Войти на сайт
26 Июня 2026 года

 

  • Джигер – джаннга къыйынлыкъ.
  • Бет бетге къараса, бет да джерге къарар.
  • Суугъа – таянма, джаугъа – ийнанма.
  • Къарыусузгъа кюлме, онгсузгъа тийме.
  • Билим – акъылны чырагъы.
  • Тилчи бир сагъатха айлыкъ хата этер.
  • Къая джолда джортма, ачыкъ сёзден къоркъма.
  • Къарт бла баш аша, джаш бла аякъ аша.
  • Айырылмаз джууугъунга, унутмаз сёзню айтма.
  • Аджашханны ызындагъы кёреди, джангылгъанны джанындагъы биледи.
  • Сютден ауузу кюйген, суугъа юфгюре эди.
  • Акъыллы – эл иеси, тели – эл баласы.
  • Къонакъ болсанг, ийнакъ бол.
  • Кёбден умут этиб, аздан къуру къалма.
  • Уясында не кёрсе, учханында аны этер.
  • Къанны къан бла джуума, аманны аман бла къуума.
  • Сакъламагъан затынга джолукъсанг, не бек къууанаса, не бек ачыйса.
  • Накъырданы арты керти болур.
  • Арба аугъандан сора, джол кёргюзтюучю кёб болур.
  • Аш иеси бла татлыды.
  • Ашыкъгъан cуу, тенгизге джетмез.
  • Таукел адам тау тешер.
  • Аман къатын алгъан, арыр, иги къатын алгъан джарыр.
  • Баш болса, бёрк табылыр.
  • Джашны джигитлиги сорулур, къызны джигерлиги сорулур.
  • Эрине къаргъыш этген къатын, эрнин къабар.
  • Эки къатын алгъан – эки ташны ортасына башын салгъан.
  • Ашына кёре табагъы, балына кёре къалагъы.
  • Къыйынлы джети элге оноу этер.
  • Артына баргъанны, къатына барма.
  • Сыфатында болмагъаны, суратында болмаз.
  • Бермеген къол, алмайды.
  • Джаным-тиним – окъуу, билим.
  • Ана – юйню кюн джарыгъы.
  • От кюйдюрген, сау болса да, тот кюйдюрген, сау болмаз.
  • Ёгюзню мюйюзлери ауурлукъ этмейдиле.
  • Джыгъылгъанны сырты джерден тоймаз.
  • Гитче джилтин уллу элни джандырыр.
  • Къууут – джелге, берне – бошха.
  • Хар зат кесини орнуна иги.
  • Баргъанынга кёре болур келгенинг.
  • Чабар ат – джетген къыз.
  • Мал кёб болса, джууукъ кёб болур.
  • Тамбла алтындан бюгюн багъыр ашхы.
  • Байлыкъ келсе, акъыл кетер.
  • Адебсиз адам – джюгенсиз ат.
  • Адамны бетине къарама, адетине къара.
  • Чомарт бергенин айтмаз.
  • Биреуге аманлыкъны тилеме да, кесинге ашхылыкъны тиле.
  • Тойгъанлыкъ къойгъа джарашады.

 

Архив Форума » Зеленый Форум [архив] » - ЗФ - Ана тилибизде
Страницы: Пред. 1 ... 14 15 16 17 18 ... 62 След.
RSS
Келигиз, тил байлыгъыбызны сакълайыкъ!
 
#376
Джаратама0
05.03.2008 19:00:36
Сау келигиз, багъалы Али-Мурат Хасанович!
 
 
 
#377
Джаратама0
05.03.2008 19:04:50
Хош келигиз, Али-Мурат Хасанович.
 
