Войти на сайт
3 Сентября 2026 года

 

  • Билими азны – ауузунда кирит.
  • Кесине оноу эте билмеген, халкъына да эте билмез.
  • Алтыннга тот къонмаз.
  • Ариу джол аджал келтирмез.
  • Айранын берсенг, челегин да къызгъанма.
  • Чомарт къонакъ юй иесин сыйлар.
  • Бозаны арты дауур болур.
  • Магъанасыз сёз – тауушсуз сыбызгъы.
  • Чакъырылмай келген къонакъ сыйланмай кетер.
  • Агъач – джерни чырайы, кийим – эрни чырайы.
  • Кирсизни – саны таза, халалны – къаны таза.
  • Адамны сыфатына къарама, сёзюне къара.
  • Иги сёз – джаннга азыкъ, аман сёз башха – къазыкъ.
  • Гыдай эчки суугъа къараб, мюйюзле кёрмесе, джашма алкъын, дегенди.
  • Къазанчы аман болса, къазаны къайнамаз.
  • Къулакъдан эсе, кёзге ышан.
  • Тик ёргени, тик энгишгеси да болады.
  • Адам туугъан джеринде, ит тойгъан джеринде.
  • Эл ауузу – элек, анга ийнаннган – халек.
  • Чыбыкълыкъда бюгюлмеген, къазыкълыкъда бюгюлмей эди.
  • Эрни эр этерик да, къара джер этерик да, тиширыуду.
  • Кёзден кетген, кёлден да кетеди.
  • Тойгъан джерге джети къайт.
  • Чакъырылмагъан джерге барма, чакъырылгъан джерден къалма.
  • Сютден ауузу кюйген, суугъа юфгюре эди.
  • Джаралыны джастыгъында сау ёлюр.
  • Къозулугъунда тоймагъан, къойлугъунда тоймаз.
  • Сибиртки да сыйлы болду, кюрек да кюнлю болду.
  • Тойчу джашха къарама, къойчу джашха къара.
  • Къонакъ аз олтурур, кёб сынар.
  • Рысхы – сют юсюнде кёмюк кибикди.
  • Байны къызы баймакъ болса да, юйде къалмаз!
  • Ашаса, ашамаса да, бёрюню ауузу – къан.
  • Окъ къызбайны джокълайды.
  • Аууз сакълагъан – джан сакълар.
  • Дуния аламаты сен эсенг да, игиме деб айтма.
  • Таугъа чыгъаллыкъ эсенг, тюзде къалма.
  • Джарлы джети элни сёзюн этер.
  • Арбаз къынгырды да, ийнек сауалмайма.
  • Азыкъ аз болса, эртде орун сал.
  • Керти сёзге тёре джокъ.
  • Ауузу бла къуш тута айланады.
  • Джашынгы кесинг юретмесенг, джашау юретир.
  • Къонакъ хазыр болгъанлыкъгъа, къонакъбай хазыр тюлдю.
  • Акъыл къартда, джашда тюйюлдю – башдады.
  • Сёз къанатсыз учар.
  • Абынмазлыкъ аякъ джокъ, джангылмазлыкъ джаякъ джокъ.
  • Ана – юйню кюн джарыгъы.
  • Кёрмегеннге кебек – танг, битмегеннге сакъал – танг.
  • Къалгъан ишге къар джауар.

 

Архив Форума » Бёлюмле :: Тематические разделы » Санат бла маданият :: Искусство и культура
   RSS
Для любителей творчества Сапара Узденова....
 
#1
Джаратама0
20.05.2007 18:47:47
http://www.youtube.com/watch?v=peJl2PXCDWA
 
 
Страницы: Пред. 1 ... 21 22 23 24 25 ... 112 След.
Ответы
 
#551
Джаратама0
21.10.2010 02:20:11
Sabr
Сау бол, мен этгеним да хазна кёп тюйюлдю, жашаумда а бир затха сокъурнамазча сюеме
 
 
 
#552
Джаратама0
26.10.2010 00:41:45
Салам!
06
Къатышханы джанны саннга,
Бой бергени санны джаннга,
Бу, джашауду, алан, ангыла.
Алмашдырсанг тюшню тюннге,
Ийнар десенг, сен, кюуюнге,
Джашау тюлдю, алан, ангыла.

