Эльбрусоид :: Форум :: Келигиз, тил байлыгъыбызны сакълайыкъ!

Сабыр джетер муратха, сабырсыз къалыр уятха.
Кёзюнде тереги болгъан, чёбю болгъаннга кюле эди.
Экеу тутушса, биреу джыгъылыр.
Тик ёргени, тик энгишгеси да болады.
Аман къатын сабий табса, бий болур…
Акъыллы – эл иеси, тели – эл баласы.
Айран тёгюлсе, джугъусу къалыр.
Ашхы болсанг, атынг чыгъар, аман болсанг, джанынг чыгъар.
Къарны аманнга къазан такъдырма, къолу аманнга от джакъдырма.
Ойнаб айтсанг да, эслеб айт.
Окъ къызбайны джокълайды.
Танг атмайма десе да, кюн къоярыкъ тюйюлдю.
Зар адамны насыбы болмаз.
Сескекли кесин билдирир.
Тойгъандан сора, ашны сёкме.
Къууут – джелге, берне – бошха.
Эм уллу байлыкъ – джан саулукъ.
Хар адамгъа кеси миннген тау кибик.
Джаш болсун, къыз болсун, акъылы, саны тюз болсун.
Эл ауузу – элек, анга ийнаннган – халек.
Окъугъан – асыу, окъумагъан – джарсыу.
Ичимден чыкъды хата, къайры барайым сата?
Тилчиден кери бол.
Адам къыйынлыгъын кёлтюрюр, зауукълугъун кёлтюрмез.
Бир онгсуз адам адет чыгъарды, деб эштирик тюлсе.
Айран ичген – къутулду, джугъусун джалагъан – тутулду.
Элге къуллукъ этмеген, элге ие болмаз.
Аман адамны тепсинге олтуртсанг, къызынгы тилер.
Джукъу тёшек сайламайды.
Къызны минг тилер, бир алыр.
Тил – миллетни джаны.
Ханнга да келеди хариблик.
Джигер – джаннга къыйынлыкъ.
Джашынгы кесинг юретмесенг, джашау юретир.
Кесинг сынамагъан затны, адамгъа буюрма.
Атлыны ашхысы, ат тизгининден билинир
Юйлю уругъа ит чабмаз.
Ашхы адам – халкъ байлыгъы, ашхы джер – джашау байлыгъы.
Аманны тукъумуна къарама, игини тукъумун сорма.
Айныгъанлы алты кюн, тогъайгъанлы тогъуз кюн.
Юреннген ауруу къалмаз.
Тёгюлген тюгел джыйылмайды.
Биреуге аманлыкъ этиб, кесинге игилик табмазса.
Ауурну тюбю бла, дженгилни башы бла джюрюген.
Аман къатын алгъан, арыр, иги къатын алгъан джарыр.
Бермеген къол, алмайды.
Къозулугъунда тоймагъан, къойлугъунда тоймаз.
Ат басханны джер билед.
Борчунг бар эсе, хурджунунга ойлаб узал.
Бети – къучакълар, джюреги – бычакълар.

RSS

Келигиз, тил байлыгъыбызны сакълайыкъ!

Апокалипсис_бла))) Гость	#426 Джаратама0 05.03.2008 20:50:39 Батчаланы Али Мурат Сау болугъуз, излеб табаргъа кюрешрикме Простите, что по русски Эльбрусоид может помочь мне получить этот разговорник?)))

Батчаланы Али Мурат Гость	#427 Джаратама0 05.03.2008 20:53:29 Апокалипсис_бла))) Эльбрусоид может помочь мне получить этот разговорник? "Эльбрусоидни" билмейме, адресигизни ийсегиз мен кесим ийерме саугъагъа ол китабны!

Девушка Гор Гость	#428 Джаратама0 05.03.2008 20:55:46 Али-Мурат Хасанович, бизни "Келигиз тил байлыгъыбызны сакълайыкъ" деген темабызда джаш адамлагъа тилибиз тас болмазча не этерге керегин айтсагъыз а?