 
 
#378
Джаратама0
05.03.2008 19:07:29
мелек
Шахар бла элни башхалыгъыча, сёлешиу тилни билиуде да сабийлени башхалыкълары бардыла. Сёз ючюн: элде школ дерследен сора сабийле тенглери бла да , орамда да, юйде да ана тилде сёлешедиле. Шахарда болум башхады: сабий садха барыб башлагъандан орус тилде сёлешиб башлайдыла, ёсе баргъанларыча, тенглери, танышлары да аслам бола барады. Анга кёре, орус тилге аслам ауадыла. Алай а, Аллахха шукур бусагъатда 90-чы джылладан башлаб, бютеу шахар школлада ана тилни эл школда ненча сагъат бериле эсе, анда да аллай бир окъуйдула. Бизде окъугъан студентле окъууда джетишимлери бла бирчадыла. Алай а, шахар школда ана тилни окъутууну баш чуруму ата - ананы сабийлерин ана тиллеринде окъутургъа излемегенлериди. Ала школланы директорларына, районолагъа, горонолагъа сабийбизни ана тилни дерслеринден бош этигиз деб, тилек къагъытла элтедиле. Алай да бек джангыладыла.
 
 
 
#379
Джаратама0
05.03.2008 19:08:17
Эгоистка
Ариадна
Джашаулу болугъуз, насыбларыгъызгъы тюбегиз!
 
 
 
#380
Джаратама0
05.03.2008 19:11:26
Сиз бусагъатда миллетибизге джараулу иш бла кюрешесиз. Бек сау болугъуз . Алай а сорлугъум бар эди: гитчелигизден устаз болургъа мы излейегиз, огъесе башха умутугъуз мы бареди? Сау болугъуз.
 
 
 
#381
Джаратама0
05.03.2008 19:12:03
Мен да бу кёзюуде сорууму айтыб къояйым.))

Мен билген бла, окъуллада къуру эки дерсибиз барды: Ана тил бла Ана адабият. Университетге сизни бёлюмюгюзге киргенден сора, талай бир дерс къошулады.

Айырыб-айырыб къаллай дерслени окъуйдула сизни факультетигизде?
Дагъыда къайсы башха тюрк тилли миллетлени фольклоруна эс бёлюнеди, бёлюне эсе?

Сау болугъуз.
 
 
 
#382
Джаратама0
05.03.2008 19:12:07
мен аняма баркъанымда эльге андада орусча селешеедиле псагъата урусча селеширге кюрешеле!!!!!
 
 
 
#383
Джаратама0
05.03.2008 19:12:33
Батчаланы Али Мурат
Мени да бир соруум бар эди, мындан алда би Сюйюнчланы Азамат бла ушагъыбызда, Азамат Алимович джаш адамла тилни билир ючюн, школ, университет да тюл, ата-анадыла джууаблы, деген эди, сизни къарамыгъыз къалайды ол соруугъа?
 
 
 
#384
Джаратама0
05.03.2008 19:13:28
Али-Мурат Хасанович, къарачай-малкъар тилде газетлени бусагъатда киши окъуб къыйналмайды, алай болмазча, миллетге хайыры болурча не этерге керекди?
 
 
 
#385
Джаратама0
05.03.2008 19:13:59
Батчаланы Али Мурат
Салам алейкум!
Бусагъъатда кёб адам ана тилин учуз этиб сёлеширге излемейди, артыкъ да джаш тёлю. Сиз англагъаннга кёре аны себеби неди?Алай болмаз ючюн не этерге керекди?Ана тилибизни сыйын не бла кёлтюрюрге боллукъду?
Сауболугъуз
 
 
 
#386
Джаратама0
05.03.2008 19:15:45
Ариадна
Гитчелигимден да ана тил бла литературадан сюйген дерсим джокъ эди. Ол затны менге иш сынамы уллу болгъан, тилни терен билген Огъары Теберди эл школну устазы Аджиланы Софья Азаматовна сингдирген эди. Аны бла келген эдим университетге, сокъуранмайма.
 
