Войти на сайт
27 Июня 2026 года

 

  • Аманны эки битли тону болур, бирин сеннге кийдирир, бирин кеси киер.
  • Къуру гыбыт бек дыгъырдар.
  • Тас болгъан бычакъны сабы – алтын.
  • Кюлме джашха – келир башха.
  • Эли джокъну – кёлю джокъ.
  • Ана къойну – балагъа джандет.
  • Ауругъаннга – кийик саулукъ, джетген къызгъа – чилле джаулукъ.
  • Окъуу – билимни ачхычы, окъуу – дунияны бачхычы.
  • Чомартха хар кюн да байрамды.
  • Уллу атлама – абынырса, уллу къабма – къарылырса.
  • Алтыннга тот къонмаз.
  • Кёб къычыргъандан – къоркъма, тынч олтургъандан – къоркъ.
  • Ата Джуртча джер болмаз, туугъан элча эл болмаз.
  • Уллу къашыкъ эрин джыртар.
  • Тамбла алтындан бюгюн багъыр ашхы.
  • Къарнынг тойгъунчу аша да, белинг талгъынчы ишле.
  • Ашатыргъа иш – ашхы, ишлетирге аш – ашхы.
  • Узун джолну барсанг, бюгюн келирсе, къысха джолну барсанг, тамбла келирсе.
  • Сабийликде юретмесенг, уллу болса – тюзелмез.
  • Джюз элде джюз ёгюзюм болгъандан эсе, джюз джууугъум болсун.
  • Гугук кесини атын айтыб къычыргъанча, мен, мен деб нек тураса?
  • Аджалсыз ёлюм болмаз.
  • Чомарт бергенин айтмаз.
  • Аллахдан тилесенг, кёб тиле.
  • Ёмюрлюк шохлукъну джел элтмез.
  • Айтылгъан сёз ызына къайтмаз.
  • Хаухну атма, ёнгкючню сатма.
  • От кюйдюрген, сау болса да, тот кюйдюрген, сау болмаз.
  • Ашыкъгъанны этеги бутуна чырмалыр.
  • Кюн – узун, ёмюр – къысха.
  • «Ёгюз, джаргъа джууукъ барма, меннге джюк боллукъса», - дегенди эшек.
  • Адамны адамлыгъы къыйынлыкъда айгъакъланады.
  • Кёл – къызбай, къол – батыр.
  • Байлыкъ келсе, акъыл кетер.
  • Адамны сабийин сюйген джюреги, бычакъча, джитиди.
  • Сыфатында болмагъаны, суратында болмаз.
  • Къайтырыкъ эшигинги, къаты уруб чыкъма.
  • Дууулдаса – бал чибин, къонса – къара чибин.
  • Урунуу – насыбны анасы.
  • Ханы къызы буюгъа-буюгъа киштик болду.
  • Къарнынг къанлынга кийирир.
  • Алим болгъандан эсе, адам болгъан къыйынды.
  • Къонакъ аз олтурур, кёб сынар.
  • Ата – баланы уясы.
  • Насыблыны баласы кюн кюнден да баш болур, насыбсызны баласы, кюн кюнден да джаш болур.
  • Ата – билек, ана – джюрек!
  • Оюмсуз атлагъан, аджалсыз ёлюр.
  • Харам къарнашдан, халал тенг ашхы.
  • Тыш элде солтан болгъандан эсе, кесинги элде олтан болгъан игиди!
  • Къолунгдан къуймакъ ашатсанг да, атаны борчундан къутулмазса.

 

Архив Форума » Бёлюмле :: Тематические разделы » Санат бла маданият :: Искусство и культура
   RSS
Для любителей творчества Сапара Узденова....
 
#1
Джаратама0
20.05.2007 18:47:47
http://www.youtube.com/watch?v=peJl2PXCDWA
 
 
Страницы: Пред. 1 ... 28 29 30 31 32 ... 112 След.
Ответы
 
#726
Джаратама0
28.04.2011 02:42:16
ШАТ,
САЛАМ!!!
 
