Войти на сайт
30 Августа 2026 года

 

  • Тилчиден кери бол.
  • Кёзню ачылгъаны – иги, ауузну джабылгъаны – иги.
  • Аман адам этегингден тутса, кес да къач.
  • Дуния аламаты сен эсенг да, игиме деб айтма.
  • Кесине оноу эте билмеген, халкъына да эте билмез.
  • Чакъырылгъанны аты, чакъырылмагъанны багъасы болур.
  • Адеб джокъда, намыс джокъ.
  • Окъ къызбайны джокълайды.
  • Булут кёкге джарашыу, уят бетге джарашыу.
  • Атлыны ашхысы, ат тизгининден билинир
  • Юйлю уругъа ит чабмаз.
  • Ашыкъгъанны этеги бутуна чырмалыр.
  • Бир онгсуз адам адет чыгъарды, деб эштирик тюлсе.
  • Тойчу джашха къарама, къойчу джашха къара.
  • Джаш болсун, къыз болсун, акъылы, саны тюз болсун.
  • Кесине гебен этелмеген, биреуге черен эте эди.
  • Ёлюр джаннга, ёкюл джокъ.
  • Къатын къылыкъсыз, эр тынчлыкъсыз.
  • Ёлген эшек бёрюден къоркъмайды.
  • Эшекни не къадар тюйсенг да, ат болмаз.
  • Гугук кесини атын айтыб къычыргъанча, мен, мен деб нек тураса?
  • Билим насыб берир, билим джолну керир.
  • Таш бла ургъанны, аш бла ур.
  • Тил бла келеди джыр да.
  • Телиге от эт десенг, юйюнге от салыр.
  • Окъугъанны бети джарыкъ.
  • Сакъалы текени да бар, мыйыгъы киштикни да бар.
  • Тил джюрекге джол ишлейди.
  • Эл бла кёргенинг эрелей.
  • Ойнай билмеген, оюн бузар.
  • Терек ауса, отунчу – кёб.
  • Сыфатында болмагъаны, суратында болмаз.
  • Джол бла сёзню къыйыры джокъ.
  • Башланнган иш битер, къымылдагъан тиш тюшер.
  • Тели турса – той бузар.
  • Сабыр джетер муратха, сабырсыз къалыр уятха.
  • Оюмсуз атлагъан, аджалсыз ёлюр.
  • Окъдан джара эртде-кеч болса да бителир, сёз джара, ёмюрге къалыр.
  • Бет бетге къараса, бет да джерге къарар.
  • Игилик игилик бла сингдирилиучю затды.
  • Эрни эр этерик да, къара джер этерик да, тиширыуду.
  • Аякъларынгы джууургъанынга кёре узат.
  • Айтылгъан буйрукъ, сёгюлмез
  • Мухар, кеси тойса да, кёзю тоймаз.
  • Ашына кёре табагъы, балына кёре къалагъы.
  • Ётюрюкден тюбю джокъ, кёлтюрюрге джиби джокъ.
  • Татлы тилде – сёз ариу, чемер къолда – иш ариу.
  • Биреуню тёрюнден, кесинги эшик артынг игиди.
  • Борчунг бар эсе, хурджунунга ойлаб узал.
  • Ат басханны джер билед.

 

Архив Форума » Зеленый Форум [архив] » - ЗФ - Ана тилибизде
Страницы: Пред. 1 ... 5 6 7 8 9 ... 14 След.
RSS
КЕЛИГИЗ ДЖЫРЛАЙЫКЪ
 
#151
Джаратама0
29.03.2010 20:40:01
бездушный кролик
турналаны сезлерин билген, бир джазыгъыз, бек жаратам аны
 
 
 
#152
Джаратама0
29.03.2010 20:42:09
или ол кесекчикмиди ол))))))))
 
 
 
#153
Джаратама0
31.03.2010 11:45:02
менчик1
Мен билиб -олду)
 
 
 
#154
Джаратама0
13.04.2010 22:47:54
Уялтама деб,тау намыс этиб...
Сормай атын да, терк кетдим...
Ичген суум бла сюймеклик сингиб,таулагъа къараб ,ант этдим:
"Къайда болсам да сени табарма ,къаршчы чыкъса да джазыуум...
Шагърей джолчукъ бла къайтыб барырма,сакъласын мени ариуум..."
 
