- Эл ауузу – элек, анга ийнаннган – халек.
- Байлыкъ болгъан джерде, тынчлыкъ джокъду.
- Кюн – узун, ёмюр – къысха.
- Таугъа чыгъаллыкъ эсенг, тюзде къалма.
- Намыс болмагъан джерде, насыб болмаз.
- Эки къатын алгъанны къулагъы тынгнгаймаз.
- Тойну къарнашы – харс, джырны къарнашы – эжиу.
- Болджал ишни бёрю ашар.
- Эринчекге кюн узун.
- Айырылмаз джууугъунга, унутмаз сёзню айтма.
- Чакъырылмагъан къонакъ тёрге атламаз.
- Бермеген къол, алмайды.
- Зар адам ашынгы ашар, кесинги сатар.
- Бир абыннган – минг сюрюнюр.
- Кийимни бичсенг, кенг бич, тар этген къыйын тюлдю.
- Керти сёзге тёре джокъ.
- Соргъан айыб тюлдю, билмеген айыбды.
- Иши джокъну, сыйы джокъ.
- Аман къатын алгъан, арыр, иги къатын алгъан джарыр.
- Аманны эки битли тону болур, бирин сеннге кийдирир, бирин кеси киер.
- Джаз бир кюнню джатсанг, къыш талай кюнню абынырса.
- Ойнаб айтсанг да, эслеб айт.
- Тил – миллетни джаны.
- Бал чибинни ургъаны – ачы, балы – татлы.
- Нёгерсизни джолу узун.
- Эл элде бирер малынг болгъандан эсе, бирер тенгинг болсун.
- Къошда джокъгъа – юлюш джокъ.
- Тилчи тилден къаныкъмаз.
- Сёлеш деб шай берген, тохта деб, сом берген.
- Ашхы тенг джолгъа салыр, аман тенг джолдан тайдырыр.
- Къарны аманнга къазан такъдырма, къолу аманнга от джакъдырма.
- Ётюрюкню башын керти кесер.
- Тас болгъан бычакъны сабы – алтын.
- Къарнынг къанлынга кийирир.
- Бичгенде ашыкъма, тикгенде ашыкъ.
- Айтылгъан буйрукъ, сёгюлмез
- Къазанда болса, чолпугъа чыгъар.
- Бал ашаргъа сюе эсенг, чибин ургъаннга тёз.
- Ана – юйню кюн джарыгъы.
- Къайгъы тюбю – тенгиз.
- Танг атмайма десе да, кюн къоярыкъ тюйюлдю.
- Татлы сёз – балдан татлы.
- Таукелге нюр джауар.
- Асхат ашлыкъ сата, юйдегиси ачдан къата.
- Намысы джокъну – дуниясы джокъ.
- Дженгил джетерикме деб, узун джолну къоюб, къысхасын барма.
- Аякъларынгы джууургъанынга кёре узат.
- Эшекге миннген – биринчи айыб, андан джыгъылгъан – экинчи айыб.
- Ат басханны джер билед.
- Аллахха ийнаннган кишини, Аллах онгдурур ишин.
Профиль
|
|
|
|||