Войти на сайт
25 Июня 2026 года

 

  • Ишлемеген – тишлемез.
  • Ётюрюкчюню шагъаты – къатында.
  • Окъ къызбайны джокълайды.
  • Бир абыннган – минг сюрюнюр.
  • Билим ат болуб да чабар, къуш болуб да учар.
  • Джюрек кёзден алгъа кёрюр.
  • Азыкълы ат арымаз, къатыны аман джарымаз.
  • Акъыллы айтыр эди, акъылсыз къоймайды.
  • Эки итни арасына сюек атма, эки адамны арасында сёз чыгъарма.
  • Келинин тута билмеген, къул этер, къызын тута билмеген, тул этер.
  • Къар – келтирди, суу – элтди.
  • Иги бла джюрюсенг, джетерсе муратынга, аман бла джюрюсенг, къалырса уятха.
  • Акъыл бла адеб эгизледиле.
  • Хунаны тюбюн къазсанг, юсюнге ауар.
  • Билими азны – ауузунда кирит.
  • Ётюрюк хапар аякъ тюбю бла джюрюйдю.
  • Дженгил джетерикме деб, узун джолну къоюб, къысхасын барма.
  • Эринчекге кюн узун.
  • Ёлюр джаннга, ёкюл джокъ.
  • Джигер – джаннга къыйынлыкъ.
  • Биреуню къыйынлыгъы бла кесинге джол ишлеме.
  • Суу да къайтады чыкъгъан джерине.
  • Джаз бир кюнню джатсанг, къыш талай кюнню абынырса.
  • Ариу сёз аурууунгу алыр.
  • Къарнынг тойгъунчу аша да, белинг талгъынчы ишле.
  • Бети къызарыучу адамны, джюреги харам болмаз.
  • Эркишини аманы тиширыуну джылатыр.
  • Биреу ашаб къутулур, биреу джалаб тутулур.
  • Къыз чыгъаргъан – къызыл къымжа.
  • Керти сёзге тёре джокъ.
  • Бозанг болмагъан джерге, къалагъынгы сукъма.
  • Аманнга алтын чыдамаз.
  • Мал кёб болса, джууукъ кёб болур.
  • Хар зат кесини орнуна иги.
  • Баланы адам этген анады.
  • Ана къойну – балагъа джандет.
  • Aдам боллукъ, сыфатындан белгили.
  • Тенги кёбню джау алмаз, акъылы кёбню дау алмаз.
  • Джукъу тёшек сайламайды.
  • Кёзню ачылгъаны – иги, ауузну джабылгъаны – иги.
  • Узун джолну барсанг, бюгюн келирсе, къысха джолну барсанг, тамбла келирсе.
  • Тин – байлыгъынг, терен саулугъунг.
  • Алгъанда – джууукъ, бергенде – джау.
  • Кирсизни – саны таза, халалны – къаны таза.
  • Къарыусузгъа кюлме, онгсузгъа тийме.
  • Агъач – джерни чырайы, кийим – эрни чырайы.
  • Ханнга да келеди хариблик.
  • Телиге акъыл салгъандан эсе, ёлгеннге джан салырса.
  • Чыбыкълыкъда бюгюлмеген, къазыкълыкъда бюгюлмей эди.
  • Джахил болса анасы, не билликди баласы?

 

Архив Форума » Зеленый Форум [архив] » - ЗФ - Ана тилибизде
Страницы: Пред. 1 ... 3 4 5 6 7 ... 62 След.
RSS
Келигиз, тил байлыгъыбызны сакълайыкъ!
 
#101
Джаратама0
21.02.2008 20:25:51
всезнайка
Мен кёб джылланы Къарачай-Черкесс радио телекомпания бла шохлукъ джюрютеме. Радиогъа кёб джырларымы алгъан эдиле фондха. Энди телевидение болгъанына бек къууанабыз, телестудияны къарачай бёлюмю да асыулу, магъаналы бериуле бардырады. Журналистле Тебуланы Шукур, Джанкёзланы Мадина талай аламат телефильмле чыгъаргъандыла, Къарачайны белгили адамларыны юсюнден. Бусагъатда ишлегенле да Чотчаланы Ахмат, Халкёчлени Зумрат, Катчиланы Алла иги бериуле этедиле. Къарачай бёлюм джамагъат къуллукъчуланы, алимлени, джазыучуланы, художниклени юсюнден сериал телефильмле этселе, бек ашхы боллукъ эди. Ала артыкъсыз да бек школлагъа, университетге керекдиле. артыкъ да бек Тебуланы Шукурну кёб къыйыны барды, анга "махтаулу журналист" деб аталмагъанына сейирсинеме.
 
