Войти на сайт
27 Июня 2026 года

 

  • Ана кёлю – балада, бала кёлю – талада.
  • Элиб деген, элге болушур.
  • Онгсузну – джакъла, тенгликни – сакъла.
  • Бёрю да ач къалмасын, эчки да ашалмасын.
  • Билимден уллу байлыкъ джокъду.
  • Экеулен сёлеше тура эселе, орталарына барыб кирме.
  • Къарнынг къанлынга кийирир.
  • Тик ёргени, тик энгишгеси да болады.
  • Чарсда алчыны эл кёреди.
  • Акъдан къара болмаз.
  • Бал чибинни ургъаны – ачы, балы – татлы.
  • Атынг аманнга чыкъгъандан эсе, джанынг тамагъынгдан чыкъсын.
  • Байдан умут эте, джарлыдан ёгюз багъасы къорады.
  • Алгъанда – джууукъ, бергенде – джау.
  • Айтханы чапыракъдан ётмеген.
  • Джан саулукъ бермей, сан саулукъ бермезсе.
  • Ач да бол, токъ да бол – намысынга бек бол.
  • Ашаса, ашамаса да, бёрюню ауузу – къан.
  • Тенгни тенглиги джашай барсанг билинир.
  • Ётюрюкден тюбю джокъ, кёлтюрюрге джиби джокъ.
  • Азыкъ аз болса, эртде орун сал.
  • Бозаны арты дауур болур.
  • Къонагъынгы артмагъын алма да, алгъышын ал.
  • Таш ата билмеген, башына урур.
  • Ишлемеген – тишлемез.
  • Джылкъыдан – ат чыгъар, тукъумдан – джаш чыгъар.
  • Мал тутхан – май джалар.
  • Ётген ёмюр – акъгъан суу.
  • Къонакъ болсанг, ийнакъ бол.
  • Ёксюзню тилеги къабыл болур.
  • Биреуге кёлтюрген таягъынг, кесинги башынга урур.
  • Байлыкъ тауусулур, билим тауусулмаз.
  • Сагъыш – къартлыкъгъа сюйюмчю.
  • Сибиртки да сыйлы болду, кюрек да кюнлю болду.
  • Эм уллу байлыкъ – джан саулукъ.
  • Мухарны эси – ашарыкъда.
  • Билген билмегенни юретген адетди.
  • Джюрекге ариу – кёзге да ариу.
  • Къошда джокъгъа – юлюш джокъ.
  • Байлыкъ болгъан джерде, тынчлыкъ джокъду.
  • Бет бетге къараса, бет да джерге къарар.
  • Ойнаб айтсанг да, эслеб айт.
  • Алма терегинден кери кетмез.
  • Дуния мал дунияда къалады.
  • Гугурук къычырмаса да, тангны атары къалмаз.
  • Адебсиз адам – джюгенсиз ат.
  • Тёрде – темир таякълы, къаяда – чыпчыкъ аякълы.
  • Эр сокъур болсун, къатын тилсиз болсун.
  • Сабийни джумушха джибер да, ызындан бар.
  • Нарт сёз къарт болмаз.

 

Архив Форума » Бёлюмле :: Тематические разделы » Санат бла маданият :: Искусство и культура
   RSS
Для любителей творчества Сапара Узденова....
 
#1
Джаратама0
20.05.2007 18:47:47
http://www.youtube.com/watch?v=peJl2PXCDWA
 
 
Страницы: Пред. 1 ... 22 23 24 25 26 ... 112 След.
Ответы
 
#576
Джаратама0
29.11.2010 00:44:58
Салам, Мики !
Юйде, уллу- гитче да эсен болурсуз.
Мени да хатам джокъду.
Иги эгечимча, ол ачылмагъан папканы ачаргъа болушайыкъ дегн джашла бардыла, алагъы чыгъыб бир кёрсенг а. ( Абдуллах, Тау )
Нальчикдеги Эльбрусоидге да менден исси Салам бер.
Джарыкъ бетде тюбеширге, Аллах буйюрсун !
Басханстан.
 
 
 
#577
Джаратама0
29.11.2010 00:45:59
ШАТ
Ашхылыкъ кер, Сапар.
Подстрочник деб неге айтаса? Построчный переводха?
 
 
 
#578
Джаратама0
29.11.2010 00:55:24
Энтда, Салам !
Эсен болурса, мундан ары да алай болсун !
Хо, подстрочный перевод дейме. Этеме дегенинг болса, джырла бла кюрешме, поэзигъа ала къарыусуздула. Къалгъан джерде уа кесинг сайлагъанны.
Кесинг къайдаса, тюбейме десем къайда табарыкъма ? Ансы,джазыллыкъ зат а,кёб эди.
Кесинг сюйгенлеге, менден, Салам бер !
Басханстан.
 
 
 
#579
Джаратама0
29.11.2010 01:03:08
ШАТ
Саламынг узакъ болсун, юйге баргъанлай берирме. Кесим Москвадама.
Джазыллыкъ зат а кебеди дегенинг? Печатать этиллик, рукописде тургъан чыгъармаларым кёбдюлеми дейсе? Нальчикде Эльбрусоидге барсанг, сканировать этиб, меннге ийиб къоярыкъдыла мейлиме. Кесинги сканеринг бар эсе кесинг огъуна этиб ийиб къоярыкъса. Печатать этиб иерме ызынга.
 
 
 
#580
Джаратама0
29.11.2010 01:23:12
Хоу,рукописьле дейме, Московский тетрадланы да бошаялмайма,арта джазарма деб,ата бергенме. Мунда, Басханстанда джазгъанларым да
1020 болгъанды ( минг бла джыйырма )
Сканерим да барды, учениклерими чакъырыб, аланы да тюшюртейим.
Тюз былайда джазгъан болмаса,хапарым джокъду комппьютордан.
Тамбла, аны къайгъысын кёрейим.
Узакъгъа кетиб къалма.
Ингирде, эски къагъытладан бир затны джаздым, саугъам болсун.