 
 
#155
Джаратама0
14.04.2010 19:09:07
Treasure
:ROSE
Ким джырлай эди бу джырны?))))
 
 
 
#156
Джаратама0
14.04.2010 23:03:16
Faida
Ася Чомаева-Семёнова и парень какой-то)))))
 
 
 
#157
Джаратама0
14.04.2010 23:21:38
Treasure

тюшдю эсиме))сау бол)))
 
 
 
#158
Джаратама0
15.04.2010 00:13:29
Faida
Не сау болу барды))))
 
 
 
#159
Джаратама0
17.04.2010 11:12:26
Treasure




Тау къушну уясы
Ёзденланы Альберт

Ата джуртум къучагъын джаяд
Халкъларын ийнакълай,
Тау къушну да уясы къаяд,
Уямса,Къарачай!

Мен джырлайма,джюрекден келген
Ауазыма тангылай,
Джашна,джашна,къонакъны сюйген
Джомакълы Къарачай!

Тау башлача,мийикди сени
Адебинг,намысынг.
Бу таулада туугъаным мени-
Олду баш насыбым!

Къайда болсам да,терк къайтырма,
Кюсеб къучагъынгы,
Ахыр тылпыуум бла да айтырма,
Къарачай,атынгы!


******************************
Каштан терекни,салкъын тюбюнде
Тюбешиб къалыб орамда,
Келбетли джайны байрым кюнюнде
Этгенем санга накъырда.
Андан сора уа эки кёзюмда
Аралыб санга алайда
Накъырда сёзден уллу сезимда
Туугъанед бизге алайда.
Энди уа джазыуу ,эки сюйгенни,
Айырды талай заманнга
Джюрегим талпыб бир-бирде сенге
Къайтама джырда мен санга.
Къыйналмай сакъла каштан терекни
Джайгъыда энтда чагъарла
Сюймеклик джолда,таза джюрекле
Бир-бирин энтда табарла
Бир-бирин энтда табарла.
 
 
 
#160
Джаратама0
18.04.2010 14:25:01
"Муратынг ючюн кюреш"
Ёзденланы Альберт

Хар башламны кёкюреги джаланды,
Джалан кибик башчы кеме джеллеге.
Ненча джангы мурат толмай къалгъанды,
Джеталмайын джан кюсеген белгиге?

Тыйгъыч болуб кюреширле,тохтар деб,
Зар джюрекле-тот киритле,сюнгюле...
Мен джангызма,итлик мени хорлар деб,
Эс ташлама муратынгдан тюнгюле,
Джел къалайгъа урса ары бюгюле!...
Сен бар алагъа,маскеле уа юрюрле!

Сау болмазлыкъ джара джауунг салмазча,
Сен кесинге кюбе ишле тёзюмден!
Уу сёзлюге джууаб табмай къалмазча,
Окъ ишлей бил айтыр тюзлюк сёзюнгден!

Бир кёзюуге кюнню чабад булут да,
Азат джелле келиб аны чачхынчы.
Хайыр чыкъмаз гурушханы унут да,
Кюреш тюзлюк эшиклени ачхынчы!
Ашыкъ,тенгим,джашлыкъ сенден къачхынчы!
Ашыкъ,тенгим,саулукъ сенден къачхынчы!
 
