Войти на сайт
29 Августа 2026 года

 

  • Джаз бир кюнню джатсанг, къыш талай кюнню абынырса.
  • Адам къыйынлыгъын кёлтюрюр, зауукълугъун кёлтюрмез.
  • Тау башында, тау болмаз, джангыз терек, бау болмаз.
  • Тойгъан джерден туугъан джер игиди.
  • Ауругъан – джашаудан умутчу.
  • Джиби бир къат джетмей эди да, эки къат тарта эди.
  • Ачны эсинде – аш.
  • Кютгени беш эчки, сызгъыргъаны уа, джерни джарады.
  • Адамгъа аман кюн соруб келмейди.
  • От этилмеген джерден тютюн чыкъмайды.
  • Азыкълы ат арымаз, къатыны аман джарымаз.
  • Байдан умут эте, джарлыдан ёгюз багъасы къорады.
  • Ашда уялгъан – мухар, ишде уялгъан – хомух.
  • Аш иеси бла татлыды.
  • Миллетни бойну – базыкъ, аны бла кюрешген – джазыкъ.
  • Джахил болса анасы, не билликди баласы?
  • Къонакъ аз олтурур, кёб сынар.
  • Башланнган иш битер, къымылдагъан тиш тюшер.
  • Биреуге аманлыкъны тилеме да, кесинге ашхылыкъны тиле.
  • Орундукъ тюбюнде атылсам да, орта джиликме, де да айлан.
  • Нарт сёз къарт болмаз.
  • Бичгенде ашыкъма, тикгенде ашыкъ.
  • Уруну арты – къуру.
  • Эшекге миннген – биринчи айыб, андан джыгъылгъан – экинчи айыб.
  • Гугурук къычырмаса да, тангны атары къалмаз.
  • Айран тёгюлсе, джугъусу къалыр.
  • Ариу сёз аурууунгу алыр.
  • Хаухну атма, ёнгкючню сатма.
  • Ачлыкъ отха секиртир.
  • Сёлеш деб шай берген, тохта деб, сом берген.
  • Аман эсирсе, юйюн ояр.
  • Байлыкъ болгъан джерде, тынчлыкъ джокъду.
  • Джылар джаш, атасыны сакъалы бла ойнар.
  • Чакъырылмагъан къонакъ тёрге атламаз.
  • Сакъалы текени да бар, мыйыгъы киштикни да бар.
  • Сабий болмагъан джерде, мёлек болмаз.
  • Аурууну келиую тынч, кетиую – къыйын.
  • Къобан да къуру да къобханлай турмайды, адам да къуру да патчахлай турмайды.
  • Джыгъылгъанны сырты джерден тоймаз.
  • Къазанны башы ачыкъ болса, итге уят керекди.
  • Ишин билген, аны сыйын чыгъарады.
  • Терек ауса, отунчу – кёб.
  • Аууз сакълагъан – джан сакълар.
  • Джарлы джети элни сёзюн этер.
  • Ким бла джюрюсенг, аны кёзю бла кёрюнюрсе.
  • Ауругъанны сау билмез, ач къарынны токъ билмез.
  • Иги сёз – джаннга азыкъ, аман сёз башха – къазыкъ.
  • Къартха ушагъан джаш – акъыллы, джашха ушагъан къарт – тели.
  • Бал чибинни ургъаны – ачы, балы – татлы.
  • Ата Джуртун танымагъан, атасын да танымаз.

 

Архив Форума » Зеленый Форум [архив] » - ЗФ - Ана тилибизде
Страницы: 1 2 3 4 5 ... 7 След.
RSS
Къарачай джырла!
 
#1
Джаратама0
05.04.2010 00:40:19
В руки мне попалась книга 1968 года выпуска "Къарачай джырла", где очень много интересных и старинных песен. Составитель Н. М. Кагиева

Решила поделиться с Вами, дорогие форумчане. Думаю, что Вас заинтересуют эти песни
 
 
 