100
1
Джокълаучанды анда ? мында мени бир тюш
Ёлген джанла къобадыла къабырдан.
Тюшледен да, ой Аллахым, кёргюз хайыр
Ёлген акгам сылайд мени башымдан.
2
Бир къаядан биз къарайбыз ёзен таба
Ёзен узун, кёрюнмейди къыйыры
Таза кёкню башлайды да булут джаба
Болад акга бир кесекчик къайгъылы.
3
- Джибимейик, кел, кирейик дорбун алгъа,
Мылы затны кётюрмейле санларым.
Ёлгенлеге джукъ тенг тюлдю къургъакъ затха,-
Сора тюйдю, мыдах болуб, къашларын.
4
Бир кесекден биз къарайбыз дорбун ичден
Таякъ джангур къургъакъ джерни къагъады
Элия да, тынчлыкъ табмай тийресинде
Кёзюуледе, къынгыр зугул, учады.
5
Талай джылны мен кёрмеген чалбаш акга
Къарай меннге, бир да, къарай къыблагъа
Сагъынады, ауур солуй, эсин манга
Эс да бёлмей булут тюбде шыблагъа.
6
? Иш сейирди, къалай келдим келмез джерден
Мен сейирме, бола тургъан, бу затха.
Кимге кетди сынчыкъ ауруу бу къарт белден
Ах, демейин, минерчама, мен, атха.
7
Ат дегенлей, турамыды бёгек атым
Мен сюйгенча, къараймысыз сиз анга
Къурмач этиб, беремисиз сюйген ашын,
Кишнеймиди, алгъын кибик, ол тангда.
8
Ат ? эшек деб, неле дейме, сер болгъанча.
Къалайдыла къарнашларым, эгечим.
Тот болмайын, турамылла мен къойгъанча,
Эски чалкъым, тёшюм- хыршым, сенегим.
9
Ай джашчыгъым, бир тансыкъма арбаз ичге
Не халдады топракъ юйню тюрсюню
Сакъал сылай бир кёрюред эд шош ингирде
Ингиргини батыб баргъан ол кюнюн.
10
Сен бтлмейсе джашау деген не затды
Ол бир кетсе, ай джан- джанны къармарса.
Кюсесенг да сен табмазса бир къуу хансны
Ийнакъларгъа, джалан ташны табмазса.
11
Ишле, терле, аша, джукъла, табын кёкге
Джерде эсенг, сен сау эсенг, къууанч ол
Иги затны джыйа бер да хаман кёзге
Сёзге бур да, тедже халкъгъа, халал бол.
12
Артха турма джюрек сюйген бир затдан да
Чабма алгъа, базынмасанг кесинге.
Ёлюрюнгю, сен унутма къууанчда да
Ахыр неди, оюм келтир эсинге.?
13
Тёзалмадым,акга,- дедим, чаба сёзге-
Бу - дин деген, керичады кёлюнгден
Не эсе да, учхараса чууакъ кёкден
Эсде къояр джукъ айтмайса кёрюнгден.
14
Джукъ айтмайса не мёлекден, не Сыйратдан
Къалай болдунг, табханмыса сен орун.
Анда джолда ёталдынгмы чырмауладан
Ол ? бу дерча, кимни тутдунг сен къолун.
15
Таякъ джангур тохтамайды, джууад къаты
Ырхы суула ырхыладан чыгъалла
Къара булут болады да эки джарты
Аралыкъда от джилтинле чагъалла.
16
Къарт атам а, узатады, къолун, тышха
Джууадыла, зыбыр къолну, тамчыла
Олсагъатлай, алады да, бери, ызгъа
Бетни сылай, тизди, сабыр, айтымла.
17
? ол дуниягъа бек ашыкъма, сорма хапар
Аны эслер джокъду алкъа сенде эс
Ол затланы эртде айтханд ма файхамбар
Бары хакъды, джокъду анда бир деб терс.
18
Терлемейин джукъ ашама, ол харамды
Сууаблыкъны, эм маджалы - халаллыкъ
Ол кёблюкде, кюнюнг анда, хаман акъды,
Ол береди, къабыр кёкде, азатлыкъ.
19
Кёб ашама, кёб джукълама, эслеб сёлеш
Ауур сёзюнг къамчи тийер базманда
Ол борчунгду, артыгъынгы халкъгъа юлеш
Юлешгенинг джагъынг болур ахратда.
20
Ач да, къара, къалай дейди Уллу Китаб
Белгилиди, ахыр кюню, ахырны
Хар атламны, эте турсанг, анга къараб,
Табдырлыкъды Уллу Аллах хакъынгы.
21
Керти болсанг Аллахынг бла Китаб сёзге
Ийнан бала, абындырмаз минг шайтан.
Ёлгенде да барлыкъ джеринг игилеге
Огъай десенг, къайнай тургъан бир къазан....
22
Биягъынлай, джашнайды да булут тюбю
Тюшдю андан шыбла бетли бир тарпан
Кёз къамарлай джарыды дама тюрсюню
Миниб анга, кетди акга къатымдан.........

1980-85-чи дж. Орта Къарачай.

Басханстан. Сапар Ёзден.
 
 
 
#581
Джаратама0
29.11.2010 03:18:06
ШАТ
Ингирде, эски къагъытладан бир затны джаздым, саугъам болсун.
Огъай-огъай, сау къаллыкъ)), акганг джандетли болсун, ёлген акганга этген назмунгу берме да меннге саугъагъа, бир джарыкъ джыр/назму бер))).

учениклерими чакъырыб
Учениклерими дегенинг? Окъутханмы этесе? Школда ишлеймисе? Огъесе назму/джыр джазаргъа юретемисе?
 
