Войти на сайт
25 Июня 2026 года

 

  • Джашынгы кесинг юретмесенг, джашау юретир.
  • Татлы тилде – сёз ариу, чемер къолда – иш ариу.
  • Джахил болса анасы, не билликди баласы?
  • Келинни – келгинчи, бёркню кийгинчи кёр.
  • Уллу айтханны этмеген – уллаймаз.
  • Бал – татлы, балдан да бала – татлы.
  • Аман къатын алгъан, арыр, иги къатын алгъан джарыр.
  • Махтаннган къыз, тойда джукълар.
  • Къатын къылыкъсыз, эр тынчлыкъсыз.
  • Тау башында, тау болмаз, джангыз терек, бау болмаз.
  • Къонагъы джокъну – шоху джокъ.
  • Къызбайны юйюне дери сюрсенг, батыр болур.
  • Ёлюр джаннга, ёкюл джокъ.
  • Къайгъыны сюйген, къайгъы табар.
  • Адам боллукъ, атламындан белгили болур.
  • Биреуню къыйынлыгъы бла кесинге джол ишлеме.
  • Эринчекни аурууу – кёб.
  • Урунуу – насыбны анасы.
  • Джаз бир кюнню джатсанг, къыш талай кюнню абынырса.
  • Иги – алгъыш этер, аман – къаргъыш этер.
  • Джаш къарыу бла кючлю, къарт акъыл бла кючлю.
  • Чакъырылгъанны аты, чакъырылмагъанны багъасы болур.
  • Тыш элде солтан болгъандан эсе, кесинги элде олтан болгъан игиди!
  • Хар сёзню орну барды.
  • Мал кёб болса, джууукъ кёб болур.
  • Ач бёрюге мекям джокъ.
  • Акъыл къартда, джашда тюйюлдю – башдады.
  • Накъырданы арты керти болур.
  • Ачыкъ джюрекге джол – ачыкъ.
  • Кёб джат да, бек чаб.
  • Таугъа чыгъаллыкъ эсенг, тюзде къалма.
  • Ашыкъгъанны этеги бутуна чырмалыр.
  • Джылыгъа джылан илешир.
  • Къарнынг къанлынга кийирир.
  • Кёл ашады да, кеси ашады.
  • Къарны аманнга къазан такъдырма, къолу аманнга от джакъдырма.
  • Гитче джилтин уллу элни джандырыр.
  • Тилчи тилден къаныкъмаз.
  • Битмегеннге сакъал – танг.
  • Сёлеш деб шай берген, тохта деб, сом берген.
  • Ариу сёзде ауруу джокъ.
  • Джыйырма къойну юч джыйырма эбзе кюте эди.
  • Иги бла джюрюсенг, джетерсе муратынга, аман бла джюрюсенг, къалырса уятха.
  • Алтыда кюлмеген, алтмышда кюлмез.
  • Бет бетге къараса, бет да джерге къарар.
  • Окъуу – билимни ачхычы, окъуу – дунияны бачхычы.
  • Акъыл бла адеб эгизледиле.
  • Ач – эснер, ат – кишнер.
  • Оюмсуз атлагъан, аджалсыз ёлюр.
  • Кёлю джокъну – джолу джокъ.

 

Архив Форума » Зеленый Форум [архив] » - ЗФ - Ана тилибизде
Страницы: Пред. 1 ... 8 9 10 11 12 ... 14 След.
RSS
КЕЛИГИЗ ДЖЫРЛАЙЫКЪ
 
#226
Джаратама0
18.08.2010 13:08:29
"Джаш тёлюге"
Ёзденланы Альберт

Ашыкъмагъыз,сиз къоркъмагъыз замандан,
Мюрзеу да кюз джыйылады сабандан,
Джаз бла джайны чегиндебиз алкъын биз,
Ашыкъмагъыз,келир керти кюнюбюз.

Мадар болса,дунияны аулагъыз,
Хар миллетни игилигин сайлагъыз,
Келтиригиз халкъыбызгъа окъууну,
Къурутугъуз "тукъум айыргъан ууну"!

