Войти на сайт
11 Мая 2026 года

 

  • Къартны бурнун сюрт да, оноугъа тут.
  • Джети тилни билген джети кишиди.
  • Бичгенде ашыкъма, тикгенде ашыкъ.
  • Керти сёзге тёре джокъ.
  • Джетген къыз джерли эшекни танымаз.
  • Аман хансны – урлугъу кёб.
  • Кёбден умут этиб, аздан къуру къалма.
  • Ашаса, ашамаса да, бёрюню ауузу – къан.
  • Чыбыкълыкъда бюгюлмеген, къазыкълыкъда бюгюлмей эди.
  • Ашха уста, юйюнде болсун
  • Рысхы – сют юсюнде кёмюк кибикди.
  • Кёлю джокъну – джолу джокъ.
  • Ётюрюкню къуйругъу – бир тутум.
  • Къууут – джелге, берне – бошха.
  • Игиге айтсанг – билир, аманнга айтсанг – кюлюр.
  • Ёксюзню тилеги къабыл болур.
  • Эртде тургъан бла эртде юйленнген сокъуранмаз.
  • Ариу сёз аурууунгу алыр.
  • Адеб базарда сатылмаз.
  • Суугъа – таянма, джаугъа – ийнанма.
  • Къарын къуру болса, джюрек уру болур.
  • Къыз келсе, джумуш эте келеди, къатын келсе, ушакъ эте келеди.
  • Тил бла келеди джыр да.
  • Бетинги сатма, малынгы сат.
  • Джауумдан сора, кюн кюйдюрюр, ётюрюкден сора, айыб кюйдюрюр.
  • Орундукъ тюбюнде атылсам да, орта джиликме, де да айлан.
  • Ишни ахырын ойламай, аллын башлама.
  • Къарт болгъан джерде, берекет болур, сабий болгъан джерде, оюн болур.
  • Эри аманны, къатыны – аман.
  • Экеулен сёлеше тура эселе, орталарына барыб кирме.
  • Алгъанда – джууукъ, бергенде – джау.
  • Акъдан къара болмаз.
  • Ойнай билмеген, уруб къачар.
  • Aдам боллукъ, сыфатындан белгили.
  • Ёпкелегенни ашы татлы болады.
  • Аманнга игилик этсенг, юйюнге сау бармазса.
  • Джыйырма къойну юч джыйырма эбзе кюте эди.
  • Ёксюзню къалачы уллу кёрюнюр.
  • Ашхы сёз таш тешер.
  • Кёб къычыргъандан – къоркъма, тынч олтургъандан – къоркъ.
  • Зарда марда джокъ.
  • Ким бла джюрюсенг, аны кёзю бла кёрюнюрсе.
  • Тилчи тилден къаныкъмаз.
  • Бойнуму джети джерден кессенг да, мен ол ишни этеллик тюлме.
  • Джахил болса анасы, не билликди баласы?
  • Къызгъанчдан ычхыныр, мухардан ычхынмаз.
  • Окъугъанны бети джарыкъ.
  • Кёкдеги болмаса, джердегин кёрмейди.
  • Биреу ашаб къутулур, биреу джалаб тутулур.
  • Асхат ашлыкъ сата, юйдегиси ачдан къата.

 

Архив Форума » Зеленый Форум [архив] » - ЗФ - Ана тилибизде
Страницы: Пред. 1 ... 16 17 18 19 20 ... 62 След.
RSS
Келигиз, тил байлыгъыбызны сакълайыкъ!
 
#426
Джаратама0
05.03.2008 20:50:39
Батчаланы Али Мурат
Сау болугъуз, излеб табаргъа кюрешрикме

Простите, что по русски Эльбрусоид может помочь мне получить этот разговорник?)))
 
 
 
#427
Джаратама0
05.03.2008 20:53:29
Апокалипсис_бла)))
Эльбрусоид может помочь мне получить этот разговорник?
"Эльбрусоидни" билмейме, адресигизни ийсегиз мен кесим ийерме саугъагъа ол китабны!
 