 
 
#161
Джаратама0
19.04.2010 19:55:50
"Эгиз къарнашла"
Ёзденланы Альберт

Кёбден бери келирге деб термиле,
Мен келгенме къарнашымы элине,
Къарнашлыкъны бешигинде тебреле,
Мен айтайым келген затны кёлюме:

Бир джюрекни тюбюнде биз джан кириб,
Джаратылдыкъ,анга болмаз чыртда дау?!
Бир анадан экибиз да сют ичиб,
Миллет толдукъ,анга шагъат-Минги Тау!

Майна,ана ёшюнлеча кёребиз,
Джылтырайла бузлары эм къарлары,
Ана сютча сууларындан ичебиз,
Эгизлери _Къарачайы,Малкъары.

Къарачайдан уллу салам берирге,
Мен келгенме Кязимни Малкъарына,
Къайсын ичген Чегем суудан ичерге,
Тынгыларгъа Омарны джырларына.
гр. "Салам"
 
 
 
#162
Джаратама0
19.04.2010 20:08:24
"Къарачай"
Ёзденланы Альберт

Алан халкъны аслан кёллю баласы,
Тау намысны оюлмазлыкъ къаласы,
Хар не тюрлю хазнадан да джеринг бай,
Акъыл сёзлю,дугъум кёзлю-Къарачай!

Тау башлада эримеучю къарынгы,
Субай санлы джашил наратларынгы
Тоялмайма кёзлерим бла ийнакълай,
Акъ башлыкълы,джашилчепкен Къарачай!

Алма терек чакъгъан кюнде,эшикде
Джукълаб тургъан балачыкъны бешикде
Тылпыуундан тогъугъанча ,мен алай
Солуучанма тау хауангы,Къарачай!

Таудан саркъыб,кёкге чыгъыб джауарыкъ,
Ахыр кюнде санларымы джууарыкъ
Сууларынгдан,мен ичеме тоялмай,
Ана кёлча таза суулу,Къарачай!

Саным сени топурагъынга къошулур,
Джаным сингиб тау хауанга,хош болур,
Аджалым да айырмазча,мен алай
Байланыбма сеннге,шыйых Къарачай!

Кёзбау сёзге сен бёлдюртме эсинги ,
Сакъла,джакъла,Шам Къарачай,кесинги!
Сюргюнде да болмагъанды кёлюнг сай,
Ата Джуртум,Ана Сютюм-Къарачай!

Керек болса,амалчы бол ,сен алай,
Терк бюгюл да,дженгил тюзел мычхылай,
Кес зорлукъну,сен ашыкъмай бек чыдай,
Хаман джылы болсун юйюнг,Къарачай!

Намыс болсун джюрек хантынг,Къарачай!
"Бирлик"болсун ёмюр антынг,Къарачай!
Бай тилинги,хур тилинги сакъла,джай!
Адам санынг минг къат ёссюн,Къарачай!
Адам санынг минг къат ёссюн,Къарачай!
гр."Учкекен"
 
 
 
#163
Джаратама0
19.04.2010 21:52:50
Келигиз Аланла бирге джырлаикъ,
Ата джуртубузгъа махтау салаикъ,
Эй-Эй-Эй Орайда,райда Осса Орайда
 
 
 
#164
Джаратама0
19.04.2010 23:57:39
Быллай джырлагъаннга уа тепсерингда келликди)))))
 
 
 
#165
Джаратама0
20.04.2010 00:22:39
"Биринчи тюбешиу"
Ёзденланы Альберт

Джолоучулукъда бек суусаб болуб,
Къара суучукъгъа къайтханем,
Суу алыб келген бир къызны кёрюб:
"Суу ичирсенг"-деб айтханем.

Ууакъ ышарыб,айча джарытыб,
Къошунун берди къолума,
Сууундан ичиб,кёб алгъыш этиб,
Атландым узакъ джолума.

