Войти на сайт
10 Мая 2026 года

 

  • Азыкъ аз болса, эртде орун сал.
  • Ана къойну – балагъа джандет.
  • Тилде сюек болмаса да, сюек сындырыр.
  • Хар адамгъа кеси миннген тау кибик.
  • Эл тойса, тоймагъан, эл къойса, къоймагъан.
  • Къолу уллу – асыу, аягъы уллу – джарсыу.
  • Ачыкъ джюрекге джол – ачыкъ.
  • Джигер – джаннга къыйынлыкъ.
  • Билими азны – ауузунда кирит.
  • Кечеси – аяз, кюню – къыш, джарлы къаргъагъа бир аш тюш!
  • Иесиз малны бёрю ашар.
  • Ёлген эшек бёрюден къоркъмайды.
  • Кимни – тили, тиши онглу, кимни – къолу, иши онглу.
  • Ариу – кёзге, акъыл – джюрекге.
  • Бети къызарыучу адамны, джюреги харам болмаз.
  • Ишленмеклик адамлыкъды.
  • Къанны къан бла джуума, аманны аман бла къуума.
  • Тил – миллетни джаны.
  • Азыкълы ат арымаз, къатыны аман джарымаз.
  • Харам къарнашдан, халал тенг ашхы.
  • Зарда марда джокъ.
  • Тынгылагъан тынгы бузар.
  • Эринчекге кюн узун.
  • Кёб джашагъан – кёб билир.
  • Эллинг бла джау болсанг да, юйюнг бла джау болма.
  • Ашатыргъа иш – ашхы, ишлетирге аш – ашхы.
  • Мураты болгъанны джюрек тебюую башхады.
  • Адамны артындан къара сабан сюрме.
  • Ашхы – джыяр, аман – джояр.
  • Къарнынг къанлынга кийирир.
  • Къыйынлы джети элге оноу этер.
  • Къошда джокъгъа – юлюш джокъ.
  • Душманны тышы – акъ, ичи – къара.
  • Окъдан джара эртде-кеч болса да бителир, сёз джара, ёмюрге къалыр.
  • Тилчиден кери бол.
  • Игини сыйлагъан адетди.
  • Къартны бурнун сюрт да, оноугъа тут.
  • Адам боллукъ, атламындан белгили болур.
  • Иги болса, тамадама – махтау, аман болса, меннге – айыб.
  • Мен да «сен», дейме, сен да «кесим», дейсе.
  • Аман къатын сабий табса, бий болур…
  • Ач келгенни – тойдур, кеч келгенни – къондур.
  • Байлыкъдан саулукъ ашхыды.
  • Хантына кёре тузу, юйюне кёре къызы.
  • Агъач – джерни чырайы, кийим – эрни чырайы.
  • Тин – байлыгъынг, терен саулугъунг.
  • Тилчи тилден къаныкъмаз.
  • Нарт сёз – тилни бети.
  • Иги сеники эсе да, сюйген кесимикин этеме.
  • Джыгъылгъанны сырты джерден тоймаз.

 

Архив Форума » Зеленый Форум [архив] » - ЗФ - Ана тилибизде
Страницы: Пред. 1 2 3 4 5 6 ... 62 След.
RSS
Келигиз, тил байлыгъыбызны сакълайыкъ!
 
#76
Джаратама0
21.02.2008 19:12:48
Алик турист
Джазыучу джамагъатны джашауу бла, сагъышлары бла джашаргъа керекди. Ол "халкъны ёкюлю" болургъа керекди. Фахмулу адам, къуру фахмусуна таяныб къалмай, ишлерге керекди, билимин, усталыгъын ёсдюрюрге керекди. Фахму бла джашау эгиз къарнашладыла.
 
 
 
#77
Джаратама0
21.02.2008 19:17:56
Сюйюнчланы А
Чыгъармаларыгъызда баш орунну къайсы тема алады?
 