 
 
#428
Джаратама0
05.03.2008 20:55:46
Али-Мурат Хасанович, бизни "Келигиз тил байлыгъыбызны сакълайыкъ" деген темабызда джаш адамлагъа тилибиз тас болмазча не этерге керегин айтсагъыз а?
 
 
 
#429
Джаратама0
05.03.2008 21:02:06
Девушка Гор
Али-Мурат Хасанович, бизни "Келигиз тил байлыгъыбызны сакълайыкъ" деген темабызда джаш адамлагъа тилибиз тас болмазча не этерге керегин айтсагъыз а?
Мен къарачай-малкъар тилни университетде окъутханлы быйыл 21 бир джыл болады, аллай бир заманны джаш адамла бла ишлей, аланы тил байлыгъыбызгъа, адабиятыбызгъа, тарихибизге къалай къарагъанларын кёрюб турама. Тили болмагъан халкъ, ол халкъ тюлдю. Тилни билмеген адам а кесин ёксюзге тергейди, миллетибизни тамблагъы кюню сизни къолугъуздады. Тилни сакълар ючюн, мени сартын аны билген баш борч тюлдю. Аны бла тюз хайырлана билирге, терен сюзерге, ёсюмюне юлюш къошаргъа керекди. Ана тилде суратлау журнал, илму ишле чыгъаргъа керекдиле. Радиону, телевидениени, къарачай тилде заманларын аслам этерге керекди.
 
 
 
#430
Джаратама0
05.03.2008 21:03:49
Батчаланы Али Мурат
Сиз Къарачай - ногъай кафедраны тамадасызыз, сиз ангылагъаннгъы кёре, КЧГУну филология бёлюмюнде студентлеге къарачай тилден керек билим берилемиди? Сау болугъуз.
 
 
 
#431
Джаратама0
05.03.2008 21:03:54
ИНГИРИГИЗ АШХЫ БОЛСУН БАГЪАЛЫ ДЖЕРДЕШЛЕРИМ!!!!
Али-Мурат Эфенди. Мен кебден бери тышында джашагъан себебли кеб затдан хапарсызма.
Бусагъатда джаш телю ана тилде джазамыды?(проза., поэзия).
САУ болугъуз.
 
 
 
#432
Джаратама0
05.03.2008 21:07:08
КОРОЛЁК
Сиз Къарачай - ногъай кафедраны тамадасызыз, сиз ангылагъаннгъы кёре, КЧГУну филология бёлюмюнде студентлеге къарачай тилден керек билим берилемиди? Сау болугъуз.
Мен ангылагъаннга кёре, къарачай-малкъар тил бла адабиятдан керекли билим тыйыншлы дараджада бериледи. Къарачай-малкъар тилден устазлыкъ билим филология факультетден сора да, педагогика бла методиканы факультетинде да бериледи.
 
 
 
#433
Джаратама0
05.03.2008 21:11:21
Кергелен
Али-Мурат Эфенди. Мен кебден бери тышында джашагъан себебли кеб затдан хапарсызма.
Бусагъатда джаш телю ана тилде джазамыды?(проза., поэзия).
Къарачай-малкъар халкъны энчи шарты - назму, джыр джазыу бла кюрешиудю. Бизни классиклерибиз Мечиланы Кязим, Семенланы Смаил, Кулийланы Къайсын, Хубийланы Осман белгилисича бек джаш заманларындан башлагъандыла джазыб. Ол традиция бюгюн да сакъланады. "Къарачай", "Минги Тау" газетлени бетлеринде басмаланнган назмула анга шагъатлыкъ этедиле. Джаш тёлюню ичинде фахмулула кёбдюле, алагъа Аллах онг берсин!
 
