну барсанг, бюгюн келирсе, къысха джолну барсанг, тамбла келирсе.
  • Чомартха хар кюн да байрамды.
  • Аз айтсам, кёб ангылагъыз.
  • Гугук кесини атын айтыб къычыргъанча, мен, мен деб нек тураса?
  • Дуния аламаты сен эсенг да, игиме деб айтма.
  • Иги бла джюрюсенг, джетерсе муратынга, аман бла джюрюсенг, къалырса уятха.
  • Иги – алгъыш этер, аман – къаргъыш этер.
  • Халкъгъа джарагъан, джарлы къалмаз.
  • Кеси юйюмде мен да ханма.
  • Таукел адам тау тешер.
  • Адамны сыфатына къарама, сёзюне къара.
  • Къартха ушагъан джаш – акъыллы, джашха ушагъан къарт – тели.
  • Джылар джаш, атасыны сакъалы бла ойнар.
  • Къазанны башы ачыкъ болса, итге уят керекди.
  • Тёгюлген тюгел джыйылмайды.
  • Ишге юренсин къоллары, халкъ бла болсун джоллары.

 

Архив Форума » Бёлюмле :: Тематические разделы » Санат бла маданият :: Искусство и культура
   RSS
Для любителей творчества Сапара Узденова....
 
#1
Джаратама0
20.05.2007 18:47:47
http://www.youtube.com/watch?v=peJl2PXCDWA
 
 
Страницы: Пред. 1 ... 27 28 29 30 31 ... 112 След.
Ответы
 
#701
Джаратама0
31.03.2011 11:44:25
Салам !

Кимле эселе да, богъанымы къатышдырыб,мени атым бла бирле бирлеге болмагъанны джазыб, кючден джарашдыртдым интернетни.
Аны юсюне да бу Тырны Ауузда бола тургъан ишле....
 
 
 
#702
Джаратама0
01.04.2011 11:18:03
Салам !

Билал, унутмагъанма, эсимдесе. Бери чыгъалмай тургъанымы магъанасын, мен айтмасам да, ангылай болурса...
Бир кесек шаушала башлагъанды...
Была келиб былайын басарча, не къыйынлыкъ бар эди былайда..
Тынчма, тынч бол !
Кесекден рахат джазарма.
Къарачайдан, алкъа, толу хапарлы тюлме. Алай а, Мухаммад ишинде тургъан хапарын эшитдим.
Эгечден туугъан, Барис Лайпан Москва джанына къайгъырма деб, билдиргенди. Къарчастан джаны бла ишим таб болса, кесим Москвагъа барлыкъ болурма.
Юйде менден Салам бер. Эсен бетли тюбешейик !

Сапар Ёзден. Басханстан.
 
 
 
#703
Джаратама0
01.04.2011 11:25:32
Тинибек къарнашха мен Салам береме.
Иги болурса,Аллах айтса. Мени да джокъду хатам.
Толу да ангыламайма, алай а, джазгъанынгы бек сюйюб окъуйма.
Айыб этмесенг энтда сорур затым барды.
Суфийле Хызргъа ( Хызыргъа ) тюберге ,аны разылыгъын табаргъа нек излейдиле, ол джаны диннге къаршчы тюлмюдю.
Заманынг болса, бу хакъдан бир зат бир джазарса.

Юйде, уллугъа-гитчеге да менден Салам бер.
Къууанчда тюбеширге Аллах болушсун !

Сапар Ёзден. Тырны Аууз. Басханстан.
 
 
 
#704
Джаратама0
01.04.2011 16:07:24
ШАТ

Алейкум салам, Сапар!
Джолну джюрюген хорлайды.
Аллах айтса, хар не да таб болур.
 
 
 
#705
Джаратама0
01.04.2011 21:51:43
Салам !

Бир кюн чыгъар бир табы, былай джазыла бир барсын.


76
Энтда бир джыл къонакъ болду ма юйюме
Тепсимде уа, аны сыйлар, джокъ джугъум.
Да, не этгин, келсенг эди сен тюшюмде
Тюбешиуню сакълар эдим джоругъун.

Чабар эди, уланчыгъы, тюнкеч джашым
Чабар эди ол къойнунга укгашха
Айтыр эдим джырларымы мен маджалын
Малкъар къыз да къарар эди суу- ашха.

Тюнюмде уа, сен кёресе, чот къалайды
Тепси юсде, хант орнуна, къагъытла
Терезени аргъы джаны агъаргъанды,
Бир ойюугъа ойюу болуб къарчыкъла.