 
 
#102
Джаратама0
21.02.2008 20:28:27
Сюйюнчланы А

кЪАРАЧАЙЛЫЛА БЛА МАЛКЪАРЛЫЛАНЫ ТИЛЛЕРИНДЕ БИР БИРИН АНГЫЛАМАСЧА НЕНЧА СЕЗ БАРДЫ?
 
 
 
#103
Джаратама0
21.02.2008 20:28:39
Сюйюнчланы А
Багъалы, Азамат!!! Джаш тёлюню тенгликге, адамлыкъ шартлагъа юретген халда джазгъан назмуларыгъыз болурла???
 
 
 
#104
Джаратама0
21.02.2008 20:36:07
Апокалипсис
Мени оюмума кёре, джаш джазыучула миллетни тарихин, фольклорну тамада тёлюню сынамын, усталыгъын хайырландыра, алагъа таяна, атламла этерге керекди. Къарача-малкъар поэзияны от джагъасында от, бурунданда джарыкъ джылыу берир ючюн, махтанчакълыкъ къалыргъа керекди. "Тай ёсдюрмеген - атха минмез" деген бурундан сёз барды. Тамада къауум джаш тёлюге игисине "иги", аманына "аман" деб багъа берирге керекди. Алайсыз ёсюм боллукъ тюлдю. Аллахгъа шукур, бизни ышандыргъан джаш джазыучула бардыла. Джоллары джарыкъ, эмда кенг болсун!
 
 
 
#105
Джаратама0
21.02.2008 20:38:23
Rassel
Эгечден туугъан, ана къарнашны сыйлагъанынг ючюн сау бол, сен менден эсе джашса, келиб кесинги танытсанг, ишингден хапар айтсанг мен да къууанырма.
 
 
 
#106
Джаратама0
21.02.2008 20:38:40
Девушка Гор
всезнайка
Къайсы джаргъа айтханыгъыз ангылашынмай къалгъанды. Ссылкагъызны ачалмагъаныбыз себебли.

Тюзетгенме халатымы. соруума джууаб табарма деб умутчума
 
 
 
#107
Джаратама0
21.02.2008 20:41:10
Гилястархан Злоязычный
Къарачай бла Малкъарны арасында, аланы джазмаларында бир джангыз хариф барды ж-дж. Ол тюзетилсе, башха ишле да тюзелликдиле. Ангылашынмагъан сёз джокъну орнундады.
 
 
 
#108
Джаратама0
21.02.2008 20:43:57
Тыш къыралда кирилицаны билмеиле къарачаилыла. Латиницагъа кечсек къалай борлур эди,с изни келюгюзге келген бла.алфавитибизни къуралгъаныны юсюнден да бир-эки сез аитсагъыз разы боллукъ эдик
 
 
 
#109
Джаратама0
21.02.2008 20:46:07
Кесигиз билгенликден, халкъыбызны алгъа тартхан, атын иги бла айтдыргъан бизни белгили жазыучуларыбыз, поэтлерибиз, жырчыларыбдыла. Сиз да этген ишигизден къууаныгъыз. Сау болугъуз

Энтада бир соруу. Бюгюнлюкде жаш тёлюде жазыучуларыбыз, назмучуларыбыз да аздыла, бар эсселе да биз аланы танымайбыз. Сизни оюмугъузгъа кёре ол не бла байламлыды?
 
