Эльбрусоид :: Форум :: Для любителей творчества Сапара Узденова....

Адам туугъан джеринде, ит тойгъан джеринде.
Тыш элде солтан болгъандан эсе, кесинги элде олтан болгъан игиди!
Ана кёлю – балада, бала кёлю – талада.
Джырчы джырчыгъа – къарнаш.
Насыблыны баласы кюн кюнден да баш болур, насыбсызны баласы, кюн кюнден да джаш болур.
Хантына кёре тузу, юйюне кёре къызы.
Юй ишлеген балта эшикде къалыр.
Джарлыны тону джаз битер.
Тили узунну, намысы – къысха.
Хунаны тюбюн къазсанг, юсюнге ауар.
Тёгюлген тюгел джыйылмайды.
Къууут – джелге, берне – бошха.
Ёгюзню мюйюзюнден тутадыла, адамны сёзюнден тутадыла.
Аджалсыз ёлюм болмаз.
Тау башында, тау болмаз, джангыз терек, бау болмаз.
Бир онгсуз адам адет чыгъарды, деб эштирик тюлсе.
Келгинчи, къонакъ уялыр, келгенден сора, къонакъбай уялыр.
Биреуню къыйынлыгъы бла кесинге джол ишлеме.
Бек ашыкъгъан меннге джетсин, дегенди аракъы.
Къумурсхала джыйылсала, пилни да джыгъадыла.
Адам къыйынлыгъын кёлтюрюр, зауукълугъун кёлтюрмез.
Рысхы – сют юсюнде кёмюк кибикди.
Ишин билген, аны сыйын чыгъарады.
Тил бла келеди джыр да.
Аякъларынгы джууургъанынга кёре узат.
Минг тенг да азды, бир джау да кёбдю.
Джерни букъусу кёкге къонмаз.
Мухарны эси – ашарыкъда.
Накъырданы арты керти болур.
Агъач халкъгъа алтынды, иссиликге салкъынды.
Адамны артындан къара сабан сюрме.
Ёлген ийнек сютлю болур.
Магъанасыз сёз – тауушсуз сыбызгъы.
Aдам боллукъ, сыфатындан белгили.
Байлыкъ келсе, акъыл кетер.
Биреуню тёрюнден, кесинги эшик артынг игиди.
Келинин тута билмеген, къул этер, къызын тута билмеген, тул этер.
Кёлю джокъну – джолу джокъ.
Башы ишлегенни, ауузу да ишлер.
Тойгъанлыкъ къойгъа джарашады.
Хата – гитчеден.
Къазанда болса, чолпугъа чыгъар.
Джюрекден джюрекге джол барды.
Ашхы – джыяр, аман – джояр.
Адамны адамлыгъы къыйынлыкъда айгъакъланады.
Ёлген эшек бёрюден къоркъмайды.
Уллу къашыкъ эрин джыртар.
Билимден уллу байлыкъ джокъду.
Эски джаугъа ышанма.
Къозулугъунда тоймагъан, къойлугъунда тоймаз.

RSS

Для любителей творчества Сапара Узденова....

EL-HALED Гость	#1 Джаратама0 20.05.2007 18:47:47 http://www.youtube.com/watch?v=peJl2PXCDWA

Ответы

Sabr

Гость

#1001

Джаратама0

12.09.2011 01:19:36

ШАТ
Салам алейкум!

Сени былайда болгъанынгы эслегенме да, кёлюме келген талай зат:
1.Басмагъа хазырланнган китабынгы толусу бла - форумда бир джангы тема ачыб, салсакъ къалай болур? Окъурукъ окъусун. Билсинле керти назмула къаллай болгъанларын. "Бу халкъыбызгъа, культурабызгъа керекди, муну созуб турмай, басмагъа берирге керекди" дерик бир адам да чыгъар - бардыла да литературадан да хапарлары болгъан, болушургъа да къолларындан келген къарачайлыла.
2.Саша айтханча, аны 2-3 бёлюмге бёлген бек къыйын боллукъду - назмула темаларына кёре салынмагъандыла. Аллындан алай салынсала эди - джырла бир джерге, табигъатлыла бир джерге, сюймекликлиле бир джерге, ачы назмула бир джерге. Алай болмагъандан ары (джангыдан къурайма десенг а - бары къатышырыкъды), башха тюрлю этерге керек болур...
3.Сени "намазлыкъ Ата джуртду" деб айтылгъан бир назмунг бар эди, бир башха назмунгда да, назму - Кёкге ачылгъан терезе болгъаны айтыла эди. Менден эсе кесинг иги эскерликсе - аланы номерлерин манга бир ий...

