- Кёзю сокъурдан – къоркъма, кёлю сокъурдан – къоркъ.
- Чакъырылмагъан къонакъ къачан кетерин сормаз.
- Тилде сюек болмаса да, сюек сындырыр.
- Ариу сёз – джаннга азыкъ, аман сёз – башха къазыкъ.
- Келинни – келгинчи, бёркню кийгинчи кёр.
- «Ёгюз, джаргъа джууукъ барма, меннге джюк боллукъса», - дегенди эшек.
- Минг тенг да азды, бир джау да кёбдю.
- Эки къатын алгъанны къулагъы тынгнгаймаз.
- Ач къалгъандан, кеч къалгъан къолай.
- Таукелге нюр джауар.
- Тынгылагъан тынгы бузар.
- Сакъ юйюне сау барыр.
- Эл тойса, тоймагъан, эл къойса, къоймагъан.
- Ётюрюкчюню шагъаты – къатында.
- Босагъагъа джууукъ орун болса, ашыгъыб тёрге озма.
- Ётюрюк хапар аякъ тюбю бла джюрюйдю.
- Чыбыкълыкъда бюгюлмеген, къазыкълыкъда бюгюлмей эди.
- Эри аманны, къатыны – аман.
- Душманны тышы – акъ, ичи – къара.
- Тюкюрюк баш джармаз, налат кёз чыгъармаз!
- Аманнга игилик этсенг, юйюнге сау бармазса.
- Кёзню ачылгъаны – иги, ауузну джабылгъаны – иги.
- Бозанг болмагъан джерге, къалагъынгы сукъма.
- Билгенни къолу къарны джандырыр.
- Тешигини къатында, чычхан да батыр болур.
- Дууулдаса – бал чибин, къонса – къара чибин.
- Ёмюрлюк шохлукъну джел элтмез.
- Ёлюк кебинсиз къалмаз.
- Иши джокъну, сыйы джокъ.
- Джылкъыдан – ат чыгъар, тукъумдан – джаш чыгъар.
- Юре билмеген ит, къонакъ келтирир.
- Адам сёзюнден белгили.
- Эркишиге тары кебек танг кёрюнюр.
- Байлыкъ келсе, акъыл кетер.
- Ашлыкъ – бюртюкден, джюн – тюкден.
- Нарт сёз къарт болмаз.
- Акъыл къартда, джашда тюйюлдю – башдады.
- Джукъу тёшек сайламайды.
- Кенгеш болса, уруш болмаз.
- Суугъа – таянма, джаугъа – ийнанма.
- Иги бла джюрюсенг, джетерсе муратынга, аман бла джюрюсенг, къалырса уятха.
- Болджал ишни бёрю ашар.
- Арбаз сайлама да, хоншу сайла.
- Тили узунну, намысы – къысха.
- Къуру гыбыт бек дыгъырдар.
- Аманны эки битли тону болур, бирин сеннге кийдирир, бирин кеси киер.
- Келинин тута билмеген, къул этер, къызын тута билмеген, тул этер.
- Тулпарлыкъ, билекден тюл – джюрекден.
- Биреуню тёрюнден, кесинги эшик артынг игиди.
- Ариу сёзде ауруу джокъ.
Профиль
|
|
|
|||