 
 
#110
Джаратама0
21.02.2008 20:47:49
Сюйюнчланы А
мен бсагъатда Эресейни ара шахарында турама, сизге тюберге, сизни бла ушакъ этерге мадар болса - бек аламат боллукъ эди
блай тышында турсанг джылла бла артыкъ англайса къарачай-малкъар адамны кереклигин
 
 
 
#111
Джаратама0
21.02.2008 20:48:23
всезнайка
Ол джыр анам сау заманда джазылгъан эди. Мен аны анама окъугъанымда, кёзлеринде джыламукъ кёрюннген эди. "Бу сёзле бары да тюздюле"- дегенинде, мен артыкъ да бек къууаннган эдим. Аналаны сау заманларында балалары къачларын кёрюрге, сыйларын мийикде тутаргъа керекдиле. Башха джашауларына да сакъ болургъа керекди. Биз терт къарнаш эдик, анам мени бла джашагъанды. Мени бла джашаргъа сайлагъанын, менге ышаннганын артыкъ да бек сюе эдим. Анама сау заманында талай назму атагъан эдим. Ёлгенден сора да кюу этгенме. Энтда атамы, анамы юсюнден да джазаргъа муратым барды
 
 
 
#112
Джаратама0
21.02.2008 20:51:11
КОРОЛЁК
Бир китабны къой "Эльбрусоидге" бютеу китабларымы берирге муратым барды. "Эльбрусоидни" къарача-малкъар китабладан библиотекасы болургъа керекди. Джазыучуланы бу ишге мамматха чакъырама.
 
 
 
#113
Джаратама0
21.02.2008 20:52:36
Сау болугъуз толу джууаб бергенигизге.Аллах атагъызны-анагъызны, къалгъан елгенлеригизни джандетли, сауларыгъызны даулетли этсин.

Бу фахму сизге кимден кечгенди?
 
 
 
#114
Джаратама0
21.02.2008 20:54:44
Rassel
Электрон адресинги джиберсенг, ушакъ этербиз. неда мени адресим 369200 Карачаевск ул. Орджоникидзе 11.
 
 
 
#115
Джаратама0
21.02.2008 20:57:10
всезнайка
Бу фахму сизге кимден кечгенди?
Мени тукъумумда джамагъат къуллукъчула, закий адамла аслам болгъандыла. "Терек тамырына кёре чайкъалады", менге да аладан бир джилтин джетген болур, кесим да алагъа ушаргъа кюрешгенме.
 
 
 
#116
Джаратама0
21.02.2008 20:58:31
Сюйюнчланы А
Аллах разы болсун Азамат! Этген муратыгъызны да джаратдым. Библиотеканы къураб башлайыкъ, Аллах джол берсе!
 
 
 
#117
Джаратама0
21.02.2008 21:01:01
Zaika
Мени джазгъанларымы асламысы огъур ишлеге аталгъандыла, сёз ючюн: ол шартланы быллай назмулада кёрюрге боллукъду: "Бу дунияда", "Аланла", "Къарачайны къадау ташы", "Мени джерими тиширыулары" поэмалада , повестледе.
 
 
 
#118
Джаратама0
21.02.2008 21:03:02
Азамат Алимович!
Джегетей езенден кеб фахмулу адамла чыкъгъандыла. Сиз да аланы ичлеринде. Мен да ол езенденме. Къарачай шахарны да бек джаратама, алай болса да кесим туугъан джерге бегирек джан аурутама. Институтда бурунгу студентлеригизден айырыб кимлени тутасыз эсигизде?
 
 
 
#119
Джаратама0
21.02.2008 21:03:37
Бир литературный кружок ачсакъ къалай кёресиз? Джаш назмучула бармыдыла бусагъатда? Ыйыкгъа бир кере джыйылыб уллу чурум да этмегенлей, назмула джазаргъа кюрешген джаш телюбюзню джазгъанларына тынгылай тусагъыз калай кёресиз?
 
 
 
#120
Джаратама0
21.02.2008 21:07:21
мираж
Бюгюнлюкде жаш тёлюде жазыучуларыбыз, назмучуларыбыз да аздыла, бар эсселе да биз аланы танымайбыз. Сизни оюмугъузгъа кёре ол не бла байламлыды?
Джаш джазыучула бурундан аз тюлдюле, аймедет, китаб басма ана тилде бусагъатда китабланы аз чыгъарады. Муну баш себеби - кърал дараджада джазыучулагъа болушлукъ керекди. Литература бусагъатда энчи ишча кёрюнеди. Джазыучу Джамагъат къуллукъчуду. Совет Союзну заманындача китаб чыгъарыу къралны бюджети бла белгилерге керекди.
 
