Эльбрусоид :: Форум

Эл ауузу – элек, анга ийнаннган – халек.
Ачылгъан эт джабылыр, кёрген кёз унутмаз.
Бермеген къол, алмайды.
Керилген да, ургъан кибикди.
Ашлыкъ – бюртюкден, джюн – тюкден.
Джырчы ёлсе, джыры къалыр.
Юреннген ауруу къалмаз.
Джеринден айырылгъан – джети джылар, джуртундан айырылгъан – ёлгюнчю джылар.
Кютгени беш эчки, сызгъыргъаны уа, джерни джарады.
Келлик заман – къартлыкъ келтирир, кетген заман – джашлыкъ ёлтюрюр.
Атлыны кёрсе, джаяуну буту талыр.
Аллахха ийнаннган кишини, Аллах онгдурур ишин.
Баш – акъыл ючюн, акъылман – халкъ ючюн.
Къазанны башы ачыкъ болса, итге уят керекди.
Терек ауса, отунчу – кёб.
Таякъ этден ётер, тил сюекден ётер.
Дженгил джетерикме деб, узун джолну къоюб, къысхасын барма.
Тилчи бир сагъатха айлыкъ хата этер.
Тил джюрекге джол ишлейди.
Айтхан сёзюне табылгъан.
Ёлген эшек бёрюден къоркъмайды.
Таула не мийик болсала да, аууш табылыр.
Дуния малгъа сатылма, кесингден телиге къатылма.
Кюн кёрмеген, кюн кёрсе, кюндюз чыракъ джандырыр.
Эки ойлашыб, бир сёлешген.
Тай асырагъан, атха минер.
Айтханы чапыракъдан ётмеген.
Джашынгы кесинг юретмесенг, джашау юретир.
Элде адам къалмаса, ит тахтагъа минер.
Эркиши – от, тиширыу – суу.
Ашыкъгъанны этеги бутуна чырмалыр.
Акъыл неден да кючлюдю.
Ашхы болсанг, атынг чыгъар, аман болсанг, джанынг чыгъар.
Ата джурт – алтын бешик.
Хатерли къул болур.
Ёпкелегенни ашы татлы болады.
Бюгюн дуния кибик, тамбла ахыратды.
Чомартха хар кюн да байрамды.
Айырылмаз джууугъунга, унутмаз сёзню айтма.
Минг тенг да азды, бир джау да кёбдю.
Агъач – джерни чырайы, кийим – эрни чырайы.
Аманнга алтын чыдамаз.
Миллетни бойну – базыкъ, аны бла кюрешген – джазыкъ.
Экеулен сёлеше тура эселе, орталарына барыб кирме.
Уллу атлама – абынырса, уллу къабма – къарылырса.
Сёз къанатсыз учар.
Ариу сёзде ауруу джокъ.
Окъумагъан сокъурду, сокъур ташха абыныр!
Ким бла джюрюсенг, аны кёзю бла кёрюнюрсе.
Ариу сёз аурууунгу алыр.

Логин:
Пароль:
	Запомнить меня на этом компьютере

Забыли свой пароль?
Регистрация