Къанны джаннга бала этсенг,
Балагъа да багъа берсенг,
Бу, джашауду, алан, ангыла
Алам джорукъ джокъду десенг
Къабырстаннга къучакъ керсенг,
Джашау тюлдю, алан, ангыла.

Къууанч-бушуу кёзюу келсе,
Хар биринден, ангы ёссе,
Бу, джашауду, алан, ангыла.
Сен, эсинги, топал этсенг,
Джахилликге эшик керсенг,
Джашау тюлдю, алан, ангыла.

Зауукъ эсенг, табигъат бла,
Ёмюрлюк бла, таш бла ханс бла,
Бу, джашауду, алан, ангыла.
Джаны болгъан эрши эсе,
Хар къуу иннет тенгинг эсе,
Джашау тюлдю, алан, ангыла.

Билсенг, ала, отну буздан,
Ала билсенг шекер туздан,
Бу, джашауду, алан, ангыла.
Тау адетден кери болсанг,
Къол орнуна айакъ созсанг,
Джашау тюлдю, алан, ангыла.

Харибге да онг теджесенг,
Ёлгеннге да сауду десенг,
Бу, джашауду, алан, ангыла.
Биле, барсанг джашау таргъа
Шо, не айыб, ёз къадаргъа.
Терс кесинг, да сора, мангыра.
05.12.1996дж

Басханстан. Сапар Ёзден
 
 
 
#553
Джаратама0
27.10.2010 03:01:43
Салам, Билял!
 
 
 
#554
Джаратама0
27.10.2010 03:34:06
ШАТ
Салам!
Бармыды бир джангылыкъ Къарачайдан? Нальчик таба уа баралмай турамыса?
 
 
 
#555
Джаратама0
27.10.2010 03:36:41
Бир кёб джазгъаным бери тюшмей къалды.
 
 
 
#556
Джаратама0
27.10.2010 03:43:54
Сагъат алтыдан бери кюрешдим,не эсе да бир тыйыгъыч болады экибизни ишибизде.
Эки джанындан да джокъду хапар,ахырда да тилсиз болуб бир къалмаймыдыла. Мени налатым бошду,алагъа джетгенни кёрюрсе.
Мени творчествома былай джарсырыкъса деб,эсимде-бусумда джокъэди..Аллахны разылыгъын табхын!
Мадар болса,звонить этиб,тынчлыкъла бир хапар билдир.
Тел: 8-866-38-4-76-96
Сапар Ёзден. Басханстан.
 
 
 
#557
Джаратама0
27.10.2010 04:03:55
Хапар соргъанлагъа,хапармы айтырса.


07
Сен, кимсе деб, соруб турма керексизге
Къургъакъ кюле, алай, бир кёб, къозума.
Аллах айтса, сен бу кюннге, тюбериксе
Къабырстанда, халкъ келечи, болурма.

Бола берсин бюгюнлюгюм элден башха
Джетер зауукъ, кёк насыбдан толурма
Ушасам да, бу джашауда, мен начасха
Къабырстанда, халкъ келечи, болурма

Мен, билеме, айыб ишим, кёбдю мени
Кёзюуледе, кёб шынкъартдан, отлума
Ёлюб кетсем мен бездирмем тёгерекни
Къабырстанда, халкъ келечи, болурма.

Сагъыш джанны этгенликге бир ачы саз
Бир - бирледе, мен къууанчны къолума
Къабырда уа, берир Аллах, манга, ауаз
Къабырстанда, халкъ келечи, болурма.

Джашау ётдю бош бёлюне бош затлагъа
Энтда, ёзге, мен къауумдан онглума.
Джюрек тюздю хар тюзге да, Аллахгъа да
Къабырстанда, халкъ келечи, болурма.

Сен, кимсе деб, соруб турма керексизге
Къургъакъ кюле, алай, бир кёб, къозума.
Аллах айтса, сен бу кюннге, тюбериксе
Къабырстанда, халкъ келечи, болурма.
06.11.1996.
 
 
 
#558
Джаратама0
27.10.2010 04:09:25
Эркекди да,бири, меннге поэзияны юсюнден бир сёлешсинчи.
Айтханны алай айтырыкъма,кеси-кеслерини джазгъанларындан ыйлыгъырча.
Сапар Ёзден. Басханстан.
 