 
 
#582
Джаратама0
29.11.2010 03:34:38
вот оно чудо новых технологий: сказать КЪАЛАЙСЫЗ? самому Сапару Узденову!
 
 
 
#583
Джаратама0
29.11.2010 05:03:41
Бир кесекден биз къарайбыз дорбун ичден
Таякъ джангур къургъакъ джерни къагъады
Элия да, тынчлыкъ табмай тийресинде
Кёзюуледе, къынгыр зугул, учады.

Таякъ джангур тохтамайды, джууад къаты
Ырхы суула ырхыладан чыгъалла
Къара булут болады да эки джарты
Аралыкъда от джилтинле чагъалла.

Поезига каруу дегенлери бу болур
 
 
 
#584
Джаратама0
29.11.2010 16:20:53
ШАТ, талай кюн да болад мен Кёлкёзге назму сакълагъанлы) Жду от истинного мастера настоящего произведения искусства, джашаума джарыкъ саугъа болурча!
 
 
 
#585
Джаратама0
29.11.2010 20:01:52
Ингир ашхы болсун, КёлКёз !
Самаркъау этсенг да, керти кёлюм бла бу джазгъанымы саугъагъа береме.
Окъуб , не аз да, джюрегинг рахатлыкъ табарыкъ эсе, мени да, къууаннганнга сана!
Аллах иги умутларынгы берсин !


Бек сюйген назмуларымы бириди бу, энди уа сеникиди
Эсен бол !

87
Бир бек шошду,
Чибинле да кетгендиле юйюмден.
Киши джокъду,
Ташадама джулдузладан, кёкледен.

Мыйыда уа
Гюрюлдейди джашлыгъымы бораны.
Барды дау а,
Ийнанмагъан, кьонакъ бол да, сор аны.

Джашауну
Кёрюрге деб, чыкъгъан кюнде халкъымдан,
Къаргъауну
Тебретдиле бирер суубаш ызымдан.

Тохтамадым,
Мен айландым кёкде, джерде болуб ач.
Ууалмадым,
Сау кьалдыла, къалмаз джерде, джюрек, баш.

Мийикледен
Мен юрендим сый берирге тюзлеге.
Мен джюрекден
Салам бердим тюше келе эллеге.

Тюзледен да
Мен юрендим сый бериуню таулагъа.
Джюрекден да
Салам бердим, мен тюбесем алагъа.

Мен атланы
Махтамадым эшеклени къатында.
Махтауланы
Мен айтмадым ингиргиге чырт тангда.

Халкъ кюлгенде
Ауузума сала эдим мен къадау.
Халкъ юргенде
Табды дейем, бизни табхан бу джашау.

Айланч бла
Кишиге да, бир затха да бармадым.

-2-
Къууанч бла,
Бушуу блача, эр - къатынча джатмадым.

Бушуу бла да,
Мен шохлукъну таулу кибик джюрютдюм,
Джарсыу бла да
Тюшледе да, тюнледе да, джюрюдюм.

Арысам а,
Излей эдим мен джёнгерге арыгъан.
Ма анга да,
Айта эдим, хар затымы ачыкъдан.

Ол заманда
Джырлай эдим, джылау эте макъамым.
Акъ боранда
Келе эди ёмюрлюкге къалырым.

Ол джыллада
Тюшген элле хар болумсуз ызымдан.
Джол ызымда
Бир юй джогъед бугъунургъа къайгъыдан.

Ма, алай бла,
Мен ашырдым джашлыгъымы аулакъда.
Къарачай бла
Бир болургьа чырмау болуб кьауумла.

Кими айтды
Сюймейсе деб, миллетинги, айранны.
Кими атды
Акъ джырыма къарасындан аркъанны.

Бирлери уа,
Джюрегиме мизли ташла кьуйдула.
Бирлери да.
Хар джырыма джити тилле сукъдула.

Мен а, саума,
Ай, не медет, къууанмайма сауума
Энтда, тамбла
Сакълайдыла чалдыу салыргъа къауумла.


-3-
Бир бек шошду,
Чибинле да кетгендиле юйюмден,
Киши джокъду,
Ташадама джулдузладан кёкледен.

Кёлюме уа
Къонакъдыла кёзлеринги къарамы
Кёлюме да
Чакьыралла шам сагъышла аланы.

Арбазда уа
Кьуяд булут аямайын тымчысын.
Арбазда уа
Сюелелле тау бусакъла болуб сын.

Ма, сангача,
Мен болубма алагьа да сагъышлы.
Алагъача,
Ма санга да, алгъышларым бир джылы.

Мени кибик,
Бёлемиди киши сизге джукьусун.
Салмай кирит,
Кьонакълаймыд сагъышланы учсузун.

Ким биледи,
Азмыдыла, сагъыш этсенг, юлгюле,
Белгилиди,
Толудула, меничала, тюрлюле.

Бошайым,
Эрикдирдим, сени кибик, къагъытны.
Тохтайым,
Учу болмайд, айта барсанг, сагъышны.

Айтылгъанны,
Къалай сюйсенг, къайры сюйсенг, ары бур.
Джазылгъанны,
Не джюрекге, неда, отха бугъундур.

Басханстан. Сапар Ёзден.
 
 
 
#586
Джаратама0
29.11.2010 21:59:24
Салам,Мики!
Къалайса, юйде барыгъыз да, тынч-эсен болурсуз!
Кесим да бездим, сени да бездирдим, ол папканы къайгъысын кёралмадынгмы. Джашлагъа табдырыр амал джокъмуду ?
Иги эгечимча, мени джумушуму бир баджар,артда джукъ тилеб къыйнамазма.
Эсен тюбешейик. Юйде Салам бер !
Сапар. Басханстан.
 
