Войти на сайт
27 Июня 2026 года

 

  • Тойгъа барсанг, тоюб бар, эски тонунгу къоюб бар.
  • Ачыу алгъа келсе, акъыл артха къалады.
  • Ойнай-ойнай кёз чыгъар.
  • Джолунга кёре – джюрюшюнг, джагъанга кёре – юлюшюнг.
  • Къызын тута билмеген, тул этер, джашын тута билмеген, къул этер.
  • Уруну арты – къуру.
  • Чомартны къолун джокълукъ байлар.
  • Билим ат болуб да чабар, къуш болуб да учар.
  • Джюрекге ариу – кёзге да ариу.
  • Эки къатын алгъан – эки ташны ортасына башын салгъан.
  • Къатын байлыкъны сюер, эр саулукъну сюер.
  • Башы джабылгъан челекге, кир тюшмез.
  • Окъугъан озар, окъумагъан тозар.
  • Билимли ёлмез, билимсиз кёрмез.
  • Башланнган иш битер, къымылдагъан тиш тюшер.
  • Къонакъ хазыр болгъанлыкъгъа, къонакъбай хазыр тюлдю.
  • Ишлегенден, къарагъан уста.
  • Билимден уллу байлыкъ джокъду.
  • Таула не мийик болсала да, аууш табылыр.
  • Эл тойса, тоймагъан, эл къойса, къоймагъан.
  • «Ёгюз, джаргъа джууукъ барма, меннге джюк боллукъса», - дегенди эшек.
  • Оюмсуз атлагъан, аджалсыз ёлюр.
  • Этни бети бла шорпасы.
  • Тамырсыз терекге таянма – джыгъылырса.
  • Джырчы джырчыгъа – къарнаш.
  • Суу кетер, таш къалыр.
  • Ауругъаннга – кийик саулукъ, джетген къызгъа – чилле джаулукъ.
  • Сууда джау джокъ, кёб сёзде магъана джокъ.
  • Джетген къыз джерли эшекни танымаз.
  • Ёнгкюч къууана барыр, джылай келир.
  • Сютден ауузу кюйген, суугъа юфгюре эди.
  • Эм ашхы къайын ана мамукъ бла башынгы тешер.
  • Уллу сёлешме да, уллу къаб.
  • Рысхысына кёре, джаш ёсер, къышлыгъына кёре, мал ёсер.
  • Кёз – сюйген джерде, къол – ауругъан джерде.
  • Тойну къарнашы – харс, джырны къарнашы – эжиу.
  • Игиге айтсанг – билир, аманнга айтсанг – кюлюр.
  • Кёзю сокъурдан – къоркъма, кёлю сокъурдан – къоркъ.
  • Ач отунчуну ачыуу – бурнунда.
  • Бир абыннган – минг сюрюнюр.
  • Бети – къучакълар, джюреги – бычакълар.
  • Юйлю уругъа ит чабмаз.
  • Къызгъанчдан ычхыныр, мухардан ычхынмаз.
  • Кийиминг бла танылма, адамлыкъ бла таныл.
  • Хар сёзню орну барды.
  • Кийимни бир кюнню аясанг, минг кюннге джарар.
  • Бек ашыкъгъан меннге джетсин, дегенди аракъы.
  • Эринчекни аурууу – кёб.
  • Асхат ашлыкъ сата, юйдегиси ачдан къата.
  • Тойгъан джерге джети къайт.

 

Архив Форума » Бёлюмле :: Тематические разделы » Санат бла маданият :: Искусство и культура
   RSS
Для любителей творчества Сапара Узденова....
 
#1
Джаратама0
20.05.2007 18:47:47
http://www.youtube.com/watch?v=peJl2PXCDWA
 
 
Страницы: Пред. 1 ... 39 40 41 42 43 ... 112 След.
Ответы
 
#1001
Джаратама0
12.09.2011 01:19:36
ШАТ
Салам алейкум!

