Войти на сайт
31 Августа 2026 года

 

  • Ачыкъ джюрекге джол – ачыкъ.
  • Къыз келсе, джумуш эте келеди, къатын келсе, ушакъ эте келеди.
  • Минг тенг да азды, бир джау да кёбдю.
  • Билгенни къолу къарны джандырыр.
  • Aдам боллукъ, сыфатындан белгили.
  • Чабакъгъа акъыл, табагъа тюшсе келеди.
  • Къоркъакъны кёзю экили кёрюр.
  • Чабар ат – джетген къыз.
  • Таула не мийик болсала да, аууш табылыр.
  • Тойчу джашха къарама, къойчу джашха къара.
  • Джумушакъ сёз къаты таякъны сындырыр.
  • Ёлюк кебинсиз къалмаз.
  • Къатын къылыкъсыз, эр тынчлыкъсыз.
  • Джолунга кёре – джюрюшюнг, джагъанга кёре – юлюшюнг.
  • Итли къонакъ джарашмаз.
  • Адам бла мюлк юлешмеген эсенг, ол адамны билиб бошагъанма, деб кесинги алдама.
  • Тик ёргени, тик энгишгеси да болады.
  • Къатын байлыкъны сюер, эр саулукъну сюер.
  • Къатыны харакетли болса, эри къымсыз болур.
  • Къолу уллу – асыу, аягъы уллу – джарсыу.
  • Кюн кёрмеген, кюн кёрсе, кюндюз чыракъ джандырыр.
  • Рысхы джалгъанды: келген да этер, кетген да этер.
  • Абынмазлыкъ аякъ джокъ, джангылмазлыкъ джаякъ джокъ.
  • Чакъырылмагъан къонакъ – орунсуз.
  • Хар зат кесини орнуна иги.
  • Сууда джау джокъ, кёб сёзде магъана джокъ.
  • Къарыусузгъа кюлме, онгсузгъа тийме.
  • Джылкъыдан – ат чыгъар, тукъумдан – джаш чыгъар.
  • Кёл ашады да, кеси ашады.
  • Ауузу бла къуш тута айланады.
  • Эринчекни аурууу – кёб.
  • Иги сёз – джаннга азыкъ, аман сёз башха – къазыкъ.
  • Байдан умут эте, джарлыдан ёгюз багъасы къорады.
  • Бал ашаргъа сюе эсенг, чибин ургъаннга тёз.
  • Ётюрюкчюню шагъаты – къатында.
  • Юйюнг бла джау болгъандан эсе, элинг бла джау бол.
  • Джиби бир къат джетмей эди да, эки къат тарта эди.
  • Къонакъны къачан кетерин сорма, къачан келлигин сор.
  • Къонагъынгы артмагъын алма да, алгъышын ал.
  • Ач къарынны, токъ билмез
  • Урама да – ёледи, сатама да – келеди.
  • Мухардан ач ычхынмаз.
  • Кёзю сокъурдан – къоркъма, кёлю сокъурдан – къоркъ.
  • Атлыны кёрсе, джаяуну буту талыр.
  • Тешигини къатында, чычхан да батыр болур.
  • Джашынгы кесинг юретмесенг, джашау юретир.
  • Оюмсуз атлагъан, аджалсыз ёлюр.
  • Ишленмеклик адамлыкъды.
  • Рысхысына кёре, джаш ёсер, къышлыгъына кёре, мал ёсер.
  • Аурууну келиую тынч, кетиую – къыйын.

 

Архив Форума » Зеленый Форум [архив] » - ЗФ - Ана тилибизде
Страницы: Пред. 1 ... 3 4 5 6 7 След.
RSS
Къарачай джырла!
 
#101
Джаратама0
18.05.2010 21:11:20
КЪАТЫНЛЫ ДЖАШХА ИЙНАРЛА

Стол юсюнде машина, анам,
Чоллакъ салгъанма машинагъа,
Он бармагъым он киши болсун
Къатынлы джашха баргъаннга.

Стол юсюнде дагъыда машина,
Къызла чоллакъ салалла,
Аналары джылай тугъанлай,
Къатынлы джашлагъа баралла.

Къатынлыланы къалай сюесиз
Бир хаух кийимни кийгенча,
Иесине башындан тутдуруб
Биреуню атына миннгенча.

Къатынлы джашха бармагъыз
Къатыны эрге кетгинчи,
Джаныгъыздан ийне чыгъармагъыз
Сау бир джылыгъыз ёттюнчю.

Къатынлыладан бир ышан таныдым,
Ала кука сёзге усталла,
Эки айны ариу айтыб
Ючюнчю айда къыстайла.

Ах уллу суугъа кирмегиз,
Кёчюую барды, сайды деб,
Къатынлы джашха бармагъыз, къызла,
Маллары барды, байды деб.

Эшик аллында балчыкъ,
Ой балчыкъмыды, сазмыды,
Къатынлылагъа къалай барасыз,
Къатынсыз джашла азмыды?

Къатынлыланы хар ким да сюемидиле,
Огъесе менми шашама,
Болмазлыкъ ишге кука сёлешиб
Джюрегими джауун ашама.

