- Джюрек кёзден алгъа кёрюр.
- Бичгенде ашыкъма, тикгенде ашыкъ.
- Тулпарлыкъ, билекден тюл – джюрекден.
- Аман киши кеси юйюнде – къонакъ.
- Иши джокъну, сыйы джокъ.
- Иги бла джюрюсенг, джетерсе муратынга, аман бла джюрюсенг, къалырса уятха.
- Ишлемеген – тишлемез.
- Джангыз терек къынгыр ёсер.
- Тилчи тилден къаныкъмаз.
- Сыфатында болмагъаны, суратында болмаз.
- Ашарыкъда сайлагъаннга – чий гырджын.
- Чомартха хар кюн да байрамды.
- Аш иеси бла татлыды.
- Мураты болгъанны джюрек тебюую башхады.
- Ишни аллы бла къууанма да, арты бла къууан.
- Къыз чыгъаргъан – къызыл къымжа.
- Эллинг бла джау болсанг да, юйюнг бла джау болма.
- Джюз элде джюз ёгюзюм болгъандан эсе, джюз джууугъум болсун.
- Рысхы джалгъанды: келген да этер, кетген да этер.
- Чомарт бергенин айтмаз.
- Аман хансны – урлугъу кёб.
- Бозанг болмагъан джерге, къалагъынгы сукъма.
- Ата Джуртуму башы болмасам да, босагъасында ташы болайым.
- Окъугъан – асыу, окъумагъан – джарсыу.
- Гугурук къычырмаса да, тангны атары къалмаз.
- От этилмеген джерден тютюн чыкъмайды.
- Аллахдан тилесенг, кёб тиле.
- Эл тойса, тоймагъан, эл къойса, къоймагъан.
- Ашхылыкъ джерде джатмайды, аманлыкъ суугъа батмайды.
- Кюн кёрмеген, кюн кёрсе, кюндюз чыракъ джандырыр.
- Сагъышы джокъ – джукъучу, акъылы джокъ – къаугъачы.
- Ариу – кёзге, акъыл – джюрекге.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Ауурну тюбю бла, дженгилни башы бла джюрюген.
- Этни да ашады, бетни да ашады.
- Къонакъ кёб келюучю юйню, къазаны отдан тюшмез.
- Айтылгъан сёз ызына къайтмаз.
- Акъыл неден да кючлюдю.
- Башсыз урчукъ тюзюне айланмаз.
- Къартны сыйын кёрмеген, къартлыгъында сыйлы болмаз.
- Ана къолу ачытмаз.
- Чабакъсыз кёлге къармакъ салгъанлыкъгъа, чабакъ тутмазса.
- Кёзю сокъурдан – къоркъма, кёлю сокъурдан – къоркъ.
- Юй кюйдю да, кюйюз чыкъды, ортасындан тюйюш чыкъды.
- Джарашыу сюйген – джалынчакъ.
- Бал – татлы, балдан да бала – татлы.
- Билим насыб берир, билим джолну керир.
- Аманны эки битли тону болур, бирин сеннге кийдирир, бирин кеси киер.
- Кёпюр салгъан кеси ётер, уру къазгъан кеси кетер.
- Таула не мийик болсала да, аууш табылыр.
Профиль
|
|
|
|||