 
 
#559
Джаратама0
28.10.2010 02:31:07
Базы адамла бардыла, ала миллeтни кeсидилe. Алага карап миллeтни болуму кёрюллюктю. Тынч, иги, куанчлы eсeлe, миллeт дe куанчлыды. Алай тюлeсe, миллeт дe алайды дeгьeнчe.

Форумда окуганларым, джырла, назмуладан англаганыма кёрe Ёздeнланы Сапар да Карачай-Малкар Аланланы миллeт адамларындан бири болурга джараулу. Форумда окуганым макалeгe, форумну куру кeсиндeн джарауундан дюнядакы бютeу Аланланы бир джeргe джыйганындан англаганыма кёрe Eлбрусоид'ни тамадалары да алай миллeт адамларыдыла. Алаи иги ниетлeблe башламасала, Аланланы джeнтeры болуп былай парлап калмазeди Eлбрусоид.

Eлбрусоид'ни китапла да басмалатганын окуганeм. Сапар Ёздeн бютюн Аланлада бeлгили джырчы, назмучу бола турганлайына 60 джылына кeлe турганлайына бир назму китабыны басмаланмагьаны да сeйирди.

Бугун Малкар'да уллу сагьышла, катышыклыкла, билинмeзликлe, проблeмлe барды. Хeркeс кeси билгeнинe, оюмуна кёрe проблeмлeни халлeтeр ючюн бар кючлeриблe игилик тюз джолдан кюрeшeдилe. Картла Москова'да Крeмлин'ни туурасында айладан бeри суукта ачта саклайды, бизни кёрюгюз, eшитигьиз дeп. Крeмлин'дeкилe кёрюп eшитмeсeлe дe Москова'дакыла, Руся'дакыла, бютeу дюнядакыла бары eшитириктилe Малкар'да уллу проблeм болганын. Кимилe Eуропа'га, Тюрк краллага барылсын дeйди. Хeркeс бир дыгалас ичиндe. Eуропа, Амeрика, уллу кралла бир оноудан колай колай чыкмайдыла. Аллах болушур иншаАллах.

Биз бирбирибизгe болушурга кeрeкбиз eнг алда. Биз кeсибизгe ие чыкмасак, болушмасак бизгe ким ие чыгьар ким болушур. ДЖюрeклe биргeлeй болуп бир болсак, джумдурук болсак калганла да сюйсeлe сюймeсeлe тынгларык болурла. Миллeт адамларыбыз Сапарчаланы да джюрeклeри тынчырак болуп китаплары басмаланса КЪарачай Малкар Аланланы да ишлeри тюзeлир, куанчлы болурла иншаАллах.
 
 
 
#560
Джаратама0
08.11.2010 01:23:52
Эль Халедни кёрген бар эсегиз менден Салам беригиз.

Айланады калак булут, кёкде, джангыз
Джелле аны этгендиле, ой, зыкгыл.
Кёрюнсе да ол бизлеге джарлы джакъсыз
Хар не бла да, менден эсе, ол такъыл.

Сюргенликге сууукъ джелле ары ? бери
Башха бошду, джурту аны къыйырсыз
Тели эсе, къууанчданды, ма ол тели
Насыблыды, аны билмейд, хайырсыз.

Эркинликни кенг джолунда сагъыш бир аз
Джумуш азды, ой, анданды, ол калак.
Джер юсде уа, болмаз эди, алай, джууаш
Ичи ? тышы болмаз эди алай акъ.

Былайда уа къаты джерде хар не къатыш
Бу иги деб, кёлюнг алыр джукъ да джокъ
Къалайда да бир бетлиди алгъыш-къаргъыш
Бирча тюлсе, бирде ачса, бирде токъ.

Булутну уа кече ? кюн да джаны сабыр
Ол кериди джер джашауда хар затдан
Зыкгыл булут, нёгерликге сен бир чакъыр
Эркин кёкде, шо, бир бездир калакдан.
1996дж. Къарчастан.
 
 
 
#561
Джаратама0
14.11.2010 01:37:22
Ала, энтда, ангылар затларына эс бёлмейдиле. Джарсыма,бусагъат хар не да орнун табарыкъды,джарсыма..
Лайпанланы Кулинагъа
72
Аллах, мени, бу тюрлюле бош къыйнайла
Тохтамаздан башлайдыла джууулдаб
Тюз джеримде ауузларын нек тыймайла
Берсенг эди сен былагъа бир джууаб.

