- Аман адам этегингден тутса, кес да къач.
- Къыз чыгъаргъан – къызыл къымжа.
- Къозулугъунда тоймагъан, къойлугъунда тоймаз.
- Ариу сёзде ауруу джокъ.
- Ичимден чыкъды хата, къайры барайым сата?
- Кечеси – аяз, кюню – къыш, джарлы къаргъагъа бир аш тюш!
- Джаш къарыу бла кючлю, къарт акъыл бла кючлю.
- Чабакъ башындан чирийди.
- Эли джокъну – кёлю джокъ.
- Онгсузну – джакъла, тенгликни – сакъла.
- Ач келгенни – тойдур, кеч келгенни – къондур.
- Биреу ашаб къутулур, биреу джалаб тутулур.
- Тик ёргени, тик энгишгеси да болады.
- Эркишини аманы тиширыуну джылатыр.
- Байлыкъ адамны сокъур этер.
- Ач къарным, тынч къулагъым.
- Рысхысына кёре, джаш ёсер, къышлыгъына кёре, мал ёсер.
- Окъумагъан сокъурду, сокъур ташха абыныр!
- Ачыу алгъа келсе, акъыл артха къалады.
- Юре билмеген ит, къонакъ келтирир.
- Сакъ юйюне сау барыр.
- Аманнга игилик этсенг, юйюнге сау бармазса.
- Ханнга да келеди хариблик.
- Керилген да, ургъан кибикди.
- Джарлы джети элни сёзюн этер.
- Къартны бурнун сюрт да, оноугъа тут.
- Татлы сёз – балдан татлы.
- Суу ичген шауданынга тюкюрме.
- Рысхы – насыбха къор.
- Гырджын – тепсини тамадасы.
- Телиге от эт десенг, юйюнге от салыр.
- Терек ауса, отунчу – кёб.
- Байлыкъ тауусулур, билим тауусулмаз.
- Къарны аманнга къазан такъдырма, къолу аманнга от джакъдырма.
- Къобан да къуру да къобханлай турмайды, адам да къуру да патчахлай турмайды.
- Иги сёз – джаннга азыкъ, аман сёз башха – къазыкъ.
- Шапа кёб болса, аш татымсыз болур.
- Телиге акъыл салгъандан эсе, ёлгеннге джан салырса.
- Джерни букъусу кёкге къонмаз.
- Къарнынг ауруса, ауузунгу тый
- Уллу сёзде уят джокъ.
- Ойнай билмеген, уруб къачар.
- Бал чибинни ургъаны – ачы, балы – татлы.
- Тойгъанлыкъ къойгъа джарашады.
- Телини эшигин, махтау джабар.
- Тили узунну, намысы – къысха.
- Ханы къызы буюгъа-буюгъа киштик болду.
- Эр абынмай, эл танымаз.
- Билмейме деген – бир сёз
- «Ма», - дегенни билмесенг, «бер», - дегенни билмезсе.
Профиль
|
|
|
|||