#2
Джаратама0
05.04.2010 00:41:42
БИЙНЁГЕР



- Гезох улу ол джигит туугъан Бийнёгер,
Тамада къарнашынг Умар ит аууруудан ауруйду,
- Ауруй эссе, анга дарманнга не джарар?
- Анга джарарыкъ акъ маралны сютюдю,
Аны тутарыкъ ана къарнашынгы итиди.
- Мен баргъан эдим ана къарнашыма ит тилей,
Ала меннге ит кючюкню бермелле,
Эгечден туугъанны къонакъ кибик кёрмелле.
- Сеннге ит бермеген аны кибик ит болсун,
Дуниядан Бийнёгерлей тюб болсун.
- Андан бардым Къубадийлеге ит тилей,
Ала мени къонакъ кибик кёрдюле,
Тилегенимде эки парий кючюк бердиле.
Аланы алыб мен уугъа айлана тебредим,
Уллу Басханны тауларына ёрледим.
Тау башында айлана-айлана сорукъдум.
Юч аякълы бир кийик чыкъды аллыма,
Эки аягъындан ючюнчюсю бек мийик,
Учлары да чарыкъ тизген миз кибик,
Мюйюзлери уа этге чанчхан тиш кибик,
Ол узакъ барды, сабыр болуб, атдырмай.
Ышаннга салыб атар кибик тохтамай.
Ол кийикни сюре-сюре тебредим,
Къарыууму бошаб сагъыш этиб олтурдум,
Уучу башлыгъымы къар къар джуммакъладан толтурдум.
Къар джуммакъланы уруб бачхыч этиб башладым.,
Ёрлеб чыкъдым ол чынгыл къаяны башына,
Мыдахлыкъ келди гезох улуну джашына,
Тёрт джаныма къараб кийигими кёрмедим,
Дагъыда бираз барыб, сора эследим.
Бара-барыб тёгерегим тул-тубан болду, чарс болду,
Акъ маралым мени аллымдан тас болду.
Армау болуб бир кесекни мен турдум.
- Кийик эсенг, ышаннга салыб атма къой,
Саулукъ марал эсенг, эмчегингден тартма къой.
Джашырма да айт, сен шайтанмыса, джекмисе?
- Мен шайтан да тюлме, джин да тюлме,
Мен кийик тюлме, ышаннга салыб атаргъа.
Саулукъ марал тюлме, тутуб эмчегимден тартаргъа.
Мен кийик тюлме, Апсатыны ариу къызыма.
Мени къоймай эсенг, сен сау къайтмагъын ызынга.
Ашадынг, ичдинг, этибизден тоймадынг,
Бизни бу къая ранлада къоймадынг.
Алай болса да мен сеннге бир иги алгъыш айтайым:
Тёбен джанынг тенгиз болсун, терк болсун.
Огъары джанынг мийик болсун, кёк болсун.
Эки кёнделенинг сени шайтан кирмез бек болсун,
Аны ичинде сени джашар кюнюнг кёб болсун,
Бизни къойма эсенг, адам келмесин къатынга. ?
Мен тюбедим шайтан кибик кийикге;
Ол айтханча, тёбен джаным тенгиз болду, терк болду,
Эки кёнделеним шайтан ётмез бек болду.
Онбеш кюнню къая ранда джашадым,
Билек этлерими кесим тутуб ашадым.
Уучу итим меннге къараб юргенинде,
Къая ранда къыйынлыкъны кёргенинде,
Бутларымдан кесиб анга ашатдым.
Онбеш кюнню этим бла джашатдым.
Къарачыгъыз, къарнашны Умарны тюшюне,
Оналтынчы кюн табды излей келиб юсюне,
?Тюш? деб кёб тиледи Бийнёгерден,
Къычырыгъын эшитдирелмейин джерден.
Мадар табмай, ол Холамгъа чабханды ?
Холам, Чегем, Басхан къалмай келдиле,
Къая ранда Бийнёгерни кёрдюле.
Кёб мадарла, кёб лагъымла этдиле,
Мадар табмай, ызларына кетдиле.
Къарнашы Умар кёз туурасындан кетмейди,
Бийнёгер а аны айтханын этмейди.
Умар анга: ?Тюшмесенг этерими айтайым сеннге, - деди.
- Тамада къызынгы кюн чыкъгъаннга сатарма,
Гитче къызынгы кюн батханнга атарма.
Ариу къатынынгы къойнума алыб джатарма.
- Ол сёзледен меннге хайыр чыкъмазын билеме,
Аланы айтыб, энди менден тилеме.
Ёрлегенимча ызымаэнер джол табмайма,
Джанымы сюеме, башымы къаядан атмайма.
Бабугейде барды мени тос къатыным,
Аны табсам бир да кёбдю айтырым.
Анга билдиригиз, ол айтханча этерме,
Ол айтса, къаядан секириб кетерме.
Къарнашы Умар муну къабыл кёргенди,
Салыб барыб анга хапар бергенди.
- Къабартыда джашагъан келиним, къоб ёрге!
Къарнашым Бийнёгер хазырланнганды кёрге,
Тос къатыны таннга дери къаты-къуту хант этди,
?Бийнёгер ёлген джерде ёллюкме?, - деб ант этди.
Атланы ол эки бутун ат этиб,
Къутас чачын саулай юсюне джамчы этиб,
Джылай-джылай келеек аллын тамчы этиб,
Эки къолун бутларына къамчи этиб,
Чаба ? джорта ол Бийнёгерге джетгенди,
- Узалмасам сеннге джетер эди билегим, - деди, -
Къабыл болсун бюгюн этген тилегим.
Тюше эсенг тюш, тюшмей эсенг да
Ёлюгюнгю къая ранда къушла ашарла,
Сюйген тенглеринг кюе, бише джашарла.
Секир, ёлюгюнгю къая ранда тыймачы,
Джуукъну, тенгни керексизге къырмачы.
Кесим этген акъ кёлекни кёзлерингде чырмачы,
Алтынлыны бурнундан тутуб быргъачы.
Кесинг ойнаучу акъ ёшюнюме чынгачы,
Алтынланы бурнундан тутуб быргъады!
Аллына тюшдю Бийнёгерни тепе чырасы,
Ол кюнден сора къысха тохтады Бийнёгерни кийик учасы.
Илиниб чыкъгъанды мындан темир ыргъакълай,
Андан чачылыб тюшдю, хычын джуммакълай.
Джангыз кекелчигинг тюшдю къатынынгы аллына,
Къыбдысын алыб урду джарлы къатын къарнына.
Мийикде кёреем Апсатыны къызыны къаласы,
Былай болгъанды Гезохну джигит баласы.
 