 
 
#587
Джаратама0
29.11.2010 22:01:11
Аллах разы болсун, Сапар! Бек ёхтемленирчадыла назмуларым! Дагъыда, КёлКёз деген сёз джиргъа бир ариу джарашырыкъды деб кесигиз айтхан эдигиз, бу темада, алгъаракъ. Аны бла, къалай джараштырыгъаныгъызны кёрюрге излей эдим. Хо, энди, къодум) Аллахдан къууаныгъыз!
 
 
 
#588
Джаратама0
30.11.2010 15:50:51
Салам !

Медитативная лириканы сюе болурса деб, тура эдим...
А, марджа, муну Сэстрагъа бир беригиз.

96
Ма, энтда, турады
Ма, энтда, чууакъды
Мен, аны билеме, ол бизни джулдузд
Джарыгъы энчиди
Минълени бириди
Джарыкълай турсунчу ол таулунукъуд.

Ай бир кюмюшлюдю
Ол бизники тюлдю
Бизники, башхады, ёргерек андан
Джумушу да табды
Ол нюрюн чачды
Келечиди, тенгим, ол, ма, аламдан

Джууугъум- тенгим да
Ма халкъым элим да
Къууанчы уллуду, кёргенлей муну
Мен да, ма алача
Атагъа - балача
Къарамым кирсизди, ёхтемлик уллу.

Бюгюн да турады
Бюгюн да чууакъды
Джарыкълай, турсунчу, ёмюрле алай
Джашасын халкъым да
Бюртюгю ташы да
Джулдузгъа болсунчу ол да джулдузлай

20.02.90. Орта Къарачай.
 
 
 
#589
Джаратама0
01.12.2010 01:12:12
# Дата: 30 Ноя 2010 12:50
ШАТ
Ма! Ма! Ма! Ма, алай дей эдим мен!!!))))))))
5-6 кере къайтарыб окъудум)))))). Сау бол, Сапар, уллу къууанч салдынг манга!))))

-------------------------------
Сапар, про учеников не ответил. Ну, если секрет, то пусть останется в секрете..\)
 
 
 
#590
Джаратама0
01.12.2010 11:06:57
Салам !
Дворецде сабийлени юретеме,- Студия игры на гитаре.
Аны тышында ( 12 джылны ) Ана тилге, джуртубузну сюерге эс береме.
Мунда джашау къарачайдан башхаракъды, миллетге онг излген адамланы бырнак этедиле,артыкъсыз да намазгъа сюелгенлени.

Тёбеннге баш ургъанланы хаталары джокъду,ашаргъа ичерге да табадыла,орус къатынланы эркелетирге ачханы -заманны да къызгъанмайдыла.
Башха,былай деб,не айтайым. Игиме,джокъду хатам.
Иги къызча, ол подсьрочниклени къайгъысын бир кёр, тюз форумда болгъанланы алсанг да.
Микиге,ол ачылмагъан папканы къайгъысын бир кёр деб,тилеген эдим, ол да тынгылайды.Ары Сеннге бир ийсин,сау орта китаблыкъ барды анда.
Джаза турсанг къууанныкъма.
Эсен кёрюшейк. Тутхан ишингден къууан!
Басханстан. Сапар Ёзден.
 
 
 
#591
Джаратама0
01.12.2010 11:13:43
Назмуланы-джырланы кесиме махтау излеб салмайма, башха иер джер джокъду,кёб джазгъаным тас болуб барады.


АЛТЫНЧЫ КИТАБНЫ баргъаны былайды.

01
Келе турад къарчыкъ себе
Джангы джыл таулагъа.
Бизге ання алгъыш эте
Береди саугъала.

Атдя да, сакъалын сылай,
Айтады алгъышны.
О биз да джырчыгъын джырлай
Джасайбыз нызыны.

Келген джыл чырт аямайын
Берсин къууанч - насыб.
Мелхум этсин келлик джайын,
Келсин къачы джарыб.

Келген джылда Минги тауну
Эримесин бузу.
Онгуб барсын ёхтем таулу,
Чарпымасын джурту.

Келе эсе, ийнар айтсын,
Къойсун кюуюн анда.
Тюйдюрмесин сууукъ къашын,
Бузлатмасын джазда.

Келе эсе, шохлай келсин,
Унутмасын муну.
Кимге да ол саулукъ берсин,
Алсын хар аурууну.

Келе турад, къарчыкъ себе,
Джангы джыл таулагъа.
Келе берсин, насыб бюрке,
Къайда да, арбазгъа.
1997.



02
Джан кёзле бла Минги таугъа къарайма да,
Не кёреме, зауукъ алгъа джаныма.
Джюгенинден къаты тутуб, бир акъ атда,
Бир таулу къыз шукур этед халкъына.

Андан джуртха чачылады кёксюл джарыкъ,
Ёмюрлюкню таркъаймагъан ол нюрю.
Мен кесим да, джокълагъанча къачхан насыб,
Хар неге да, бир кенг ачыб, кёлюмю.

Гызмар сагъыш, олсагъатдан, тас болады,
Эсим джарыкъ, джарыгъанча, тау тангда.
Кёзге тюшген, кирли зат да, бир тазады,
Джангы джарыкъ бир кёб тууа, ма, джанда.

Минги тауну, баш джанында, таза кёкге,
Эмилик бла таугъа чыкъгъан ол къызгъа,
Я Аллахым, мен тилейме, джабма кёзле,
Къыз алгъышын, шо, бир сана къабылгъа.

Ёмюрлюкню акъ баласы, акъ Минг тау,
Тюшюнгде да къаралмасын чырт башынг.
Аркъангдагъы таулу къызгъа салма сен дау,
Акълыгъынгча, алай, бир эт, джашарын.

Чыкъса бир къыз акъ аты бла Минги таугъа.
Алгъыш айтса, алай андан, халкъына.
Къауумлача, сейир болмам, мен бу затха,
Мен бир кёрген, келиб къалад аллыма.
25.03.97.