Сен къатынынгдан бир бек къоркъаса,
Къатынынг ёлюб джыларыкъ,
Мени да аллах сеннге буюруб
Сен эки къатын сынарыкъ.

Къатынынг, къызларынг, джашынг ?
Бир кёб болалла санасам,
Бир кёб къыйыным зыраф болады
Мен сагъыш этиб къарасам.

Мен къара суудан кече алама,
Ма Къобан суугъа бармайын,
Ёлсем къабырым эки джарылыр
Бир барыб джюрек джармайын.

Бойнумдагъы инджиле мени,
Эки къат джетеди бойнума,
Къатыны болуб къыз тилегенни
Бойнундан буусун бууала.
 
 
 
#102
Джаратама0
18.05.2010 21:12:32
БЕРНЕ

Анала къызларын алай асырайла,
Бир минут эсинден кетмейин,
Къызчыкъгъа кёлек, къызчыкъгъа чепкен,
Къызчыкъны джылы джетмейин.

Харакет джыяд, ой хадек джыяд,
Хапары чыгъыб элине,
Джылтырагъан къумач къоймай джыйса да
Дагъыда джетмейди кёлюне.

Тойгъа иймейди, эрге бермейди,
25 джылы джетмейин,
Чиллеле бла ой дарийледен
Бернесин хазыр этмейин.

Тойгъа ийсе да эрге бермейди
25 джылы джетмейин,
Елгенледен башлаб, саулагъа дери
Бернесин хазыр этмейин.

Береме десе да бериб къоялмайды,
Сёзчю къатынлагъа сормайын,
Ой осу эте, ой бусу эте
Аны отуз джылы озмайын.

Ой къобуз тауушла, ма харс тауушла,
Ала узакъ-узакъ джайылыб,
Берген кюнюнде ким да джаратыр
Джууугъу, тенги джыйылыб.

Алыб барадыла къайын юйюне,
Анда да алай джыйылыб,
Эки джаныны джууугъу-тенги
Юч юйге кючден сыйыныб.

Эрге барды деб, къатын алды деб
Хапары чыгъыб элинде
Эй, сени джауунг тынгыласын
Бернесин юлешген кюнюнде.

Къайын ананг чыртда огъурамагъанды,
Ой къайын атанг не этсе да,
Мен аны алай къоярыкъ тюлме,
Тамбла ызына кетсе да.

Ой бу сёзлени къысха-къысха айтыб
Къайын къызы джюрюйдю чабханлай,
Келтирмезбиз да къоярбыз Дейле
Гатчай ызына къайтханлай.
 
 
 
#103
Джаратама0
18.05.2010 21:13:16
ГУДУЧУ КЕЛИНЧИК

Тауланы башы къаралыб келеди,
Джауум булутла салыныб,
Мени джауум кёрсюн сют башы челекни
Баш къалынчыгъы алыныб.

Урлагъан болуб, урлагъан болуб
Ой гяур налат, билгенинг,
Аллахдан къоркъмай къалай урладынг
Махай къызыны тюменин.

? Тюменим ? дейди, тюменим ? дейди
Махай къызы бизге келеди,
Бир тюменни урлаб ашаб кетдинг,
Анам бир тюмен тёледи.

Сени эки къолунг бир ариу джарашад,
Ууакъ-ууакъ затны джыяргъа,
Сени юйюнг къурубму къалгъанды,
Муну гудулугъун тыяргъа.

Юйюнг къурурукъ, тыбырынг тартыллыкъ,
Урлагъанны къойсанг а,
Насыбынг алай болсун, бычагъымы урлаб
Талгъыр ёгюзюнгю сояргъа.

Аллахдан къоркъмай къалай урладынг
Къайын атангы кёлегин,
Келинчикден къоркъуб да кёлтюрюб айланад
Анам сют башы челегин.

Урлагъан этеди, тырнагъан этеди, деб
Хамит бир иги берди керегин,
Аллахдан къоркъмай къалай да урладынг
Къайын атангы кёлегин.

Айт дедигиз да ой мен айтдым
Бизни келинчикни саулугъун,
Аллахдан къоркъмайын урлаб къойгъан эди
Къайын анасыны джаулугъун.
 
 
 
#104
Джаратама0
18.05.2010 21:14:23
БУХАРЛА

Ёзенни энгишге кетиб барама,
Мен да баргъанлай къайтайым,
Эжиу этигиз, иги тынгыларгъыз,
Бухарланы джырын айтайым.

Огъары къатынынг, тёбен къатынынг,
Сохта, саулай юч ёзенни къуршайса,
Бухарны да кийиб, палтонунгу кийсенг,
Тёртмюйюз къочхаргъа ушайса.

Биджиланы Сохта омакъ кийиннгенди,
Джолун энишге салгъанды,
Сымайылланы Тамаш къара бухарны
Къалай джаябашын алгъанды.

Сымайылланы Тамаш къара бухарны
Къалай джаябашын алгъанды,
Абайланы Астакгу бухар алама деб
Нарсанагъа сингиб къалгъанды.

Гочияланы Хаджи бухарын кийиб
Орамны ёрге-энишге озады,
Мама улу Хочалай, бухарлагъа эришиб,
Эеки чырпа бёркюн созады.