Sabr

Гость

#1002

Джаратама0

12.09.2011 01:46:59

ШАТ

4.Сени бир назмунг барды: Кёкню алты къатына гитарангы алты къылы чыгъарыр, джетинчиге уа - иман.
Китабны 7 кесекге юлешсенг: биринчи бёлюмде гитараны бир къылы юсюнде бир джазыу бла (назму тизгин дейик); экинчи бёлюмде гитараны экинчи къылы - анда да бир башха джазыу. Алай эте, алтынчы къыл бошалады, аны ызындан а - джетинчи бёлюм: алайда иманны графически кёргюзтюрге керекди, юсюнде да бир джазыу бла. Айтыргъа, бир художник-график керекди. Ким биледи, Атаев эталырмы?
Алай бла китабны бёлюмлери сени рухунгу Кёкге чыгъыб баргъанын кёргюзтюрге керекдиле - Джангы Джёгетейден Эски Джетегейлиге дери. Сагъыш эт.

ШАТ

Гость

#1003

Джаратама0

13.09.2011 12:50:29

Sabr;

ШАТ
Салам алейкум!

Сени былайда болгъанынгы эслегенме да, кёлюме келген талай зат:
1.Басмагъа хазырланнган китабынгы толусу бла - форумда бир джангы тема ачыб, салсакъ къалай болур? Окъурукъ окъусун. Билсинле керти назмула къаллай болгъанларын. "Бу халкъыбызгъа, культурабызгъа керекди, муну созуб турмай, басмагъа берирге керекди" дерик бир адам да чыгъар - бардыла да литературадан да хапарлары болгъан, болушургъа да къолларындан келген къарачайлыла.

Салам, Билал !

Китаблыкъны былайгъа салсакъ ушагъыусуз болур. Болушурукъ адам болса, кёрмейми турады.....

ШАТ

Гость

#1004

Джаратама0

13.09.2011 21:01:10

Sabr ;

ШАТ

4.Сени бир назмунг барды: Кёкню алты къатына гитарангы алты къылы чыгъарыр, джетинчиге уа - иман.
Китабны 7 кесекге юлешсенг: биринчи бёлюмде гитараны бир къылы юсюнде бир джазыу бла (назму тизгин дейик); экинчи бёлюмде гитараны экинчи къылы - анда да бир башха джазыу. Алай эте, алтынчы къыл бошалады, аны ызындан а - джетинчи бёлюм: алайда иманны графически кёргюзтюрге керекди, юсюнде да бир джазыу бла. Айтыргъа, бир художник-график керекди. Ким биледи, Атаев эталырмы?
Алай бла китабны бёлюмлери сени рухунгу Кёкге чыгъыб баргъанын кёргюзтюрге керекдиле - Джангы Джёгетейден Эски Джетегейлиге дери. Сагъыш эт.

Билал, не аламат оюм айтдынг, керти, мен сюйгенча, китаб боллукъ эди алай болса.
Ёска да эталлыкъ эди, аны бла уа эртдеден бери тюбешмегенме, хапарсызма..
Этеме десе, Айнар бек таб этерик эди.
Сашагъа, Айнаргъа да ий- деген эдим вёрстканы..
Айнаргъа бир айтайым...

Саулукъ - Эсенлик.

Сапар Ёз. Турна Аууш.

ШАТ

Гость

#1005

Джаратама0

13.09.2011 21:57:35

* * *
33

Кече кюндюзюм
Кечедеди зауукъ келиу джаныма
Кюндюз а тюшюм
Айланады джарлы джаным абына

Кече нёгерим
Терсни тюзню айта билед ачыкъдан
Кюндюз эгерим
Тенгни-джауну сюрюб иед къатымдан

Некме былай деб
Соргъанлыкъгъа мен таймаздан кесиме
Турчу алай деб
Ауаз келед башха кёкден эсиме

Кюндюз кечемди
Андан болур кюн болгъанды ауана
Кечем кемемди
Джашау толкъун истем тюлдю ай анга

Некме былай деб
Тюшюмде да мен сорама кесиме
Джырчы алайд деб
Ауаз келед башха кёкден эсиме.

28.09.01.

Ocean Гость	#1006 Джаратама0 13.09.2011 22:42:59 Кюндюз а тюшюм Айланады джарлы джаным абына

Sabr

Гость

#1007

Джаратама0

14.09.2011 05:34:47

ШАТ

***

Кече - кюндюзюм:
Кечедеди зауукъ келиу джаныма.
Кюндюз а - тюшюм:
Айланады джарлы джаным абына.