03 22.02.97.
Бездирди хариблик, мыйыны джангыдан билейикчи
Арыгъанбыз сынай зауукъну - къууанчны чюйресин.
Ёргеден, алгъынлай, адамлыкъ, ёхтемлик тилейикчи.
Уяныр кюн джетди, алгъышлайды, аны, джюрегим.

Уяннганла халкъла, хар бири, хорламгъа ёчюкгенле.
Акъылын, хар бир халкъ, талпытады къуру ёсюмге
Ёмюрню узуну, бизлеге, шакалла, маскеле да юрелле
Хазырлайла къабхан, ол къабхан а, бизге,- Бёрюге.

Бир къара, къатышха, хар джантек къазанны ийесиди
Акъылман а, къара, ийисгейди, къуру, тютюнюн
Ачхасыз эсенг, сен, графоман фахмунга сийерикди,
Ол тили бла къармар, ичинги дуниясын, хар тюгюн.

Динсизлик дерт тутса адамны къой тауну да джыгъады
Иннетни джокъ этер, ол акъны да джалгъар къарагъа
Игини джашауун излесе чочхагъа бир дженгил ушатады
Акъылын да джутар, чабдырыр къолларын аркъаннга.

Семиребиз кемсиз, кёзюуде уа, ачдан, къырылабыз
Гитчечикбиз бирде, бирде бир тарды бизге тёгерек
Эркеклебиз бирде, кёзюую бла, къатынча, джылайбыз
Джорукъсузбуз бир бек, кечалмазча бизни артда кёк.

Юйюреди джазыу, Тюзлюкню къанатын сындырады
Джашауну шималын сынаргъа башладыкъ биз ачыкъ
Юлгюлю эдик биз, бир къара, энди бедиш ат туурады
Сакъласакъ да джарыкъ, къарады келген ол джарыкъ

Эсиргенчады халкъ, эсиртген а бизни тумакълыкъды
Джелпегин халкъымы бусгаклаб бошады бир къауум
Хар элде оноучу, хар бири биришер бир къалтакъды,
Зарауат халкъыма, халкъымданды, ангады, дауум

Ышарады тангым, бусагъат къарангы къачарыкъды
Кечени уа, тюню, мычырыкъды, мени биргеме
Бусагъат шаркъ менге джаныны кёзлерин ачарыкъды
Халкъымда да, алай, ачылсынчы, хар ким бир-бирге.

Айнысынчы халкъым, наллансынчы ангы бла хариф бла
Джол узакъды бир бек, къыйырсызды джолу заманны
Ырджысын хар неде, айырсынчы билим бла, тарих бла
Ариулаб ол ичин, джорукъгъа да салсын душманын.
04
Кюндюзде, ышарсанг, ышараса, кюнню баласыча
Ариулукъ юсюнгде бир турсунчу былай ёмюрле
Джердеги да бир бош, субайса кёкде къанатлыча
Таулада, хар къайда, айтылырчаса, сен, юлгюде.

Сюймекликсе да сен, сен, аныча, керти тамашаса
Ызласынчы, сени, къуру да, къууанч бла насыб
Кюн-кюнден тохтаусуз джанымда эсимде агъараса
Сюйюмюнг сюйюмлю, джашатады мени агъартыб.

Кёргеним - эштгеним, о къарайма да, барысы сенсе
Эрикдирмесин кёк, ол айырмасын, чыртда, сенден
Муратда, сен, ийнан, мен сени бла, анда, кёкледеме
Ой, алай а, мен ким, башхалача, бир бош, биреулен.
Ноябрь 1996
 
 
 
#592
Джаратама0
01.12.2010 17:16:32
АЛТЫНЧЫ КИТАБНЫ баргъаны былайды. - огъур бла
 
 
 
#593
Джаратама0
01.12.2010 17:23:27
Сау бол! Сени да, Аллах огъурлу муратларынга джетдирсин !
Джылгъа энтда 162 ишим къагъытха тюшерге хазырды. 1023 болду
 
 
 
#594
Джаратама0
02.12.2010 09:35:20
05
Ибилис аркъанын Тюзлюкню бойнуна быргъагъанды
Армаулуду Тюзлюк, бусагъат, тюшерикча, сыртдан.
Адамлыкъ, зырафха,бетсизни тюбюне джыгъылгъанды
Мыжыкъла, бир къара, ышаралла, бизге, башындан

Айныгъанды терслик, къарыуу да аны бир чексизди.
Наратла, къалтырай, бюгюлелле талны аллында.
Ызыбыз боранда, аллыбыз да, Тейри, белгисизди
Бир мугалды халкъым, джашаууча, эси къалкъыуда.

Эрикгенме, тёзе, кюн - кюнден тёзюмюм бошалады
Тарыгъа да, бездим, мен халны, тенгиме - джауума
Гырылдай тюнюмде, мурулдай тюнюмде, кюн озады
Къыйналама, мунга, таулуданды заран таулугъа.

Хар тёрде бир ташбет, фахмулу уа онгалмай харибди
Гыбытлыды джарты, акъылман а джашайды, ашсыз.
Антсызгъа чот иги, муртатны да, халы, бир игиди
Къатышха, бир къара, оноучуду, бирер иймансыз.

Къыйнаса сагъышым, кечимим а, къуру намазлыкъды
Нюрленеме кюшлю, бойсунама кёклей шошлукъгъа
Ышармыш болуб джан, ой эсим да, алай, къууанчлыды
Арыса да халкъым, ол бюкмез тобукъну Джокълукъгъа.

Бир бошха, джорукъсуз, къадары табанны беклесе да
Ол джууар терслигин, къууанырча этер кесекден
Къызчыкъны анагъа, атагъа джашчыгъын тик этсе да
Ийманда чыдасакъ, чыгъарыр, башына, теренден
01.03.1997 дж.