О, къой барын, ётчю бери, олтур тёрге
Бары бошду, кёзюу эте, джырлайыкъ
Ангы кюч бла кетейик да джерден ёрге
Кёк бла бирге биз зауукъла сынайыкъ.

Джашау мунда ётюрюкдю тарджюрекди
Мунда джокъду кёк сырындан бир ышан
Биле эсенг, шо, бир айтчы, былай некди
Джашау ичи къайнай турад къайгъыдан.

Келген эсенг игилик бла, тюз нюзюр бла
Аллай иннет табармыса сен элде
Шох болсанг а къауумлача ётюрюк бла
Джанынг къанынг ой джуунмаз ма терде.

Келгенликге тазалыкъ бла тюз нюзюр бла
Кесингчаны кёрюрмюсе сен мунда
Къалгъанлача, шох болсанг а ётюрюк бла
Харам хакъынг толу болур къолунгда.

Келген эсенг, алай келгин, саулукъ чача
Тюзлюк теджей акъыллыгъа, телиге.
Ой бюгюнча,тёгюлсюнле джангы къарла
Къарач Джуртну узуну бла кенгине.

09.01.98. Къарчастан. Орта Къарачай.




77
Джашым Басханда
Кесим мен мында
Арабызда джангы джылны къарлары
Ол тёшекдеди
Бу мен этген неди
Чагъыр худжу бошламайды ма ары.

Джашым Басханда
Кесим мен мында
Тюшюмде уа мен таймайын кёреме
Алыб къолума
Къысыб къойнума
Басхан тардан Къарачайгъа ётеме.

Кючлюдю заман
Неге да ол хан
Эй, ма бир кюн, этер бизге ол оноу
Джашым аязыр
Ичким да къалыр
Бирер джерде атылмазбыз болуб оу.
10.01.98. Къарчастан.
 
 
 
#706
Джаратама0
02.04.2011 01:49:11
Салам ШАТ!

Кёпден бери кёрюнмеенг. Хош келдинг! Аллах онг берир иншаАллах.

Мен алай кёп терен билмейме. Андан мундан окуп ешиткенлерим болмаса. Суфийле Хызырга тюбегерге излегенлерин билмеем. (Хар Суфийме дегенге де ышанылыр мы, хисторияда Мюслюманланы алдатыр ючюн базы чуутлуланы Суфийме Шыйхма деп айланганлары да айтылады). ДЖанглыз Хызыр (а.с.) Аллахю теаланы сюйген кулуду деп ешиткенем, тарда калганлага джардым зат етеди деп де айтыу барды. Кур'ан-ы Керим'де Мусса (а.с.) пайгамбарла, Аллахны сюйген кулуну нёгерлигьи юсюнден хапар барды.
Кейф сура, 60-83 аятла. http://www.elbrusoid.org/content/kuran/p23424.shtm l Пайгамбарыбыз, ышангылы хадислеге кёре, ол кишини Хызыр болганын айтмыш. Аятлада Муса бла Хызыр'ны бирбирлерине тюбегенлери еки сууну бир болганы джерни Истанбул болганын айтадыла, бир каумла. Муса'ны джанында кесинден джылы гитче бири даха барды, аны да Юша (сонрадан пайгамбар болган) болганын айтадыла. Бугюн Юша пайгамбарны кабырыды деп Истанбул'да бир тауну (Бейкоз) юсюнде бир джер барды, джанглыз бу айтыу да болур.

Картларыбыздан мени ешиткеним бир айтыу: Борлакладан анамы анасы Мехмет Емин'ни кызы Мукуят, Кауказ'да болган сагьатларында гитчелигьинде джанында бир сабий нёгерибле суу (кёл) кыйырына барганды. Куандырыр ючюн кесине челекчик алмышла, ол сууга кетгенинде ызына алама деп сууга тюшкенди. Нёгери сабий (Мехмет Еминни карнашыны джашчыгьы) де коркуп нетерге билмегенди. Сонра алайлада танынмаган бир адам келип суудан чыгьарганды. Мукуятны уллу карнашы Умар джаш нёгерлерибле оюн ойнаймыш. Ол адам барып атыбла Умар деп чакырганды, егьеччигьини суудан чыгьарып келеме юйюгюзге хапар бер дегьенди. Сонра ол адам тас болуп кетмиш, екинчи кёрген болмамыш. Барганларында Мукуят башы тёбен джатып тураймыш, аузундан да суу келип. Алайла Хызыр куртарган болур деп айтмышла.