Батчаланы Али Мурат

Гость

#429

Джаратама0

05.03.2008 21:02:06

Девушка Гор
Али-Мурат Хасанович, бизни "Келигиз тил байлыгъыбызны сакълайыкъ" деген темабызда джаш адамлагъа тилибиз тас болмазча не этерге керегин айтсагъыз а?
Мен къарачай-малкъар тилни университетде окъутханлы быйыл 21 бир джыл болады, аллай бир заманны джаш адамла бла ишлей, аланы тил байлыгъыбызгъа, адабиятыбызгъа, тарихибизге къалай къарагъанларын кёрюб турама. Тили болмагъан халкъ, ол халкъ тюлдю. Тилни билмеген адам а кесин ёксюзге тергейди, миллетибизни тамблагъы кюню сизни къолугъуздады. Тилни сакълар ючюн, мени сартын аны билген баш борч тюлдю. Аны бла тюз хайырлана билирге, терен сюзерге, ёсюмюне юлюш къошаргъа керекди. Ана тилде суратлау журнал, илму ишле чыгъаргъа керекдиле. Радиону, телевидениени, къарачай тилде заманларын аслам этерге керекди.

КОРОЛЁК Гость	#430 Джаратама0 05.03.2008 21:03:49 Батчаланы Али Мурат Сиз Къарачай - ногъай кафедраны тамадасызыз, сиз ангылагъаннгъы кёре, КЧГУну филология бёлюмюнде студентлеге къарачай тилден керек билим берилемиди? Сау болугъуз.

Кергелен

Гость

#431

Джаратама0

05.03.2008 21:03:54

ИНГИРИГИЗ АШХЫ БОЛСУН БАГЪАЛЫ ДЖЕРДЕШЛЕРИМ!!!!
Али-Мурат Эфенди. Мен кебден бери тышында джашагъан себебли кеб затдан хапарсызма.
Бусагъатда джаш телю ана тилде джазамыды?(проза., поэзия).
САУ болугъуз.

Батчаланы Али Мурат

Гость

#432

Джаратама0

05.03.2008 21:07:08

КОРОЛЁК
Сиз Къарачай - ногъай кафедраны тамадасызыз, сиз ангылагъаннгъы кёре, КЧГУну филология бёлюмюнде студентлеге къарачай тилден керек билим берилемиди? Сау болугъуз.
Мен ангылагъаннга кёре, къарачай-малкъар тил бла адабиятдан керекли билим тыйыншлы дараджада бериледи. Къарачай-малкъар тилден устазлыкъ билим филология факультетден сора да, педагогика бла методиканы факультетинде да бериледи.

Батчаланы Али Мурат

Гость

#433

Джаратама0

05.03.2008 21:11:21

Кергелен
Али-Мурат Эфенди. Мен кебден бери тышында джашагъан себебли кеб затдан хапарсызма.
Бусагъатда джаш телю ана тилде джазамыды?(проза., поэзия).
Къарачай-малкъар халкъны энчи шарты - назму, джыр джазыу бла кюрешиудю. Бизни классиклерибиз Мечиланы Кязим, Семенланы Смаил, Кулийланы Къайсын, Хубийланы Осман белгилисича бек джаш заманларындан башлагъандыла джазыб. Ол традиция бюгюн да сакъланады. "Къарачай", "Минги Тау" газетлени бетлеринде басмаланнган назмула анга шагъатлыкъ этедиле. Джаш тёлюню ичинде фахмулула кёбдюле, алагъа Аллах онг берсин!