 
 
#3
Джаратама0
05.04.2010 00:41:48
 
 
 
#4
Джаратама0
05.04.2010 00:42:46
Абу Амин
 
 
 
#5
Джаратама0
05.04.2010 00:43:02
SOFIKOSHKA
 
 
 
#6
Джаратама0
05.04.2010 00:52:46
SOFIKOSHKA
Я помню эту поэму "Бийнегер" отец мне вслух читал)))))
 
 
 
#7
Джаратама0
05.04.2010 01:16:29
SOFIKOSHKA
а можешь оглавление книги выложить?))
 
 
 
#8
Джаратама0
05.04.2010 01:22:09
Ма, иги къыз десенг, иги къыз
Энди ол китабны ичин, тышын да ариучукъ сканировать этиб, бери джиберигиз. Охому?
 
 
 
#9
Джаратама0
05.04.2010 01:26:00
Aybazullu

БАШЛАРЫ

Эски къарачай джырла

Бийнёгер
Джандар
Татаркъан
Экинчи Эмина
Хасаука
Умар
Гапалау
Бекболатны джыры
Айджаякъ
Кулина
Акътамакъ
Бурмамут
Таукъан
Наныкъ
Джерме
Голлу
Чалкъычыкъ
Арбачы
Алийни джыры

Джангы къарачай джырла

Минги Тау
Партиягъа бюсюреу (это СССР посвящу))) )
Лелинни джыры
Ленин
Сюйген джуртума
Совет Союзну батыры Багъатырланы Харуннга
Къууанч джыр
Уруш къоркъуу къорасын
Джаш тёлюню джыры
Къарачай вальс
Чалкъычы джыйын
Кёгала
Колхоз къыз))
Къызны ийнары
Булбуллу тангла
Джазны джыры
Ишсиз туралмайма
Къачаннга дери
Унутма
Письмо
Сюйгенме студентни
Джигитни джыры
Нек термилтесе?
Джолоучу
Биз джырлайбыз
Сюйген къызыма
Айгъа нек къарайса
Танг
Джаз
Тюбедим
Булбулчукъ
Ариуум
Санга, комсомол
Сохталаны джыры
Сабий тенгиме
Кавказ таулагъа
Биргенге этеме джолуму
 
 
 
#10
Джаратама0
05.04.2010 01:27:05
Форумчанка
Энди ол китабны ичин, тышын да ариучукъ сканировать этиб, бери джиберигиз. Охому?