Уялтама деб,тау намыс этиб,
Сормай атын да терк кетдим.
Ичген сууум бла сюймеклик сингиб,
Таулагъа къараб ант этдим:

Къайда болсам да,сени табарма,
Къаршчы чыкъса да джазыуум!
Шагърей джолчукъ бла къайтыб барырма...
Сакъла сен,мени ариум.
 
 
 
#166
Джаратама0
21.04.2010 17:15:32
"Тюеле"
Ёзденланы Альберт


Ата Джуртха элтген джолла кесилиб,
Онглуракъла чыкъдыкъ энтда бир джазгъа.
Тюе джыйын барад къумну тизилиб,
Ала бара болурламы Кавказгъа?

Башчы тюе кёллендиред джыйынын,
Тири атлайд ант этгенча талмазгъа.
Башчы болса, бир оноугъа сыйыныб,
Сюркелиб да джетер эдик Кавказгъа.

Кесинг онгсуз болсанг,кимге не айыб?!
Кюн таякъ да-къамчид мында онгсузгъа!
Тюеле уа кетгендиле ташайыб?!
Ала джетген болурламы Кавказгъа?!

Джол азыгъы боллукъ эсек да джолда,
Кюрешейик башха джуртда къалмазгъа.
Ёлмей джетсенг,насыб кёрген,ол анда
Ёлгенледен салам айтыр Кавказгъа!

Бу джуртсузлукъ барад бизни тюб этиб,
Энтда саулай чыгъарбызмы биз джайгъа?
Ёлгенлени сыртыбызгъа джюк этиб,
Атланайыкъ,мадар табыб,Кавказгъа!

Ёлгенлени джюреклеге джюк этиб,
Атланайыкъ,мадар табыб,Кавказгъа!..
Алим Газаев
 
 
 
#167
Джаратама0
21.04.2010 20:09:41
"Къобан"
Ёзденланы Альберт

Ёзенлени,кенг тюзлени
Суусабларын къандыргъан,
Минги Тауну джюрегини
Къан тамырыса,Къобан.

Къарачайны Къобаны,
Минги Тауну кёк къаны,
Алгъышлары къартланы,
Таркъайма минг джылланы!

Джаз башында кемсиз аза,
Къулакъ суудан уяла,
Джайда-боза,къачда-таза,
Къыш болса уа -мияла.

Сени суунг-мени къаным,
Ёхтемлигинг кёлюмде.
Сабыр болгъанлыкъгъа ангым,
Дженгиллигинг халимде.

Энди халкъым термилмесин
Сенден уртлам уртларгъа!
Ачлыкъ джетиб кюсемесин
Ташларынгы джаларгъа!

Сынамазча халкъым къуулукъ,
Ёмюрде да болма сай!
Этиб турсанг халал къуллукъ,
Разы турур Къарачай!
Алим Газаев
 
 
 
#168
Джаратама0
21.04.2010 22:32:23
"Акъ Таула"
Абдина Байчеккуева

Акъ Тауланы башын сылай баралла
Мийик кёкде дженгил кёксюл булутла
Кёллендиргенлейин туралла мени уа
Кюнден-кюннге джангыдан джангы умутла

Толгъан ай мийикде шош кетиб барады
Саулай джерни джарытыб биз да алгъышлай
Бюгече бизде бек уллу той барады
Джарыкъды джюрекле джайгъы тангы атханлай

Джаш тёлю харс ура чыгъыб тюз тепсейди
Къууанчдан толуб мени джаш джюрегим
Сизни бла бирге мен джангы джуртла ишлейме
Джашауда болуб мени этген муратым

Акъ Тауланы башын сылай баралла
Мийик кёкде дженгил кёксюл булутла
Кёллендиргенлейин туралла мени уа
Кюнден-кюннге джангыдан джангы умутла

Алим Теппеев
 
 
 
#169
Джаратама0
23.04.2010 21:33:46
"Джашлыгъым"
Ёзденланы Альберт

Кетген кече бир сейирлик тюш кёрдюм,
Къушча учуб бара эди джашлыгъым,
Бек тансыкълаб,джеталмасам-деб,кёб сюрдюм,
Уча эдим джел-джел эте башлыгъым.