Тюз джеримде ауузларын нек тыймайла
Меннге сормай бош кирелле къоюннга
Былай турмам, юзюлселе тёзюм къылла
Мен боллукъма кёргюзюрге оюнла.

Былай турмам, юзюлселе тёзюм къылла
Джаш-къартды деб мен биринден уялмам
Керек болса къамчидиле менде джырла
Керек болса туугъанчалла къамадан.

Керек болса къамчидиле менде джырла
Отха бурсам боллукъдула шыбыла
Он мингни да кюйдюрюрле ма бир ызгъа
Нек билмейле поэт сёзню зыбчыкъла.

Аллах, мени бу тюрлюле бош къыйнайла
Тохтамаздан башлайдыла джууулдаб
Тюз джеримде ауузларын нек тыймайла
Берсенг эди сен былагъа бир джууаб.
06.11.97. Къарчастан. Орта Къарач.
 
 
 
#562
Джаратама0
14.11.2010 08:06:58
 
 
 
#563
Джаратама0
14.11.2010 15:11:31
КёлКёз деген сёз джыргъа бир ариу джарашырыкъды.
Менден Салам да ал,джаратсанг а, бу джырны да.


70
Энтда, ма, кетди кече кери
Танг кесин джаяды ёзенге
Джыр излей келгенме да бери
Харифле да алкъа кёлекге.

Кёк башы ариуду, бир ариу
Къарамдан узакъды къыйыры
Ой джан а тохтатмайын талпыу
Алайын кёреди бир сыйлы.

Нек тартады, хаман, ёргеге
Кёк джюзюн сюеди асыры
Чыгъарыкъча ол анда тёрге
Тёр юсде боллукъча акъыллы.

Эй, тутсам да, мен ары, ызны
Бу эсим къалырмы да башда.
Мен анда табарча минг джырны
Аллай джер болурму да анда.

Къыллыны алыб мен къолума
Сюелиб ма бюгюнча тангда
Джыр джауум себерча джуртума
Аллай кюн болурму ма артда.

Энтда, ма, кетди кече кери
Джарыгъын джаяды энтда танг
Бир ариуду, энтда, этгени
Агъарады энтда Къарчастан.
02.11.97. Орта Къарачай
 
 
 
#564
Джаратама0
15.11.2010 11:03:45
Салам,Нюрбек!
Иги болурса деб, ышанама. Мени да джокъду хатам,боллукъду джашаргъа..
Кече Къарчастандан звонит этгенди биреулен, Аллах буйюруб, иш аллына бара башлагъан болур, дейме.
Мадарынг болса мени бир джокъла.
 
 
 
#565
Джаратама0
19.11.2010 21:10:40
27
Бу кюуню Сылпагъарланы бир тиширыуну тилеги бла джазгъанма.
Олсагъатда Джёгетей Аягъында джашай эдим. Кесими да, юйде ауруб
тургъан адамым бар эди да, сагъышым тёпбеден эди. Тиширыу асыры
бек джылагъандан, ёлген джашны хапарын толу ангыламадым.
Джашны мен кесим да таный эдим, Джёгетейчи эди ол. Барын да джан-
шагъаным, анда- мында алджагъан джерчиклерим болургъа боллукъду-
ла. Ол себебден, Сылпагъарладан кечмеклик тилейме. Кюу а былайды.
Эски къагъытланы къозгъай келиб табханма да, тас болуб къалмасын деб,
Бери джибереме
Сылпагъарланы Энверге этилген кюу

Сиз тынгылагъыз ой мен да айтайым
Бу Энверге этген кюуюмю.
Айтыб башласам а алай болама
Юсден атханча джюгюмю.

Нарсана шахар курорт а шахарды
Ой бу миллет таймай келеди
Ары барыргъа мен а сюймейме
Эй андан къыйынлыкъ келгенди.

Энивер аллыкъ ол ариу юйню да
Шыбыла джерге кёмнгенди
Къарачай шахарны джаратмагъан Энвер
Ма Нарсананы ууун кёргенди

Сакълай а сакълай Земфира сени
Ма да къачхы ханслай онганды
Сени кюсей да дугъум кёзлери
Ма боз кюренден толгъанды.