эммм.... тышын этеим, ичи уа ручка бла да джазылгъанды, къагъыты да аман болгъынды - иги сканировать этилмейди
 
 
 
#11
Джаратама0
05.04.2010 01:45:49
ДЖАНДАР



Ой, Джандар, Джандар, джанынга барсын кябагъа,
Ит тамлыла джыйылгъандыла Бабагъа.
Мурдух башында бир бёлек атлы кёрюндю,
Ала тосму экен, сора джауму экен?
Ала уа бизни тахсабызны билгенле,
Юслерине кёк гебенекле кийгенле.
Чартлаб ётдюм мен чегет Бабагъа
Джаш къауумну элтиб къуудум быкъы бла ранга,
Айыбы джокъду Джандарны бир тауда ёсген уланнга.
- Юсеин, мен джаш сен къарт, - деди. ?
Экибиз да алгъын нёгер болайыкъ.
Ёлсек да ёлдюк, къалсакъ да бирден къалайыкъ.
Ой, арабызда да чынар терек арамды.
Экибизден джер къачмайын ким къачса,
Аны анасындан ичген сютю харамды.
Стауатны, ой, тамлы аскер басханды!
Къаралдысы къошубузну джабханды.
Хомух Юсеин этген антын унутду,
Къара джамчыны юсюне ол тутду.
Къачма, къачма, Амырхан улу къызбай Юсеин!
Къача эсенг, къара къамангы къоя бар,
Кеси намысынгы сен а джоя бар. ?
Тынгыламай, Юсеин джамчы бла къутулду,
Джарлы Джандар кеси джангыз тутулду.
Къан чачылды ат джеринде башлыкъгъа.
Налат болсун, бу сабийликге, джашлакъгъа.
Джашлыкъ басыб эскермедик джауланы,
Сакъламадыкъ айрыланы, тауланы.
Онгсуз кюнде Хусинни къарт шкогун табмадым,
Амалсыздан эшик артын сакъладым.
Кезлик бычакъ бла джетисин босагъагъа къабладым,
Къарын къуялла таудан келген чарагъа.
Тмалы аскер сансыз санаусуз кёб болду.
Кёк чепгенинг тёгерей кюбеден бек болду.
Эгечинг Хурай этген кёк чебген,
Ол а сеннге бир аман кюнде тигилди.
Чыркъы саыйн ол чебгеннге окъ тийди.
Халысы сайын къалмай къызыл къан сингди.
?Джылама, Лаккуш, къарнашым, джылама!?
Сен джыласанг а кёлюм такъыр болады,
Къарылгъачны къанатындан къара сакъладым,
Тейри, сени амалтын акъ тюкледен толады.
Къачды Юсеин, айбат къатынны хомух баласы!
Джан Джандар болур ой джарлы юйню къаласы;
Болуб къала шойбуз, ой марджа, джашла, не этейтк!
Бу ит тамлыланы керти болуб табасы.
Тамлыла кёб келдиле, джыйылдыла Бабагъа,
Кийизден буруб джула салалла кезлик бычакъ этген джарагъа.
Тамлыланы тау къошлагъа юретген,
Джарлыланы эшиклерин тюб этген,
Кърымшаухалланы болур осал Танабаш.
Эчкилери Къарабашланы Махатчи деген алабаш.
Ючюнчюлери Хазлеулени Алибек деген джыланбаш.
Махатчи, тамлыланы тау джоллагъа юретген.
Ёлген ёлюлерин чанала бла сюйретген,
Махтачи, баргъаненг къызылбекледе джашаргъа.
Умут этгененг Къарачайны къой аягъынлай ашаргъа.
Къызылбеклеге бардынг эсе не табдынг?
Сынчыкъда джерни ауузунг толу юч къабдынг.
Буу тыяды Ылышдын Байрамны эгери
Къойчу къошда гыбышыгъа къалгъанды, келмейин,
Сен Къарачайдан сайлаб алгъан нёгеринг.
Байрамны алайда сойдула сыйрымдыгъа, тасмагъа.
Джандетли болсун Джылкъычы улу джаш Джандар,
Къанынг чачылгъанды сени расагъа, забагъа.
Бизни джаныбыз ой къурман болсун, къор болосун
Джигит Джандарны бизге тулпар табхан анагъа.
 