Бирликдеди,бирликдеди кючюбюз!
Аны билмей ёлгенд бизни кёбюбюз.
Сюймесенг да,эт ахлунга адамлыкъ,
Башха халкъгъа этмегенлей аманлыкъ.

Танкга къама ургъан-болур ол кюлкю!
Кёбню кёрген чууут халкъдан биз юлгю
Алайыкъ да , халкъыбызны сакълайыкъ,
Биз акъыл бла Джуртубузну джакълайыкъ!
1992дж.
 
 
 
#227
Джаратама0
19.08.2010 02:31:21
Сени к'ара к'ашынг табанынга джете...

К'айдан да кердюм тюшюмде сени,
Кошмарла керюб атды эртденги...
 
 
 
#228
Джаратама0
20.08.2010 01:08:18
Сени к'ара к'ашынг табанынга джете...

К'айдан да кердюм тюшюмде сени,
Кошмарла керюб атды эртденги...
...)))))))))) аз кёб поклонницала айланмайдыла... бу джырланы джырласанг))))))
 
 
 
#229
Джаратама0
20.08.2010 16:01:46
Faida
Наоборот, пытаюсь избавиться от них
 
 
 
#230
Джаратама0
20.08.2010 17:25:37
Murchello
...да мен да алай англадым джырларынгы магъанасын))))))
 
 
 
#231
Джаратама0
20.08.2010 17:55:46
"Джырчы бла арбачы"
Ёзденланы Альберт

Ие болгъан "джашау"деген арбагъа,
Мени джырым джырлансын!-деб буюрад.
Мадар болмай башха дырны джырларгъа,
Арбачыны джырын джырлайд джамагъат.
Арбачы да ёхтемлениб ышырад,
Джюгенни да тюз тутаргъа унутуб.
Джанкъылычны сюрген кибик халкъ барад,
Насыб излеб,белгисизге джол тутуб.

Бу болумну эслеб джырлайд бир инсан:
"Былай барсакъ,тирелирбиз къаягъа!"
Тюшюрелле аны джашау арбадан,
Баям этиб атын джети дуниягъа.
Чархны джолдан терсейтсе уа арбачы,
Халкъ инджилиб,даулар джарыкъ кюнлени.
Эсге тюшюб джолда къалгъан ол джырчы,
Арбачыдан сыйырырла джюгенни.

Халкъ барады джашау деген арбада,
"Чархы-заман,кегейлери-ёмюрле",
Халкъ барлыкъды кюн сау болуб аламда,
Арбачыла кетерле да келирле...
Хар адам да тенгди джашау арбада,
Джырлай билген къоркъмасын да джырласын!
Халкъ кючю бла джыр къуралсын арада,
Ол джыр халкъгъа къыбламача джарасын!
1984дж.
Байкъулланы Солтан

http://www.youtube.com/watch?v=npbsXx5qUfY&feature =related
 
 
 
#232
Джаратама0
22.08.2010 09:44:18
САМЫЙ МОЩНЫЙ ЗОЛОТОЙ ГОЛОС - АЛИМ ГАЗАЕВ...ЖЫРЛАСА, ТЕГЕРЕК ШОШ БОЛАДЫ, ЖЫРЫНЫ СЕЗЛЕРИ ЖЮРЕКДЕ КЪАЛАДЫ, АНГА ЖАШ-КЪАРТ ДА ТЫНГЫЛАЙДЫ....МИЛЛЕТНИ АТЫН АЙТДЫРГЪАН ЖЫРЧЫ...АЛИМ ЖЫРЛАП ТЕБРЕГЕНДЕ, ОТАРЛАНЫ ОМАР (АЛЛАХ ЖАННЕТЛИ ЭТСИН!я) АЙТХАН ЭДИ - "ЭНДИ ЁЛЮРГЕДА КЪОРКЪМАЙМА, МИЛЛЕТНИ ЖЫРЫ ЁЛЛЮК ТЮЛДЮ". ЖЫРЛА АЛИМ, ЖЫРЛА!!!!
 