 
 
#434
Джаратама0
05.03.2008 21:15:41
Батчаланы Али Мурат
салам алейкум! Али Мурат, сенден ("сиз" деб айтмайма, аттямдан юренгениме кёре, къартладан эшитгенимча, миллетибизде, кишиге да алай айтмагъандыла... кечмеклик тилейме терс эсем!), мени правону окъуйма, сора аны юсюнден бир соруум бар эди; джукъ "юридический" сёзлюк къарачай тилде этилгенмиди, чыкъгъанмыды? Аллай бир зат этерге, ол мени муратымды...
 
 
 
#435
Джаратама0
05.03.2008 21:16:49
Батчаланы Али Мурат
Сау болугъуз, иги муратларына джетсин джаш телюбюз!
 
 
 
#436
Джаратама0
05.03.2008 21:18:23
Батчаланы Али Мурат

Оюмугъзгъа кёре, тил хазнабыз (лексиконубуз) бусагъат къаллай халдады? Ёсюудемиди огъесе акъыртын артха кетиб барамыды? *ана-атала да сабийлерин тыйыб айлана эселе ана тил дерслеринден*
 
 
 
#437
Джаратама0
05.03.2008 22:29:42
Aybazullu
sama
Сан этмей къойгъаннга санамагъыз, сизни сорууларыгъызгъа Али-Мурат Хасанович, Аллах айтса, тамбла джууабла берликди
 
 
 
#438
Джаратама0
05.03.2008 22:32:22
Болсун.
 
 
 
#439
Джаратама0
05.03.2008 22:44:08
Девушка Гор
сагъышыбызда джокъ эди аллайгъа))
 
 
 
#440
Джаратама0
05.03.2008 22:50:28
Aybazullu
сагъышыбызда джокъ эди аллайгъа
 
 
 
#441
Джаратама0
05.03.2008 22:55:36
Девушка Гор
Джетелмейми къалдым? Бир кёб соруум бар эди.
 
 
 
#442
Джаратама0
06.03.2008 12:55:38
Акъыллычыкъ
Бир кёб соруум бар эди
Бар эсе бер сорууларынгы, бюгюнда келликди Али-Мурат Хасанович къонакъгъа, джазарбыз джууабла
 
 
 
#443
Джаратама0
06.03.2008 15:20:06
Батчаланы Али Мурат
Али-Мурат Хасанович, школда китабла къарачай тил бла литературадан эртде эски болгъандыла, аланы джангыртыргъа мадар бармыды? Бар эсе бюгюнге дери ол джумуш нек этилмегенди, ким этерге керекди аны?
 
 
 
#444
Джаратама0
06.03.2008 19:34:43
Акъыллычыкъ
Аламат соруу, мени кёлюме да бир кёб келеди ол. Джууабны бирге сакъларыкъбыз
 
 
 
#445
Джаратама0
06.03.2008 23:10:08
Девушка Гор
 
 
 
#446
Джаратама0
07.03.2008 16:11:39
Багъалы джамагъат, мен бюгюн КъЧР-ны халкъ джазыучусу Сюйюнчланы Азаматха къонакъгъа келгенме. Келгеними баш мураты неди десегиз, Азамат Алимович, 8-чи мартны аллы бла бютеу тиширыуланы байрамлары бла алгъышлаб, алагъа назмула окъургъа излейди. Сиз да, менича бу ариу назмулагъа сюйюб тынгыларыгъызгъа ышанама!
 
 
 
#447
Джаратама0
07.03.2008 16:32:30
Багъалы тиширыула! Сизни 8-чи март байрам бла таза джюрекден алгъышлайма. Насыб, саулукъ, кёб къууанчла теджейме! Мени китабларымда аналагъа, эгечлеге, юй бийчелеге, сюйгенлеге, джаш къызлагъа аталгъан джырла, назмула аслам орун аладыла. Мен бюгюн сизге "Белая лебедь на синей волне" деген джыр китабымдан джырланы сёзлерин айтыргъа сюеме.
Мени джерими тиширыулары
Мени джерими тиширыулары,
Чыгъанакъ ханс болса да джолугъуз,
Къайытыб келиб, отджагъабызны
Отун джандырды огъур къолугъуз.