 
 
#12
Джаратама0
05.04.2010 02:41:00
SOFIKOSHKA

Софа отличная тема, на конец-то песни идут еще и с нотами! Как у тебя полностью скопировать эту книгу, или если она есть где нибудь в электронном варианте было бы вообще здорово!
 
 
 
#13
Джаратама0
05.04.2010 02:47:13
ТАТАРКЪАН



Джауумла джауалла джалпакълагъа, кёллеге.
Къуугъун келгенди Къарачайда эллеге.
Ныхытны башында сюедиле юч къурукъ,
Дууут ? Аягъындан чыкъды ачы къычырыкъ,
Бир къауум джетди Къарачайгъа ычхыныб.
Анда болур Батда улу Батыр Татаркъан,
Джетишген кюн алады ол керти къан.
Экинчиси Мука улу омакъ Байчагъар ?
Къылычындан къызыл ? ала къан агъар.
Татаркъан бизден артыкъ не этеди?
Джау кёрсек а аллыбызгъа салабыз,
Джаугъа джетсек къаныбызны алабыз.
Татаркъанны кюндюз изелле да табмалла,
Эр джигитле джукъламалла, джатмалла,
Иммолат да ёрге-энгишге чабады,
Кеси миннген тору аджирни арытды,
Бийлигин сахтиян чарыкъла бла танытды.
Татаркъан а джолоучулукъ алгъанды,
Оъ, эте, кеч эте, экинчи кюн келгенди,
Къарагъанды да элде киши кёрмегенди.
- Анам, джаным, бизни элибиз къайры кетгенди?
- Ишни заманында элибиз ишге кетгенди.
- Анам, тюнене къойчу къошда къалгъанем,
Джангур джаууб онгсуз, къолайсыз болгъанем.
Эртденбла сюрюу къобхунчу
Ашыгъыб мен эртде туруб кетгенме,
Бек ач болуб, уллу инджилиб джетгенме.
Бир хазырынг ? бузурунг джокъмуду?
- Алгъын ийген къойларынгдан этген эдим къурманлыкъ,
Андан сеннге толу юлюш къойгъанем,
Юч ёзенден юч эгечинг джетдиле,
Ала джылаб, сеннге алгъыш этдиле,
Юч сюегинг ючюсю ашаб кетдиле.
Сеннге къалгъан джауорун бла башджарты,
Сени ауузунга тийисн деб къойгъанем,
Ашай тур, ол тюлдю ашарыкъны арты. ?
Ол джауорунну этин сыдырды да юч къабды.
Элни къуугъуннга кетгенин джауорундан таныды.
- Анам, мени иш заманды деб, джубантма.
Къуугъуннга кетген аскерни да узайтема,
- Къалмазлыкъса, джашым, аны билеме.
Дууут Джалпагъын къызылбек аскер алгъында,
Элибиз да къуугъун этиб къуралганды.
Джалпакъ къыллы къалмай, ёзеннге да киргенди, -
Къатынны, къызны джалан аякъ этдириб сюргенди.
Эмчек ананг бара эди, къызгъан ийнекча ёкюре,
Къызылбекле бара элле, джесирлеге джекире. ?
- Анам, бюгече бир джарлы джашчыкъ кёргенем,
Ол джашчыкъгъа чабырларымы бергенем.
Джокъмуду меннге эрик ашагъан чабырлыкъ,
Къалмагъанды энди рахатлыкъ, сабырлыкъ, -
Чабырлыкъны ууа, чаба кетгенди,
Эрлей джолда эки чабыр этгенди,
Аскерни Схауат сыртында джетгенди,
Секириб ол, эрлей ёре туруб,
Эки этегин бюрек башынданкъайырды,
Уланланы эркечлерин айырды.
Бёлек уланы сыртны энишге
Сютден тойгъан маркъа къозулай сынатды.
Джетгени бла къан гыртчыла чайнатды.
Ёте барды да эркек къузгъунча къычырды,
Къыркъылгъан къойгъа джыйын джаллы ычхынды,
Схауатны сууун къызыл къаннга алдырда.
Батда улу батыр татаркъан
Арыгъан джылкъыгъа салды ат аркъан.
Манс джетмейди батыр татаркъанны келине,
Ой, бет табдырды, Къарачай деген элине.
Батыр Татаркъан алтынлыгъа бетден-бетге базады,
Къызылкёнчек улу омакъ Иммолат
Аягъындан черкес атлай асхайды.
Татаркъан алтынла бетден ? бетге атады.
Къызылкёнчек улу аягъындан черкес атлай джатады.
Схауатда ачы барды да гара джокъ.
Не къарайбыз да Алботланы Зулияда бирден сора джара джокъ.
 