 
 
#727
Джаратама0
28.04.2011 02:54:24
Ай кёб джаша,Саламынг узакъ болсун !

Эсенме, Сиз джанына да аны теджейме.
Не таб болду келгенинг,тилегим барды.
Тил байлыгъынг джетерикди, иги эгечимча, таблыгъынга кёре бир подстрочникле этсенг а.
Талай переводчик табылгъанды,ачха зат да излемейдиле.
Микиге да бир тилеген эдим, заманы болмаз...
Башха не айтайым.
Джаз кесек мычыды,аны джарсыугъа санамасам, джокъду хатам.
Эски къагъытла бла кюрешеме.
Джангы джазгъаным да кёбдю.
Аллахгъа Шукур !
 
 
 
#728
Джаратама0
28.04.2011 02:57:39
ШАТ,

эсингде эсе талайны этиб почтанга ийгенем...аланы джаратханменг?
 
 
 
#729
Джаратама0
28.04.2011 03:11:01
Андан бери комп. талай ремонтдан ётгенди,майлда да адресим башхады. Учениклериме къаратдырайым, кесим алджарыкъма.
 
 
 
#730
Джаратама0
01.05.2011 14:20:33
Салам !


83
Джуртуму сюйдюм таулу таунуча
Къарасын агъын да махтадым
Ол а, не, кёрдю мени къауумча
Кесекге бир бермед Барагъын.

Мийикге джаяу баргъан табсызды
Джолунгу тутсанг кёкню ёрге
Джанча сан алай кючлю арыйды
Барыуунг чыдамайды кёбге.

Халкъымдан кесек кёлюм къалса да
Экибиз ма тура джан бла къан.
Джашауум шыбла отда джанса да
Джашасын Джашауча Къарчастан.

09.02.98. Орта Къарачай.
Батал Паша
 
 
 
#731
Джаратама0
01.05.2011 19:50:20
Сапар, салам!

Газетде сени юсюнгден джазылгъан статьяны къысхартылгъан кесегин былайгъа салайым. Башха джерде басмагъа барырча болса, толусу бла чыгъар.
Лайпанланы Билал

ЁЗДЕН ДЖЫРЧЫ САПАР
("Къарачайда" чыкъгъан статьяны басмаланмагъан кесеги)

***

Къуллукъ къул этген ёзденледен неда кърал бий этген къулладан тюлдю Сапар ЁЗДЕН.
Аллах эркин джаратхан насыблы къауумданды ол. Керти поэтди ? алай демек ? ёзденлик аны къанындады. Къан бла кирген а ? джан бла чыгъады джангыз.

Энчи ат къураб, Атлы болургъа фахмулары джетмеген, джаяу барыргъа уа ыйлыкъгъан мискин джанла да бардыла. Аны себебли, ала не этедиле? Арбасы болгъанны арбасына минедиле да, аны джырын джырлайдыла. Толумуду алада адамлыкъ, шайырлыкъ?

Керти поэт дуния малгъа алданныкъ, сатыллыкъ тюлдю. Хакъ сёзден келген Акъ сёздю аны Тейриси. Джангыз анга къуллукъ этеди шайыр. Андан башхалагъа баш ура тебресе, имандан чыгъады, поэзиядан кетеди: бетин, ауазын, сёзюн ? айтыргъа, кесин-ёзюн ? тас этеди.

?КЪЫЛ КЪОБУЗНУ ГЫЛ КЪОБУЗ ЭТГЕННГЕ

Къыл къобузунгу гыл къобуз этдинг сен...
Сокъурансанг да,
Ёлтюрген заманынгы артха къайтаралмазса,
Сатылгъан, джоюлгъан фахмунгу
Энди бетин чыгьаралмазса,
Джыйгъан байлыгьынгы уа ?
Джыргъа, назмугъа, макъамгъа буралмазса:
Къаядан тюл, джашаудан тюл,
Поэзиядан, Поэзиядан кетдинг сен.