---------

Арап ДЖырджыланы, поетлени юсюнден. Пайгамбарыбызны кюнюнде Арап поетлени онглуларындан Кааб бин Зухейр болганды. Зухейр, карнашы Мюслюман болганына ачыуланып Пайгамбарызга джау болуп аны аманларга кюрешип назмула джазганды. Пайгамбарыбызны кёп кыйнаганды, бир кюн 'аны ёлтюрюгюз' дегьенди. Алайла Зухейр'ни тёгьерегьинде адам калмагьанды, херкес андан джаллаганды. Пайгамбарга менден елчи болугуз деп кимге барса, енди сен ёлдюнг, куртулушунг джокту дегьендиле. Ол да тамам мадарсыз болганында межгитге Пайгамбарыбызны (с.а.в.) кёрюрге барганды. Ёлдюрейик де кояйык дегьенлеринде, коюгуз келсин дегьенди. Санга назму джазганма, аны окурга излейме деп окуп башлаганды. Пайгамбарыбыз назмуну кёп джаратканды, бети джарык болуп, алайдакылага муну иги тынглагыз дегьенди, юсюнде болган хырканы (джамчы) алып Зухейр'ни инг башларына салганды. Андан назмуга Касиде-и Бюрде дегьендиле.

Пайгамбарыбыз аушкандан сонра, Муавие кёп ачха да берип хырканы (джамчы) сатып алып Мюслюман кралны хазинесине салырга излегенди. ДЖанглыз Зухейр унамаганды. Аушкандан сонра, мирасчыларындан ачха тёлеп алып хазинеге салгандыла. Ол хырка, бугюн Истанбул Топкапы Сарай'да Пайгамбарыбызны аманатлары (кылычлары, тамгасы ...) болган джерде турады. Мюслюман кралла уллу казауатлага чыкганларында ол хырканы сандыгьы бла биргелейлерине тюени юсюнде елтеймишле.

Назмуну макам, сёзлерин сиз поетле джырчыла даха иги англарык болурсуз. Пайгамбарны нек аллай бир кёп джаратканын. ... Арапча орижинал сёзлерибле джырланганы: http://www.youtube.com/watch?feature=player_embedd ed&v=IGft6TZxXIA

Хырканы юсюнден хапар: http://www.youtube.com/watch?v=6ns98ciNSMk&feature =player_embedded

Быягьы мен кёп джаздым ;)

Алейкюм Салам. Сиз де уллу гитче херкесге Салам айтыгыз.

ШАТ хар заман да Шат болугуз куанчла саулукла!

Аллахха аманат.
 
 
 
#707
Джаратама0
04.04.2011 00:04:15
Сеннге да, Аллах эсенлик берсин !
Игиме, Тинибек. Интернет кесек къылыкъ этди да, аны бла мычыгъанма.
Джукъ джазсанг къууаныб окъуйма, сау бол.
Билал бла сен джазгъан болмаса, уллу окъур зат да кёрмейме.
Къуру, къатын алгъан бла эрге баргъандан уллу ушакъ джокъду.
Бир тюрлю чамчыкъла этген кибикле эте...
Окъой, къууансынла- джылларыды.
Аллах буйюрса, бу эки кюнде джангы затланы джазыб саллыкъма.
Эсен бол !
Саламыбыз бирге...
 
 
 
#708
Джаратама0
04.04.2011 01:22:54
Саубол ШАТ,

Интернет кесек къылыкъ этди да, аны бла мычыгъанма. Ынтернетте болады бир бир аллайла

Елбрусоид форум игиди, миллетибизни бирлештирир, бирбиринден хапарлы етер ючюн. Кыйынлары болганла сауболсунла.

Нисан джангурлача (бугюнледе еки кюнден бери иги джангур джауады, джерле хаман джешерип калдыла) хар зат иги болур Аллах буюрса.

Саламла!
 
 
 
#709
Джаратама0
04.04.2011 13:03:59
Не да таб боллукъду.......

78
Письмо джазсанг келеменинг къурумайды
Аралыбма, сагъыш басыб, арбазгъа
Арбазда уа, санга ушаш, джукъ учмайды
Кёрген затым - къуу бутакъла эм къарла.

Тансыкъ эсем, тансыгъымы бир ангыла
Кесим къалыб, эрикгенме кесимден
Ёрге къараб сен да менлей бир тынгыла
Хар соруугъа ачыкъ джууаб Тейриден.