 
 
#14
Джаратама0
05.04.2010 02:51:31
Alania

Не знаю. Может я не так сканирую, но отсканированный вариант очень непонятный получается... Я постараюсь большинство песен из этой книги выложить в этой теме.
 
 
 
#15
Джаратама0
05.04.2010 03:15:53
SOFIKOSHKA
После сканирования, нераспознанные слова нужно доводить до ума в ручную, после чего они могут быть размещены и на форуме и в "ленинке".
Я так думаю, а ты узнай))) эки къат ишлик болуб къалмасын.
Тема отличная, гран мерси!
СССР-ни кёб къыйнамай, бюсюреу этиб къой.)))
 
 
 
#16
Джаратама0
05.04.2010 03:19:13
SOFIKOSHKA

Спасибо!
 
 
 
#17
Джаратама0
05.04.2010 03:19:54
SOFIKOSHKA

очень мне твоя тема нравится, супер
я долго думал, как и где можно найти слова к старым песням. Спасибо большое

Энди офисде эжиу эштсегиз сеир болмассыз

Было-бы очень хорошо, если из таких старых песен сделали караоке
 
 
 
#18
Джаратама0
05.04.2010 03:19:58
Папин Южак

спасибо.
Я попробую завтра еще раз посканировать. Просто скан текста слишком черномазый получается

СССР-ни кёб къыйнамай, бюсюреу этиб къой.)))

джукъ дауласа сизге ашырырма
 
 
 
#19
Джаратама0
05.04.2010 03:20:51
Пилигрим



Энди офисде эжиу эштсегиз сеир болмассыз

сенге ышанама не да болсун)))))
 
 
 
#20
Джаратама0
05.04.2010 03:30:11
Пилигрим
Было-бы очень хорошо, если из таких старых песен сделали караоке
Чего у вас для этого не хватает?)
SOFIKOSHKA
Тимурну эжиуюн диктофоннга джаздырсанг, аудио версиясын да джарашдырыб къоярыкъ эдинг.)))
 
 
 
#21
Джаратама0
05.04.2010 05:10:33
Менде эски джырланы (Тюркде Мустафа Къарабашдан, Йылмаз Науруздан; Америкада Рамазан Къарчаны къызындан) толу вариантлары бардыла. Ноталары джокъду. Юлгюге "Хасаука" джырны толу вариантын кёргюзтейим. ХАСАУКА

Къычырады Дауле: - Хахай, къуугъун!
Къарачайны шохун барын, джууугъун
Чакъырыгъыз, бизге дженгил джетсинле,
Къара кюнде бир болушлукъ этсинле!

Гяуур патчах кёб артыкълыкъ этеди,
Марджа, джашла, орус аскер джетеди.
Аладыла этибизден тоймагъан,
Таргъа тыйыб, джашаргъа да къоймагъан.

Джау келгенди, Хасаукагъа киргенди,
Таб джолланы Амантишден билгенди.
Чанка бийди бизни сатыб къоярыкъ,
Къарачайны багъасындан тоярыкъ.

Джау келгенди кесин бизден джашырыб,
Джау киргенди ит Атаджокъ ашырыб.
Чыгыр къабан намыс-сый деб билмейди,
Эр Къарачай зорлукъгъа ийилмейди.

Къабартыды орус итге теблетген,
Джау аскерин тау тарлагъа тебретген.
Анттыймазла къара зарлыкъ этелле,
Ала чекден асыры бек ётелле.

Урлаб-тырнаб, ауурланыб джаталла,
Адамларын малланыча саталла.
Къайдан чыкъды бу ит къауум Капказгъа?!
Антмы этгенд халал къыйын къабмазгъа?!