 
 
#121
Джаратама0
21.02.2008 21:14:44
Багъалы Азамат Алимович!
Бусагъатда кеб къарачай юидегиде кеси тиибизде селешмей, орус тилде селешедиле атала-анала сабийлери бла. Школлада да ана тилни дерслерине иймеучендиле сабийлерин, ол алагъа неге керекди дегенни аитыб. Сора орус тилде селешселе, къарачай сезлени къатышдырмай, тыш къыралны тилин билгенча кередиле кеслерин. Алай бла кеси тилибиз унутулуб барады. Мен анга бек къыиналама. Сизни келюгюзге келген бла ол неден болады?
 
 
 
#122
Джаратама0
21.02.2008 21:15:05
Чтец
Бир литературный кружок ачсакъ къалай кёресиз? Джаш назмучула бармыдыла бусагъатда? Ыйыкгъа бир кере джыйылыб уллу чурум да этмегенлей, назмула джазаргъа кюрешген джаш телюбюзню джазгъанларына тынгылай тусагъыз калай кёресиз?
Бу соруу мени джюрегиме бек таб джарашады. Бизни шахар - билимни, культураны, литератураны аралыгъы болургъа керекди. "Эльбрусоидни" мекямында литература салон болса, бек ашхы боллукъ эди. Хар ыйыкъда болмаса да, бир айгъа эки кере джыйылыула болсала, ол тюбешиуледе сынамлы литераторла да, джаш къауум да джараулу ушакъ этерге боллукъдула, джангы къол джазмаланы сюзерге боллукъдула. Ол бирлешликни юсю бла республиканы тамадаларына литератураны проблемаларын чыгъарыргъа боллукъду. Бизни шахарда фахмулу джаш джазыучула бардыла: Багъатырланы Шахриза, Токъланы Фатимат, Эрикгенланы Лейла дагъыда башхала. Ол кружок республикан басмада литература бетлеге теджерге, конкурсла бардырыргъа боллукъду.
 
 
 
#123
Джаратама0
21.02.2008 21:20:17
всезнайка.
Ата-аналаны сыйлы борчларыды кеслерини тиллерин балаларына рысхыны, байлыкъны бергенча, таб аладан да баш этиб, туудукъларына берирге керекдиле - ана тилни. Былайда юйдегини уллу магъанасы барды. Ана тилин билмеген джаш къауум тил бла бирге миллет ёхтемлигин, тарихин тас этеди, балаларын ата тилде зауукъландырыуну орнуна, "джарым адам" этеди. Быллай айтыу барды "Ненча тилни биле эсенг - анча адамса" ана тилден ёнгелегенле, уллу байлыкъдан тышында къаладыла.
 
 
 
#124
Джаратама0
21.02.2008 21:22:49
Сюйюнчланы А
Туркиадан уллу салам. Ана джырыгызны менде бек джаратып тынглайма.
 
 
 
#125
Джаратама0
21.02.2008 21:24:48
всезнайка
Къарачай тилни юч алфавити болгъанды: араб, латин, кириллица, мен школда латин графика бла окъугъанма, ол къарачай тилни джорукъларына, тауушларын толу белгилерге таб эди. Бусагъатда бир къауум тюрк миллетле СНГ-де латиницагъа кёчгендиле. Биз Россияда джашагъаныбыз себебли, бютеу типографияла кириллица бла ишлейдиле, латиницагъа кёчюу саны аз миллетлеге бюджетни къытлыгъындан къыйынды.
 
 
 
#
Джаратама0
 
 
 
#
Джаратама0
 
 
 
#
Джаратама0
 
 
 
Страницы: Пред. 1 ... 3 4 5 6 7 ... 62 След.
Читают тему (гостей: 1)

 

Написать нам

Фонд «Содействие развитию карачаево-балкарской молодежи «Эльбрусоид»

© 2003-2026 Elbrusoid.org  |  Все права защищены Законами Гор.