Джеталмадым,джеталмадым мен аны,
Къайтарыргъа бармыд мадар заманны?

Алдагъанны алдагъанын билгенде,
Алдайса-деб,айталмагъан джашлыгъым!
Ол тазалыкъ джокъду бюгюн биргемде,
Алыб кетди къайталмагъан джашлыгъым!

Джеталмадым,джеталмадым мен аны,
Къайтарыргъа бармыд мадар заманны?


Бюгюнлюкде тюшлерими джокълагъан,
Насыбны кёб, сагъышы аз джашлыгъым!
Джокъду къачхы булутда да сокъмагъы,
Келлик джаз бла да къайталмаз джашлыгъым.

гр. "Салам"
 
 
 
#170
Джаратама0
24.04.2010 23:59:53
"Кечеги джолоучу"
Ёзденланы Альберт

Юшюген къар аякъ тюбде къансыйды,
Къышхы кече бир джолоучу джарсыйды,
Хар бир мешна джетиб озса ызындан,
Ачыу чыгъа,къама кибик къынындан,
Бир сагъышха тийиб ауузу къамайды,
Джара тюшген сагъыш этиб джылайды:

"Сууукъ къарам нек бурулмайд
Джылы саламгъа?
Кечегиде нек ийнанмайд
Адам адамгъа?

Къар къансыйды,джан джарсыйды,джол узакъ.
Бир къауумла мешналадан къарай, сакъ
Озадыла,болушургъа "мадар джокъ",
Ким биледи,тохтасала тиер окъ,
Не уа кирир сыртларындан бир бычакъ,
Аны ючюн озадыла хар ким сакъ.

Аяз сорад ачы улуб,
Джара тамагъын:
"Урлатханмыд адам улу
Ийнанмакълыгъын?!"

Заман атлаб барад кече ортадан,
Джолоучудан сора джокъду джолда джан,
Узун джолну кёрюнмейди чырт учу,
Арыгъанды,баралмайды джолоучу,
Ийнанмайды анга келлик мадаргъа,
Бауурундан джыгъылгъанды ол къаргъа.

Къардан джылыу тилегенча,
Джайыб къучагъын,
Сюркеледи,излегенча
Ийнанмакълыгъын.

Сууукъ тангы къабыр шошлукъ джесирлеб,
Бусакъла да сын ташлача симсиреб...
Къардан болуб джолоучуну кебини,
Излемейди энди сени не мени.
Кёб да турмай басындыла мешнала,
Ийнаналмай къарайдыла адамла.

Кюн да тийди,шош аламгъа
Тёге джарыкъны,
Излегиз!-дей адамлагъа,-
Ийнанмакълыкъны.

гр."Салам"
 
 
 
#171
Джаратама0
26.04.2010 21:08:18
"Къарды атынгы джазама"
Ёзденланы Альберт

Мен бек сюйген акъ байрамда,
Сен бек сюйген акъ байрам да-
Джангы джыл,энди джетеди!
Узакъда болсамда кесим,
Тансыкълыкъ кючлеген эсим
Сени бла ушакъ этеди.

Кёк да акъды,джер да акъды,
Къар сууукъду,джумушакъды,
Къарда атынгы джазама,
Сууукъ болса бармакъ учум
Атынгы джазгъаны ючюн,
Эринлериме салама.

Джашау деген сюймекликди,
Джолу тюздю,бирде тикди,
Сени сюйгенли билгенме!
Билдим джюрегими кючюн,
Сени бек сюйгени ючюн,
Аны да артыкъ сюйгенме!

гр."Салам"
 
 
 
#172
Джаратама0
26.04.2010 21:14:37
"Чапай элим"
Ёзденланы Альберт

Шам Къарачайды уллу атабыз,
Сен аны къартлыкъ джашыса!
Алтын джюзюкдю чыкъгъан Марабыз,
Сен аны накъут ташыса!