Абай улу Астакгу бухарына къууана
Алыб столгъа атады,
Ходжайланы Нюрчюк, джыргъа къошмайсыз деб,
Ёпкелеб ауруб джатады.

Къарачай джашла къайдан юрендиле
Ала бухар кийген къылыкъгъа,
Бир къара бухар келтиргендиле
Джюнтарайланы сылыкъгъа.

Чыртда бухары джокъду дейдиле
Бу Къобанланы Нюрлюню,
Джыргъа къошаргъа джаратмай барама
Сомакъайланы кирлини.

Тууарчы улу Юнюсден мен аллыкъма
Бу бухарланы ёлчесин,
Токъланы Махди бир бухар киеди,
Кюн кюйдюрюб аны джелкесин.

Абайланы Астакгу бухаргъа къууаныб
Юсюне ёре сюелиб турады,
Оракъланы Батдал бухар бёркюн
Къара щетка алыб урады.

Мен чегет джанын ой-ой бошадым
Энди кюнбет джанына ётейим,
Локъманны бухары эски болгъанды,
Ой-ой Шогъайыбха не этейим.

Сени бухарынг эски болгъан эсе,
Джангыгъа заказ иерее,
Атанг Локъман къарт болгъанды, Шогъайыб,
Ёлсе бухарын киерсе.

Таубий улу Хаджи Зекерия,
Ат баш сюек кибик, къургъакъ омакълыкъны сюеди,
Дагъыстанланы Кёкчюк акъ кёлекни
Кечеги тойлагъа киеди.

Таубий улу ат баш сюек
Къургъакъ омакълыкъны сюеди,
Деккушланы Махди эски бухарын
Беш джылдан бери киеди.

Ол джарлы Шогъайыб, бухар бёрк табмай,
Нёгерине бир бек къарайды,
Хапчаланы Сагъит, бухар бёркалама деб
Джау гыбыт кёлтюрюб барады.

Хапчаланы Сагъыт, бухар бёрк алама деб
Нарсанагъа кесин салгъанды,
Гяусарланы Шакъман, бир бышдады бериб
Къаллай бухар бёрк алгъанды.

Бухар кийгенлени тамадалары
Бегеулланы Сохтады,
Бухар кийгенлени ачы заялары
Тууарчы улу Юнюсде тохтады.
 
 
 
#105
Джаратама0
18.05.2010 21:15:14
ТЕНГЛЕГЕ ЭТИЛГЕН ЧАМ ДЖЫР

Шошай, Тёртмюиюз, Чычхансырт, Ючаякъ
Ходжады быланы башлары,
Бир бек къыйналыб ишлейле Дейле
Заболоткинни джашлары.

Бригадир келсе къалай айтырыкъса
Суула сбросха ётгенле,
Шошай, Тёртмюиюз, Чычхансырт, Ючаякъ
Харбыз бачхагъа кетгенле.

Арыгъынгда суунг тохтагъанд, Ючаякъ
Келиб баразангы кёрсенг а,
Тёртмюиюз аягъын кюйдюрген этгенди
Бир аягъынгы берсенг а.

Касхалта кетиб барады, джашла,
Картны ёрге айланыб секире,
Тёбен джаныбызда Тёртмюиюз джырлайды,
Ол ёгюз кибик ёкюре.
 
 
 
#106
Джаратама0
18.05.2010 21:16:00
БАЛДАНЫМ

Джайны кюнлери исси болады,
Кюннге кюедиле санларым,
Джюрегими джауун ашаб барады
Гоккакёз ариу Балданым.

Джайны кюнлери исси да боладыла,
Мен ёлейим да къалайым,
Ариулугъуна сёзюм да джокъ эди
Адамлыгъын кимге сорайым.

Адамлыгъында несин сораса,
Ашаса уллу къабады,
Эсине тюшсе, орамгъа чыгъыб,
Джалан аякълай чабады.

Джалан аякълай чабмайын не этсин,
Тас болгъанды аны башмагъы,
Тёрт сантиметрден артыкъ да барды
Къулакъ артыны къасмагъы.

Балданым тойда тебсей да билмейди,
Тоннга тигилген дженг кибик,
Ой-ой ашаб тойса аууб да къалады,
Оюлуб а тюшген гён кибик.

Ой-ой Балдан эски джамай да билмейди,
Ийнеге уа халы сууура,
Эртденден ингирге дери джетиб къалады,
Кюнде нартюхчюкле къууура.
 
 
 
#107
Джаратама0
18.05.2010 21:16:49
КЪАТЫН КЪОЮУЧУ КИШИЛЕГЕ

Ёрге бардым, энишге келдим,
Мен этер мадар табмадым,
Энди менден сени кёлюнг къалмасын,
Сау джети джылны сакъладым.

Къатын къойгъанла сайлаб алалла
Къаратонларын, къартларын,
Мени къатымда сиз кёб сагъынмагъыз
Къан ичгенлени атларын.

Атын къатымда ий кёб айтмагъыз,
Мени аз акъылым бёлюнед,
Ой кёзлерими къаты къыссам да
Кирпиклеримде кёрюнед.

Былай этеринги алгъаракъ билсем,
Ызламаз эдим ызынгы,
Джанынга дарманнга излеб кюсегин
Сен джашынг бла къызынгы.

