- Тёзген – тёш ашар!
- Джюрекге ариу – кёзге да ариу.
- Ашыкъгъанны этеги бутуна чырмалыр.
- Аз айтсам, кёб ангылагъыз.
- Чомартха Тейри да борчлуду.
- Ашхы тенг джолгъа салыр, аман тенг джолдан тайдырыр.
- Хата – гитчеден.
- Таукел тауну аудурур.
- Ишлерге уял да, ашаргъа табма.
- Татлы тилде – сёз ариу, чемер къолда – иш ариу.
- Къызны минг тилер, бир алыр.
- Тилчиден кери бол.
- Къоркъакъны кёзю экили кёрюр.
- Оюмсуз атлагъан, аджалсыз ёлюр.
- Ариу – кёзге, акъыл – джюрекге.
- Киштикге къанат битсе, чыпчыкъ къалмаз эди.
- Эрни эр этерик да, къара джер этерик да, тиширыуду.
- Юреннген ауруу къалмаз.
- Кёз – сюйген джерде, къол – ауругъан джерде.
- Къумурсхала джыйылсала, пилни да джыгъадыла.
- Уллу сёзде уят джокъ.
- Нафысынгы айтханын этме, намысынгы айтханын эт.
- Башсыз урчукъ тюзюне айланмаз.
- Баргъанынга кёре болур келгенинг.
- «Ёгюз, джаргъа джууукъ барма, меннге джюк боллукъса», - дегенди эшек.
- Айырылгъанланы айю ашар, бёлюннгенлени бёрю ашар.
- Билим – акъылны чырагъы.
- Сютню башын джалагъан къутулур, тюбюн ичген тутулур.
- Уллу къашыкъ эрин джыртар.
- Ишлегенде эринме, ишде чолакъ кёрюнме.
- Сескекли кесин билдирир.
- Бал ашаргъа сюе эсенг, чибин ургъаннга тёз.
- Чабар ат – джетген къыз.
- Аш хазыр болса, иш харам болур.
- Чакъырылмагъан къонакъ – орунсуз.
- Кёпюр салгъан кеси ётер, уру къазгъан кеси кетер.
- Акъыл къартда, джашда тюйюлдю – башдады.
- Аманны тукъумуна къарама, игини тукъумун сорма.
- Сёз садакъдан кючлюдю.
- Азыгъы аз, алгъа къабар, аты аман, алгъа чабар.
- Биреу ашаб къутулур, биреу джалаб тутулур.
- Эринчекни эр алмаз, эр алса да, кёл салмаз, кёл салса да, кёб бармаз!
- Сакъламагъан затынга джолукъсанг, не бек къууанаса, не бек ачыйса.
- Ата джурт – алтын бешик.
- Кюн – узун, ёмюр – къысха.
- Къыйынлы джети элге оноу этер.
- Къыйынлы джети элни къайгъысын этер.
- Ойнай билмеген, оюн бузар.
- Кёзню ачылгъаны – иги, ауузну джабылгъаны – иги.
- Къарны аманнга къазан такъдырма, къолу аманнга от джакъдырма.
Профиль
|
|
|
|||