- Джукъу тёшек сайламайды.
- Къызбайны юйюне дери сюрсенг, батыр болур.
- Кеси юйюмде мен да ханма.
- Бойнуму джети джерден кессенг да, мен ол ишни этеллик тюлме.
- Адеби болмагъан къыз – тузсуз хант.
- Акъыллы – эл иеси, тели – эл баласы.
- Тойгъандан сора, ашны сёкме.
- Ауузу бла къуш тута айланады.
- Джюрек кёзден алгъа кёрюр.
- Ата джурт – алтын бешик.
- Эки итни арасына сюек атма, эки адамны арасында сёз чыгъарма.
- Кюн кёрмеген, кюн кёрсе, кюндюз чыракъ джандырыр.
- Ашхы сёз таш тешер.
- Къонакъ аман болса, къонакъбай джунчур
- Мадар болса, къадар болур.
- Хансыз джомакъ болмаз.
- Эл ауузу – элия.
- Сибиртки да сыйлы болду, кюрек да кюнлю болду.
- Баланы адам этген анады.
- Атынг аманнга чыкъгъандан эсе, джанынг тамагъынгдан чыкъсын.
- Къарнынг къанлынга кийирир.
- Джыгъылгъанны сырты джерден тоймаз.
- Терслик кетер, тюзлюк джетер.
- Мухарны эси – ашарыкъда.
- Баш – акъыл ючюн, акъылман – халкъ ючюн.
- Кюл тюбюндеги от кёрюнмейди.
- Кийимни бичсенг, кенг бич, тар этген къыйын тюлдю.
- Чакъырылмагъан джерге барма, чакъырылгъан джерден къалма.
- Къобан да къуру да къобханлай турмайды, адам да къуру да патчахлай турмайды.
- Арбаз къынгырды да, ийнек сауалмайма.
- Ач къарным, тынч къулагъым.
- Джетген къыз джерли эшекни танымаз.
- Ана къолу ачытмаз.
- Тюзлюк шохлукъну бегитир.
- Татлы сёз – балдан татлы.
- Адамны аманы адамны бети бла ойнар.
- Сёз къанатсыз учар.
- Айыбны суу бла джууалмазса.
- Бек анасы джыламаз.
- Иши джокъну, сыйы джокъ.
- Атадан ёксюз – бир ёксюз, анадан ёксюз – эки ёксюз.
- Рысхы – сют юсюнде кёмюк кибикди.
- Адебни адебсизден юрен.
- Къарыусузгъа кюлме, онгсузгъа тийме.
- Сакъалы текени да бар, мыйыгъы киштикни да бар.
- Ишленмеклик адамлыкъды.
- Акъыллы эркиши атын махтар, акъылсыз эркиши къатынын махтар.
- Кёбден умут этиб, аздан къуру къалма.
- Джеринден айырылгъан – джети джылар, джуртундан айырылгъан – ёлгюнчю джылар.
- Уллу къашыкъ эрин джыртар.
Профиль
|
|
|
|||