Ой наным, юйюнг къуругъан,
Да нек тутханды аманынг,
Бизге келирге бир бошамагъан
Не занятады заманынг.

Билмей тургъанлай ой мени ариуум
Бир бек къыйынлыкъ салгъанды.
Ий аллах ючюн да бир сорайым,
Не затдан кёлю къалгъанды.

Кечем, кюнюм да мен къыйынлыны
Не кюн батханнга ташайды,
Мынча къыйынлыгъы юсюнде болгъан
Дунияда къалай джашайды.

Сен болгъан элден бериб кетерикме,
Санга джашаргъа тар эсе,
Башха эллеге бир джайылайым
Санга ушагъан бар эсе.

Бу къыйынлыкъны бизге Берген
Этген муратына джетмесин,
Джаны къыйналгъан нени да айтады,
Аны ючюн айыб этмесин.

Мындан къараб таныйма, къызла,
Ариуну тургъан юйлерин,
Былай аманнга бу нек кетгенди,
Билеме келген кюнлерин.

Мени наным бир мыдахчыкьды
Не ышармайды, кюлмейди,
Ой мени наным бир аман уллуду,
Кимден туугъанын билмейме.

Мени наным нек сёлешмейди,
Тутубму къойгъанма бойнундан,
Ой менден сюйюб алгъан къатынынг
Джарылыб чыкъсын къойнунгдан.

Атангы, анангы мен да таныйма,
Кесинг да бизни эллисе,
Кимни алгъанынгы къалай билмейсе,
Сен къалай уллу кёллюсе.

Къатын алгъаннга къалай баралла,
Ий хаух кийимни кийгенча,
Иеси атны башындан тутуб,
Барыб юсюне миннгенча.

Бу къыйынлыкъдан аман кёрмедим,
Сау санларынгы талайды,
Урлагъан малынг дауланнган этер,
Къатынлы киши да алайды.
 
 
 
#108
Джаратама0
17.07.2010 01:18:06
Фердаус
Ай, маладес!
 
 
 
#109
Джаратама0
17.07.2010 01:50:29
Фердауссау къаллыкъ къайдан табханса бу аламат затланы?
 
 
 
#110
Джаратама0
18.07.2010 16:25:08
Салам!

Мен да бир джыр къошаим.

КЁЗБАУ.

Ала да кёзлю, ариу кёзбаум,
Къайдан да чыкъдынг аллыма.
Сени кёрюрге термилиб ёлеме,
Джаннган от салдынг да къаныма.

Ариу тюрсюнюнг ингирге дери
Джетеди, кёзюме кёрюне,
Тютюн этмеин кюед джюрегим,
Ийнансанг, ариучукъ,сёзюме.

Сени кёрюрге термиле, тарала,
Бир ауруу табады джюрегим.
Ийнакълаб сени къойнума къысаргъа
Термилед, елед кёкюрегим.

Стол юсюне салгъанма картынгы,
Эртден, ингир кёзюм джетерге,
Ышара тургъан кёзюнге къараб,
Сюймекликден ушакъ этерге.

Ингирге дери ишде арыб келиб,
Тансыкълаб,кёзюнге къарасам,
Ачыкъ джарагъа балхам салгъанча,
Джюрегиме тынчлыкъ саласа.

Джазыу болурму къатынга олтуруб,
Сени чачынгы сыларгъа,
Джаныб а баргъан кёкюрекге къысыб,
Ала кёзлеринге къараргъа?

БАЙРАМУКЪ УЛУ УМАР- КЪАРАЧАЙЛЫ.

Ленинполь, 1950 дж.
 
 
 
#111
Джаратама0
22.07.2010 12:42:55
всезнайка
Сау бол, Мадина

къарачайлы
къайдан табханса бу аламат затланы?
"Къарачай халкъ джырла" деген китабдан алгъанма, 1969 дж. басмаланганды.
 
 
 
#112
Джаратама0
23.07.2010 02:33:00
Аремплин парча къурт къатапа
Келедиле бернеле.
Къарт катынла боладыла
Хоталагъа иеле.
Бу джырны толусу бла билген бар эсегиз бир джазыгъыз марджа!!
 
 
 
#113
Джаратама0
23.07.2010 02:42:01
кремплин парча къурт къатапа
келедиле бернеле
къарт къатынла боладыла
хоталагъа иеле
 
 
 
#114
Джаратама0
23.07.2010 02:44:22
бу джырны толусу бла билген бар эсегиз марджа!
 
 
 
#115
Джаратама0
24.07.2010 19:39:45
Джамболат.
Къабартылы къалиярлы къарт бийче,
Кёзюдюре юкню алыб,къарады...
Алайчыкъда Джамболатны таныды,
Чачын -башын тартыб,джылаб башлады...
Къарт бийче уа улакъ кибик макъырды...
Уланларын ,бир да къоймай ,чакъырды.
-Ой,уланларым,мени джанларым......
Кёремисиз Джамболатны тургъанын.
Бир кере ол джылкъыбызны сюргенди...
Экинчи да бир джашымы ёлтюрдю...
Ючюнчю уа,келиними элтгенди...
Анга ол а адамсызлыкъ этгенди....
Энтда келиб,аллыбызда турады,
биригизни ёлтюрюргеди мураты...
Чыгъыб уруш этемисиз-этигиз...
Этмей эсегиз-аллымдан кетигиз....
Къыптым бла уруб,ичин джарырма (...)
Джамболат а киши эсе,манга къатылмаз...
Аны алтын ушкогу манга атылмаз...
Атландыла (..)дери кетдиле...
Юч да джол айырылгъанга джетдиле...
Алайчыкъда джол оноула этдиле...Ойра-ой...
 