Хоу,
Къыл къобузну гыл къобуз этиб къойдунг сен.
Фахму кьудретинги, ёзден бетинги джойдунг сен.
Къыл къобузну къул къобуз этдинг сен,
Иймандан чыкъдынг? Поэзиядан кетдинг сен.

Ай медет а...
Джети къат кёкден кетдинг ?
Аллах берген фахму бла
Ибилисге къуллукъ этдинг.

Хей,
Кюн къобузну кюл этген джарлы,
Джандетин джаханим этген джарлы,
Кимден да бек кесинг кюе болурса...
Джазгьанымы джылай джаздым, окъурса?.

Не этгин, ?къыл къобузну гыл къобуз этген? насыбсызла кёбден кёб бола барадыла бюгюнлюкде. ?Джашауну къыйынлыгъынданды? дерикле да болурла. Алай а, керти джырчы, назмучу кесини бетин, фахмусун аякъ тюбге атармы? Джашау къыйын эсе да,
Сапарны гитарасыны бир къылы да сыйсызлагъа сый бермей, Тюзлюкге, Эркинликге чакъыргъанлай келеди да. Аны ючюн базады былай джазаргъа Сапар:

Сыйлы халкъым, мен ёлгенде болма мыдах,
Сен ашыкъма джатдырыргъа къабыргъа.
Къарачайны бек сюйгенден алма гюнах,
Излейди деб, ёлген джырчы бир багъа.

Айтыр сёзюм бек тюрлюдю, сен тынгла,
Джашаугъача, мен айтайым акъырын.
Не кюнде да къор болайым джанынга,
Къабырда да ой сен болгъун джарыгъым.

Салыб бошаб сууукъ санны сал агъачха,
Бошай туруб къартбет молла окъууун,
Меннге кибик, айтсын сёзюн гитарагъа,
Хар къылгъа да энчи сура буюрсун.

Алты къылы басхыч болур алты кёкге,
Джетинчиге ийман кючюм чыгъарыр.
Андан ары, не керекди, халкъым, меннге?
Келлик кюнде тыйыншлы орнум табылыр.

Сыйлы халкъым, мен ёлгенде болма мыдах,
Энтда бир джаш кетеди деб джокълукъгъа.
Ийнанама, мен билеме, барды Аллах,
Шайыр джаным чыгъарыкъды джарыкъгъа.

Менделеевни чалдышында элементлеча, эртде-кеч болса да, хар фахму тыйыншлы орнун табмай къаллыкъ тюлдю. Фахмуларын бюгюн дуния малгъа ауушдургъанлагъа орун табылмазгъа да болур. Биреуню арбасына миниб, аны джырлагъандан эсе, кесинги джырынгы джырлай, джаяу баргъан иги тюлмюдю? Тюзюн айтсакъ, керти поэт къачан да джаяуду. Арба джолну бармайды ? тикни ёрге, энчи джол сала, атлайды ол. Джалан башды, джалан аякъды кеси да. Джер Кёкге, Кёк да джерге аны джалан джаныны ичи бла ётедиле.

Танг алада Алам джарыкъ
Киреди да тёппеден,
Кюн батханда Ингир болуб ?
Алай чыгъад кёзледен.

Ингирликде Къара кече
Киреди да кёзлеге,
Эртденликде кириб кетед
Табанымдан тюз джерге.

Сейирмеми ? Шыйыхлыкъдан
Джукъ бармыды кёлюмде?
Шайырмамы ? джашау джарыкъ
Келе туруб ёлюмден?

Ата джуртуна намазлыкъгъача киреди Сапар. Ана тилинде айтылгъан къанатлы сёзю аны ёрге тартыб барады. Тёнгеги джети къат джерни, джюреги джети къат кёкню сезгенлей джашайды поэт.