06
Къатышханы джанны саннга,
Бой бергени санны джаннга,
Бу, джашауду, алан, ангыла.
Алмашдырсанг тюшню тюннге,
Ийнар десенг, сен, кюуюнге,
Джашау тюлдю, алан, ангыла.

Къанны джаннга бала этсенг,
Балагъа да багъа берсенг,
Бу, джашауду, алан, ангыла
Алам джорукъ джокъду десенг
Къабырстаннга къучакъ керсенг,
Джашау тюлдю, алан, ангыла.

Къууанч-бушуу кёзюу келсе,
Хар биринден, ангы ёссе,
Бу, джашауду, алан, ангыла.
Сен, эсинги, топал этсенг,
Джахилликге эшик керсенг,
Джашау тюлдю, алан, ангыла.

Зауукъ эсенг, табигъат бла,
Ёмюрлюк бла, таш бла ханс бла,
Бу, джашауду, алан, ангыла.
Джаны болгъан эрши эсе,
Хар къуу иннет тенгинг эсе,
Джашау тюлдю, алан, ангыла.

Билсенг, ала, отну буздан,
Ала билсенг шекер туздан,
Бу, джашауду, алан, ангыла.
Тау адетден кери болсанг,
Къол орнуна айакъ созсанг,
Джашау тюлдю, алан, ангыла.

Харибге да онг теджесенг,
Ёлгеннге да сауду десенг,
Бу, джашауду, алан, ангыла.
Биле, барсанг джашау таргъа
Шо, не айыб, ёз къадаргъа.
Терс кесинг, да сора, мангыра.
05.12.1996дж


07
Сен, кимсе деб, соруб турма керексизге
Къургъакъ кюле, алай, бир кёб, къозума.
Аллах айтса, сен бу кюннге, тюбериксе
Къабырстанда, халкъ келечи, болурма.

Бола берсин бюгюнлюгюм элден башха
Джетер зауукъ, кёк насыбдан толурма
Ушасам да, бу джашауда, мен начасха
Къабырстанда, халкъ келечи, болурма

Мен, билеме, айыб ишим, кёбдю мени
Кёзюуледе, кёб шынкъартдан, отлума
Ёлюб кетсем мен бездирмем тёгерекни
Къабырстанда, халкъ келечи, болурма.

Сагъыш джанны этгенликге бир ачы саз
Бир - бирледе, мен къууанчны къолума
Къабырда уа, берир Аллах, манга, ауаз
Къабырстанда, халкъ келечи, болурма.

Джашау ётдю бош бёлюне бош затлагъа
Энтда, ёзге, мен къауумдан онглума.
Джюрек тюздю хар тюзге да, Аллахгъа да
Къабырстанда, халкъ келечи, болурма.

Сен, кимсе деб, соруб турма керексизге
Къургъакъ кюле, алай, бир кёб, къозума.
Аллах айтса, сен бу кюннге, тюбериксе
Къабырстанда, халкъ келечи, болурма.
06.11.1996.





08 февраль 1996
Ойлашыб, къарасакъ, бу дуния, таурухлай, аламатды
Ол табады алгъыш, бюсюреу гитчеден - уллудан
Учурады, бирде, башындан, булутдан, къаратады
Себелейди бизге, кёзюуде, макъамла джулдуздан

Излесенг, алайын, къарагъа ол акъсыл къаратады
Айыртады, тейри, ол сеннге аманны игини арасын
Кёзюуде джанынгы къууанчдан ай алай къаматады.
Ышарыб да къояр, къаргъасанг да аны анасын

Келтирген джашаргъа, кетерген да бизни къуру Олду
Аллахданды, хар зат, Аллахгъады, кимни да, иши.
Залимге ол залим, джарлыгъа уа боран кюнде отду
Билгеннге, алайын, илинмез шайтанны бир тиши.

Эскерсем да муну, абынмайын чыртдан да болмай
Кёблени, бир бошха, кесимден, узакъгъа узайтдым
Ариула да сюйдюм, ой ала бла да бир да бир онгмай
Ууундан чагъырны бойюннга аркъанны да атдым.

Эртденде кечени, ашхамда тангланы, махтадым да
Мен андан да, тейри, ой кёралмадым бир да файда
Динлиге, динсизге джанымы керексиз кенг ачдым да
Ахыргъы уа, къара, джашагъанчама, мен, ахратда

Намыслы да болдум, эршиге да айтдым мен ариу сёз
Адебсиз да, болдум, мен андан да, артда, эрикдим.
Кёк берди да фахму къурадым джырланы о бир бек кёб
Юлешдим халкъыма, джаууна да юлюш джибердим.

Инджилиб да кёрдюм, ой, андан да хайыр деген азды
Бийчеле бла да, мен, тёрледе, олтурдум, ма, ханлай
Ийлесе да джашау, халкъыма иннетим, энтда, акъды.
Ийлесе да джазыу, ийманым бла джаным - Къарачай

Чыракъны джашауу, къатханы да, къуру кечедеди
Джарыта къараны, ахырда, къаралыр къаралай
Джазыучу да, алай, халкъына ол ийман кюч береди
Ахыргъы уа къалай, атылыр да къалыр чыракълай.

Заманны кючю кёб, алгъышы, къаргъышы да толуду
Толтурур къарынны, артыкъны уа, билир къустура
Бизден тюлдю къадар, Бериучю хар неден да онглуду
Бойсуналла, анга, къумурсха къой, бютеу дунияла.
09
Джауады сагъыш ёргеден
Бир джокъду бир зат ахыры
Табылмады онг тёзгенден
Кетибсе, сен энтда, джары

Къайырды джашау джырчыгъа
Неде да, мунга, къуру гырт
Былай деб, айтсам а, къысха
Хар не да джыларча, къыжгъыл

Бош, къачмай, салам ийе тур
Сенден сора джокъду кишим
Хо, тюлсе, меннге, сен обур
Болгъанса джаннга кийимим.