 
 
#78
Джаратама0
21.02.2008 19:26:03
kluhoriec
Мени джазгъанларымда: джырлада, хапарлада, очеркледе, повестледе, назмулада адамлыкъ деген баш орунну алады. Не ючюн десегиз ол адам улуну джашауунда эм магъаналы шартланы бириди. Не къыйынлыкъда да адамла бир-бирлерине болушургъа керекдиле тынч джашар ючюн. Мени "Адамлыкъ" деген китабым да барды. "Хала джюрекле" деген повестимде быллай эпиграф барды: "Адам къатында адам ёлмейди!"

Адамлыкъ
Эрирле къарла,
Суула саркъарла,
Темир тот болур,
Багъыр морт болур,
Бюгюнгю душман,
Тамбла шох болур

Ауушунур ачха,
Джукъарыр бочха,
Мадарынг болса,
Кирме сен борчха.
Ашалыб къурур
Мухурну тархы
Бурулуб турур
джашауну чархы.

Тау таугъа ауа,
Тюрленир хауа,
Суу излер ызын,
Кёк да джулдузун.
Заманнга кёре
Джыр ауаз алыр,
Адамлыкъ джерде
Тюрленмей къалыр!
 
 
 
#79
Джаратама0
21.02.2008 19:31:02
Сюйюнчланы А
Багъалы Азамат! Бусагъатда уа лирика назмула джазамысыз?
 
 
 
#80
Джаратама0
21.02.2008 19:31:03
Сюйюнчланы А
Азамат, сизни назмуларыгъызгъа макъам салыб, кеб джыр этгендиле.Эм сюйген джырыгъыз къайсыды?
 
 
 
#81
Джаратама0
21.02.2008 19:38:46
Zaika
Мени назмуларыма, къарача, орус тилде да Шимал Кавказны коипозиторлары макъам салыб, эки джюзден артыкъ джыр барды. Мен бу композиторла бла ишлегенме: Ногъайлыланы Маджит, Байчеккуланы Абидин, Дауров Аслан, Тхабисимов Умар дагъыда башхала. Кёб джырым Къабарты-Малкъарда, Адыгеяда, Къарачай-Черкессияда радиоланы фондларында джазылгъандыла. Мени джырларымдан бек сюйгенле "Минги Тау", "Россия", "Къарачайгъа джыр", "Харунну джыры", "Турнала", "Ёмюрлюк от", "Архыз джулдузла", "Тиширыу атла" дагъыда башхала.
 
 
 
#82
Джаратама0
21.02.2008 19:39:53
Сюйюнчланы А
Багъалы Азамат! Сизни чыгъармаларыгъызны ичинде сюймеклик назмула да кёбдюле. Аланы атагъан адамларыгъыз да болурла (айыб этмегиз аллай энчи сору соргъаныма).
 
 
 
#83
Джаратама0
21.02.2008 19:47:42
Назмуну джазар ючюн адамгъа не керекди? Аны айтханым, фахму билим, дагъы да аны кибик затла назмучугъа шартла болгъанын билебиз, алай а, бир-бирде джазмай бир-бирде уа джазгъанлай туралла назмучула, ол джаза турган кёзюуде анга себеб не болады?
 
 
 
#84
Джаратама0
21.02.2008 19:48:33
SOFIKOSHKA
Лирика назмуланы мен къачан да джазгъанлай турама. Бу назмуну мен кёб болмайын джазгъанма, басмагъа чыкъмагъанды алкъынчы, биринчи тынглаучум сенсе.

Джети джукълаб уянсам да
Джети джукълаб уянсам да,
Сенден ариу тюш болмаз,
Сюймекликден огъурлу
Дунияда кюч болмаз.

Джер юсюнде айландым,
Тенгиз тюбюн къармадым,
Излесем да аламда,
Сенден ариу табмадым.

Акъ къагъытха ай сурат,
Салгъан кибик къашларынг,
Кёзлерингден джур къараб,
Къундуз къара чачларынг.

Сени кёлюнг кёмеуюл,
Суу айламма болсада,
Джюрегими суутмаз,
Боран буруб турсада.

Сени атынгы сагъынсам,
Булут болад тылпыуум
Бу аурууну багъаргъа
Бармыд сени къарыунг.

Къая бал бла марал сют-
Сюймекликни кереги,
Мен къаягъа ёрлейим,
Уучу болуб кёрейим.

Мен къаядан джыгъылсам,
Тутармыса къол джайыб.
Ууда болсам джаралы
Багъармыса къайгъырыб?