Сени былайда болгъанынгы эслегенме да, кёлюме келген талай зат:
1.Басмагъа хазырланнган китабынгы толусу бла - форумда бир джангы тема ачыб, салсакъ къалай болур? Окъурукъ окъусун. Билсинле керти назмула къаллай болгъанларын. "Бу халкъыбызгъа, культурабызгъа керекди, муну созуб турмай, басмагъа берирге керекди" дерик бир адам да чыгъар - бардыла да литературадан да хапарлары болгъан, болушургъа да къолларындан келген къарачайлыла.
2.Саша айтханча, аны 2-3 бёлюмге бёлген бек къыйын боллукъду - назмула темаларына кёре салынмагъандыла. Аллындан алай салынсала эди - джырла бир джерге, табигъатлыла бир джерге, сюймекликлиле бир джерге, ачы назмула бир джерге. Алай болмагъандан ары (джангыдан къурайма десенг а - бары къатышырыкъды), башха тюрлю этерге керек болур...
3.Сени "намазлыкъ Ата джуртду" деб айтылгъан бир назмунг бар эди, бир башха назмунгда да, назму - Кёкге ачылгъан терезе болгъаны айтыла эди. Менден эсе кесинг иги эскерликсе - аланы номерлерин манга бир ий...
 
 
 
#1002
Джаратама0
12.09.2011 01:46:59
ШАТ

4.Сени бир назмунг барды: Кёкню алты къатына гитарангы алты къылы чыгъарыр, джетинчиге уа - иман.
Китабны 7 кесекге юлешсенг: биринчи бёлюмде гитараны бир къылы юсюнде бир джазыу бла (назму тизгин дейик); экинчи бёлюмде гитараны экинчи къылы - анда да бир башха джазыу. Алай эте, алтынчы къыл бошалады, аны ызындан а - джетинчи бёлюм: алайда иманны графически кёргюзтюрге керекди, юсюнде да бир джазыу бла. Айтыргъа, бир художник-график керекди. Ким биледи, Атаев эталырмы?
Алай бла китабны бёлюмлери сени рухунгу Кёкге чыгъыб баргъанын кёргюзтюрге керекдиле - Джангы Джёгетейден Эски Джетегейлиге дери. Сагъыш эт.
 
 
 
#1003
Джаратама0
13.09.2011 12:50:29
Sabr;

ШАТ
Салам алейкум!

Сени былайда болгъанынгы эслегенме да, кёлюме келген талай зат:
1.Басмагъа хазырланнган китабынгы толусу бла - форумда бир джангы тема ачыб, салсакъ къалай болур? Окъурукъ окъусун. Билсинле керти назмула къаллай болгъанларын. "Бу халкъыбызгъа, культурабызгъа керекди, муну созуб турмай, басмагъа берирге керекди" дерик бир адам да чыгъар - бардыла да литературадан да хапарлары болгъан, болушургъа да къолларындан келген къарачайлыла.

Салам, Билал !

Китаблыкъны былайгъа салсакъ ушагъыусуз болур. Болушурукъ адам болса, кёрмейми турады.....
 
 
 
#1004
Джаратама0
13.09.2011 21:01:10
Sabr ;

ШАТ

4.Сени бир назмунг барды: Кёкню алты къатына гитарангы алты къылы чыгъарыр, джетинчиге уа - иман.
Китабны 7 кесекге юлешсенг: биринчи бёлюмде гитараны бир къылы юсюнде бир джазыу бла (назму тизгин дейик); экинчи бёлюмде гитараны экинчи къылы - анда да бир башха джазыу. Алай эте, алтынчы къыл бошалады, аны ызындан а - джетинчи бёлюм: алайда иманны графически кёргюзтюрге керекди, юсюнде да бир джазыу бла. Айтыргъа, бир художник-график керекди. Ким биледи, Атаев эталырмы?
Алай бла китабны бёлюмлери сени рухунгу Кёкге чыгъыб баргъанын кёргюзтюрге керекдиле - Джангы Джёгетейден Эски Джетегейлиге дери. Сагъыш эт.