Ол билмеген, ол этмезлик, болмаз бир зат
Кёб джаншамай, сагъын, анга, эсинги
Кесинг къыллы, бош этме да, сен, къазауат
Андан, бир бил, тюзюнг бла терсинги.

Келмесенг а, айтыб - айтмай, не дерикме.
Алай, ёзге, джашаб турса джашчыгъым
Бир да таймай, мен, эсинге тюшерикме
Танг да атмай мылы болур джастыгъынг

Сени сакълай кетди энтда къышхы кюню
Бир кирмединг джашым къатыш арбазгъа
Джылытса да тансыкъ сагъыш мылы юйню
Мен, бу халда, чыгъармамы ма джазгъа.

Письмо джазсанг келеменинг къурумайды
Аралыбма, сагъыш басыб, арбазгъа
Арбазда уа, санга ушаш, джукъ учмайды
Кёрген затым - къуу бутакъла эм къарла.
 
 
 
#710
Джаратама0
06.04.2011 10:42:44
79
Мамучуланы Адрагъа

Адра тенгим, бу къатышхан, бу не затды
Ашхы затны алалмайбыз джашаудан.
Мундан ары аллыбызда ма джар барды
Да не къалды, биз салынсакъ алайдан.

Нарт халкъыбыз болуб барад аман бетли
Аман бет а джарашмайды таулугъа
Къайтарайыкъ биз ызына сыйлы энни
Чыгъайыкъ да сатлыкълагъа биз уугъа.

Гайгайла уа, джашайдыла, семиз болуб
Эсли болгъан, джылау эте, ачлыкъда
Бирер тели тоханагъа къушлай къонуб
Бирер алим джашау къурай тарлыкъда.

Джауубуз а бир бек кёбдю къобан ташча
Ёмюрден да, туруб тургъан, хаман, тик.
Адра тенгим, не айтайым, мундан башха
Аллах, болуш, юзюлмесин бизде джик.

17.01.98. Къарчастан. Батал Паша.
 
 
 
#711
Джаратама0
07.04.2011 03:01:46
ШАТ,
бюгюн "Карачаево-Черкесия" журналда Адраны назмуларын окъугъанем)))
 
 
 
#712
Джаратама0
07.04.2011 13:44:46
Салам !
Не зат журналды,хапарсызма.
Мадарынг болса толуракъ хапар билдир.
Унарыкъмыды, ким биледи. Адраны талай сагъышын Эльбрусоидни форумуна тюшюрюрге керек эди. Бек терен оюм этген джашды.
Рахат бол !
 
 
 
#713
Джаратама0
09.04.2011 10:47:28
Салам !

Турна Ауушда бир ариу къар джауады.
 
 
 
#714
Джаратама0
10.04.2011 14:32:33
Салам! Республиканский журнал "Карачаево-Черкесия".Адраны эки назмусу барды кетген 2010 джылгъы 2-чи номеринде,орус тилде.
 
 
 
#715
Джаратама0
16.04.2011 01:24:47
Салам, Нюрджан !

Сау бол информациянг ючюн.
Адра,керти да иги адамды,мен билиб.
Былай деб айтырча,джангылыкъ джокъду менде.
Къарчастан да тынгылайды.
Ючкёкеннге менден Салам.

Сапар Ёзден. Турна Аууш.
 
 
 
#716
Джаратама0
16.04.2011 03:38:40
Саламынг узакъ босун!!! Эртдерек Адраны гитче сборниги тюшгенеди къолума орус тилде.Керти да бек сеийр болуб окъугъанем Бек терен оюм этген джашды. АЛЛАХ айтса Къарчастандан бек иги хапар алырса!!!
 
 
 
#717
Джаратама0
16.04.2011 13:23:50
Эсен бол,Нюрджан!
Джюрегинг сюйгенлеге менден Салам !
О хо, Къарчастандан да келир бир иги хапар.
Келмесе да, чыдарбыз....


80
Олтурама, джырларыма, мен, джыр эте
Ийнардан да, кюуге тартад, этгеним
Билед Аллах, сагъышлагъа бир бек кете
Арыгъанма, джашау кибик, эследим.

Теджесем да ёзден халкъгъа ёзден джырла
Ата джуртум манга къучакъ кермеди.
Былай эте, киргенликге къыркъбеш джылгъа
Юй тюблюкге къарыш джерчик бермеди.

Сансызлыкъда къалыб кетиб кесим джангыз
Сууукъ юйде сууукъ джырны джазама
Мундан башха о не этгин къалсанг джакъсыз
Шейирме да, шынкъарт болуб, джанама.