Кече - нёгерим:
Терсни тюзню айта билед ачыкъдан.
Кюндюз - эгерим:
Тенгни-джауну сюрюб иед къатымдан.

"Некме былай?"- деб,
Соргъанлыкъгъа мен таймаздан кесиме,
"Турчу алай",- деб,
Ауаз келед башха кёкден эсиме.

Кюндюз - кечемди:
Андан болур - кюн болгъанды ауана.
Кечем - кемемди:
Джашау толкъун истем тюлдю ай анга.

"Некме былай?- деб,
Тюшюмде да мен сорама кесиме.
"Джырчы алайд",- деб,
Ауаз келед башха кёкден эсиме.

Хар назмунгу юсюнден бирер китаб джазарчады. Аллай бир тинтиучю, сапаровед да чыгъар. Ишек джокъду.

Sabr

Гость

#1008

Джаратама0

18.09.2011 07:05:45

Bilal LAYPAN

КЪАДАУ ТАШДА КЪЫЛ КЪОБУЗ
Ёзденланы Сапаргъа ? Джырчыгъа

Суу джанында Къадау Ташда,
Кесилген Джангыз Терекни къатында,
Кимден эсе да къалыб кетген
Зынгырдайды къыл къобуз.

Кюнде джылтыраб кеси да,
Къаматады кёзюмю.
Аны сокъгъан кюн таякъды,
Кюн таякъны тутхан къол а ?
Кёрюнмейди ? Кёкдеди.

Кюн, булутха кирсе да,
Ол зынгырдайд тохтамай.
Къачхы аязны джазгъы къолу
Сылайд аны аяулу.

Бюгюн а къыл къобузда
Мен кёрдюм илячинни:
Огъесе,
О́л ? къанатлана́ тургъан ?
Къыл къобузну джанымед?

Къадау ташны юсюнде
Зынгырдайды къыл къобуз.
Зынгырдайды тауушсуз,
Алай а, эшитеме мен.

Нени эшитеме мен:
Джангыз Терекни джырын, кюуюн да;
Минг джылны тынгылаб тургъан,
Кёб палахны сынаб, чыдаб,
Ичинден, тышындан да кюйюб,
Къаралыб, къатыб тургъан,
Къадау Ташны ауазын, сёзюн да.

Къыл къобузну согъады табигъат:
Тынгылайма Къадау Ташха, Джангыз Терекге.
Саугъа, ёлгеннге да тынгылайма,
Туру, таша дуниягъа да тынгылайма,
Эки дуниягъа да тынгылайма,
Ангыларгъа кюрешеме Кёкню, джерни да.

Зынгырдайды къыл къобуз тохтаусуз.
Къыллары асры къызгъандан,
От тиллеге ушайдыла бир-бирде.
Алагъа суу тамчыларын чача да, сууута,
Къыл къобузну суусабын да кесе,
Кетиб барады Къобан да тохтаусуз.

Ата джуртду джюрекни ашы:
Къобанны
Ичеме сууун, джалайма ташын.
Къыл къобуз зынгырдайды, уята эсими.
Кетиб баргъан Къобан сууда,
Тохтаб тургъан Къадау ташда,
Кесилген Джангыз Терекде да
Кёреме кесими.

Къыл къобуз а зынгырдайды.
Кёкдемид, джердемид ? къайдады ?
Билмейме, аны иеси.
Кимди иеси ? аны да билмейме.

Бир-бирде къулагъыма
Таныш джер макъам, сёз да келеди:
?Тауларыбыз тебмесинле,
Къартларыбыз ёлмесинле,
Тургъаныча турсун Таш, Агъач?.

Кёбюсю уа,
Джети къат Кёкден эне келген,
Дуния энди эшитирик
Макъамладыла, Сёзледиле.

Къыл къобузну къылларына тийиб,
Аланы зынгырдатыб, тиллендириб,
Дунияны тёрт джанына чачылгъан
Ол джарыкъны
Къалай эслемейсиз сиз?
Къадер кечени джарыгъыча бир затды ол.

Къадау Ташны юсюнде зынгырдай тургъан къыл къобуз.
Аны тауушу Ауалгъа, Ахыргъа да джетиб,
Къалюбаладан, Ахырзамандан да айтады хапар.

Таш бла Терекден, Джер бла Кёкдендиле
Ёзю, бети, макъамы, сёзю да къыл къобузну.
Ёмюрлюкню ёлюмсюз ауазы
Чыгъады Къадау Ташны юсюнде къыл къобуздан.

Сезигиз, эшитигиз, кёрюгюз.
Тынгылагъыз, ангылагъыз:
Бизни ючюн согъулады къыл къобуз.