Мени джерими тиширыулары,
Бир сабийге ёксюзлюк сынатмагъан,
Бир онгсуз къартны неда сакъатны
Къыйын кюнде тышына атмагъан.

Мени джерими тиширыулары,
Алтындан сыйлы джюрек къыллары,
Атыгъызны балсытыб айталла
Джырчыланы эм ариу джырлары.

Мени джерими тиширыулары,
О, сиз ненча къыйынлыкъ чекдигиз;
Джашлай эрлеригиз, джашларыгъыз
Урушда ёлюб, кёз джаш тёкдюгюз.

Мени джерими тиширыулары,
Туугъан джерден гюнахсыз юзюлюб,
Узакъ сыртлада, киши джуртлада
Инджилдигиз чачылыб, тёгюлюб.

Мени джерими тиширыулары,
Сиз тёлю эте, аналыкъ этдигиз,
Юзюлмез ючюн джерни юсюнден
Бизни тукъумубуз - юзюгюбюз.

Мени джерими тиширыулары,
Ким толу джазар къадарыгъызны?
Джумшакъ намазлыкъ этиб джаяма
Сизни аллыгъызгъа джырымы!
 
 
 
#448
Джаратама0
07.03.2008 16:41:06
Тиширыу эркишини къанатыды
Сени ючюн джолгъа атландым:
Тюзге бардым, таугъа чыкъдым,
Къууаннгандан къанатландым,-
Тиширыу эркишини къанатыды.

Сёлешсек, сен - акъыл тёбе,
Тюбешсек да биз кёб кере,
Къанатлача, къашны кере,-
Тиширыу эркишини къанатыды.

Ашыгъама игиликге,
Башым джетед мени кёкге,
Къушла учхан мийикликге,-
Тиширыу эркишини къанатыды.

Сени кёрсем, учунама,
Учуннгандан джыр джазама,
Макъам салыб учурама,-
Тиширыу эркишини къанатыды.

Кирсем да мен теренине
Сюймекликни тенгизине,
Батмазма, къол берсенг меннге, -
Тиширыу эркишини къанатыды.

Кёб къраллада мен айландым,
Ариуланы кёрюб къайтдым,
Ёнге джангыз сеннге айтдым:
Тиширыу эркишини къанатыды.
 
 
 
#449
Джаратама0
07.03.2008 16:50:51
Сюйюнчланы А
Сау болугъуз Азамат, бир бек къууандырдыгъыз, бир тилегим барды: "Алтын джумарыкъ" деген назмугъузну бир джазсагъыз а
 
 
 
#450
Джаратама0
07.03.2008 16:53:03
АЛТЫН ДЖУМАРЫКЪ
Алтын къанатлы сеир джумарыкъ
Сен болурмуса, билейим.
Манга сюймеклик хауа келтирген
От къанатынга тийеим.

Сюйдюрдюнг эсе, кюйдюрдюнг эсе,
Энд мындан ары джандырма,
Джаннган джюрекни ал да суугъа ат
Сен атхан сууда барырма.

Дунья зауугъум алтын джумарыкъ,
Бизни тийреде уя сал.
Алтын тохана ишетир эдим,
Кетмей къалыргъа унасанг.

Къанатлы хаман учуб турмайды,
Солуу алады кёзюуге.
Сени ауазынг керек болады
Джюрек джырыма эжиуге.

Сюйдюрдюнг эсе, кюйдюрдюнг эсе,
Энд мындан ары джандырма.
Сюймеклигими ал да суугъа ат ?
Сен атхан сууда барырма.
 
 
 
Страницы: Пред. 1 ... 16 17 18 19 20 ... 62 След.
Читают тему (гостей: 6)

 

Написать нам

Фонд «Содействие развитию карачаево-балкарской молодежи «Эльбрусоид»

© 2003-2026 Elbrusoid.org  |  Все права защищены Законами Гор.