Шам Къарачай улан этиб ёсдюрген
Атаджокъду душманланы юсдюрген.
Ол генезир бизге джаулукъ этеди,
Хайда, джашла, орус аскер джетеди.

Ол таяныб, душманлагъа-джаулагъа,
Ие болур мурат этед таулагъа.
Юлюш излеб чабады къул Къабарты,
Аман бла бошаллыкъ болур арты.

Атаджокъла ? инаралны тенглери,
Тенглери тюл ? этеклери-дженглери.
Ол къауумду бизни ачыкъ джауубуз,
Ала бла кемсиз кёбдю дауубуз

Ол инарал бизни хорлаб алалса,
Тырнакъларын юсюбюзге салалса,
Джыртыб, талаб, мууал этиб къояред,
Джасакъ бла терибизни сояред.

Ачыудан биз къайнагъынчы, бишгинчи,
Ол залимни тузагъына тюшгюнчю,
Бирлешейик, кенгдегин да джокълагъыз,
Тар ёзенде джуртубузну сакълагъыз.

Тау асланла хазыр болуб чыгъыгъыз,
Джау аскерни дженгил-дженгил джыгъыгъыз.
Ойнатыгъыз сампаллада къолланы,
Къызартыгъыз Хасаукада джолланы.

Эбекку улу от къалагъа кетгенди,
От алыргъа кёб дыгалас этгенди.
Ырхы басыб, от ёзекни джабханды,
"Ай медет!" деб, Дауут эрнин къабханды.

Излей кетиб, бир уууч от табханды,
Анга къошар затла излеб, чабханды.
Залыкъылды табыб, аны эзгенди,
Кюкюртню да къошуб, отну сюзгенди.

Ёлчелеге къуюб аны тиздиле,
Мычымай къоргъашын окъла джюздюле.
Бир базыкъны ёшюнюнден тийдиле,
Аллай кёбню къая раннга ийдиле.

Джигерлени-джигитлени къолунда,
Тау мылтыкъла этер сауут болдула.
Хасауканы айланч-буйланч джоллары
Шындык-шындык ёлюкледен толдула.

Джигит таулу ёхтем-ёхтем джекиред,
Ташдан-ташха джел ургъанча секиред.
Таукел улан инаралны ёлтюрсюн,
Башын кесиб аны бизге келтирсин.

Батыр Умар гёджебсиниб атлайды,
"Къоркъмагъыз!" деб, джаугъа къаршчы чартлайды.
"Джетигиз!" деб, нёгерлерин сакълайды,
Атады да алчыларын къаблайды.

Ма окъ тийди бизни джигит Умаргъа,
Аман кюнде джер салгъаненг Чубаргъа.
Керек эдинг, быллай кюннге тууаргъа,
Даулет барад, кёзлеринги джумаргъа.

От бошалыб, окъ бошалыб къалса да,
Ташла-агъачла окъча, тобча джаудула.
Асланланы къурч беллери талса да,
Абычарла чаууллагъа аудула.

Бу къазауат бек узакъгъа барлыгъед,
Инаралны баш токъмагъын аллыгъед.
Аскерибиз азды, саны толмайды,
Сауут кюч да биз сюйгенча болмайды.

Тизгинлешиб, ёзенни ёрге джау кирди,
Батыр Къайтукъ сабийлеге кёл берди:
- Таулучукъла, сиз да ёсюб джетерсиз,
Бу къан дертни джууабларын этерсиз.
 
 
 
#22
Джаратама0
05.04.2010 11:45:59
Sabr

Менде барды ноталары

 
 
 
#23
Джаратама0
05.04.2010 17:06:10
SOFIKOSHKA

Сау бол!
 
 
 
#24
Джаратама0
05.04.2010 17:32:29
Бизде да бардыла эски джырла
 
 
 
#25
Джаратама0
05.04.2010 18:56:51
Игичик

Бизде дегенинг ол къайдады?
 
 
 
Страницы: 1 2 3 4 5 ... 7 След.
Читают тему (гостей: 1)

 

Написать нам

Фонд «Содействие развитию карачаево-балкарской молодежи «Эльбрусоид»

© 2003-2026 Elbrusoid.org  |  Все права защищены Законами Гор.