Ташайды аргъы джаннга,
Кетди Ай кёзден.
Булгъанды къара къаннга
Бютеу кёрюннген.

Алай а, ма чынг башда,
Тёрюнде Кёкню,
Ачылса булут ара,
Кёреме Кёзню.

Ол КЁЗНЮ кёрюр ючюн, фахмуну да ЁЗДЕН кёзю, САПАР кёзю болургъа керекди. Ёзге, аллай керамат - окъуучулада, джазыучулада да бек аз адамгъа бериледи. Бизни поэзияда аллай насыб берилген адам ? ЁЗДЕНланы САПАРды.
 
 
 
#732
Джаратама0
02.05.2011 02:56:06
Sabr,сейр мен окъумай къалгъанма бу статьяны...сау бол...
 
 
 
#733
Джаратама0
02.05.2011 16:18:29
Nurgan
сейр мен окъумай къалгъанма бу статьяны...сау бол...

http://www.elbrusoid.org/phorum/index.php?action=v thread&forum=22&topic=13090
ЁЗДЕН ДЖЫРЧЫ САПАР
(?Къарачай? газет, 2010 джыл, июлну 24, ?58)
 
 
 
#734
Джаратама0
03.05.2011 14:16:47
Джуртум - джуртумду, сюймезге да ишим джокъду.

