Аджашханны ызындагъы кёреди, джангылгъанны джанындагъы биледи.
Кёб ашасанг, татыуу чыкъмаз, кёб сёлешсенг, магъанасы чыкъмаз.
Эм уллу байлыкъ – джан саулукъ.
Чабар ат – джетген къыз.
Биреуню эскиси биреуге джангы болмайды.
Ётюрюкню къуйругъу – бир тутум.
Тойгъа алгъа да барма, тойда артха да къалма.
Джюрек кёзден алгъа кёрюр.
Огъурлуну сёзю – суу, огъурсузну сёзю – уу.
Адамны адамлыгъы къыйынлыкъда айгъакъланады.
Джан саулукъ бермей, сан саулукъ бермезсе.
Ауурну тюбю бла, дженгилни башы бла джюрюген.
Терслик кетер, тюзлюк джетер.
Адамны сабийин сюйген джюреги, бычакъча, джитиди.
Къалгъан ишге къар джауар.
Мени джылытмагъан кюн, меннге тиймесин!
Арба аугъандан сора, джол кёргюзтюучю кёб болур.
Тилсиз миллет джокъ болур.
Окъумагъан сокъурду, сокъур ташха абыныр!
Адам бла мюлк юлешмеген эсенг, ол адамны билиб бошагъанма, деб кесинги алдама.
Джумушакъ терекни къурт ашар.
Адам сёзюнден белгили.
Ач келгенни – тойдур, кеч келгенни – къондур.
Къанны къан бла джуума, аманны аман бла къуума.
Артына баргъанны, къатына барма.
Аз айтсам, кёб ангылагъыз.
Ауругъанны сау билмез, ач къарынны токъ билмез.
Джаз бир кюнню джатсанг, къыш талай кюнню абынырса.
Джылыгъа джылан илешир.
Аякъларынгы джууургъанынга кёре узат.
Чыбыкълыкъда бюгюлмеген, къазыкълыкъда бюгюлмей эди.
Къарт болгъан джерде, берекет болур, сабий болгъан джерде, оюн болур.
Чакъырылгъанны аты, чакъырылмагъанны багъасы болур.
Джырчы джырчыгъа – къарнаш.
Келинин тута билмеген, къул этер, къызын тута билмеген, тул этер.
Джолда аягъынга сакъ бол, ушакъда тилинге сакъ бол.
Урама да – ёледи, сатама да – келеди.
Джылкъыдан – ат чыгъар, тукъумдан – джаш чыгъар.
Кёлю джокъну – джолу джокъ.
Тил – кесген бычакъ, сёз – атылгъан окъ.
Къарнынг ауруса, ауузунгу тый
Намысы болмагъанны, сыйы болмаз.
Джигер – джаннга къыйынлыкъ.
Тенгинг джокъ эсе – изле, бар эсе – сакъла!
Итли къонакъ джарашмаз.
Джаш болсун, къыз болсун, акъылы, саны тюз болсун.
Ётюрюкчюню шагъаты – къатында.
Юй ишлеген балта эшикде къалыр.
Рысхы – насыбха къор.
Эллинг бла джау болсанг да, юйюнг бла джау болма.
