- Сабийни джумушха джибер да, ызындан бар.
- Джылар джаш, атасыны сакъалы бла ойнар.
- Адамны артындан къара сабан сюрме.
- Ашхы болсанг, атынг чыгъар, аман болсанг, джанынг чыгъар.
- Аш иеси бла татлыды.
- Кесине оноу эте билмеген, халкъына да эте билмез.
- Къарны аманнга къазан такъдырма, къолу аманнга от джакъдырма.
- Атлыны кёрсе, джаяуну буту талыр.
- Хар сёзню орну барды.
- Игилик игилик бла сингдирилиучю затды.
- Хансыз джомакъ болмаз.
- «Ма», - дегенни билмесенг, «бер», - дегенни билмезсе.
- Чабакъгъа акъыл, табагъа тюшсе келеди.
- Байлыкъ тауусулур, билим тауусулмаз.
- Бермеген къол, алмайды.
- Биреуге аманлыкъ этиб, кесинге игилик табмазса.
- Кютгени беш эчки, сызгъыргъаны уа, джерни джарады.
- Ишге юренсин къоллары, халкъ бла болсун джоллары.
- Аман хансны – урлугъу кёб.
- Таякъ этден ётер, тил сюекден ётер.
- Магъанасыз сёз – тауушсуз сыбызгъы.
- Чёбню кёлтюрсенг, тюбюнден сёз чыгъар.
- Айырылмаз джууугъунга, унутмаз сёзню айтма.
- Сютден ауузу кюйген, суугъа юфгюре эди.
- Кёб ашасанг, татыуу чыкъмаз, кёб сёлешсенг, магъанасы чыкъмаз.
- Бичгенде ашыкъма, тикгенде ашыкъ.
- Ат басханны джер билед.
- Ёзденликни джайгъан – джокълукъ.
- Тил бла келеди джыр да.
- Онгсузну – джакъла, тенгликни – сакъла.
- Агъач халкъгъа алтынды, иссиликге салкъынды.
- Зар адам ашынгы ашар, кесинги сатар.
- Къатын къылыкъсыз, эр тынчлыкъсыз.
- Къошда джокъгъа – юлюш джокъ.
- Ариу сёзде ауруу джокъ.
- Къуллукъчума, деб махтанма, къуллукъ – хаух джамчыды!
- Таугъа чыгъаллыкъ эсенг, тюзде къалма.
- Кюл тюбюндеги от кёрюнмейди.
- Ишин билген, аны сыйын чыгъарады.
- Аллахха ийнаннган кишини, Аллах онгдурур ишин.
- Чомарт джарлы болмаз.
- Окъдан джара эртде-кеч болса да бителир, сёз джара, ёмюрге къалыр.
- Эли джокъну – кёлю джокъ.
- Бети къызарыучу адамны, джюреги харам болмаз.
- Акъыл сабырлыкъ берир.
- Этни да ашады, бетни да ашады.
- Къазанчы аман болса, къазаны къайнамаз.
- Чалманны аллы къалай башланса, арты да алай барады.
- Хоншуну тауугъу къаз кёрюнюр, келини къыз кёрюнюр.
- Кийиминг бла танылма, адамлыкъ бла таныл.
Профиль
|
|
|
|||