Ocean Гость	#1009 Джаратама0 19.09.2011 01:52:45 ШАТ K`aidasiz?

Sabr

Гость

#1010

Джаратама0

19.09.2011 03:48:14

Шатны интернети ишлемейди - аны ючюн киралмайды бери.
Башха хатасы джокъду.

Къуш тюкню Басхан суугъа тийириб, къачхы чапракълада джазгъы назмуларын джазады. Аллах онг берсин Сапар тутхан къаламгъа.

Tinibek Гость	#1011 Джаратама0 19.09.2011 04:34:11 Къуш тюкню Басхан суугъа тийириб, къачхы чапракълада джазгъы назмуларын джазады. Аллах онг берсин Сапар тутхан къаламгъа. Sabr Амин.

Sabr

Гость

#1012

Джаратама0

19.09.2011 05:07:53

Сапар ЁЗДЕН

291

Туугъан элим, сен энтда да бир сагъышлы:
Джаз ала да ушамайса сен джазгъа.
Кёгюнгде да ? боз булутла бир къайгъылы,
Бири-бирин хазырдыла таларгъа.

Келгенликге тансыкъ ала мен джуртумдан,
Къарайма да, берир затынг ? мыдахлыкъ.
Алай, ёзге, чарламайма, мен джугъунгдан,
Джазгъы хансынг, болуб эсе, намазлыкъ.

Намазгъа уа излемейме мен намазлыкъ,
Намазлыкъны эм игиси ? джуртумду.
Сен барлыкъда, сынамайды джаным ачлыкъ.
Санга кёлюм ? сенден эсе, уллуду.

Биягъынлай, ма тамбла да джолум тюзге.
Мен да, энтда, ашхы джолгъа барайым.
Сен, къайдан да эсен къайтар, Аллах, юйге ?
Мен кёрюме баба джуртда джатайым.

"Ата джуртуна намазлыкъгъача киреди Сапар" деб, бу назмуну окъугъандан сора джазгъанды Лайпанланы Билал.

Sabr

Гость

#1013

Джаратама0

19.09.2011 05:18:42

Сапар ЁЗДЕН

ХХХ

Тюшюмде тюшсем а мен тюшге,
Кёз къамар алайды бир джарыкъ.
Аллай зат кёрюнмейди тюнде,
Ай джарыкъ анга кёре - джазыкъ.

Аллай зат кёрюнмейди тюнде -
Шаркъ таба кёксюл къатыш кимит.
Бек джашил - башда эм тёбенде,
Къантору кёкде да бир кийик.

Гюл джашнау алады да эсни,
Сора мен джатама кырдыкга.
Унутуб, тюзнюча, хар терсни,
Шам сёзле теджейме Аллахха.

Сора не - тебрейди джабалакъ,
Къарчыкъла да тюлдюле сууукъ.
Хар неге къарайма осмакълаб,
Мен джукъда да кёрмейме бузукъ.

Тюшюмден тюшсем а мен тюннге,
Бурулуб хар не да чюйреге,
Джокъ салам - саугъа не ёлгеннге -
Дуниямы хазырма чюйлерге.

Нени юсюнденди бу назму?

Бу назму къайсы тилге кёчюрюлсе да, назмулай къаллыкъды. Хар окъугъан - башха джерли, башха тилли, башха динли болса да - кесича ангыларча, сагъышланырча, бир магъана табарыкъды. Джети къат Кёкча, назму джети къатлы болмаса, аны поэзия дараджасы мийик болалмайды. Сёз бир джерге байланыб къалса, къанатлы сёз болалмайды, учалмайды. Сапарны назмулары тагъылгъан назмула тюлдюле - андады аланы аламатлыкълары...

Тизгинледе басым бузулмай баргъаны уа? "Чюйреге - чюйлерге" дегенча аламат рифмала уа?

Сапарны быллай сейир поэзиясын эслеялмагъан адабиятчыларыбызгъа, культура, басма къуллукъчуларыбызгъа не айтыргъа билмейме: айтаса да - эшитмейле, айтмай тынгылаб да туралмайса. Эшда, бу да ана тилибизни, миллет культурабызны не халда болгъанын кёргюзтген зат болур.

Sabr

Гость

#1014

Джаратама0

19.09.2011 05:21:31

Шийирлеринги окъуб, башымы чайкъай, олтуруб турама. Бир джангылыгъы болмагъан назмунг джокъду. "Европагъа терезе ачханбыз" деб къууаннгандыла. Сен а Кёкге ачханса терезе. Сени Сёзюнг - Кёкге ачылгъан терезеди. Джаша, Сапар. Сени назмуларынг китаб болуб чыгъыб, халкъны къолуна тюшмей тургъанлары - бек уллу терсликди. Къуру сени аллынгда тюл, бютеу адабиятыбызны аллында да.