Сен къайнатхан бал суудан,
Ичиб, тогъуб, тоймазма.,
Къалам тутмаз къарт болсам да
Сюйгеними къоймазма!
 
 
 
#85
Джаратама0
21.02.2008 19:54:29
Сюйюнчланы А
Сизни чыгъармаларыгъызны къачанда бек джарата эдим. А ма бу чыгъарманы биринчи меннге окъутдугъуз эсегиз - джазыб алыб кесиме, бек багъалатама!
сау болугъуз! Аллах Сизге кёб саулукъ берсин, энтда быллай аламат назмула къураргъа кеб джылла берсин
 
 
 
#86
Джаратама0
21.02.2008 19:56:53
Ассаламу гъалейкум уа рахматуллахи уа баракатуху
Багъалы Азамат Алимович!
Кюнлени ашыкъдырыб, санаб тургъан эдим келлигигизни эшитгенимде.Шукур эмда махтау Аллахха, бу кюн да келди.

Бир ишексиз къарачай-малкъар миллетде Сизни чыгъармаларыгъызны билмеген адам болмаз. башым кекге джетеди мен да ол адамладан болгъаныма.

Мен гитчелигимден да сизни бла шагъырей болуб есгенме.Ол дегеним: эгечлерим Къарачай шахарны устазлыкъ институтунда окъугъандыла сизни къолугъузда, амма Суюнчланы Азамат деб атыгъыз ъар къуру да юйде айтылгъанлай тургъанды, меннге уа школгъа джюрюб башлагъынчын, окъургъа юреннгинчин назмуларыгъызны юретгендиле. Келюме алай келеди: хар юйдегиде да сабийле алай ёсген болурла.

Бюгюнлюкде Эльбрусоидни игилиги бла миллетибизни адамлары дунияны къайсы этегинде болсала да бири-бирин табыб, Ата джуртубузну, джазыучуларыбызны, маджал адамларыбызны юсюнден ушакъ бардырыргъа мадар табадыла. Багъалы Азамат Алимович, кезден айтханнга санамагъыз, келюмден алыб айтама: Тюркденми дейсе, Америкаданмы дейсе, Москваданмы, Казахстанданмы - бир талай шахарладан, къралладан джердешлерибиз сизни чыгъармачылыкъ джолугъуз бла шагърей болмагъан адам джокъду, бек сюйюб бири-бирибизге джазабыз, Ата джуртубузну тансыкълайбыз Сизни чыгъармаларыгъызны окъуб.

Аллах мындан ары да кеб джылланы узагъына саулугъугъуз бла туруб, энтда бир талай есерик телюлени да джангы чыгъармалырыгъыз бла къууандырырча этсин.Аллах юидегигизден, джуугъугъуздан-тенгигизден къууандырсын.
бюгюн бизни бла ушакъ бардырыргъа келгенигиз ючюн. заман табыб. бек сау болугъуз.
Аллах къыйыныгъызны сууаб базманыгъызгъа джазсын. Аллахны разылыгъын табыгъыз!

Энди мен келгинчи соруулары бла арытмагъан эселе. мен да бир эки зат сорургъа умутчума.
 
 
 
#87
Джаратама0
21.02.2008 19:57:01
Малкъарда шёндюгю жазыучуладан кимни жаратасыз?
 
 
 
#88
Джаратама0
21.02.2008 19:58:00
КОРОЛЁК
Орус литературада "Адресаты лирики" А.С. Пушкина, "Женщины воспетые Есениным" дагъыда ала кибик китабла басмаланнгандыла. Мен да аталгъан назмуларымы, джырларымы бир китабчыкъ этиб, ол тиширыуланы суратларын да салыб чыгъарыргъа муратым барды. Аланы ичинде быллай таулу тиширыула бардыла: Долаланы Кёгала (Кёк-Ала), Кульбайланы Элизат "Алтын джумарыкъ", Хуриет Эрсой (Айджаякъ).
 
 
 
#89
Джаратама0
21.02.2008 19:58:49
Сюйюнчланы А
Табигъатны сакълауугъа къалай къарайсыз?
 