К ъ ы з ы л т а н г д а А т а д ж у р т у м д а
01
Джатады арыгъан башым анамы джумушакъ джастыгъында
къызыл тангда, Ата джуртумда.
Ол сылайды сагъышладан согъулгъан узун къоллары бла
анамы бу джастыкъгъа тёкген джыламукъларыны къызылын
къарасын, агъын да, морунда.
Ачыкъ бола келиб мутхузгъа бурулгъан тюшлерин
Мен гитче заманымда бек сюйген, мени ёсдюрген ана
Ёшюнлени джылыуларын.
Анам мени таба тургъан сагъатда ачы къычырыгъыны
къычырыкъдан толу кёзлерин.
Аны менге этген ай джарыкъгъа ушагъан, джылы
белляуларыны джаякъларын.
Эринлеримден акъгъан чыммакъ акъ сютюню тылпыуун,
Сютюню акъ джанын.
Мени тар къарангы къарындан акъ джашаугъа чыгъаргъан
алтынкёз Къачны узунлугъун ? кенглигин, мийиклигин-
теренлигин.
Мени кёкге - кёкге быргъагъан ата къарнашларымы деу
къолларыны берчлерин
Мени кёрюрге келгенлени аякъларын, аякъ басхан ызларын.
Мени эсими алгъан къара булутлу кёкню сабий джю-
регими биринчи кере гюрюлдетген ачы гюрюлдеуюн.
Арыгъан башым гюрюлдейди, джастыкъдан чемелтаякъ
айланыргъа хазырды. Алай а анамы джастыгъы башьмы
джыгъылырын сюймейди: " Къоркъма-къоркъма,
бу джашауду" - деб башымы кесине къысады.
Джатады узакъдан келген, къууанчны-бушууну эгечни -
къарнашныча билген таукъан башым анамы тюкджан джас -
тыгъында къызыл тангда Ата джуртумда.
Ол сылайды сагъышладан согъулгъан узун къоллары
бла къумлада къалгъан сабий джылларымы.
Биринчи атлам этген сагъатымда джерни дыгъысын
кётюралмагъан джалан аякъларымы.
Атамы биринчи кере айтхан сёзлерини сейир макъам-
ларын, аланы джюрегиме тие озгъан къанатларын.
Аккамы ол мени кекге атыучу гемуда тобукъларыны
юслерин.
Аны ол меннге атагъан джылауукъ къозусуну хырза-
лы мангылайчыгъын.
Аммамы ол джыйырыкъ бетинде къачхы кёзлерини
джазгъы къарамларын, аны айраныны акъ татыуун,
ауаргъа эртде хазыр болгъан къарт къабыргъагъа
-2-
тиреулюкге къалгъан чал намазлыгъын.
Аккамы, Аммамы къабыр ичинде джер бетли болгъан
джарыкъ кёрюрге термилген этсиз сюеклерин.
Къарачайны кёгюнде турнала бла къушла тауушлары
бла этген салынмакъ джолланы.
Не къарт не джаш бола билмеген таулуну сагъы -
шын ангылагъан шам тауларымы.
Аланы дорданларында, къая ыранларында балалары
бла ойнай тургъан шайтан джеллени.
Узакълада поезд чархланы тауушларына кёмюлген
джыр ауазларымы.
Аулакълада къалгъан мыдах тангларымы джыламукъ
кёзлерин, алача анда къадгъан айлы кечелерими
кюлген тауушларын.
Суукъ джерледе джалан аякъ айланнган къарыусуз
тюнлерими, аланы кеслерине эрле этерге излеб ай -
ланнган джелбаш тюшлерими.
Мени эркелетген сепгилджюрек къызланы боялгъан
чачларыны сюймеклик ийислерин.
Мени ёлюрюмю излегенлени мыйыларыны букъула-
рын, джашарымы сюйгенлени туздамларын,
мангылайларындан акъгъан терлерин.
Мени къабырлагъа алыб баргъан тенглерими мы -
дах атламларын, терен сагъьшларыны толкъунларын.
Кеб ёмюрлени, киши тиймесин деб. къабырыма къа -
раууллукъ этерик, кеси да ёлюрге аз-буз къал -
гъан джанбаш сын ташымы дугъур юсюн.
Къабыр къарангыгъа ёмюрлюк бала болгъан сюек
башымы, аны къутукъ ичини ийисли хауасыны шошлугъун.
Анга джастыкълыкъ этген Къарачай топракъны бу-
рунун да, бюгюнюн да, келлик заманын да.
Арыгъан башым гюрюлдейди, джастыкъдан чёмелтаякъ
айланыргъа хазырда. Алай а анамы джастыгъы башы-
мы джыгъылырын сюймейди: " Къоркъма-къоркъма, бу
джашауду,"- деб башымы кесине къысады.
Джатады арыгъан башым анамы джумушакъ джасты -
гъында къызыл тангда, Ата джуртумда.
Джуртдан кете башласанг да, адамны джурт сюерге юрет деб юретдинг
Джылай турсанг да, адамны кюлюрге юрет деб юретдинг.
Джыгъыла барсанг да, адамны тургъузургъа юрет деб юретдинг.
Къабыр къаза турсанг да, адамны юй тюб къазаргъа юрет деб юретдинг.
Ёлюб башласанг да. Адамны джашаргъа юрет деб юретдинг.
Сау бол, Ата джуртум!!!
 
 
 
#735
Джаратама0
04.05.2011 20:21:12
Салам !


Бюгюн да кюн джылыды.
Сыртлыкъла кёгере башлагъандыла.
Мени да джокъду хатам.
Аллахгъа Шукур, Джашау алгъады..
 
 
 
#736
Джаратама0
05.05.2011 15:38:26
Саламынг узакъ болсун,Билал!
Джазгъанларынгы бир джерге джыяргъа кюрешеме.
Иги болурса,мени да джокъду хатам,эсиме джукъ келсе бир затла джазама.
Кёбюсюне, эски затларым бла кюрешеме.
Юйде Салам бер менден.

Китабны баргъаны былайды:

84
Джашауума, сени ючюн, салам бере,
Аджыраудан кери болуб тюш бла тюн,
Шаркъгъа кибик, батышха да эсни кере,
Къууанч халда озуб барад ёмюрюм.

Сюйемеми, сюймеймеми Кёкге бир сор.
Айыб тюлдю, сен джер бла да бир соруш.
Сенге - менге ой болмасын насыб мухол.
Кенг учмасын, табар бизде ол къонуш.

