- Ургъан суудан башынгы сакъла.
- Сабийни джумушха джибер да, ызындан бар.
- Къонагъынгы артмагъын алма да, алгъышын ал.
- Ишин билген, аны сыйын чыгъарады.
- Джангыз торгъай джырламаз.
- Сескекли кесин билдирир.
- Адам туугъан джеринде, ит тойгъан джеринде.
- Къаллай салам берсенг, аллай джууаб алырса.
- Аман хансны – урлугъу кёб.
- Байдан умут эте, джарлыдан ёгюз багъасы къорады.
- Ойнай-ойнай кёз чыгъар.
- Джашынгы кесинг юретмесенг, джашау юретир.
- Намыс сатылыб алынмайды.
- Иги болса, тамадама – махтау, аман болса, меннге – айыб.
- Айырылмаз джууугъунга, унутмаз сёзню айтма.
- Эринчекни аурууу – кёб.
- Къуллукъчума, деб махтанма, къуллукъ – хаух джамчыды!
- Къазанчы аман болса, къазаны къайнамаз.
- Гугурук къычырмаса да, тангны атары къалмаз.
- Ата Джуртуму башы болмасам да, босагъасында ташы болайым.
- Шайтан алдады, тюзлюк къаргъады.
- Джарлы джети элни сёзюн этер.
- Илму – джашауну джолу.
- Телини эшигин, махтау джабар.
- Эркишини аманы тиширыуну джылатыр.
- Юй ишлеген балта эшикде къалыр.
- Телиге от эт десенг, юйюнге от салыр.
- Ариуну – ауруу кёб.
- Уллу айтханны этмеген – уллаймаз.
- Къарт бла баш аша, джаш бла аякъ аша.
- Ач къарным, тынч къулагъым.
- Аман къатын алгъан, арыр, иги къатын алгъан джарыр.
- Айтхан сёзюне табылгъан.
- Кечеси – аяз, кюню – къыш, джарлы къаргъагъа бир аш тюш!
- Телиге акъыл салгъандан эсе, ёлгеннге джан салырса.
- Агъач – джерни чырайы, кийим – эрни чырайы.
- Къарнынг ауруса, ауузунгу тый
- Джан саулукъ бермей, сан саулукъ бермезсе.
- Мен да «сен», дейме, сен да «кесим», дейсе.
- Юйлю уругъа ит чабмаз.
- Иги бла джюрюсенг, джетерсе муратынга, аман бла джюрюсенг, къалырса уятха.
- Ашарыкъда сайлагъаннга – чий гырджын.
- Тенги кёбню джау алмаз, акъылы кёбню дау алмаз.
- Къобан да къуру да къобханлай турмайды, адам да къуру да патчахлай турмайды.
- Ауузу бла къуш тута айланады.
- Ишге юренсин къоллары, халкъ бла болсун джоллары.
- Джолда аягъынга сакъ бол, ушакъда тилинге сакъ бол.
- Окъ къызбайны джокълайды.
- Келгинчи, къонакъ уялыр, келгенден сора, къонакъбай уялыр.
- Башы ишлегенни, ауузу да ишлер.
Профиль
|
|
|
|||