 
 
#90
Джаратама0
21.02.2008 20:00:18
SOFIKOSHKA
Сау бол, Софья, бизни аз къыйыныбызгъа уллу багъа бергенигизге.
 
 
 
#91
Джаратама0
21.02.2008 20:02:00
URL
Ма бу джырны къалай джазгъаныгъыз эсигиздеми?
Хатууланы Халит джырлагъан " Анам" деген джыр
 
 
 
#92
Джаратама0
21.02.2008 20:02:20
Сюйюнчланы А
Бир китабыгъызны бизге саугъагъа берирмисиз, ал бетинде кол салыб?
 
 
 
#93
Джаратама0
21.02.2008 20:05:09
мираж
Бусагъатда Малкъар джазыучууладан тамада тёлюню сынамын хайырландыра иги атламла этедиле. Сёз ючюн: Толгъурланы Зейтун, Шауайланы Хасан, Теппеланы Алим, Созайланы Ахмат, Берберланы Бурхан.
 
 
 
#94
Джаратама0
21.02.2008 20:10:26
Чтец
Джазыучуну къыбламача аллай сезими болургъа керекди. Алай демеклик, фахмуну шарты ол джазыучугъа тынчлыкъ бермей, аны учундуруб, джазмай къояргъа мадар болмай ишлетеди. Илхам деген мукъладиси барды. Бир назмумда быллай сёз барды:
Къолда къамиш къаламым,
Кюн таякъдан ёзеги,
Дженгер этиб алгъанма
Чабхан атны джюрегин.
 
 
 
#95
Джаратама0
21.02.2008 20:15:16
Чтец
Илхам (вдохновение)
Мукъладис (магнит)
 
 
 
#96
Джаратама0
21.02.2008 20:15:18
Азамат Алимович! Алгъын бизни ана тилибизде газет болмаса. телебериуле болмай эдиле.Бир талай джылны мындан алгъа, шукур Аллахха ол да болду.Джаубаланы Хусейни (джандетли болсун) бериулерине, репортажларына сюйюб къараучан эдик. Телевидениени къарачай белюмюню бусагъатагъы ишини юсюнден не аитыргъа боллукъсуз?
 
 
 
#97
Джаратама0
21.02.2008 20:15:38
Сюйюнчланы А
Багъалы Азамат! Уялтдыгъыз тейри Сора сизны къыйыныгъызгъа аз деб айтыргъа боламыды? Сиз бизни эм бек сюйген джазыучуларыбызни бирисиз
 
 
 
#98
Джаратама0
21.02.2008 20:16:27
всезнайка
Къайсы джаргъа айтханыгъыз ангылашынмай къалгъанды. Ссылкагъызны ачалмагъаныбыз себебли.
 
 
 
#99
Джаратама0
21.02.2008 20:16:44
Багъалы Азамат!
Назмуцула миллетибизде кёфдюле. Зангы, энди ёсюф келген заш телю да бардырырца энишхе тюшюрмей даражасын назму зазууну, не этерге керехди, сизни оюмугъузгъа кёре?
Сау болугъуз.
 
 
 
#100
Джаратама0
21.02.2008 20:23:58
Сюйюнчланы А
Азамат, салам алюкум!:-) Мени анамда Суюнчладанды (сизге таныргъа - Рая, Аминни къызы). Сизге бек разыды Карачаевскеде университетде окъуугъа киргени ючюн, сизни джоругъугъуз бла.

Сёзлеригизни форумда къуаныб окъуйма - бай, эркин тилде джазасыз. Аны айтханым - келе турсагъыз а, джаш тёлюге иги юлгю боллукъ эди, ансы ана тилни унутуб къоябыз.) Сизге къаты саулукъ, рахатлыкъ, эсенлик теджейме. Сау къалыгъыз! Расул.
 
 
 
#
Джаратама0
 
 
 
#
Джаратама0
 
 
 
#
Джаратама0
 
 
 
Страницы: Пред. 1 2 3 4 5 6 ... 62 След.
Читают тему (гостей: 3)

 

Написать нам

Фонд «Содействие развитию карачаево-балкарской молодежи «Эльбрусоид»

© 2003-2026 Elbrusoid.org  |  Все права защищены Законами Гор.