Билал, не аламат оюм айтдынг, керти, мен сюйгенча, китаб боллукъ эди алай болса.
Ёска да эталлыкъ эди, аны бла уа эртдеден бери тюбешмегенме, хапарсызма..
Этеме десе, Айнар бек таб этерик эди.
Сашагъа, Айнаргъа да ий- деген эдим вёрстканы..
Айнаргъа бир айтайым...

Саулукъ - Эсенлик.

Сапар Ёз. Турна Аууш.
 
 
 
#1005
Джаратама0
13.09.2011 21:57:35
* * *
33

Кече кюндюзюм
Кечедеди зауукъ келиу джаныма
Кюндюз а тюшюм
Айланады джарлы джаным абына

Кече нёгерим
Терсни тюзню айта билед ачыкъдан
Кюндюз эгерим
Тенгни-джауну сюрюб иед къатымдан

Некме былай деб
Соргъанлыкъгъа мен таймаздан кесиме
Турчу алай деб
Ауаз келед башха кёкден эсиме

Кюндюз кечемди
Андан болур кюн болгъанды ауана
Кечем кемемди
Джашау толкъун истем тюлдю ай анга

Некме былай деб
Тюшюмде да мен сорама кесиме
Джырчы алайд деб
Ауаз келед башха кёкден эсиме.

28.09.01.
 
 
 
#1006
Джаратама0
13.09.2011 22:42:59
Кюндюз а тюшюм
Айланады джарлы джаным абына
 
 
 
#1007
Джаратама0
14.09.2011 05:34:47
ШАТ

***

Кече - кюндюзюм:
Кечедеди зауукъ келиу джаныма.
Кюндюз а - тюшюм:
Айланады джарлы джаным абына.

Кече - нёгерим:
Терсни тюзню айта билед ачыкъдан.
Кюндюз - эгерим:
Тенгни-джауну сюрюб иед къатымдан.

"Некме былай?"- деб,
Соргъанлыкъгъа мен таймаздан кесиме,
"Турчу алай",- деб,
Ауаз келед башха кёкден эсиме.

Кюндюз - кечемди:
Андан болур - кюн болгъанды ауана.
Кечем - кемемди:
Джашау толкъун истем тюлдю ай анга.

"Некме былай?- деб,
Тюшюмде да мен сорама кесиме.
"Джырчы алайд",- деб,
Ауаз келед башха кёкден эсиме.

Хар назмунгу юсюнден бирер китаб джазарчады. Аллай бир тинтиучю, сапаровед да чыгъар. Ишек джокъду.
 
 
 
#1008
Джаратама0
18.09.2011 07:05:45
Bilal LAYPAN

КЪАДАУ ТАШДА КЪЫЛ КЪОБУЗ
Ёзденланы Сапаргъа ? Джырчыгъа

Суу джанында Къадау Ташда,
Кесилген Джангыз Терекни къатында,
Кимден эсе да къалыб кетген
Зынгырдайды къыл къобуз.

Кюнде джылтыраб кеси да,
Къаматады кёзюмю.
Аны сокъгъан кюн таякъды,
Кюн таякъны тутхан къол а ?
Кёрюнмейди ? Кёкдеди.

Кюн, булутха кирсе да,
Ол зынгырдайд тохтамай.
Къачхы аязны джазгъы къолу
Сылайд аны аяулу.

Бюгюн а къыл къобузда
Мен кёрдюм илячинни:
Огъесе,
О́л ? къанатлана́ тургъан ?
Къыл къобузну джанымед?

Къадау ташны юсюнде
Зынгырдайды къыл къобуз.
Зынгырдайды тауушсуз,
Алай а, эшитеме мен.

Нени эшитеме мен:
Джангыз Терекни джырын, кюуюн да;
Минг джылны тынгылаб тургъан,
Кёб палахны сынаб, чыдаб,
Ичинден, тышындан да кюйюб,
Къаралыб, къатыб тургъан,
Къадау Ташны ауазын, сёзюн да.