Айлансам да бир ? бирледе мен булутда
Сен, барса да, хар не зат да, аламат.
Инджи къызы, къуру сенсе умутумда -
Къара кёкде, кёзбау джулдуз, агъарад.

08.02.98. Орта Къарачай.
Джёгетей Аягъы
 
 
 
#737
Джаратама0
06.05.2011 14:03:15
85
Манга, бир къара да. бери.
Айтчы, тюзюн болумну
Дуниям къатышхынчы мени,
Уялмай, узат къолунгу.

Начасмамы, айт алайын.
Адам эсем, кюлме кенгден.
Излейсе да, мен айтайым,
Ненгди артыкъ ма менден.

Безиме, къозума мени.
Тюл шойма мен балачыкъ.
Артыкъ эсем, сюрчю мени.
Эт, араны, сен ачыкъ.

Юшютме да бер джылыууну.
Алгъынча бир бол сюйюмлю.
Балдан, сен айыр да тузну.
Этчи, нюрлю - юйюмю.

Сюйеме, къара, алгъындача
Эшит сёзюмю, бол джангы.
Сен да менлей къайгъылан да,
Къошчу, джаннга джанынгы.

09.02.98. Къарчастан.
 
 
 
#738
Джаратама0
09.05.2011 03:33:53
Салам !

Баргъаны былайды,бара берсинчи,бир Аллах айтхан болур.


86

Хаман да, былай болуб, турмаз
Бир кюн сен кетерсе биреуге
Ой, аны ючюн кюн да тутулмаз
Ай да, джабышмаз келиб джерге.

Мен да, кёмюлмезме тереннге
Учуб, мен, болмазма кёгюрчюн
Ол кюнде да къулма Тейриме
Бюгюнча сыйларма мен кёгюн

Хаман да былай болуб турмаз
Бир кюн мен алырма башханы
Ой аны ючюн ай да тутулмаз
Сен да ма тюймезсе къашланы.

Сен да, ма, тюймезсе къашланы,
Джокъча мен сени джюрегингде,
Бюгюнню, къалмаз да, хар заты,
Ой джашарбыз биз бирер джерде.

Хаман да, былай болуб, турмаз.
Бошалыр, арыр да, джарсыуум,
Эс турса, сени чырт къурутмаз,
Кенг - узакъ этсе да джазыуум.

Къарчастан. 11.02.98.
 
 
 
#739
Джаратама0
11.05.2011 17:30:31
Салам !
Былайыракъ барсын.

87

Сен меннге татлыса джашауумча
Асмагъым, бешик белляу да- сен.
Кёр, мени, адам бетли, саунуча,
Ий меннге салам сюймекликден.

Намысынг къардан эсе акъсылды.
Къууанчлай, бир табды кюлюмюнг.
Сезиминг кёкге да бир джайыкъды.
Кёзлеринг билелле кёрюрюн.

Иннетинг чууакъды тауда тангча,
Атламынг сабырды эм таукел.
Сыпатынг, ой тюз да, ма маралча
Чайкъала, эки джанына, бел.

Дарманымса эмда аурууумса,
Кеч мени, сюеме бир кемсиз.
Тууаргъа- ёлге да сен чурумса.
Айт манга, о кимме мен сенсиз.

Къарчастан. Орта Къарачай.
Джёгетей. 12.02.98.
 
 
 
#740
Джаратама0
17.05.2011 11:48:23
Салам !

Кюн аязыды, ариу эртден. Къыр керти да тышланды. Кёк алай тазады, алай тазады, шыбырдамай ариу айтсанг да боллукъду.
Аламат.

Басханстан.
 
 
 
#741
Джаратама0
17.05.2011 12:27:16
EL-HALED

Салам Алейкум !
Алан,къайдаса ? Хапарынгы сорама,киши тынчлыкълы джууаб бермейди.
Анда- мында, кёрюне да бир тур.
Эсен болурса деб,ышанама.