Aybazullu

Гость

#434

Джаратама0

05.03.2008 21:15:41

Батчаланы Али Мурат
салам алейкум! Али Мурат, сенден ("сиз" деб айтмайма, аттямдан юренгениме кёре, къартладан эшитгенимча, миллетибизде, кишиге да алай айтмагъандыла... кечмеклик тилейме терс эсем!), мени правону окъуйма, сора аны юсюнден бир соруум бар эди; джукъ "юридический" сёзлюк къарачай тилде этилгенмиди, чыкъгъанмыды? Аллай бир зат этерге, ол мени муратымды...

Кергелен Гость	#435 Джаратама0 05.03.2008 21:16:49 Батчаланы Али Мурат Сау болугъуз, иги муратларына джетсин джаш телюбюз!

sama

Гость

#436

Джаратама0

05.03.2008 21:18:23

Батчаланы Али Мурат

Оюмугъзгъа кёре, тил хазнабыз (лексиконубуз) бусагъат къаллай халдады? Ёсюудемиди огъесе акъыртын артха кетиб барамыды? *ана-атала да сабийлерин тыйыб айлана эселе ана тил дерслеринден*

Девушка Гор Гость	#437 Джаратама0 05.03.2008 22:29:42 Aybazullu sama Сан этмей къойгъаннга санамагъыз, сизни сорууларыгъызгъа Али-Мурат Хасанович, Аллах айтса, тамбла джууабла берликди

sama Гость	#438 Джаратама0 05.03.2008 22:32:22 Болсун.

Aybazullu Гость	#439 Джаратама0 05.03.2008 22:44:08 Девушка Гор сагъышыбызда джокъ эди аллайгъа))

Девушка Гор Гость	#440 Джаратама0 05.03.2008 22:50:28 Aybazullu сагъышыбызда джокъ эди аллайгъа

Акъыллычыкъ Гость	#441 Джаратама0 05.03.2008 22:55:36 Девушка Гор Джетелмейми къалдым? Бир кёб соруум бар эди.

Девушка Гор Гость	#442 Джаратама0 06.03.2008 12:55:38 Акъыллычыкъ Бир кёб соруум бар эди Бар эсе бер сорууларынгы, бюгюнда келликди Али-Мурат Хасанович къонакъгъа, джазарбыз джууабла

Акъыллычыкъ

Гость

#443

Джаратама0

06.03.2008 15:20:06

Батчаланы Али Мурат
Али-Мурат Хасанович, школда китабла къарачай тил бла литературадан эртде эски болгъандыла, аланы джангыртыргъа мадар бармыды? Бар эсе бюгюнге дери ол джумуш нек этилмегенди, ким этерге керекди аны?

Девушка Гор Гость	#444 Джаратама0 06.03.2008 19:34:43 Акъыллычыкъ Аламат соруу, мени кёлюме да бир кёб келеди ол. Джууабны бирге сакъларыкъбыз

Сорвиголова Гость	#445 Джаратама0 06.03.2008 23:10:08 Девушка Гор

Девушка Гор

Гость

#446

Джаратама0

07.03.2008 16:11:39

Багъалы джамагъат, мен бюгюн КъЧР-ны халкъ джазыучусу Сюйюнчланы Азаматха къонакъгъа келгенме. Келгеними баш мураты неди десегиз, Азамат Алимович, 8-чи мартны аллы бла бютеу тиширыуланы байрамлары бла алгъышлаб, алагъа назмула окъургъа излейди. Сиз да, менича бу ариу назмулагъа сюйюб тынгыларыгъызгъа ышанама!

Сюйюнчланы А

Гость

#447

Джаратама0

07.03.2008 16:32:30

Багъалы тиширыула! Сизни 8-чи март байрам бла таза джюрекден алгъышлайма. Насыб, саулукъ, кёб къууанчла теджейме! Мени китабларымда аналагъа, эгечлеге, юй бийчелеге, сюйгенлеге, джаш къызлагъа аталгъан джырла, назмула аслам орун аладыла. Мен бюгюн сизге "Белая лебедь на синей волне" деген джыр китабымдан джырланы сёзлерин айтыргъа сюеме.
Мени джерими тиширыулары
Мени джерими тиширыулары,
Чыгъанакъ ханс болса да джолугъуз,
Къайытыб келиб, отджагъабызны
Отун джандырды огъур къолугъуз.