ШАТ Гость	#1015 Джаратама0 22.09.2011 21:03:06 Салам ! Игиме.Барынга да - ИГИЛИК !!! Билал, кюрешдим, ачалмайма сенгге тюшерик бетни. Мени Скайпда былай изле. Узденов07

Sabr Гость	#1016 Джаратама0 23.09.2011 17:43:23 Салам, Сапар! Юй телефонунг, хурджун телефонунг да ишлемейле. СКАЙПынг бла да байланырча тюлдю. СКАЙПда атым: bilal.l

ШАТ

Гость

#1017

Джаратама0

23.09.2011 20:18:13

Sabr

Саламынг узакъ болсун !

Ол ат бла да кёрдюм, болмайды.
Энтда былай бир кёр ;
Сапар Узденов- деб.

Интернетим нек ишлемегенин былайда джазалмам, ангылай болурса джитибашланы къылыкъларын.

Юйдеги телефонда къармалгъанды, ачха излей болур.
Интерни уа, связны тамадасына тюбеб, алай такъдыргъанма.......
Джарыкъ бетли тюбешейик!!!

Sabr Гость	#1018 Джаратама0 23.09.2011 23:03:33 ШАТ Uzdenov07 бу СКАЙПда барды, алай а сени бла связаться эталмайма. "Не отвечает" деб барады.

ШАТ Гость	#1019 Джаратама0 23.09.2011 23:59:28 Sabr Бусагъат таб этейик.

ШАТ Гость	#1020 Джаратама0 24.09.2011 22:02:12 Sabr Салам ! Иги болурса, Аллах айтса ! Мени да джокъду хатам, шукур Дуниягъа ! Сашадан хайыр хапар да алдым...

Sabr

Гость

#1021

Джаратама0

25.09.2011 03:40:18

БЮГЮН - СЕНТЯБРНЫ 25

Бу не кюндю? Бу кюн а - къарачай адабиятны сёз устасы, эркин тутушдан да спортну устасы ЁЗДЕНЛАНЫ Сапарны туугъан кюнюдю.

Муратларынг толсунла, Сапар!
Хакъ джолдан, Акъ сёзден да айырмасын Аллах сени.

Ата джуртубузгъа намазлыкъгъача къарагъанынг ючюн да,

Адабият юйюбюзню терезесин Кёкге ачханынг ючюн да,

"...тургъаныча турсун Таш, Агъач" деб айтханынг ючюн да -

узакъ ёмюрлю бол, халкъынгдан къууана, халкъынгы да къууандыра, кёб джаша.

Ocean Гость	#1022 Джаратама0 25.09.2011 04:47:00 ШАТ Tuug`an kyunyugyuzbla alg`yshlaima, Sapar!!!! Auruusuz, chirmausuz bolug`uz! Etken muratlarig`yzg`a djetigiz!!!Kelir bu zamang` k`uanchbla, djangi nazmulabla, djirlabla sizda, sizni syuigenleda djeteik!!!

Кергелен

Гость

#1023

Джаратама0

25.09.2011 15:05:11

Сапар, туугъан кюнюнг бла алгъышлайма!

Саулукъ,эсенлик болсунла джол негеринг узакъ-узун джыллагъа.
Джуугъунгу -тенгинги ичинде къууанч бла джашаргъа Аллаху Тагъала буюрсун.

Ол сен кемсиз сюйген КъарачайМалкъар миллетге ,Сапарны алгъышы-тилеги къабыл болду деб , кёрейик къысха заманда!

Таза джюрекден

Ocean Гость	#1024 Джаратама0 25.09.2011 17:58:56 ШАТ Кобрин - Предмет и задачи биофизики

kalejchi Гость	#1025 Джаратама0 26.09.2011 01:11:48 Сапар, салам алейкум! Туугъанынга - атанг-ананг, ахлуларынг къууаннгандыла. Джашагъанынга уа - бютеу къарачай-малкъар халкъыбыз къууанады. Тутуш бла да, назму-джыр джазыу бла да Халкъыбызны атын айтдыргъанса. "Джангы Джёгетейден Эски Джетегейлиге" дери деб назму китаб джазгъанса да, къысха заманда ол да окъуучуланы къолларына тюшерча этсин Аллах. Кёб джаша къууанч бла, насыб бла.

Читают тему (гостей: 5)

Логин:
Пароль:
	Запомнить меня на этом компьютере

Забыли свой пароль?
Регистрация