 
 
#116
Джаратама0
08.01.2011 03:19:38
Гошаяхны кюйю

Ори-ой-ой-ой.
Къаншаубийим тау эллеге туугъан кюн
Тау эллеге тейри эшиги ачылды.
Къаншаубийим тау элледен кетген кюн
Тау эллери, къуш тюгюнлей, чачылды.

Ори, ой, ой, ой.
Къаншаубийим кетгенди да, тапмайма,
Кече, кюн да аны жолун сакълайма.
Ол кетген кюнден бери бир кечени,
Белими тешип, тёшекге жатмайма.

Ори-ой, ой, ой.
Кел, Къарачач, Къара ташха барайыкъ,
Къара ташдан тёбен таргъа къарайыкъ.
Къаншаубийим келе эсе, жырлайыкъ,
Келмей эсе, жиляп, ташны жарайыкъ.

Ори-ой, ой, ой.
Алай бла Къара ташха келгенек,
Мухур тюзде юч атлыны кёргенек.
Ортадагъы генже тайгъа ушайды,
Сыртында уа башха адам ойнайды.

Ори, ой, ой, ой.
Ала сабанлада тюлкю къуудула,
Аны къууа кетип, бёрю этдиле.
Хадаужукъ бийчеле Къаншаубийими,
Эшек мыйысын ашатып, тели этдиле.

Ори, ой, ой, ой.
Тар аузунда таракъ-таракъ къаяла,
Ала энди бир бирине аусунла!
Хадаужукъланы сары бийчелеге
Энди манга жаугъан къанла жаусунла!

Ори, ой, ой, ой.
Къаншаубийни тапмай, айлана, жюрюй,
Къарачайда Къарт-журт элге келгенме,
Кече, кюн да Къаншаубийими сакълай,
Жиляй-жиляй, аман бла ёлгенме.

Ори, ой, ой, ой.
Ким биледи, хапарымы айтырла
Бир заманда Къарачайны къартлары,
Манга бу кюнлени келтиргенлени
Аман бла къуругъуед артлары!
 
 
 
#117
Джаратама0
08.01.2011 03:21:46
Уллу Хож
Ой Уллу Хождан а ма чыкъгъан элле жети ариу, орайда,
Да къамаладан а бир къан тамызгъан а эки ариу, орайда.

Ой, уруш эте да бир алда баргъан Уркъуят, орайда,
Ургъан жеринден а къып-къызыл ариу а къан къуяд, орайда.

Ой, кёкде ойнайды да ариу Уркъуятны билеги, орайда,
Да къабыл болсун а бу жарлы халкъны уа тилеги, орайда.

Ой, уруш этерикбиз ма бюпон къалып тамбла, орайда,
Абидез алабыз а жингирикден акъгъан а къан бла, орайда.

Сауутларыбыз а, юфгюрсек, тюкню юзелле, орайда,
Ой, жашларыбыз а бу солдат къанда уа жюзелле, орайда.

Ой, Уллу Хожну да не башы болур батагъа, орайда,
Башыбыз къалды да сауут амалтын а хатагъа, орайда.

Сауутларыбыз къалдыла чынар терекге асылып, орайда,
Тёбентин сары гяуур келеди, ёзен туманлача, басылып, орайда.

Эй, маржа, жашла да, ма къырылайыкъ, ёлейик, орайда,
Бу сары гяуургъа биз динибизни бермейик, орайда.

Ол окъ тийгенди да бу жаш келинни кёзюне, орайда,
Да ийнанмагъыз а Къарох улуну уа сёзюне, орайда.

Ол Къарох улу да, ол итден туугъан ийнарал, орайда,
Сабийлерибизни уругъа къуюб'а, кюйдюред, орайда.

Ол бой бермеген а ол ариу черкес къызланы, орайда,
Къымжа этдирип, чыбыкъла бла уа тюйдюред, орайда.

Къартларыбызны уа шинжиле бла тюйдюред, орайда,
Ол аны бла уа патчахха кесин а сюйдюред, орайда.

Къанлы патчах ийнанады ол ийнаралны сёзюне, орайда,
Налат болсун ол патчахны кёзюне, орайда.

Хожну сууун ма къызыл къаннга кьызартханд, орайда,
Черкеслени уа бу шорха акъгъан къанлары, орайда.

Ийнаралгъа ит териден кебин бичерек, орайда,
Аны къанын а биз бал татытып ичерек, орайда.

Ассы ийнаралла аман ишлени башлалла, орайда,
Бирда къалмайын а ичли къатынла ташлалла, орайда.

Бууаз къатынланы да чабакъла кибик жаралла, орайда,
Сабийчиклерибиз а ма жау чыракълай жаналла, орайда.

