- Тынгылагъан тынгы бузар.
- Шапа кёб болса, аш татымсыз болур.
- Акъыл къартда, джашда тюйюлдю – башдады.
- Адебни адебсизден юрен.
- Кирсизни – саны таза, халалны – къаны таза.
- Билмейме деген – бир сёз
- Джюз элде джюз ёгюзюм болгъандан эсе, джюз джууугъум болсун.
- Хунаны тюбюн къазсанг, юсюнге ауар.
- Зар адамны насыбы болмаз.
- Чомартха хар кюн да байрамды.
- Таукелге нюр джауар.
- Рысхы джалгъанды: келген да этер, кетген да этер.
- Эрине къаргъыш этген къатын, эрнин къабар.
- Адамны артындан къара сабан сюрме.
- Арпа, будай – ащды, алтын, кюмюш а – ташды.
- Тёгюлген тюгел джыйылмайды.
- Чабакъ башындан чирийди.
- Къулакъдан эсе, кёзге ышан.
- Къарнынг тойгъунчу аша да, белинг талгъынчы ишле.
- Къобан да къуру да къобханлай турмайды, адам да къуру да патчахлай турмайды.
- Ётюрюкден тюбю джокъ, кёлтюрюрге джиби джокъ.
- Кенгеш болса, уруш болмаз.
- Айтханы чапыракъдан ётмеген.
- Юре билмеген ит, къонакъ келтирир.
- Кюлме джашха – келир башха.
- Таш ата билмеген, башына урур.
- Экеулен сёлеше тура эселе, орталарына барыб кирме.
- Къызбайны юйюне дери сюрсенг, батыр болур.
- Суу ичген шауданынга тюкюрме.
- Иги болса, тамадама – махтау, аман болса, меннге – айыб.
- Эки ойлашыб, бир сёлешген.
- Суу кетер, таш къалыр.
- Тулпарлыкъ, билекден тюл – джюрекден.
- Къайтырыкъ эшигинги, къаты уруб чыкъма.
- Ишленмеклик адамлыкъды.
- Ач къарным, тынч къулагъым.
- Рысхы – насыбха къор.
- Термилгенинги табмазса, кюлгенинге тюберсе.
- Суу да къайтады чыкъгъан джерине.
- Ишлегенде эринме, ишде чолакъ кёрюнме.
- Чомарт бергенин айтмаз.
- Байлыкъ тауусулур, билим тауусулмаз.
- Бал ашаргъа сюе эсенг, чибин ургъаннга тёз.
- Ойнай билмеген, уруб къачар.
- Телиге акъыл салгъандан эсе, ёлгеннге джан салырса.
- Адам туугъан джеринде, ит тойгъан джеринде.
- Къан бла кирген, джан бла чыгъар.
- Джарашыу сюйген – джалынчакъ.
- «Ма», - дегенни билмесенг, «бер», - дегенни билмезсе.
- Тойгъан джерге джети къайт.
Профиль
|
|
|
|||