- Джолда аягъынга сакъ бол, ушакъда тилинге сакъ бол.
- Азыгъы аз, алгъа къабар, аты аман, алгъа чабар.
- Джерни букъусу кёкге къонмаз.
- Къулакъдан эсе, кёзге ышан.
- Туз, гырджын аша, тюзлюк бла джаша.
- Чабар ат – джетген къыз.
- Айраннга суу къош, телиге джол бош.
- Къууут – джелге, берне – бошха.
- Окъумагъан сокъурду, сокъур ташха абыныр!
- Тойгъандан сора, ашны сёкме.
- Тойгъан антын унутур.
- Ата – баланы уясы.
- Сабий болмагъан джерде, мёлек болмаз.
- Ачылгъан эт джабылыр, кёрген кёз унутмаз.
- Босагъа таш юйге кирмей эди, тыбыр таш эшикге чыкъмай эди.
- Адамгъа аман кюн соруб келмейди.
- Джаханимни кёрмей, джандетге кёл салмазса.
- Иги адам абынса да, джангылмаз.
- Ёлюр джаннга, ёкюл джокъ.
- Акъылсызны джууукъгъа алма, акъыллыны кенгнге салма.
- Джюрек кёзден алгъа кёрюр.
- Мени джылытмагъан кюн, меннге тиймесин!
- Ач отунчуну ачыуу – бурнунда.
- Джауумдан сора, кюн кюйдюрюр, ётюрюкден сора, айыб кюйдюрюр.
- Ишни ахырын ойламай, аллын башлама.
- Сакъалы текени да бар, мыйыгъы киштикни да бар.
- Джахил болса анасы, не билликди баласы?
- Берекет берсин деген джерде, берекет болур.
- Акъдан къара болмаз.
- Бети – къучакълар, джюреги – бычакълар.
- Таула не мийик болсала да, аууш табылыр.
- Баш – акъыл ючюн, акъылман – халкъ ючюн.
- Тойгъа алгъа да барма, тойда артха да къалма.
- Юй ишлеген балта эшикде къалыр.
- Иесиз малны бёрю ашар.
- Зарда марда джокъ.
- Сыфатында болмагъаны, суратында болмаз.
- Билим – акъылны чырагъы.
- Тыш элде солтан болгъандан эсе, кесинги элде олтан болгъан игиди!
- Адамны сабийин сюйген джюреги, бычакъча, джитиди.
- Шекер бла туз – бир болмаз, ушамагъан – юй болмаз.
- Байлыкъ келсе, акъыл кетер.
- Иги бла джюрюсенг, джетерсе муратынга, аман бла джюрюсенг, къалырса уятха.
- Къарнынг къанлынга кийирир.
- Керек ташны ауурлугъу джокъ.
- Ичимден чыкъды хата, къайры барайым сата?
- Тёзгеннге, джабылгъан эшик ачылыр.
- Сабий кёргенин унутмаз.
- Тёгюлген тюгел джыйылмайды.
- Суугъа – таянма, джаугъа – ийнанма.
Профиль
|
|
|
|||