Нарсана больница уа нек джарамады
Аман аурууну багъаргъа
Ой сени юйге ашырыб ийгендиле
Азчыкъ къалды деб джашаргъа.

Ашхы умутунг бла баргъаненг Энвер
Курорт Нарсанада турургъа
Ой уллу Аллах а буйюрмай а къойдуда
Джангы арбазны къурургъа.

Сен да ишлеген сени ишингде
Ма энтда ишлейле тенглеринг
Бир къауумлагъа той а болгъанды
Сени замансыз ёлгенинг.

Энверим эте, Энверим дей да
Ма ананг Балачыкъ атады
Ёлюб кетсенг да бу эки атынг
Бизни бла бирге къаогъанды

Бир кече тюшде алай а кёрдюм
Атлам эталмай аллыма
Энверде ауруу кери да болсун
Мени сюймеген къаллыма

Ол джарлы атанг Азияда къалды
Ай сени къарнашынг да узакъда
Энди уа ананг къалай турлукъду
Тюшгенди сагъыш тутмакъгъа.

Зенфирни кёрсем сен эсге тюшюб
Кёзлерим къандан толады
Къабыргъа кирген ол мыдах Энвер
Ой тюшде къабырдан къобады.

Къабырдан къобуб аллыма келиб
Тынчлыкъ - эсенлик сен сорсанъ
Джангы туугъанча алай болама
Салам берирге къол созсанг

Мени тюшлерим тюнле болсала
Табмазенг менден насыблы
Сени орнунга ой мен кетгеем
Къабыр тереннге ма ары.

Ашхы муратла кёб этген Энвер
Джеталмай къалдынг муратха
Ачы аурууунг джер а салдырды
Ёлюмден келген ол атха.

Джууукъ болгъан а алай джылайла
Киши джыламаз ой алай
Джарлы Энверим джан бериб къойдунг
Мени да бир бек къучакълай.

Халал тенглеринг кёре келелле
Учу кёрюнмейд келгенни
Мени джауум да кёрмей а къалсын
Былай а къыйналыб ёлгенни.

Кирпиклени уа ёмюрге джабдынг
Этдинг бизни да сен мыдах
Биз мында санга джараялмадыкъ
Анда джарасын, шо, Аллах.

Ай кенг арбазда миллет толуед
Толубед тенгден джууукъдан.
Аман ауруудан замансыз кетдинг
Къутулдунг энди худжудан.

Таймай кёзюме кёрюнюб турад
Ахыргъы кюнню къарамы
Джыламай санга къалай а этгин
Джылаб мен кёрсем анангы.

Бу джылы джазда не да чагъады
Терек джашнады къурмачлай
Къачхы тюрсюнлей ма эгечлеринг
Сокъур болалла ой джылай.

Нарсана сени кёб туталмады
Морхгъа да келдинг джашаргъа.
Алай а джазыу бир да буйюрмад
Анда уа къабын къабаргъа.

Ай дарман иче, дарман иче да
Суу ичалмазлыкъ сен болдунг
Джангыз къарнашынг къалай болалсын
Кесин кесине сен къойдунг.

Ол джарлы ананг, ой хариб ананг
Тюрлюле этед ол санга
Акъны айырма энди къарадан
Ингирди дейди ой танга.

Ай, хариб Энвер, болур а болду
Энди тынчлыкълы сен джукъла
О сыйлы Аллахым мен а тилейме
Бизни Эниверни унутма.

Кюу айтмайын а, не джыламайын
Къалай джашагъын айтчы бир
Кюндюз - кече да былай тилейме
Джандет ичине сен бир кир.

Джашау джолунг а къолай болмады
Заман джукълатды замансыз
Кесинг джангыз а къалай тураса
Къыйын да болур анасыз.

Джашауунг сени къолай болмады
Бир бек къыйнады керексиз
Джарлы кесинг а къалай тураса
Къыйын да болур эгечсиз.

Джашауунг сени къолай болмады
Инджиу бла ётдю хайырсыз.
Къара кёрюнде къалай тураса
Табсыз да болур къарнашсыз.

Ахыр тылпыуум менден къорамай
Атмам джюрекден мен сени
Сени кёзюнгден кёрюб а турлукъма
Джууукъда - тенгде кёблени.