Сапар Ёзден. Басханстан.
 
 
 
#742
Джаратама0
17.05.2011 12:52:32
ШАТ
Я получила книгу на почту читаю в захлеб
 
 
 
#743
Джаратама0
17.05.2011 13:01:37
мики


Иги эгечимча,энтда талай китабны иерикме,аланы бир джерге джыя бир бар.
Юйде уллугъа-гитчеге да Салам !

Тохта кетиб къалма...

Бу Джазгъы саугъам болсун.

443 ? 278

Кёз кёреди бир кёб затны;
Джарыгъын тангны.
Джарый келген кюн таякъны.
Акълыгъын къарны.

Кёз кёреди бир кёб затны;
Кёкню къалынын.
Ёсе тургъан джашил хансны,
Къачны сарысын.

Кёз кёреди бир кёб затны;
Сынны ? учханны.
Бешик юс бла сал агъачны.
Къууну ? чакъгъанны.

Кёз кёреди бир кёб затны;
Нюрюн дунияны.
Керпеслигин кюн бла айны.
Ичин Къуранны.

Насыб дерге, ой чынг башда,
Кёргенди ? Насыб.
Сый бермейбиз сыйлы затха.
Уллуду айыб.

18.08.05.

Сапар Ёзден.
Басханстан.
 
 
 
#744
Джаратама0
18.05.2011 12:10:32
Салам !

Эсенлик излейме барынга да !

88
Сен джазгъаса мен а ой къачхама
Сен менден эй мен сенден узакъ
Сен алгъаса, мен а, тюз артгъама
Мен мылы, о сен а бир къургъакъ.

Джазыуула эки джары баралла
Шо, не дейим, алай эсе къадар.
Хар кимден неден да арыгъынма
Бир ишим болалмады маджал.

Хар кимден неден да арыгъанма
Не аз да, ой сен эдинг, кючюм
Ма, къара, сабийча, тарыгъама
Къууанчдан ташады ёмюрюм.

Ма, къара, сабийча, тарыгъама
Кечеде, турама, мен къымсыз
Ой, бездим, къоба да - абына да
Саума мен алай а джан джырсыз.

Ой, бездим, къоба да - абына да
Сагъышым чыгъалмайды кёкге
Эрикдим, отда да, джалында да
Базгъаным да азды ёргеге.

Сен алгъаса, мен а, тюз артхама
Мен мылы,о сен а бир къургъакъ.
Сен джазгъаса, мен а ой къачхама
Сен менден, эй мен сенден узакъ.

Къарчастан.
Орта Къарач.12.02.90.


Басханстан.
 
 
 
#745
Джаратама0
19.05.2011 13:40:20
Салам !

Китабны барлыгъы былайды,бара берсин.


89
Бу джерге, бек болма къайгъылы.
Кёк бла тюлдю,тенгим къадарынг.
Джыр джурту - мийикди асыры,
Булгъаныр кёлюнг къой атламынг.

Джыр джурту - мийикди асыры.
Сен, менлей, тёзмессе былайда
Былайда сагъыш тубан къалын.
Джокъду той айтылмайд орайда.

Былайда сагъыш тубан къалын.
Джан солур кёрюнмейди бир зат.
Ач да, токъ да болмайды ангынг,
Джокъ мунда алгъыш эмда налат.

Ач да, токъ да болмайды ангынг.
Джер турмуш башхады ма мундан.
Тасды эсингден къууанч къайгъы,
Бу джери узакъды таурухдан.

Тасды эсингден къууанч, къайгъы.
Бил, аны, аны ючюн, къоркъун.
Джашаудан башхады былайы.
Джокъду сора бу джерде орнунг.

Джашаудан башхады былайы,
Булгъаныр кёлюнг къой атламынг.
Джыр джурту мийикди асыры,
Кёк бла тюлдю,тенгим, къадарынг.