Къыл къобузну согъады табигъат:
Тынгылайма Къадау Ташха, Джангыз Терекге.
Саугъа, ёлгеннге да тынгылайма,
Туру, таша дуниягъа да тынгылайма,
Эки дуниягъа да тынгылайма,
Ангыларгъа кюрешеме Кёкню, джерни да.

Зынгырдайды къыл къобуз тохтаусуз.
Къыллары асры къызгъандан,
От тиллеге ушайдыла бир-бирде.
Алагъа суу тамчыларын чача да, сууута,
Къыл къобузну суусабын да кесе,
Кетиб барады Къобан да тохтаусуз.

Ата джуртду джюрекни ашы:
Къобанны
Ичеме сууун, джалайма ташын.
Къыл къобуз зынгырдайды, уята эсими.
Кетиб баргъан Къобан сууда,
Тохтаб тургъан Къадау ташда,
Кесилген Джангыз Терекде да
Кёреме кесими.

Къыл къобуз а зынгырдайды.
Кёкдемид, джердемид ? къайдады ?
Билмейме, аны иеси.
Кимди иеси ? аны да билмейме.

Бир-бирде къулагъыма
Таныш джер макъам, сёз да келеди:
?Тауларыбыз тебмесинле,
Къартларыбыз ёлмесинле,
Тургъаныча турсун Таш, Агъач?.

Кёбюсю уа,
Джети къат Кёкден эне келген,
Дуния энди эшитирик
Макъамладыла, Сёзледиле.

Къыл къобузну къылларына тийиб,
Аланы зынгырдатыб, тиллендириб,
Дунияны тёрт джанына чачылгъан
Ол джарыкъны
Къалай эслемейсиз сиз?
Къадер кечени джарыгъыча бир затды ол.

Къадау Ташны юсюнде зынгырдай тургъан къыл къобуз.
Аны тауушу Ауалгъа, Ахыргъа да джетиб,
Къалюбаладан, Ахырзамандан да айтады хапар.

Таш бла Терекден, Джер бла Кёкдендиле
Ёзю, бети, макъамы, сёзю да къыл къобузну.
Ёмюрлюкню ёлюмсюз ауазы
Чыгъады Къадау Ташны юсюнде къыл къобуздан.

Сезигиз, эшитигиз, кёрюгюз.
Тынгылагъыз, ангылагъыз:
Бизни ючюн согъулады къыл къобуз.
 
 
 
#1009
Джаратама0
19.09.2011 01:52:45
ШАТ


K`aidasiz?
 
 
 
#1010
Джаратама0
19.09.2011 03:48:14
Шатны интернети ишлемейди - аны ючюн киралмайды бери.
Башха хатасы джокъду.

Къуш тюкню Басхан суугъа тийириб, къачхы чапракълада джазгъы назмуларын джазады. Аллах онг берсин Сапар тутхан къаламгъа.
 
 
 
#1011
Джаратама0
19.09.2011 04:34:11
Къуш тюкню Басхан суугъа тийириб, къачхы чапракълада джазгъы назмуларын джазады. Аллах онг берсин Сапар тутхан къаламгъа.
Sabr


Амин.
 
 
 
#1012
Джаратама0
19.09.2011 05:07:53
Сапар ЁЗДЕН

291

Туугъан элим, сен энтда да бир сагъышлы:
Джаз ала да ушамайса сен джазгъа.
Кёгюнгде да ? боз булутла бир къайгъылы,
Бири-бирин хазырдыла таларгъа.

Келгенликге тансыкъ ала мен джуртумдан,
Къарайма да, берир затынг ? мыдахлыкъ.
Алай, ёзге, чарламайма, мен джугъунгдан,
Джазгъы хансынг, болуб эсе, намазлыкъ.