 
 
#233
Джаратама0
22.08.2010 13:38:19
Менме
 
 
 
#234
Джаратама0
22.08.2010 14:09:58
АТА ДЖУРТУМ-АЛАН ДЖУРТУМ
Ёзденланы Альберт

Ата Джуртум-Алан Джуртум зорлукъ отда кюл болуб,
Кюл аш болду зордан къалгъан таджал Алан урлукъгъа.
Ата шартынг-Алан шартынг Джуртха тама кёл болуб,
Андан ичдинг,анадн чакъдынг,бойсунмадынг зорлукъгъа.

Джашна,халкъым,Терекден джете Лабагъа!
Гюл кюннгеча,бур бетинги Кябагъа!
Ана тилинг-баба тилинг -шумер тил,
Аллах берген сыйлы тилни этме кюл!

Тинин,динин,джерин сакълай ёлген джигит эрлени,
Шейит болуб кетгендиле хур джандетге джанлары.
Къанлы джаула джуртха чаба,джара салгъан джерлени
Битейдиле джуртну сакълай ёлгенлени санлары.

Джашна,халкъым,Терекден джете Лабагъа!
Гюл кюннгеча,бур бетинги Кябагъа!
Ана тилинг-баба тилинг -шумер тил,
Аллах берген сыйлы тилни этме кюл!

Хей,къыйынлы,таджал халкъым,сен сынагъан къыйынлыкъ
Кёблюк этер сау дунияны халкъларына,джерине...
Джашна,халкъым,джауларынгы акъыл бла,билим бла джыкъ,
Тири атлай,намыс сакълай,чыкъ насыбны тёрюне!

Джашна,халкъым,Терекден джете Лабагъа!
Гюл кюннгеча,бур бетинги Кябагъа!
Ана тилинг-баба тилинг -шумер тил,
Аллах берген сыйлы тилни этме кюл!

Джаша,халкъым,сен сынама энди сюргюн,къазауат!
Сен кёргенден кери этсин Аллах адам улусун!
Джесирликни сезиминден джюрегинги тазалаб,
Азатлыкъгъа юренирге Уллу Аллах буюрсун!

Джашна,халкъым,Терекден джете Лабагъа!
Гюл кюннгеча,бур бетинги Кябагъа!
Ана тилинг-баба тилинг -шумер тил,
Аллах берген сыйлы тилни этме кюл!
1987дж.
 
 
 
#235
Джаратама0
24.08.2010 16:51:31
*Алтын бешигим - МАРА*

Эй Мара элим, эй туугъан джерим,
Алтын бешигимсе сен мени...
Чегингнен кирсем, джандетге киреме,
Джандет эшигимсе сен мени

Аула арада, сыйдам къалада,
Кесинг Минги таугъа джанаша,
Бурма чегетле, хурма кёгетле,
Табигъат сейир-тамаша

Чокъуракъ сууларынг, сослан ташларынг,
Къарагъан кёзню къамата,
Хей, хур къызларынг, деу да джашларынг,
Дунияны кёзюн къарата

Салкъын сыртларынг, дангыл тюзлеринг,
Тау къышлыкъларынг, джайлыгъынг,
Былай - сабанла, алай ? сюрюуле,
Кёгютюм мелхум байлыгъым

Джохар бузлары, булхар кюртлери,
Башлада бугъойла, чыранла,
Марал эчкиле, джугъутур текеле,
Чынгыл къаяла, ыранла...
.................................................. ...
.........................................
Ненча ёмюрню джашайды Мара,
Чырт баш урмайын пеляхха,
Ненча ёмюрню джашнайды Мара,
Шукур а болсун Аллахха...

Хей Мара элим, хей туугъан джерим,
Алтын бешигимсе сен мени,
Чегингнен кирсем, джандетге киреме,
Джандет эшигимсе сен мени
 
 
 
#236
Джаратама0
24.08.2010 17:32:31
taulanud

Бу джырмыды? Сёзлерин, макъамын а ким джазгъанды?
 
 
 
#237
Джаратама0
24.08.2010 17:58:49
kalejchi хоу...джырды..джарымын да джазмагъанма..бирдта узунду..эсиме тюшюралгъанымды бу.