Эсли джан къалса къымжалай
Ол, хаман, турмаз, былай сер
Чыгъар да сандан тырнакълай
Джарсымай, джаллар да кетер

Кетсе уа, келмез ол къайтыб
Кетген зат, къуру да, алгъа
Къой, алма, кёкден, сен айыб
Ишинг, онгдурмаз, ахратда.
1996
 
 
 
#595
Джаратама0
02.12.2010 22:23:02
10
Турама, сыртда, джазгъыда
Джангызма, алгъынча, о нек
Толуду, сагъыш, джанымда
Бири уа къыйнайды бир бек.

Быйыл джангызма мен энтда
Тюшде да джангызма, ийнан
Нени да, элейме джюрек бла
Алай а джукъ джокъду андан

Джашау да, сенича, терсбаш
Къыйыкъды, манга, къарамы
Бир бош, ол тюйеди да къаш
Къозгъайды, ичин, джарамы.

Бирде ой джаншайма тюннге
Къойдум деб, сени башхагъа.
Къонса да, къууанч, юйюме,
Джатмаз деб, менде, ачхагъа.

Бирде уа, тансыкъма бир бек
Ма, бюгюн да, хал, ма, алай
Джокъча, бир шошду джюрек
Джаным да эки джан талайд.

Мени, сен кёресе, мыллыкча,
Кесинг а, игит да, сен къуш
Джокъду, эсинг, ангыларча,
Башхады, кёкден, бир таууш.

Башхады, кёкден, бир таууш
Джуу да, сен джан, тынгыла
Къызчыкъ, кесингсе манкъуш,
Ай, барма, къадау, джырчыгъа.
17апрель 1990дж.



11
Эртделеде,
Менде къарам, хар неге да, кирсиз эди
Эртденледе,
Менде къарам, джаулагъа да джылы эди

Джарыкъ танглай, къутлу эди, ингирим
Таш - агъач да, болуб элле, джёнгерим.

Бюгюн энди,
Къалтакъ джашау бергенди да табанны
Тюрленнгенди
Джаным мени къонакъ этмейд бир джанны

Джаугъа, тенге, къарайма да, сагъыш бир
Джашлыгъым да акъсыл тюлдю, энди кир.

Къайры баргъын.
Онг джанымда - къуру къая, тик, чауул.
Къайры баргъын.
Сол джанымда бир тынмагъан бир дауур.

Алгъа баргъа, мен ёталмаз бир джазыу
Ызыма да, къарайма да, джокъ къарыу.
1997. Джаз.





12
Терсге бурсанг, халал ишни, хар игисин
Сан этмесенг, джаман ишин, джаманны
Къууанч этсенг, дуния юсню телилигин
Ашыкъ, джарлы, окъуй кириш Алхамны

Эрши, келбет, ма, бир бетли, кёрюнселе
Адам кёзден сен джашырсанг къарамны
Къарам ичде дин джилтинле ючкюлселе
Къадал, джарлы, окъуй кириш Алхамны

Сен джашаугъа, ол да санга, онган эсе
Сау дуниягъа быргъай эсенг тюкюрюк
Ангы ичге, къара шайтан, къоннган эсе
Мунда тюлсе, бу сен барлыкъ, ётюрюк.
Октябрь 1996 дж.







13
Къолумда къобузум, хурджунда уа джюгюм ма хауады.
Байлыгъым экиси, ой джокъду, башха, бир джугъум.
Мыйыгъа да сагъыш джауумлай бир къаты да джауады.
Болушур киши джокъ, сагъышдан ой алай тунчукъдум.

Мен болсамда ёзден, энди, мен аманнга тайаннганма.
Къалтырайды, кюнюм, бойсуна, чагъырны кючюне.
Арбаданча ёгюз, ой андан да, керти, мен къанннганма.
Джелимсизме кемсиз, бир шайтан да къоймаз юйюне.

Саугъагъамыды бу, бу джашау чюйресин теджегенди.
Чюйреге мен чюйре, мен тюшде да онгсунмайма чырт.
Алдаулукъ тюзлюкню, онгалмазча, тюбге теблегенди,
Байлыкъда хазна кёб, Ачлыкъда уа, бек ачды гыбыт.

Къаббашла чачлыгъа, сен уйалчы, тюксюзсе да дейле.
Тёбеле таулагъа къычыралла туугъанча ала бийледен.
Къаргъала къушлагъа, ангыламай, алай джекирелле,
Бёрюле да къымсыз, бир толуду, бёрю джурт, итден.

Къатышыбды дуния, энди джез да алтын бла тенгишди.
Элерге къатышны, айырырча, керек эд, уллу бир элек.
Къобарлыкъ Тюзлюкню, тутарыкъ да адет - Тейрибизди,
Джокъласынчы дженгил, бир салсынчы, неге да, эсеб.

Къолумда къобузум, хурджунда уа джюгюм ма хауады
Джашауну джелинден, бир табалмайма, Аллах, ышыкъ.
Таяннганма тёшге, сагъышдан джюрегим бир къаугъады.
Шо, къайдады Насыб, ол, кетгенди джерден, аджашыб.

Къарасынчы джерге, джорукъну, орнуна, келтирсинчи.
Джоярын да джойсун, ансы, чот, эй, боллукъду, табсыз.
Онгсузгъа - онглулукъ, онглугъа да ийман от берсинчи,
Къуртланады джашау, биз былай бла къалабыз башсыз.
1996 дж. Октябрь.
 
 
 
#596
Джаратама0
03.12.2010 01:15:35
Окъу...

15
Уятдынг джанымы, дунияма да джангы кёз бергенсе
Алгъынлай джаш болдум, джашланнганды эсим да алай.
Шайтанны эм джинни сагъышдан бир узакъ кетергенсе,
Хал игиди, Тейри, къарамым, джашаугъа, ма танглай.