Намазгъа уа излемейме мен намазлыкъ,
Намазлыкъны эм игиси ? джуртумду.
Сен барлыкъда, сынамайды джаным ачлыкъ.
Санга кёлюм ? сенден эсе, уллуду.

Биягъынлай, ма тамбла да джолум тюзге.
Мен да, энтда, ашхы джолгъа барайым.
Сен, къайдан да эсен къайтар, Аллах, юйге ?
Мен кёрюме баба джуртда джатайым.

"Ата джуртуна намазлыкъгъача киреди Сапар" деб, бу назмуну окъугъандан сора джазгъанды Лайпанланы Билал.
 
 
 
#1013
Джаратама0
19.09.2011 05:18:42
Сапар ЁЗДЕН

ХХХ

Тюшюмде тюшсем а мен тюшге,
Кёз къамар алайды бир джарыкъ.
Аллай зат кёрюнмейди тюнде,
Ай джарыкъ анга кёре - джазыкъ.

Аллай зат кёрюнмейди тюнде -
Шаркъ таба кёксюл къатыш кимит.
Бек джашил - башда эм тёбенде,
Къантору кёкде да бир кийик.

Гюл джашнау алады да эсни,
Сора мен джатама кырдыкга.
Унутуб, тюзнюча, хар терсни,
Шам сёзле теджейме Аллахха.

Сора не - тебрейди джабалакъ,
Къарчыкъла да тюлдюле сууукъ.
Хар неге къарайма осмакълаб,
Мен джукъда да кёрмейме бузукъ.

Тюшюмден тюшсем а мен тюннге,
Бурулуб хар не да чюйреге,
Джокъ салам - саугъа не ёлгеннге -
Дуниямы хазырма чюйлерге.

Нени юсюнденди бу назму?

Бу назму къайсы тилге кёчюрюлсе да, назмулай къаллыкъды. Хар окъугъан - башха джерли, башха тилли, башха динли болса да - кесича ангыларча, сагъышланырча, бир магъана табарыкъды. Джети къат Кёкча, назму джети къатлы болмаса, аны поэзия дараджасы мийик болалмайды. Сёз бир джерге байланыб къалса, къанатлы сёз болалмайды, учалмайды. Сапарны назмулары тагъылгъан назмула тюлдюле - андады аланы аламатлыкълары...

Тизгинледе басым бузулмай баргъаны уа? "Чюйреге - чюйлерге" дегенча аламат рифмала уа?

Сапарны быллай сейир поэзиясын эслеялмагъан адабиятчыларыбызгъа, культура, басма къуллукъчуларыбызгъа не айтыргъа билмейме: айтаса да - эшитмейле, айтмай тынгылаб да туралмайса. Эшда, бу да ана тилибизни, миллет культурабызны не халда болгъанын кёргюзтген зат болур.
 
 
 
#1014
Джаратама0
19.09.2011 05:21:31
Шийирлеринги окъуб, башымы чайкъай, олтуруб турама. Бир джангылыгъы болмагъан назмунг джокъду. "Европагъа терезе ачханбыз" деб къууаннгандыла. Сен а Кёкге ачханса терезе. Сени Сёзюнг - Кёкге ачылгъан терезеди. Джаша, Сапар. Сени назмуларынг китаб болуб чыгъыб, халкъны къолуна тюшмей тургъанлары - бек уллу терсликди. Къуру сени аллынгда тюл, бютеу адабиятыбызны аллында да.
 
 
 
#1015
Джаратама0
22.09.2011 21:03:06
Салам !

Игиме.Барынга да - ИГИЛИК !!!

Билал, кюрешдим, ачалмайма сенгге тюшерик бетни.
Мени Скайпда былай изле.
Узденов07
 
 
 
#1016
Джаратама0
23.09.2011 17:43:23
Салам, Сапар!
Юй телефонунг, хурджун телефонунг да ишлемейле. СКАЙПынг бла да байланырча тюлдю. СКАЙПда атым: bilal.l
 
 
 
#1017
Джаратама0
23.09.2011 20:18:13
Sabr

Саламынг узакъ болсун !