 
 
#387
Джаратама0
05.03.2008 19:20:04
sama
Ана тил бла адабиятдан сора окъуу планнга кёре, талай терен тамалы болгъан дерс барды. Ала биринчиден бешинчи курсха дери барадыла: Къарачай-малкъар тилни тарихи, тюрк тиллени тенглешдириу грамматикасы, тюркологиягъа кириу (Введение в тюркологию), ана диалектология, къарачай-малкъар тил бла орус тилни тенглешдириу грамматика, ана тилни практика стилистикасы, халкъ аууз творчество эмда адабиятны тарихи. Дагъыда тюрлю-тюрлю спецкурсла бла спецсеминарла, литература краеведение...
 
 
 
#388
Джаратама0
05.03.2008 19:22:06
Али- Мурат Хасанович Къарачай - Малкъарда миийк дараджагъа джетген алимледен, илму ишден усталыкълары болгъан адамладан илму совет къуралса, анда тарихде, литературада, китаблада, журналлада, радио бла телевидениеде не ишле этерге тыйыншлы болгъаны оноу этилсе иги боллукъ болур эди?
 
 
 
#389
Джаратама0
05.03.2008 19:22:46
мелек
Барыбызда билгенден элде, Аллаха шукур ана тил бла хайырланадыла. Орус тилни джармаларгъа кюрешгенле да бардыла. Къайда болсакъ да, къайда джюрюсек да, сагъышыбыз да, сёзюбюз да башха тиллени сыйлай ана тилден чыкъмазгъа керекбиз!
 
 
 
#390
Джаратама0
05.03.2008 19:23:57
Батчаланы Али Мурат
Багъалы Али Мурат, сау келигиз! Бизни сорууларыбызгъа заман айырыб, джууабла бергенигизге бек сау болугъуз! Эм къыйын юнюгюз былай болсун

Мен да бир соруу берейим!
Сизни студентлеригизни ичинде, сиз билиб, къаллай бири окъуб бошагъандан сора, къарачай тилден устаз болуб ишлейди? Сау болугъуз!
 
 
 
#391
Джаратама0
05.03.2008 19:24:41
Батчаланы Али Мурат
Университетде окъутхан себебли, сизни талай аспирантыгъыз да болур? Сау болугъуз
 
 
 
#392
Джаратама0
05.03.2008 19:27:10
Эгоистка
Эм биринчиси, газетни киши окъумайды дерге джарамайды, аз -кёб эсе да аны тиражы 9 минге джууукъду. Бизни саныбызгъа кёре ол джукъда тюлдю. Ол айыбды, кесибизге бедишди. Экинчиси, ана тилде чыкъгъан газетни окъумайбыз, алмайбыз дегенле да бардыла. Мен ангылагъан бла ала аналарын да, юйдегилерин да алай сюедиле. Газетни арт джыллада тюрсюню башхаракъ болгъанды, иги джанына. Хаман миллетде тюрлениулени, джамагъатны ичинде джетишимлени терк-терк кёргюзюрге, баямларгъа керекди. Тилден, тарихден, адабиятдан материалланы аслам этерге керекди.
 
 
 
#393
Джаратама0
05.03.2008 19:27:28
Батчаланы Али Мурат
Къатынгда къарачай адам болмаса, къарачайча сёлешмей турсанг унутула болур ана тил.
 
 
 
#394
Джаратама0
05.03.2008 19:30:16
Хауа сюрюучю
Ана тилни эм биринчи кесибиз учуз этебиз, ангыламагъанлыкъдан. Бир къауум ата-ана, ана тил Черкеск шахардан ары керек тюлдю дейдиле, ол барыбызда билгенден сабийлени чиркитген этеди. Суратлау литератураны окъургъа, ана тилде чыкъгъан газетни, журналны джаздырыб алыргъа, тарихинги, культурангы билирге керекди.
 
 
 
#395
Джаратама0
05.03.2008 19:31:16
Батчаланы Али Мурат
Сау болугъуз джууабыгъызгъа!
 
