- Кёрмегеннге кебек – танг, битмегеннге сакъал – танг.
- Ёксюзню къалачы уллу кёрюнюр.
- Башда акъыл болмаса, эки аякъгъа кюч джетер.
- Ойнай билмеген, уруб къачар.
- Уллу къашыкъ эрин джыртар.
- Огъурлуну сёзю – суу, огъурсузну сёзю – уу.
- Алма терегинден кери кетмез.
- Джарлыны тону джаз битер.
- Накъырданы арты керти болур.
- Дуния малгъа сатылма, кесингден телиге къатылма.
- Эшекге миннген – биринчи айыб, андан джыгъылгъан – экинчи айыб.
- Ургъан суудан башынгы сакъла.
- Кесинг сынамагъан затны, адамгъа буюрма.
- Кюн – узун, ёмюр – къысха.
- Джетген къыз джерли эшекни танымаз.
- Аууздан келген, къолдан келсе, ким да патчах болур эди.
- Сабийликде юретмесенг, уллу болса – тюзелмез.
- Айыбны суу бла джууалмазса.
- Таукел къуру къалмаз.
- Сескекли кесин билдирир.
- Садакъачыны джаны – къапчыгъында.
- Джарлы джети элни сёзюн этер.
- Джангыз терек къынгыр ёсер.
- Сёз садакъдан кючлюдю.
- Тойгъа барсанг, тоюб бар, эски тонунгу къоюб бар.
- Дуния аламаты сен эсенг да, игиме деб айтма.
- Бал – татлы, балдан да бала – татлы.
- Шайтан алдады, тюзлюк къаргъады.
- Аз сёлеш, кёб ишле.
- Суугъа – таянма, джаугъа – ийнанма.
- Джумушакъ сёз къаты таякъны сындырыр.
- Аш кетер да бет къалыр.
- Ичимден чыкъды хата, къайры барайым сата?
- Эркишини аманы тиширыуну джылатыр.
- Ашда – бёрю, ишде – ёлю.
- Адамны адамлыгъы къыйынлыкъда айгъакъланады.
- Къралынгы – душмандан, башынгы от бла суудан сакъла.
- Къыйынлы джети элни къайгъысын этер.
- Айран ичген – къутулду, джугъусун джалагъан – тутулду.
- Адам сёзюнден белгили.
- Ата Джуртча джер болмаз, туугъан элча эл болмаз.
- Бир абыннган – минг сюрюнюр.
- Джолда аягъынга сакъ бол, ушакъда тилинге сакъ бол.
- Туз, гырджын аша, тюзлюк бла джаша.
- Сёз сёзню айтдырыр.
- Тин – байлыгъынг, терен саулугъунг.
- Джиби бир къат джетмей эди да, эки къат тарта эди.
- Ач да бол, токъ да бол – намысынга бек бол.
- Юй кюйдю да, кюйюз чыкъды, ортасындан тюйюш чыкъды.
- Тас болгъан бычакъны сабы – алтын.
Профиль
|
|
|
|||