Патчахлыкъны биз ичибизге иймезек, орайда,
Жашагъан жерибиз бу Къарачайча бек болса, орайда.

Мындан ары он жыл къазауат этерек, орайда,
Жашагъан жерибиз ол тенгиз болса, терк болса, орайда.

Ёлюклерибизни ол гяусар итле талайла, орайда,
Акъгъан къаныбызны чубар маскеле жалайла, орайда.

Тёгерегибизни къанлы аскерле сакълайла, орайда,
Этибизни согъум къойлай къакълайла, орайда.

Арабызгъа орус килисала салалла,
Ой, къартларыбыз ары табыныргъа баралла, орайда.
 
 
 
#118
Джаратама0
08.01.2011 03:22:53
Айжаякъ

Айжаякъ, ала жаулугъунг
Ариу жарашады бойнунга.
Мен а сукъланама, ёлеме
Мамукъдан жумушакъ къойнунга.

Он, жылкъы анасы - акъ байтал,
Ол а къарыш къулакъ тай табар.
Мен сени анангы уста таныйма,
Ол а къалгьан къатынладан файгъамбар.

Ой, жылкъылада хора тай,
Салчы аягъынгы тузакъгъа.
Манга эки къанат а битгееди,
Айжаякъны алып кетерге узакъгъа.

Ойра, тузакъ, дейле, къоймайла,
Къанжыгъамда жибек аркъаннга.
Сора хора дейле, къоймайла
Кесим миниучю тарпаннга.

Ой, тарпан тайла ойнайла,
Ала ойнагъандан тоймайла.
Сени ананг манга сормай берлигед,
Къалгъан сюймегенле къоймайла.

Ой, тулгъа барлыкъ сен болсанг,
Санга менден игини ким табар?
Иги тулгъа бармай къалгъан а къатын,
Артда бушуу этип, жер къабар.

Ой, жылкъы анасы - акъ байтал,
Ол а сакъат болду, ырахын.
Ойра, мен сюйгенлей сюймесенг,
Сени болсун мени гюняхым.

Ой, Багъыр улу къурурукъ,
Къаллай хоралагъа минеди,
Къара кёрпе тонла киеди,
Эрсиз къатынланы сюеди.

Кел, биз Тебердиге барайыкъ,
Жашарбыз, къанжалбаш юй салып.
Башыбызгъа уллу кюн салып,
Эшиклеге къаты чюй салып.

Багъыр улу Къаспот деген - кюл аякъ.
Тапкада болур, жаным, чын аякъ.
Тапкадан тюшюп, аякъ ууалсын,
Шахар Тебердини суу алсын.

Ойра, тауда отлагъан кийикле,
Ала жукъламайла, сойланмай.
Мен сени алай алып къоялмам,
Иги сагъыш этип, ойламай.

Туура болумунгу мен айтсам,
Айжаягъым, ариу акъ жаулукъ,
Къалмагъанды энди сени юсюнгде
Керти алгъын кибик махтаулукъ.
 
 
 
#119
Джаратама0
08.01.2011 03:27:03
Бешик жыр
Жукъла, кёз гинжичигим,
Сен жукъугъа кетсенг а,
Татлы тюшле кёре, кюле,
Ишиме бош этсенг а.

Бёлляу-бёлляу эт, кюнюм,
Къатын алып кёрейим,
Сен аурума, бауурчугъум,
Сен жаша, мен ёлейим.

Кёзчюклеринг нюр жана,
Ёсюп, жюрюп кетерсе.
Тау жигити болуп, мени
Жумушуму этерсе.

Алма терек тюбюнде,
Суу тауушха тынгылай,
Тынч-тынч жукълап къалчы, кёзюм,
Мен да бешик жыр жырлай.

Жукъу саулукъ береди,
Жукъла, алтын тауугъум,
Жукълап турсанг, эркелерме,
Сенсе жашау зауугъум.
 
 
 
#120
Джаратама0
08.01.2011 03:27:47
Джёрме

Къарачайдан белек атлы
Тебредиле, ой, ой.
Ала, жорта, Загьызандан
Атландыла, ой, ой!

Ала алайда азыкъларын
Жаратмайла, ой, ой!
Ала алайда доммай уугъа
Жайылдыла, ой, ой!

Алайчыкъда ёлтюрдюле
Семиз доммай, ой, ой!
Ол доммайдан этген элле
Тогъуз жёрме, ой, ой!

Жёрмелени санадым да -
Бири жокъ, ой, ой!
Жёрме урларгъа Шимаухадан
Тири жокъ, ой. ой!

Былай ары жёрме озуп
Кёрюрмегиз, ой, ой?
Ол сагъатха аны ашаргъа
Бёрюмегиз, ой, ой?

Бирин къоюп бирин манга
Берирмегиз, ой, ой?

Мени жёрмем алты эшекге
Жюк болады, ой, ой!
Аны урлагъан юйю бла
Тюп болады, ой, ой!

Мени жёрмем багъанадан
Базыкъ эди, ой, ой!
Мени жёрмем бир къарыннга
Жазыкъ эди, ой, ой!