Ким джазгъан-къурагъанын
атын-тукъумун билмейме, джангыз Нарсанада джашагъанын билеме,дохтур болуб ишлейди анда...Кёчгюнчюлюкню заманында джазгъан эди, туугъан элине таралыб...
Нарсанада джагъанлыкъха тыш элчи тюлдю,марачыды кеси.

Бу джырны Отарланы Омар джырлаб да эштен эдим, къарт атам да бек сюе эди бизге джырларгъа муну, аннан юреннгенме
 
 
 
#238
Джаратама0
26.08.2010 11:24:11
"Ислам диннге тёрт тёрттизгин"
Ёзденланы Альберт

1.Муслиманлыкъ-чууакъ кёкде джарыкъ кюн,
Ийнамсызны ич дуниясы кечеди!
Джюз джыл толгъан кяфырны да,ма бюгюн
Ислам диннге къайтса,Аллах кечеди!

2.Дунияда джангылгъандыла мингле,
Айыб джокъду бир джангылгъан инсаннга,
Дунияда эм акъыллы алимле
Ахырында къайтадыла Къур`аннга!

3.Ислам динни тазалыгъын ушатдым
Минги Тауда джылтырагъан кёк бузгъа,
Ислам диннге къаршчы джанны ушатдым
Балчыкъдагъы тёнгереген тонгузгъа!

4.Къой кютгеннге,къазгъаннга да магъадан,
Болгъаннга да къралгъа ара багъана
Бир Аллахха къуллукъ этгенден уллу
Джокъду-джокъду бу дунияда магъана!
1986дж.
 
 
 
#239
Джаратама0
26.08.2010 18:37:45
ЁЗДЕНЛАНЫ САПАР

ХХХ

Кёреме Ай джарыйды мийикде, Кёкде.
Эштеме сызгъырады жел да чегетде.
Ёхтем таула тёзелле бу ачы желге,
Алача мен да тёземе джаш сюймекликге.

Билеме, сен жукълайса, кёресе тюшле,
Менича къарамайса джулдузлу Кёкге.
Тюшюнгде да саласа, билеме, джастыкъ,
Сюймекликден алырча экибиз тансыкъ.

Эртденликде тёгесе юсюме чачны,
Къучакълайса мени бла сейирлик тангны.
Тюнюнгде уа къоймайса джууукъ къатынга,
Тиерге да къоймайса зыбыр чачынга.

Кёреме Ай джарыйды бийикде Кёкде.
Эштеме сызгъырады джел да чегетде.
Сагъышымда уа къара чач кесине тартад,
Анга башха тийсе уа, менме ахырат.
 
 
 
#240
Джаратама0
27.08.2010 02:47:45
"Чолпан"
Ёзденланы Альберт
(кеси джырлайды)

Сюймеклигими сакъларгъа дедим,
Толу болгъанма антыма,
Мен джазыццма джер,джюген салыб,
Келгенме,ариу,къатынга.

Сен сыйлы антым,
Уча къанатым,
Ашхы муратым-
Чолпаным!

Къол узатдым да,къолунгу бердинг,
Сюйюмлю къараб сен манга,
Къол къолну тута,насыбдан тола,
Атландыкъ биз кёксюл тангнга!


Сен сыйлы антым,
Уча къанатым,
Ашхы муратым-
Чолпаным!

Шош джангызлыкъны мен джесиринден
Къутулдум,келед джырларым!
Джулдуз учханча дженгил джетелле
Атмаучу къыйын тангларым!

Ёмюрлюк антым,
Учхан къанатым,
Толгъан муратым-
Чолпаным!
1985дж.
 
 
 
#241
Джаратама0
27.08.2010 04:18:38
Ёзденланы Сапар

КИМ ЧАЧСЫН МЕНИ САГЪЫШЫМЫ

Ким чачсын мени сагъышымы,
Къатымда мыдахды бир адам.
Атымы айтыб а, ахсынса,
Джыламукъ агъады мыйымдан.

Ким чачсын мени сагъышымы,
Бу адам менден кетеди ?
Чыммакъ акъ, сыйлы насыбымы
Къап-къара къара боран элтеди.

Ким чачсын мени сагъышымы,
Джазыугъа бойсунмайды джюрек.
Ким чачсын мени сагъышымы,
Кёк да тюлдю манга бюгюн кёк.