Мени джерими тиширыулары,
Бир сабийге ёксюзлюк сынатмагъан,
Бир онгсуз къартны неда сакъатны
Къыйын кюнде тышына атмагъан.

Мени джерими тиширыулары,
Алтындан сыйлы джюрек къыллары,
Атыгъызны балсытыб айталла
Джырчыланы эм ариу джырлары.

Мени джерими тиширыулары,
О, сиз ненча къыйынлыкъ чекдигиз;
Джашлай эрлеригиз, джашларыгъыз
Урушда ёлюб, кёз джаш тёкдюгюз.

Мени джерими тиширыулары,
Туугъан джерден гюнахсыз юзюлюб,
Узакъ сыртлада, киши джуртлада
Инджилдигиз чачылыб, тёгюлюб.

Мени джерими тиширыулары,
Сиз тёлю эте, аналыкъ этдигиз,
Юзюлмез ючюн джерни юсюнден
Бизни тукъумубуз - юзюгюбюз.

Мени джерими тиширыулары,
Ким толу джазар къадарыгъызны?
Джумшакъ намазлыкъ этиб джаяма
Сизни аллыгъызгъа джырымы!

Сюйюнчланы А

Гость

#448

Джаратама0

07.03.2008 16:41:06

Тиширыу эркишини къанатыды
Сени ючюн джолгъа атландым:
Тюзге бардым, таугъа чыкъдым,
Къууаннгандан къанатландым,-
Тиширыу эркишини къанатыды.

Сёлешсек, сен - акъыл тёбе,
Тюбешсек да биз кёб кере,
Къанатлача, къашны кере,-
Тиширыу эркишини къанатыды.

Ашыгъама игиликге,
Башым джетед мени кёкге,
Къушла учхан мийикликге,-
Тиширыу эркишини къанатыды.

Сени кёрсем, учунама,
Учуннгандан джыр джазама,
Макъам салыб учурама,-
Тиширыу эркишини къанатыды.

Кирсем да мен теренине
Сюймекликни тенгизине,
Батмазма, къол берсенг меннге, -
Тиширыу эркишини къанатыды.

Кёб къраллада мен айландым,
Ариуланы кёрюб къайтдым,
Ёнге джангыз сеннге айтдым:
Тиширыу эркишини къанатыды.

Акъыллычыкъ Гость	#449 Джаратама0 07.03.2008 16:50:51 Сюйюнчланы А Сау болугъуз Азамат, бир бек къууандырдыгъыз, бир тилегим барды: "Алтын джумарыкъ" деген назмугъузну бир джазсагъыз а

Сюйюнчланы А Гость	#450 Джаратама0 07.03.2008 16:53:03 АЛТЫН ДЖУМАРЫКЪ Алтын къанатлы сеир джумарыкъ Сен болурмуса, билейим. Манга сюймеклик хауа келтирген От къанатынга тийеим. Сюйдюрдюнг эсе, кюйдюрдюнг эсе, Энд мындан ары джандырма, Джаннган джюрекни ал да суугъа ат Сен атхан сууда барырма. Дунья зауугъум алтын джумарыкъ, Бизни тийреде уя сал. Алтын тохана ишетир эдим, Кетмей къалыргъа унасанг. Къанатлы хаман учуб турмайды, Солуу алады кёзюуге. Сени ауазынг керек болады Джюрек джырыма эжиуге. Сюйдюрдюнг эсе, кюйдюрдюнг эсе, Энд мындан ары джандырма. Сюймеклигими ал да суугъа ат ? Сен атхан сууда барырма.

Читают тему (гостей: 2)

Логин:
Пароль:
	Запомнить меня на этом компьютере

Забыли свой пароль?
Регистрация