Жёрме барад, маржа, жашла,
Жаным бла, ой, ой!
Къан салгъанма жарлы юйюме
Къарным бла, ой, ой!

Жау жагъылып, урлагъанымы
Билдирдим, ой, ой,
Уллу къабып, мен аузуму
Кюйдюрдюм, ой, ой!
 
 
 
#121
Джаратама0
08.01.2011 03:28:26
Боз алаша

Ой, алаша, боз алаша, ой, ой, ой,
Чаришге чапсанг, оз, алаша, ой, ой, ой,
Озалмасанг, артха келчи, ой, ой, ой?
Жаммызынгы тарта келчи, ой, ой, ой!

Алашамы чаришге салдым, ой!
Артларындан сюрюп келди, ой!
Аз къарыуун билип келди, ой!
Халкъ ызындан кюлюп келди, ой!

Мени алашам - боз хорады, ой,
Аны ким да нек сорады, ой!
Алашамы жангыз тюгю, ой!
Сыртындагъы кертме жюгю, ой!

Мени алашам - жоргъа алаша, ой!
Къаргъа кирсе - чана алаша, ой!
Тюзге чыкъса - арба алаша, ой!
Жарлылагъа жара, алаша, ой!

Алашамы къулакълары, ой!
Таш макъалайд туякълары, ой!
Темир юзед жыякълары, ой!
От чагъады аякълары, ой!

Мени алашам - къыргъый жоргъа, ой!
Секиреди аршын жаргъа, ой!
Аллай ёхтемд мени алашам, ой!
Ой, алаша, боз алаша, ой!

Мени алашам - кенг сауурлу, ой!
Къарыш болур сырт жаууру, ой!
Иер салсам, къулакъ жумар, ой!
Къамчи тийсе, къуйрукъ булгъар, ой!

Ары айлан да, салам аша, ой!
Бери айлан да, бичен аша, ой!
Ашамасанг - талау аша, ой!
Макъа терид тартыу жиби, ой!

Мени алашам - аллай бозду, ой!
Халкъ чаришде барын озду, ой!
Эй, машалла, боз алаша, ой!
Кёз тиймесин, кёп жыл жаша, ой!
 
 
 
#122
Джаратама0
08.01.2011 03:29:06
Озай

Ой, озай, озай, озай,
Келгенбиз жаным, озай,
Бир малчы къошдан, озай,
Келмейбиз ачдан, озай.

Ой, озай, озай, озай,
Ой, озай, озай, озай

Къапчыгъымда азыгъым, озай,
Къолумда жерк къазыгъым, озай,
Чыгъыгъызда кёрюгюз, озай,
Бизге бир зат беригиз, озай!

Ой, озай, озай, озай,
Ой, озай, озай, озай.

Чырды толу этигиз, озай,
Андан юлюш этигиз, озай,
Къууанч кюннге жетигиз, озай,
Уялмасын бетигиз, озай.

Ой, озай, озай, озай,
Ой, озай, озай, озай.

От башында тузугъуз, озай,
Берекетли ашыгъыз, озай,
Къатын алсын жашыгъыз, озай.

Ой, озай, озай, озай,
Ой, озай, озай, озай.

Келинигиз жаш тапсын, озай,
Ол да халкъгъа жарасын, озай,
Берген - насыпха батсын, озай,
Бермегенни - ит къапсын, озай.

Ой, озай, озай, озай,
Ой, озай, озай, озай.

Жюнлю болсун къоюгъуз, озай,
Жарыкъ болсун тоюгъуз, озай,
Семиз тууар союгъуз, озай,
Бизге юлюш къоюгъуз, озай.

Ой, озай, озай, озай,
Ой, озай, озай, озай.

Уллу кессенг - манга кес, озай,
Гитче кессенг - бармакъны кес, озай,
Сау къалыгъыз, кетейик, озай,
Хоншу юйге ётейик, озай.

Ой, озай, озай, озай,
Ой, озай, озай, озай.

Ойнай, кюле, келгенбиз, озай,
Алгъыш эте кетебиз, озай,
Озай жырны жырлайбыз, озай,
Энтта къайтып келирбиз, озай!

Ой, озай, озай, озай,
Ой, озай, озай, озай.
 
 
 
#123
Джаратама0
08.01.2011 03:31:41
Орус-япон урушда

Тау эллеге уруш къагъытла келген кюн
Жарлы жашланы правленнге жыйдыла.
Аракъы ичирип, кёллерин жарыкъ этерге,
Атла жегелле, Россейге алып кетерге.

Аллы бурун Узун-Къалагъа баргъанек,
Инбашларыбызгъа кёк пагонла салгъанек,
Ызы бла уа Армавирге баргъанек,
Армавирде ай бла жыл тургъанек.

Къазауат къуллукъну кёлюбюзден билгенек,
Андан сора да машиналагъа миннгенек,
Машинала бла тамам къыркъ кюн баргъанек,
Сора бир шахарда атылып къалгъанек.

Эрттен, ингир Япон таулагъа къараек,
Японлуланы кийикленича мараек,
Марасакъ да, биз аланы уа кёрмеек,
Ол кюнледе биз кесибизни билмеек.