Ким чачсын мени сагъышымы,
Джазыудан болурму шапагъат?
Юзгеннге мени къанатымы,
Чыкъмасын ёмюрюнде къанат.
 
 
 
#242
Джаратама0
29.08.2010 01:03:22
"Джыр- байлыкъ"
Ёзденланы Альберт

Бай къул да болур,къул бай да болур,
Бай къулун дайым туталмаз.
Ханла джашагъан къала оюлур,
Джырны уа заман джуталмаз!

Ашхы джыр,джерде ашхы адамча,
Джашайды ёлмей ёмюрге,
Таулугъа тауча,къырдышха джазча,
Керекди джыр да джюрекге.

Сары алтынны сомду багъасы,
Алтын-магъадан,сом-къагъыт,
Джюрек джырны уа джокъду багъасы:
Керти адамгъа джыр-байлыкъ.
1976дж.
 
 
 
#243
Джаратама0
29.08.2010 02:12:37
ЁЗДЕНЛАНЫ САПАР

ХХХ

Киши кёрмейд къарамымы,
Киши билмейд сагъышымы,
Джангыз юйде кесим джангыз джатама.
Тансыкъ болгъандан джериме,
Бир затла сора кесиме,
Акъ къайында къуу бутакъгъа къарайма.

Шууулдайдыла бутакъла,
Къарла бюрке узакъгъа ?
Хар биринде бирер тюрлю бир макъам.
Кимим айтсын кёзюмден,
Былай тюрлю некме мен?
Табылырмы джууаб берлик бир адам.

Барадыла учуб джылла,
Тюб-тюз тюзле эм къынгырла ?
Аладан да табалмайма мен джууаб.
Киши кёрмейд къарамымы,
Киши билмейд сагъышымы,
Биллик джан а ? Къарачайым узакъдад.
 
 
 
#244
Джаратама0
31.08.2010 02:10:42
"Сатылгъан тенглик"
Ёзденланы Альберт

"...Сатханды!"-деб,биреу келиб,
Азраилча къычырды.
Ачыууму шайтан джели
Тынчлыгъымы учурду.

Ол болсун,деб,тюшюм мени,
Бу оюмну сайладым:
Джюген салыб,дженгилликни
Сабырлыкъгъа байладым.

Сабырлыкъны ёкюл этиб,
Салыб келдим тенгиме,
"Акъ иннетин" ол кюл этиб,
Джакъды мени бетиме.

Болгъан затха бушуу этдим,
Тёзюм табдым,болдум сакъ...
Заман-къобан джууа,бетим
Алгъындан да болду акъ.

Ангыладым-джангыз болад
Тёрде мийик тохана...
Бек ышаннган-бачхыч болад
Ышаннган адамына.

Сатлыкъ-сата.заман озуб,
Ёрлесе уа башлагъа?
Къайгъы этед джюрек ёсюб
Келген ачыкъ джашлагъа.
1983дж.
 
 
 
#245
Джаратама0
31.08.2010 03:28:05
ЁЗДЕНЛАНЫ САПАР

ХХХ

Кюндюзле кетелле,
Кечеле келелле.
Кече да кетеди танг белги берсе.
Мен а, не кеталмай,
Не, мында туралмай,
Ашырыб барама заманны терсге.

Джашауум джарыкъды,
Хар нем да ашхыды.
Алай а узакъды менден биреулен.
Кюндюз да, кече да
Мен ачыкъ тилейме;
Аллах сен айырма ол къызны менден.

Таулада, ма бюгюн,
Кюн ариу болурму?
Таулада, ма бюгюн, ол болур эсен.
Мен а Шималдама,
Тубаннга къарайма ?
Нёгерим да джокъду, кесим бла ма мен.

Тансыкъдан ёлеме.
Джыр анга шагъатды.
Кесекден барлыкъма мен сени таба.
Башхагъа алданма,
Бетинги сен сатма.
Бедишлик, билесе, джюрекге къама.
 