Тюбегинчи сенге, алайды, хар зат да, сюймезча, аманед.
Ышарыу бла сагъыш, хо, тюрлюед халкъдан бир кесек.
Налатлыча бир бек, къууанчдан - бушуудан да къачаем.
Энди мен бир башха, бир джарыкъды, къарачы, джюрек.

Бир сейирди къадар, сюйсе агъарта, къаралта да биледи,
Игини, аманны да, чырт сормай, береди бирде тёпбеден.
Шох къаллыкъбызмы биз, ой аны оноуу, анда, ёргедеди.
Мен хазырма анга, кёрюрге хар затны да ангы бла терен.
Ноябрь 1996








16
Мадарсызма, кёресе чотну
Бир уллуду бизни арабыз
Насыбым узаталмай къолну
Ибилисча къалгъанма джангыз.

Налатла сен бир берме манга
Алайсыз да, бир байма андан
Алайсыз да, джетиб аманнга
Салыныбма джарны башындан.

Минереге излесем къууанчха
Джыгъылама къыйынды миннген
Алгъа тюлдю, атлам да артха
Ой, алайды, азаб от чексенг

Сагъынама сени тохтаусуз
Айхай не, бир кериди зауукъ
Ингирим эртденим тауушсуз
Сезимни да бууады сууукъ.

Бир кёралмадынг сен халымы
Теджейалмадынг сен кесинги
Туралмазма былай къайгъылы
Боллугъум белгилиди мени.
12.11.96.




17
Мийикде хар джулдуз бир-бирге джарыкъны себелейди
Бир ариуду алам, бир эскер, бир нюрлюдю аны сыфаты
Джарыгъы джанымы, былайдады, мындады ? джердеди
Шо, мен кимме ансыз, сюйеме, кемсиз, бир къаты.

Накъырдамыды бу сагъышлан да, манга иги тынгылачы
Къайтарыб, джангыдан айтайым къайгъымы хапарын
Ой, сюйсенг а, джырла, сюйсенга къаты сен джылачы,
Тюбешалмасакъ биз, джарыллыкъды мени къадарым.

Ненча джыл, хар кюнде, орамда амалсыз тюбешебиз
Сюймекликсе да, сен, буйюгъама сени аллынгда.
Экибиз башхала, биз аны болумун экибиз да билебиз
Бирибиз джазгъыда, бирибиз да къуру къачхыда.

Сюйгеним эдинг сен, ой мен анамы къарнына бегигинчи
Былайда уа джерде, сагъышынг бир узакъды менден.
Эсингде тута бер, эсдесе джаным къачында керилгинчи
Джашауну тюрсюню къорагъынчы мени эсимден.

Бошалса сюймеклик, сен чырт да, бошха, мыдах болма
Ой, алай а, мени, унутуб да бир къойма, сен, терк
Эриксенг эрингден джашаудан керексиз да сен къоркъма
Сен сагъын джырчыны, кёрюрсе, ариу кёрюнюр тёгерек.
12.11.1996.




18 07.12.1996.
Барайым, элге бир барайымчы
Тансыкъдан ёлеме джуртума
Джериме алгъынча къарайымчы
Танг ала джыргъа чыгъа уугъа.

Мен джырдан хуна этиб тизмезме
Не да джыр болмаз джылгъа азыкъ
Джуртумдан а джашау бир бездирме
Барды джурт, ой тюлме мен джазыкъ.

Джангыдан, айтама, абынсам да
Сюрюнюб да, буду айтханым
Джурт сауда ханла ичде мен ханма
Эй, алай а, кёбдю сагъышым.

Бу дуния дамсыз кибик болгъанды
Таб кёрсе этеди бизни сер
Кёзюуде юсге да къондурады
Кёзюуде чочуб да ол тебрер.

Джуртуму сен джашау абындырма
Кесекге бир къой сен кесине.
Алгъа ызгъа да бек хыны чабдырма
Бошуна бош ийме терсине.

Халкъыма керек затларын берчи
Терсине сылама сен тюгюн
Джарсыуун, аны да бир эскерчи
Джангыдан ишлей турад юйюн.

Тёзюучю неден да арыгъанды
Тул киши арымайды алай
Кёзюуде джауун да агъызгъанды
Кёзюуде къалгъанды джазыкълай.

Халкъымы налы эски болгъанды
Джол ёрге, джер тутмайды туякъ
Ой, юсю да, алкъа бир джаланды
Джол узун, айтмазча, бир узакъ.

Барайым, элге бир барайымчы
Тансыкъдан ёлеме джуртума
Джериме алгъынча къарайымчы
Танг ала джыргъа чыгъа уугъа.
 
 
 
#597
Джаратама0
03.12.2010 02:14:57
Кертида,окъугъуз
 
 
 
#598
Джаратама0
03.12.2010 03:10:31
Салам, эсен болурса!
Ол зыгытдан туугъанны къалай этгенин сен кёрдюнгию.
Сора, тур да, аллайла ючюн отха кир.
Иги этедиле меничагъа. Ким эсе да, накажу бездарщину...
 
 
 
#599
Джаратама0
03.12.2010 03:17:10
Ол мени ызымдан келгенчиклеге бир къара, вот колхозбайла...
 
 
 
#600
Джаратама0
03.12.2010 03:20:05
Вотгде кайф, хар неге да хо де да барсанг а.
Аллах, Сен, кеч..
 
 
 
Страницы: Пред. 1 ... 22 23 24 25 26 ... 112 След.
Читают тему (гостей: 2)

 

Написать нам

Фонд «Содействие развитию карачаево-балкарской молодежи «Эльбрусоид»

© 2003-2026 Elbrusoid.org  |  Все права защищены Законами Гор.