Кече арада, татлы жукълап тургъанлай,
Бир къуугъун чыкъды, шибиля ургъанлай:
"Кавказдан келген жигит тау къушла!
Бюгюн болгъанд къанлы согъуш урушда.

Бизни полкну японлу аскер алгъанды,
Мухаммадияны тилеги къабыл болгъанды".
Атларыбызгъа ашыгъышлы чабышдыкъ,
Гузаба сермеп, атларыбызны табышдыкъ.

Женгил, жуду биз да атланы жерледик,
Ашыгъышлыкъда чаба, жорта тебредик,
Танг атаргъа Япон таулагъа ёрледик,
Кюн аллына къызыл къан тёге тебредик.

Топ тютюнден бир бирибизни кёрмедик,
Жунчумадыкъ, бирден залпны сермедик,
Таматабыз а Тохчукъланы Наныды,
Япон топну ол кючлюгюн таныды.

Сора Наны ма алай айтып сёлешди:
"Бизден келген, жаным, жашла, жигитле!
Жан чыкъгъынчы, сауут-саба къоймайыкъ,
Чыкъгъан элибизни бетин жоймайыкъ.

Бизден келген, жаным, жашла, ай жигитле!
Барыбызда бир жерчикде турайыкъ,
Сермешиуде бираз тири ойнайыкъ,
Ёлгенибизге жаназы, намаз къурайыкъ.

Суу тапмайбыз, жаназы, намаз къылыргъа,
Япон топла къоймайдыла бирге турургъа.
Мажалларыбыз ауур жаралы болдула,
Юс кийимлерибиз къызыл къандан толдула.

Гогуйланы ол тулпар Харун, жаш Харун,
Бу дунияда сен бек кёп умут этгененг,
Бирине да жеталмай кетдинг, жартылай,
Жан беребиз, Япон таулада, къалтырай.

Биз ёлгенек тауларыбыздан узакъда,
Япон таулада жан бергенек, термилип.
Бизни миндирип ийген ючлю тайлагъа,
Бизни кюнюбюз келсин ол ит байлагъа.

Арисейден бир аман хапар алалла,
Ёлген болса, гетен бокълауучха салалла.
Аны уа къарап кёрген заманыбызда
Санла бла жанла башха болалла.
 
 
 
#124
Джаратама0
08.01.2011 03:32:37
Аман къатын

Иги къартла жау сюртелле
Мансларына, ой, ой.
Ариу къызла чач бау салалла
Чачларына, ой, ой.

Чачы жете болур, тейри,
Табанына, ой, ой,
Ариу къызла, эр тапмайбыз
Аманыгъызгъа, ой, ой.

Аман къатынны мен айтайым
Сарынын, ой, ой!
Аман болсанг, бурулсун
Сени къарынынг, ой, ой!

Къатын болса, къатынладан
Къаты болсун, ой, ой.
Аман къатынны жашар кюню
Алты болсун, ой, ой!

Аман къатын от жагъада
Олтурур, ой, ой,
От жагъаны тюкюрюкден
Толтурур, ой, ой.

Эри урушса, ата юйюне
Кете болур, ой, ой,
Этеклери тухтуй таууш
Эте болур, ой, ой!

Айлана болур, арпа ун кибик,
Юйрегенлей, ой, ой,
Чарыкъларын табанындан
Сюйрегенлей, ой, ой.

Аман къатынны билген ашы
Как болур, ой, ой!
Ахшы къатын къыш къатыкъгъа
Сакъ болур, ой, ой!
 
 
 
#125
Джаратама0
08.01.2011 19:01:03
Таукъан

Мени сюигеним Таукъан болгъанды,
Тау кийиклени мараучу.
Сени таныгъанлы, кесим болгъанма
Келлик жолунга къараучу.

Къараучу кесим болгъанма, Таукъан,
Ол сен жюрюучю жоллагъа.
Мен сени бла уа тюшюп къалгъыем
Таулада терен къоллагъа.

Ол аргъы ёзеннге кюн тиймейд, Таукъан,
Мен кюн тийгеннге барлыкъма.
Арсарлы бола уа сен турлукъ эсенг,
Болжалны кенгнге саллыкъма.

Болжалны кенгнге мен салсам, Таукъан,
Кимле жюрютюр жуубын?
Эки сюйгеннге уа себеп болгъанны
Айтып айтмайла сууабын.

Ой, къолумдагъы къобузум, алан,
Акъ кюмюшденди тюеги.
Таукъанны сюймейин, ой, мен не этейим,
Суратха ушайды сюеги.

Аргъы таулада туманла, алан,
Берги таулагъа къоналла.
Келип, къатыма уа олтурсанг, Таукъан,
Ол ушагъыусуз суналла.

Таукъан таулагъа кетгенди бюгюн,
Тау кийиклени мараргъа.
Келигиз, къызла уа, ма биз барайыкъ
Таукъанны аллына къараргъа.
 
 
 
#
Джаратама0
 
 
 
Страницы: Пред. 1 ... 3 4 5 6 7 След.
Читают тему (гостей: 1)

 

Написать нам

Фонд «Содействие развитию карачаево-балкарской молодежи «Эльбрусоид»

© 2003-2026 Elbrusoid.org  |  Все права защищены Законами Гор.