Тёзюб - тёзмей да къалай этейим
Бир уллу джарсыу сен бердинг
Ой бери келлигинг ётюрюк болур
Сен бизни сакъла сен кесинг.

Ары къарайма да, бери къарайма да
Мен кёрмейме сени алгъынлай
Ай, Эниверим, джазда къууландынг
Бир чагъалмайын сен джазлай.

Ой къайсы барды ары кетмезлик
Биз да барлыкъбыз кесекден.
Сыйлы Аллахдан ахыр тилегим
Тюбетсин бизни джандетде.
Къарчастан.
1995 дж. Джазда.
 
 
 
#566
Джаратама0
22.11.2010 00:23:21
Игиме,сизге теджегеним да олду.
Саламымы да алыгъыз.


75
Бир ариуду, ма бюгюн да, тюненелелей
Къышхы кёкде кёрюнмейди чырт булут
Эсим мени бир чууакъды таулу кёклей
Сансыз къарам хар неге да бюгюн джут.

Ай не медет къышхы кюню алай къысха
Тартыб ? созуб, узун этер джокъ мадар
Мени кючюм джыр анасы алтын къылгъа
Мени кючюм джаза билиу ма азбар.

Къарчастанны таза кёгю турсун былай
Башхаладан ой кирмесин шайтан ? джин
Бизникиле акъ мёлекле джангыргъанлай
Джарыкъ къатыш себе берсин къуру дин.

Къарча эли джашар кюнюнг учсуз болсун
Артда къалма, сен, алгъа да, чабма бек
Ючюлмейин, джана берсин тыбыр отунг
Тот болмасын къаманг къатыш хар керек.

Эсим мени бир чууакъды таулу кёклей
Сансыз къарам хар неге да бюгюн джут.
Бир ариуду, ма бюгюн да, тюненелелей
Къышхы кёкде кёрюнмейди чырт булут.
08.01.98. Орта Къарачай. Джёгетей
 
 
 
#567
Джаратама0
22.11.2010 01:15:45
Саламынг узакъ босун!Иги бол...иги бол)))
 
 
 
#568
Джаратама0
22.11.2010 04:32:43
ШАТ
Энвер ким эсе да Аллах джандетли этсин!
Керти ачыкъ джюрекден къыйналгъан болур эдинг ол тиширыуну джашына къыйналгъанына, ансы алай джазаллыкъ болмаз эдинг. Аллах къыйынлыкъдан сакъласын, кюу джазар кюн кергюзтмесин, къууанч джырла джазарча къууанч кюнлеринги кеб этсин!
 
 
 
#569
Джаратама0
22.11.2010 13:59:05
Багъалы Сэстра,кюн ашхы босун!
Эски джырларымы джарашдыра тура эдим,бери къарагъанымда,ННН-ден да, Сенден хапар алдым.Экинге да,эмда, сиз сюгенлеге Саламым бла бирге, бусагъатда джазгъан джырымы саугъагъа ийеме.
Кесинг бла да, творчествону юсюнден бир иги ушакъ этерге деб,турама.
Къайда айлансанг да къууанч бла айлан!
Эсен кёрюшейик! Джаза тур.

80
Олтурама джырларыма мен джыр эте
Ийнардан да кюуге тартад этгеним
Билед Аллах, сагъышлагъа бир бек кете
Арыгъанма, джашау кибик, эследим.

Теджесем да ёзден халкъгъа ёзден джырла
Ата джуртум манга къучакъ кермеди.
Былай эте киргенликге къыркъбеш джылгъа
Юй тюблюкге къарыш джерчик бермеди.

Сансызлыкъда къалыб кетиб кесим джангыз
Сууукъ юйде сууукъ джырны джазама
Мундан башха о не этгин къалсанг джакъсыз
Шейирме да, шынкъарт болуб джанама.

Халкъым менден алалмады алыр затын
Берлигин да, бералмады джырчыгъа
Не сейирди, джауум бола халаллыгъым
Оу- шау бола келиб кирдим къартлыкъгъа.

Билед Аллах, сагъышлагъа бир бек кете
Арыгъанма, джашау кибик, эследим.
Андан болур, къычырады джаным кёкге
Мундан табсыз, шо, неди да, этеринг.

