- Ашхы болсанг, атынг чыгъар, аман болсанг, джанынг чыгъар.
- Ётюрюк хапар аякъ тюбю бла джюрюйдю.
- Атадан ёксюз – бир ёксюз, анадан ёксюз – эки ёксюз.
- Иги – алгъыш этер, аман – къаргъыш этер.
- Ишлерге уял да, ашаргъа табма.
- Башы ишлегенни, ауузу да ишлер.
- Керек ташны ауурлугъу джокъ.
- Накъырда – кертини келечиси.
- Ачны эсинде – аш.
- Къонакъ болсанг, ийнакъ бол.
- Адеб этмеген, адеб кёрмез.
- Джаралыны джастыгъында сау ёлюр.
- Къарын къуру болса, джюрек уру болур.
- Келинни – келгинчи, бёркню кийгинчи кёр.
- Къыйынлы джети элге оноу этер.
- Юйлю уругъа ит чабмаз.
- Хаухну атма, ёнгкючню сатма.
- Хунаны тюбюн къазсанг, юсюнге ауар.
- Чыкълы кюнде чыкъмагъан, чыкъса къуру кирмеген.
- Сабийни джумушха джибер да, ызындан бар.
- Садакъачыны джаны – къапчыгъында.
- Эки элинги тыйсанг, джети элде махталырса.
- Джаз бир кюнню джатсанг, къыш талай кюнню абынырса.
- Джарлы эскисин джамаса, къууаныр.
- Сескекли кесин билдирир.
- Босагъагъа джууукъ орун болса, ашыгъыб тёрге озма.
- Сабий кёргенин унутмаз.
- Къыз чыгъаргъан – къызыл къымжа.
- Чомарт бергенин айтмаз.
- Ариу сёз – джаннга азыкъ, аман сёз – башха къазыкъ.
- Уясында не кёрсе, учханында аны этер.
- Ашхылыкъ джерде джатмайды, аманлыкъ суугъа батмайды.
- Къолу уллу – асыу, аягъы уллу – джарсыу.
- Ханнга да келеди хариблик.
- Артына баргъанны, къатына барма.
- Дуния мал дунияда къалады.
- От кюйдюрген, сау болса да, тот кюйдюрген, сау болмаз.
- Таш бла ургъанны, аш бла ур.
- Намыс сатылыб алынмайды.
- Чомарт къонакъ юй иесин сыйлар.
- Суу да къайтады чыкъгъан джерине.
- Рысхы – сют юсюнде кёмюк кибикди.
- Иги адам абынса да, джангылмаз.
- Сагъыш – къартлыкъгъа сюйюмчю.
- Къууут – джелге, берне – бошха.
- Айраннга суу къош, телиге джол бош.
- Сютден ауузу кюйген, суугъа юфгюре эди.
- Тойгъан джерден туугъан джер игиди.
- Аджашханны ызындагъы кёреди, джангылгъанны джанындагъы биледи.
- Эшекге миннген – биринчи айыб, андан джыгъылгъан – экинчи айыб.
Профиль
|
|
|
|||