 
 
#246
Джаратама0
31.08.2010 03:32:39
ЁЗДЕНЛАНЫ САПАР

ХХХ

Джыр манга къонакъ бола тургъанлай,
Сен озгъаненг туура къатымда.
Сен кетсенг да къолунгу булгъамай,
Атынг айтылгъанед джырымда.

Нек къарайенг алай тюрлю меннге,
Мен ушамайемми кесиме.
Огъесе, чабыб джетиб мен сеннге
Айтыргъа керекмем ? ?сюеме?.

Сен ташайдынг, джелча, кёб мычымай,
Мен а къалдым тургъан джеримде.
Бек сюйгеним, айтчы, сен, джашырмай,
Бир кесек турмагъанмем эсингде?

Тёгерек джандетча тамашады.
Мен аны билсем да бек ачыкъ,
Сагъышым акъ тюлдю, ма къарады,
Кесимден этеди къачарыкъ.

Тёгерек джазгъыды - къууанчлыды.
Къайт да бери, кюннге бир къара.
Ол сенден менден да акъыллыды,
Менича ол ? ?кел? - дейди санга.
 
 
 
#247
Джаратама0
01.09.2010 19:31:26
kalejchi
 
 
 
#248
Джаратама0
01.09.2010 20:01:12
"Дангыл тюзде"
Ёзденланы Альберт

Джер юсюнде хар неден да мийик болуб къалгъанча,
Сескеклениб сюелеме мен ишекли адамча,
Ким эсе да тюз сыртымдан меннге къараб тургъанча,
Бурулама,дангыл тюз а къыйырсызды-заманча.

Кёзлерими къысама да,кёрюнеди Минги Тау,
Джюрегими ургъаны да эшитиледи:Тау! Тау! Тау!

Кёк къанатлы джырчы аяз кюнчыкъгъандан келеди,
Бармакълары къауралагъа къыллагъача тиеди,
Аяз кюнню акъ булутлу кёз къабагъын ачады,
Джайгъы кюн да дуниягъа алтын нюрюн чачады.

Кёзлерими къысама да,кёрюнеди Минги Тау,
Джюрегими ургъаны да эшитиледи:Тау! Тау! Тау!

Къучагъымы кюннге кериб,мен учунуб солуйма,
Кёкню кёк къол аязындан кёк хауаны тогъуйма,
Тешилгенди сезимими байлаб тургъан кюрме да,
Энди кесек ишлегенме, джетишгенча хар не да.

Кёзлерими къысама да,кёрюнеди Минги Тау,
Джюрегими ургъаны да эшитиледи:Тау! Тау! Тау!
 
 
 
#249
Джаратама0
02.09.2010 00:35:55
ЁЗДЕНЛАНЫ САПАР

ХХХ

Чакъырсам да сени,
Излесем да сени,
Бек узакъды, узакъ, бизни арабыз.
Алай а мен джерге,
Башымдагъы кёкге,
Этеме уялмай сени ючюн алгъыш.

Былтыргъы илешлик,
Ол кючлю сюймеклик,
Кесекге эди ол ? билмейек биз а аны.
Джанкъозла чакъсала,
Къуу болуб акъсала,
Артда кёрлюгек кертисин биз джазны.

Джанкъозла чакъдыла.
Къуу болуб акъдыла.
Джашил джаз да келди таулагъа, элиме.
Джай кетиб, къач келди.
Къыш джерге къар себди.
Сен да бир уллу сый бердинг кесинге.

Быйылча бир джылда,
Джауумлу бир къышда,
Насыблы болалмай къыйналсанг кесинге,
Сюйгенингден къалсанг,
Мыдахлыкъ сынасанг,
Сен мени тюшюрлюксе, билеме эсинге.
 
 
 
#250
Джаратама0
02.09.2010 02:03:47
Кимде болса да Хасан Хубиевни хоть бир джырчыгъы бармыды (сёзлери) ?
 
 
 
Страницы: Пред. 1 ... 8 9 10 11 12 ... 14 След.
Читают тему (гостей: 1)

 

Написать нам

Фонд «Содействие развитию карачаево-балкарской молодежи «Эльбрусоид»

© 2003-2026 Elbrusoid.org  |  Все права защищены Законами Гор.