14.02.98. Къарчастан.
Орта Джёгетей.
Сапар Ёзден.
 
 
 
#746
Джаратама0
19.05.2011 15:15:50

Поезия - Дшашау да тюлдю, Ёлюм да тюлдю. Ол - Ёмюрлюкню кесиди. Кёз кёргенден башха,таша-зибил джерлери кёбдю,алайын къуру ангы кёреди. Айхай, хар бир ангы да кёрюб бармайды алайын. Аны кёрген да,сезимин таб-къысха айтырга керекди. Хар магананы ичинде да минг магана барды. ...(Сапар Ёзден)
 
 
 
#747
Джаратама0
21.05.2011 01:08:50
Салам !
Нальчикге,ЭЛЬБРУСОЙДни Байрамына барыб, эски шохларыма да тюбеб,къууаныб къайтдым.
Байрамны бардыргъанлагъа Аллах эсенлик берсин, нени да ариу-таб этдиле.
АПЕРИМ ЭЛЬБРУСОЙДни Нальчикде бёлюмюне!!!!!!!!!!!!!!!!!!!!!!!!!!!!!!!!
Аны юсюнден кесекден рахат джазарма.
 
 
 
#748
Джаратама0
21.05.2011 15:17:27
Эсинге келгенни айтыб барыргъы болмаса да,бу сагъышны уа, айтмай, къаяргъа боламыды.

Былай эте айныб да кетербиз,халкъ сезим да шатланыр.

Китабны баргъаны былайды.

90
Келсенг бери,
Сен кёрюрсе, джашагъаным кимле бла.
Дуниям мени,
Кетиб барад, джаншау эте, джинле бла.

Къарайма да,
Джёнгер дерча, мени джокъду адамым
Санайма да,
Тенгден эсе, джауум болур - асламы.

Къауумлары,
Я Аллахым, ант этселе,- ачха бла.
Таулуланы,
Бирсилери, тенглик тутуб, начас бла.

Нарт юзюгю,
Атханды да, дунисындан нартлыкъны
Аны ючюнд
Джоюб барад сыйлы юзюк халкълыгъын.

Муну кёре
Ёсе барад, бу шат джуртха, джарсыуум.
Кюйе ? ёле
Дамсыз бола, суууб барад, джашауум.

Дуниям мени,
Кетиб барад, джаншау эте, джинле бла.
Келсенг бери,
Сен кёрюрсе, джашагъаным кимле бла.

Къарчастан.
Орта Къарачай.14.02.98.

Сапар Ёзден. Басханстан. Турна Аууш.
 
 
 
#749
Джаратама0
21.05.2011 19:55:26
ШАТ
Нальчикге,ЭЛЬБРУСОЙДни Байрамына барыб, эски шохларыма да тюбеб,къууаныб къайтдым
Салам, Сапар!
Эшитген эдик ол хапарны. Эшитиб, Нальчикдегилеге бек кезюбюз къарады. Бизни да барыбызны беккезюбюз къарай эди сени джырлагъанынга да тынгыларгъа, кесинги да керюрге, назмуларынга да тынгыларгъа, тюз ушакъ да этерге. Бек кеб адамны, къартны, джашны да, джюреклеринн къууандыраса. Аллах къууанчдырсын сени).
 
 
 
#750
Джаратама0
22.05.2011 00:42:43
Сэстренка

Сау бол,этген алгъышларынг барыбызгъа да джетсин!

Аллах буйюрса, къууанчалыны биринде,Сизге да джырларма.
 
 
 
#
Джаратама0
 
 
 
Страницы: Пред. 1 ... 28 29 30 31 32 ... 112 След.
Читают тему (гостей: 11)

 

Написать нам

Фонд «Содействие развитию карачаево-балкарской молодежи «Эльбрусоид»

© 2003-2026 Elbrusoid.org  |  Все права защищены Законами Гор.