Халкъым менден, алалмады, алыр затын
Берлигин да, бералмады джырчыгъа
Не сейирди, джауум бола халаллыгъым
Оу- шау бола, келиб кирдим къартлыкъгъа.

Билед Аллах, сагъышлагъа бир бек кете
Арыгъанма, джашау кибик, эследим.
Андан болур, къычырады джаным кёкге
Мундан табсыз, шо, неди да, этеринг.

03.02.98. Орта Къарачай. Батал Паша.
 
 
 
#718
Джаратама0
23.04.2011 00:44:53
Салам !

Алкъа хапар джокъду. Джангылыкъ болгъанлай билдирирме.
 
 
 
#719
Джаратама0
23.04.2011 01:05:53
Окъуйма, бюсюрейме жазгъанынга!!!
Бу темангы да "ЧАПРАКЪЛАНЫ БОЯУЛАРЫ КЪАЙРЫ КЕТДИ...." бардыр!
 
 
 
#720
Джаратама0
23.04.2011 13:57:26
Тура - туруб, игиси да бир келир.

81
Джашау бизге, онг бермейди, не эседа
Къолай джери кёрюнмейди джазыуну
Не затха да, ёхтем эдик ёхтемледен
Энди бизден ким сыйырды къарыууну

Айтчы бери нек онгмайбыз къалгъанлача
Рахынлыкъгъа нек ийгенди халкъ башын
Биз джаулагъа къарамайбыз джаулагъача
Чёб джелдеча нек къалтырайд ма халкъым.

Тау ийманлай тау джюрек да тасды бизден
Таулу урлукъ да нек тюшдю ташлагъа
Мен кёрмедим битим ёсюб таш юсюнде
Ташда урлукъ хазыр ашлыкъ къаргъагъа.

Джигит кюню келликмиди хар таулугъа
Алгъын заман, къайталырмы, ма бизге
Таулу бёркюн алмаш этди ма джаулукъгъа
Бёлюндюк да къауум - къауум экиге.

Бедиш болдукъ келе тургъан джаш тёлюге
Алтын халкъым сёгюш болду багъыргъа
Ой, не дербиз, джете туруб биз кёпюрге
Суубаш болдукъ шайтан кириб акъылгъа.

21.01.98. Орта Къарачай. Батал Паша.
 
 
 
#721
Джаратама0
24.04.2011 13:57:49
Салам !

Халид, бу теманы да ачдынг да, джанлаб кетдинг.
Тынчмыса,кесингден бир хапар билдирсенг кишиге заран боллукъ болмаз.

Мени да джокъду хатам, бу эки-юч кюнде,кёзюу эте, къалын джабалакъ джауады.

Къайда болсанг да, Эсен Бол!
 
 
 
#722
Джаратама0
26.04.2011 06:18:36
Билалгъа да, Тинибекге да Салам береме.

Ашыгъама, чагъарына, джалан терек
Бир къарар эд танг алада чакъгъанъа
Аллай кюнде болады да джан эслирек
Бир уллуду джазгъы сыйым Заманнга

Аллай кюнде болады да джан эслирек
Мен кесим да чакъгъанчама алмалай
Джашаууму къармайма да мен игирек
Муратланы, эй, тебрейме мен джасай.

Джашаууму къармайма да мен игирек
Къотарама джан ичинден болгъанны
Тюзлюк ишге баргъан эсем мен тигирек
Алай излейд бугъар джерле ма ангы.

Тюзлюк ишге баргъан эсем мен тигирек
Сен бир кеч деб, кёкге къараб тилейме
Муратларым болсала да къуу- эскирек
Онгсузну да, мен, чагъарын излейме.

Муратларым болсала да къуу - эскирек
Мен излейме къатмазларын замансыз
Бюгюнде да, къышхы кюнде,буду тилек
Ёлмесинле джан къышымда ала къыш.

Бюгюнде да, къышхы кюнде, буду тилек
Бир къарар эд, танг алада, чакъгъанга...
Аллай кюнде болады да джан эслирек
Бир уллуду джазгъы сыйым Заманнга

16.02.98. Къарчастан. Орта Къарачай
 
 
 
#723
Джаратама0
27.04.2011 02:00:51
Алейкюмселам ШАТ ! Саубол, Аллах разы болсун! "Биледи джер, биледи кёк. Билсин аны саулай миллет!" . Аллах кюч, сабыр, хорлам берир иншаАллах.
Талай адам чыгъарабыз дедиле да,джумуш сёзден ары бармады.