03.02.98. Орта Къарачай. Батал Паша.
Басханстан. Сапар Ёзден.
 
 
 
#570
Джаратама0
24.11.2010 00:23:54
На днях получил книги из Москвы. Меня интересует современная лирика. Начал читать книгу ?Поющая пуля? Александра Кувакина. Приятно был удивлен, что книгу завершает стихотворение, посвященное нашему Сапару Узденову. Вот оно:

***
Сапару Узденову

Мир держится на старых истинах.
Поэт на вечном положеньи
Скитальца в чашах многолиственных
Оттенков смысла и значений.

Как лихорадкою охваченный,
Он мучается нужным словом,
Свершая труд, уже оплаченный
Толпы старинным приговором.
 
 
 
#571
Джаратама0
24.11.2010 02:34:29
Sdorovo!!!Nado kupit etu knigu.
 
 
 
#572
Джаратама0
24.11.2010 12:43:18
ШАТ
Э, тохта, неди ол # 22 Ноя 2010 10:59 назмунг? Кесинги къартлыкъгъа хорлатыргъамы башлагъанса?))) Мен бери бир сурат бир салырма, юрене эсем, кесим алгъанма Къызыл-Къалада))), тамам сени "Джанкъзларынга" келишген бир сурат))).
 
 
 
#573
Джаратама0
24.11.2010 16:49:13
Кюн ашхы болсун, Сэстра!
Игиме, Сеннге да, теджегеним, олду.
Эски джазгъанларым бир джерге джыйышдырыб кюрешеме, бошалыргъа унумайдыла.
Сени бла ушакъ этерим да неди:
Лайпан улу Билалны аты бла талай джерден звонит этгендиле, -подстрочникле ий, орусча китабынгы этейик,- деб.
Эсинг байды, мадарынг болса, тюз форумдан алсанг да, талай затыма къарасанг, къууанныкъ эдим.
Къызыл Къаланы сагъынаса да, андан да бир эки зат айтайым:
Москвадан келсек (тенглерим бла) хаман да алайгъа бара эдик.
Менде да кёбдю ол джерден сурат, бир кесекден Сеннге ийерме.
Москвада, аланы, талай адамгъа кёргюзсенг, талай алгъышда эштириксе.
Кёб зат айтырым келсе да тохташайым.
Эсен бол! Аллаху Акбар!!!
Кесинг - кесинг бла къалсанг, бу джырыма да, эс бёлюрсе....

1004
Учхун тюлдю энди джан, юрендим кёбге
Бугъунмай дуния башдан
Туурама Кёкге.

Туурама келлик кюннге, ачха не токъгъа
Хазырма насыб тюннге
Джалыннга, отха.

Юркютмейди джау юзюк, барлыкъ не джокълукъ
Хайыр джокъ ачы кюйюб
Боллукъду боллукъ.

Ахырны аллы джете, къоркъмаз къан бла джан
Сингсем да къара джерге
Джашар Къарчастан.

Бугъунмай дуния башдан, туурама Кёкге.
Кёзледен ийнам къарам
Учады ёрге.
30.09.10. Басханстан. Тырны ? Аууз.
 
 
 
#574
Джаратама0
25.11.2010 05:05:06
Кече шошду, кюренли кёкде бир мутхуз джулдуз да, кюрешеди джарыгъын бюркюб
 
 
 
#575
Джаратама0
28.11.2010 16:02:54
Кюн ашхы болсун, Сэстра !
Эсенме, Сени да эсен болурунгу излейме !
Къолумдан келгенни этейим,- дегенинге Сау бол.
Самарада, Тольяттиде 80- нга джууукъ кёчюрюлген затым барды.
Китаб формат болур ючюн энтда талай зат керекди. Аллай-быллай бир демейме,кесинг джаратхан затладан бир беш затны этсенг да къууанныкъма. Ариу бир башха адамны къошсанг да огъайым джокъду.
Къайда айлансанг да, къууанч бла айлан !
Басханстан.
 
 
 
Страницы: Пред. 1 ... 21 22 23 24 25 ... 112 След.
Читают тему (гостей: 6)

 

Написать нам

Фонд «Содействие развитию карачаево-балкарской молодежи «Эльбрусоид»

© 2003-2026 Elbrusoid.org  |  Все права защищены Законами Гор.