Ол ат бла да кёрдюм, болмайды.
Энтда былай бир кёр ;
Сапар Узденов- деб.

Интернетим нек ишлемегенин былайда джазалмам, ангылай болурса джитибашланы къылыкъларын.

Юйдеги телефонда къармалгъанды, ачха излей болур.
Интерни уа, связны тамадасына тюбеб, алай такъдыргъанма.......
Джарыкъ бетли тюбешейик!!!
 
 
 
#1018
Джаратама0
23.09.2011 23:03:33
ШАТ
Uzdenov07 бу СКАЙПда барды, алай а сени бла связаться эталмайма.
"Не отвечает" деб барады.
 
 
 
#1019
Джаратама0
23.09.2011 23:59:28
Sabr

Бусагъат таб этейик.
 
 
 
#1020
Джаратама0
24.09.2011 22:02:12
Sabr

Салам !

Иги болурса, Аллах айтса !
Мени да джокъду хатам, шукур Дуниягъа !
Сашадан хайыр хапар да алдым...
 
 
 
#1021
Джаратама0
25.09.2011 03:40:18
БЮГЮН - СЕНТЯБРНЫ 25

Бу не кюндю? Бу кюн а - къарачай адабиятны сёз устасы, эркин тутушдан да спортну устасы ЁЗДЕНЛАНЫ Сапарны туугъан кюнюдю.

Муратларынг толсунла, Сапар!
Хакъ джолдан, Акъ сёзден да айырмасын Аллах сени.

Ата джуртубузгъа намазлыкъгъача къарагъанынг ючюн да,

Адабият юйюбюзню терезесин Кёкге ачханынг ючюн да,

"...тургъаныча турсун Таш, Агъач" деб айтханынг ючюн да -

узакъ ёмюрлю бол, халкъынгдан къууана, халкъынгы да къууандыра, кёб джаша.
 
 
 
#1022
Джаратама0
25.09.2011 04:47:00
ШАТ


Tuug`an kyunyugyuzbla alg`yshlaima, Sapar!!!! Auruusuz, chirmausuz bolug`uz! Etken muratlarig`yzg`a djetigiz!!!Kelir bu zamang` k`uanchbla, djangi nazmulabla, djirlabla sizda, sizni syuigenleda djeteik!!!
 
 
 
#1023
Джаратама0
25.09.2011 15:05:11
Сапар, туугъан кюнюнг бла алгъышлайма!



Саулукъ,эсенлик болсунла джол негеринг узакъ-узун джыллагъа.
Джуугъунгу -тенгинги ичинде къууанч бла джашаргъа Аллаху Тагъала буюрсун.
Ол сен кемсиз сюйген КъарачайМалкъар миллетге ,Сапарны алгъышы-тилеги къабыл болду деб , кёрейик къысха заманда!

Таза джюрекден
 
 
 
#1024
Джаратама0
25.09.2011 17:58:56
ШАТ



Кобрин - Предмет и задачи биофизики
 
 
 
#1025
Джаратама0
26.09.2011 01:11:48
Сапар, салам алейкум!

Туугъанынга - атанг-ананг, ахлуларынг къууаннгандыла.
Джашагъанынга уа - бютеу къарачай-малкъар халкъыбыз къууанады.

Тутуш бла да, назму-джыр джазыу бла да Халкъыбызны атын айтдыргъанса.

"Джангы Джёгетейден Эски Джетегейлиге" дери деб назму китаб джазгъанса да, къысха заманда ол да окъуучуланы къолларына тюшерча этсин Аллах.

Кёб джаша къууанч бла, насыб бла.
 
 
 
Страницы: Пред. 1 ... 39 40 41 42 43 ... 112 След.
Читают тему (гостей: 17)

 

Написать нам

Фонд «Содействие развитию карачаево-балкарской молодежи «Эльбрусоид»

© 2003-2026 Elbrusoid.org  |  Все права защищены Законами Гор.