Талай адам керти кёллерибле ниет еткен болурла, калаесе де бир тыйган/тыйганла болаболур ?!!
Дюняда аманла/шайтанла да барды игиле/мелекле де барды.
Былай карасанг дюнияда болум амандан аманга барганча. Ахыр заман да дейдиле. Бир каумла даджджал барды, мехди барды зат да дейдиле. Биг бротхер, капитализм, фашизм,кефере, харпла, етдж. Буланы енг башта если адамлага "чыбыклыкта бюгюлмегенлеге" джау болганларына сёз джокту. ;)
Хорлам алда болур Аллах айтса.
Саулукла, куанчла Есен болугуз.
 
 
 
#724
Джаратама0
27.04.2011 04:00:41
Алейкум салам, Сапар!

Дуния малдан багъалыды Сёз,
Сёзюнг тёрге ётмей къалмаз.
Кёбге тёзген азгъа да тёз -
Дуния былай турмаз!
 
 
 
#725
Джаратама0
27.04.2011 22:12:48
Салам !

Аллах буйюргъан болур.
Бу кюуню былайгъа джазмай къояргъа деб тура эдим.
Китабда былай барады да,бёлмегеним иги болур дейме.
82
Къаншаубийни джыры

Арытханды ауруу, энди, сен, джылагъан да эталмай
Ма джабханса кирпик, солууунг да билинмейди чырт
Джашадынг эки джыл эй ма бир да сёзчюк сен айталмай
Болушур къарыу джокъ, ма уллу кёк да, бала, сансызд.

Припев:
Бир къарачы сен бери, бир ышарчы сабийлей
Бир джарыкъды аламатды дун ? дуния
Къыйналдынг керексизге, къыйналдынг Къаншаубийлей
Ой, сени ючюн, мен джетгенме шашаргъа.

Таулучукъса да сен белляуунг да кесингча мыдахды
Таулучукъса да сен джазыуунг да болгъанды къыйын
Келтирген дуниягъа, кетерген да къуру ма Аллахды
Энтда, тёз бир кесек, кёргюзюр аурууну къыйырын.

Припев:
Бир къарачы сен бери, бир ышарчы сабийлей
Ачыуулан да сен бир созчу къолунгу манга.
Къыйналдынг керексизге, къыйналдынг Къаншаубийлей
Ой сени ючюн мен джетгенме шашаргъа.

Сен джатаса кемсиз, кесинги теринге кёмюлгенсе
Эсинг тасды сенден, джюрекчик а урады къаты
Джашаугъа Ёлюмге да сен бирча эрши кёрюннгенсе
Алагъа уа, ма мен, сени ючюн, тюйюбме къашны.

Припев:
Къычырама тюнюмде, къычырама тюшюмде
Ой бу неди, ой бу неди бу палах
Ызгъылымды джатханчыкъ, уланымды бу джашчыкъ
Аллахыма, ой къайдады, бир узакъ.

Туралсанг аякъгъа мен сеннге дунияны танытырма
Юретирме сеннге мен отну эм бузну тиллерин
Джуртунгдан, тарихден санга ёхтемлик алдырырма
Танытырма сеннге халкъынгы бёрюсюн, итлерин.

Припев:
Къычырама тюнюмде, къычырама тюшюмде
Ой бу неди, ой бу неди бу палах
Ызгъылымды джатханчыкъ, уланымды бу джашчыкъ
Аллахыма, ой къайдады, бир узакъ.

Ма озду эки джыл ёлюмюнг кёзюнгден кёзюн алмай
Джашадынг эки джыл Джашауунг да къарай туурадан.
Ашырдынг эки джыл биринден да кери бир къачалмай
Бир къатдыр белинги, эй туугъан шойса сен таулудан.

Припев:
Къычырама тюнюмде, къычырама тюшюмде
Ой бу неди, ой бу неди бу палах
Ызгъылымды джатханчыкъ, уланымды бу джашчыкъ
Аллахыма, ой къайдады, бир узакъ.

Къарчастан. Орта Къарачай.
Джёгетей. 1998 дж.
 
 
 
Страницы: Пред. 1 ... 27 28 29 30 31 ... 112 След.
Читают тему (гостей: 10)

 

Написать нам

Фонд «Содействие развитию карачаево-балкарской молодежи «Эльбрусоид»

© 2003-2026 Elbrusoid.org  |  Все права защищены Законами Гор.