Шам Къарачайны къартлыкъ джашы,
Алтын Мараны накъут ташы,
ДЖаш джюрегимде толгъан айым,
Сен намыс къаламса,Чапайым!

Джеринг эркинча,сени адамынг
Кенг джюреклиди,джарыкъды!
Алан тюзледе ёсген уланынг,
Эски чеклерин саллыкъды!

Шам Къарачайны къартлыкъ джашы,
Алтын Мараны накъут ташы,
Джаш джюрегимде толгъан айым,
Сен намыс къаламса,Чапайым!

Мени тыбырым,ёмюрлюк антым,
Мийиклей турсун намысынг!
Таулу эллеге айтылгъан атынг,
Саулай дуниягъы айтылсын!

Шам Къарачайны къартлыкъ джашы,
Алтын Мараны накъут ташы,
ДЖаш джюрегимде толгъан айым,
Сен намыс къаламса,Чапайым!
гр. "Салам"
 
 
 
#173
Джаратама0
29.04.2010 16:58:08
Кюн тийгенди тау эллеге нюрюн чача,
Уллу юйле сюелелле -къалалача
Къонакъ келсе эшиклени кенгнге ача
Сен джашнайса туугъа элим Ючкекеним...
андан арысын ...билмейме)
 
 
 
#174
Джаратама0
29.04.2010 17:05:05
"Хурзук элим"
Ёзденланы Альберт

Чууакъ эртденде Чолпан джулдузча
Джашнайса тау элим.
Къаядан саркъгъан къара суучукъча,
Тазад санга кёлюм!

Орайда-райда,Хурзук элим
Орайда-райда,туугъан джерим,
Анамачад санга джюрегим!

Сенсе бешиги эм сабийлиги,
Къарачай халкъынгы.
Ана сютю блады сюймеклиги
Къызынгы,джашынгы.

Орайда-райда,Хурзук элим
Орайда-райда,туугъан джерим,
Анамачад санга джюрегим!

Ныгъышда къартла алгъыш айталла
Джуртума,элиме,
Рахат джашаугъа джырла джырлайла,
Насыбха бёлене.

Орайда-райда,Хурзук элим
Орайда-райда,туугъан джерим,
Анамачад санга джюрегим!

Умар излеген муратла толуб,
Джаш тёлюнг окъуйду.
Бюгюннгю джашчыкъ тамбла джаш болуб,
Джуртуму къоруйду.

Орайда-райда,Хурзук элим
Орайда-райда,туугъан джерим,
Анамачад санга джюрегим!
 
 
 
#175
Джаратама0
06.05.2010 21:51:01
"Болур бла болмаз"
Ёзденланы Альберт

Айрандан тоюб мас болгъан адам,
Ол ёмюрлюкге мас болур!
Адам къатында тас болгъан адам,
Ол табылмаздан тас болур!

Онгсузну хакъын ашагъан улан
Кеси кибикге аш болур!
Миллети ючюн джашагъан улан,
Ол миллетине баш болур!

Джарлы болама...-деб,джылаб тургъан,
Ол ёмюрюнде бай болмаз!
Мыжыкъ аджир бла байталдан туугъан
Ол чабыб озгъан тай болмаз!

Кертини чамгъа бургъанлыгъынга,
Уллу тюрленнген зат болмаз!
"Эшекге тамгъа ургъанлыгъынга,
Ол ёмюрде да ат болмаз!"
 
 
 
Страницы: Пред. 1 ... 5 6 7 8 9 ... 14 След.
Читают тему (гостей: 1)

 

Написать нам

Фонд «Содействие развитию карачаево-балкарской молодежи «Эльбрусоид»

© 2003-2026 Elbrusoid.org  |  Все права защищены Законами Гор.