- Адамгъа аман кюн соруб келмейди.
- Сабыр джетер муратха, сабырсыз къалыр уятха.
- Тас болгъан бычакъны сабы – алтын.
- Джумушакъ терекни къурт ашар.
- Сёлеш деб шай берген, тохта деб, сом берген.
- Билими азны – ауузунда кирит.
- Нёгер болсанг, тенг бол, тенг болмасанг, кенг бол.
- Ана кёлю – балада, бала кёлю – талада.
- Уллу атлама – абынырса, уллу къабма – къарылырса.
- Аман адамны тепсинге олтуртсанг, къызынгы тилер.
- Аманны эки битли тону болур, бирин сеннге кийдирир, бирин кеси киер.
- Чомартха хар кюн да байрамды.
- Ариу джол аджал келтирмез.
- Бир абыннган – минг сюрюнюр.
- Танг атмайма десе да, кюн къоярыкъ тюйюлдю.
- Кеси юйюмде мен да ханма.
- Адамны сабийин сюйген джюреги, бычакъча, джитиди.
- Джашны джигитлиги сорулур, къызны джигерлиги сорулур.
- Зарда марда джокъ.
- Соргъан айыб тюлдю, билмеген айыбды.
- Артына баргъанны, къатына барма.
- Джангыз терек къынгыр ёсер.
- Дууулдаса – бал чибин, къонса – къара чибин.
- Къыз тиширыу кеси юйюнде да къонакъды.
- Нёгерсизни джолу узун.
- Башы ишлегенни, ауузу да ишлер.
- Ариу – кёзге, акъыл – джюрекге.
- Тенги кёбню джау алмаз, акъылы кёбню дау алмаз.
- Сёз – кюмюш, джыр – алтын.
- Башланнган иш битер, къымылдагъан тиш тюшер.
- Рысхы – насыбха къор.
- Эртде тургъан бла эртде юйленнген сокъуранмаз.
- Ёзденликни джайгъан – джокълукъ.
- Къызын тута билмеген, тул этер, джашын тута билмеген, къул этер.
- Кёпюр салгъан кеси ётер, уру къазгъан кеси кетер.
- Мал кёб болса, джууукъ кёб болур.
- Сибиртки да сыйлы болду, кюрек да кюнлю болду.
- Кёб джат да, бек чаб.
- Джукъу тёшек сайламайды.
- Арбаз сайлама да, хоншу сайла.
- Къонакъ хазыр болгъанлыкъгъа, къонакъбай хазыр тюлдю.
- Ханы къызы буюгъа-буюгъа киштик болду.
- Ана къолу ачытмаз.
- Тилсиз миллет джокъ болур.
- Экеулен сёлеше тура эселе, орталарына барыб кирме.
- Мухардан ач ычхынмаз.
- Аллахха ийнаннган кишини, Аллах онгдурур ишин.
- Элде адам къалмаса, ит тахтагъа минер.
- Адам къаллай бир ишленмесе, аллай бир кесин уллу кёреди.
- Суу ичген шауданынга тюкюрме.
Профиль
|
|
|
|||