 
 
#396
Джаратама0
05.03.2008 19:31:20
Батчаланы Али Мурат
Айыб этмегиз, энтда бир соруу бере кетейим, ансын заманым тыкъды.
Сиз англадыгъыз болур, хар бирибиз бирер шахардан джазабыз. Тыш къралладан джазгъанлада бардыла. Ол себебден, хар бирибизни къарачайча сёлешиб турур мадарыбыз болмайды. Ана тилге тансыкъ болсакъ бу форумгъа киребиз. Аны барын айтханым. Сизни сохталарыгъыз бу форумгъа кириб, ана тилде кеслерича темала ачыб, бизни да халатларыбызны тюзете турур мадарлары бармыды?Компьютерлери интернетлери джокъ эсе, Эльбрусоидни мекямына келе турсала, алгъа компьютерле табылырла деб акъылым алайды. Анга сизни сагъышыгъыз къалайды?
 
 
 
#397
Джаратама0
05.03.2008 19:33:20
Сизни сохталарыгъыз бу форумгъа кириб, ана тилде кеслерича темала ачыб, бизни да халатларыбызны тюзете турур мадарлары бармыды?Компьютерлери интернетлери джокъ эсе, Эльбрусоидни мекямына келе турсала, алгъа компьютерле табылырла деб акъылым алайды.
 
 
 
#398
Джаратама0
05.03.2008 19:34:18
Мышона
Къабарты-малкъар кърал университетде кандидатлыкъ, докторлукъ илму дараджаланы джакълагъан тилден да, адабиятдан да алим советле ишлегенли талай джыл болады. Бизни КъЧКъУ-ден талай адам анда кеслерини алим диссертациаларын джакълаб, илмуланы доктору, кандидаты деген атланы алгъандыла. Бир оноугъа келир ючюн, анда да, мында да алимле терк-терк сёлеширге керекдиле, илму конференциала бардырыргъа тыйыншлыды.
 
 
 
#399
Джаратама0
05.03.2008 19:38:25
sama
Сизни сохталарыгъыз бу форумгъа кириб, ана тилде кеслерича темала ачыб, бизни да халатларыбызны тюзете турур мадарлары бармыды?Компьютерлери интернетлери джокъ эсе, Эльбрусоидни мекямына келе турсала, алгъа компьютерле табылырла деб акъылым алайды.
Соруунг тюздю, сау бол! Бусагъатда бизни студентлерибиз университетни къатында орналгъан "Эльбрусоидни" мекямына дженгил-дженгил джюрюй башлагъандыла, сен айтхан ишге да эс бёллюкдюле. Былайда ишлеген джашла бла къызла, сау болсунла, бизге бу ишде уллу болушлукъ этедиле. Алагъа джюрек разылыгъымы билдиреме.
 
 
 
#400
Джаратама0
05.03.2008 19:39:28
Батчаланы Али Мурат
Сау келигиз, Али - Мурат Хасанович!
Мен соруу соргъунчу бир хапар айтайым. Бир кюн джолоучу болуб Черкесск шахаргъа тебрегенме. Газелни ал орнуна олтуруб барама. Къатымда уа бир эркиши олтуруб турады.. Шофер да, ол эркиши да ушакъ этедиле къарачай бла орус тилини къатышдырыб. Мени да ушакъгъа къошдула. Мен а уа орусча селешдим. Сора, ол къатымда олтургъан эркиши менге къараб: "Къызчыкъ, сен къарачайлымыса", - деб сорду. "Къарачайлыма", - дедим мен. Сора ол менге урушду. "Сен къарачайлы эсенг, къарачайны джеринде тура эсенг, орусча нек селешесе?" Мен джунчудум. "Оруслу мы болады, тегейли мы болады, черкесли мы болады, биринчи къарачайча селеш да, ангыламасала орусча ангылатырса", - деди ол менге. Тюз айтамыды, огъесе, къалай болургъа керекди?
Бек сау болугъуз
 
 
 
Страницы: Пред. 1 ... 14 15 16 17 18 ... 62 След.
Читают тему (гостей: 2)

 

Написать нам

Фонд «Содействие развитию карачаево-балкарской молодежи «Эльбрусоид»

© 2003-2026 Elbrusoid.org  |  Все права защищены Законами Гор.