Эльбрусоид :: Форум

Эм уллу байлыкъ – джан саулукъ.
Къалгъан ишге къар джауар.
Уллу къашыкъ эрин джыртар.
Айран ичген – къутулду, джугъусун джалагъан – тутулду.
Чоюнну башы ачыкъ болса, итге уят керекди.
Минг тенг да азды, бир джау да кёбдю.
Кесинге джетмегенни, кёб сёлешме.
Тура эдим джата, къайдан чыкъды хата?
Кёб ашасанг, татыуу чыкъмаз, кёб сёлешсенг, магъанасы чыкъмаз.
Адамны джюреги нени кёрюрге сюйсе, кёзю да аны кёрюрге ёч болады.
Къар – келтирди, суу – элтди.
Бичгенде ашыкъма, тикгенде ашыкъ.
Сёз къанатсыз учар.
Кечеси – аяз, кюню – къыш, джарлы къаргъагъа бир аш тюш!
Ашына кёре табагъы, балына кёре къалагъы.
Къыз чыгъаргъан – къызыл къымжа.
Билген билмегенни юретген адетди.
Ач бёрюге мекям джокъ.
Биреуню къыйынлыгъы бла кесинге джол ишлеме.
Ёксюзню тилеги къабыл болур.
Шекер бла туз – бир болмаз, ушамагъан – юй болмаз.
Джашлыкъ этмеген, башлыкъ этмез.
Чомартны къолу берекет.
Накъырда – кертини келечиси.
Экиндини кеч къылсанг, чабыб джетер ашхам.
Сёз сёзню айтдырыр.
Магъанасыз сёз – тауушсуз сыбызгъы.
Аджал соруб келмез, келсе, къайтыб кетмез.
Гугурук къычырмаса да, тангны атары къалмаз.
Чёбню кёлтюрсенг, тюбюнден сёз чыгъар.
Ёмюрлюк шохлукъну джел элтмез.
Башланнган иш битер, къымылдагъан тиш тюшер.
Эл ауузу – элек, анга ийнаннган – халек.
Окъдан джара эртде-кеч болса да бителир, сёз джара, ёмюрге къалыр.
Ачлыкъда тары гырджын халыуадан татлы.
Ашхылыкъ джерде джатмайды, аманлыкъ суугъа батмайды.
Эринчекге кюн узун.
Окъугъан озар, окъумагъан тозар.
Тойну къарнашы – харс, джырны къарнашы – эжиу.
Кёзден кетген, кёлден да кетеди.
Ашхы тенг джолгъа салыр, аман тенг джолдан тайдырыр.
Джырына кёре эжиую.
Иги джашны ышаны – аз сёлешиб, кёб тынгылар.
Тулпарлыкъ, билекден тюл – джюрекден.
Илму – джашауну джолу.
Рысхысына кёре, джаш ёсер, къышлыгъына кёре, мал ёсер.
Тилчи тилден къаныкъмаз.
Ач отунчуну ачыуу – бурнунда.
Биреу ашаб къутулур, биреу джалаб тутулур.
Къатын байлыкъны сюер, эр саулукъну сюер.

Логин:
Пароль:
	Запомнить меня на этом компьютере

Забыли свой пароль?
Регистрация