Аман адам этегингден тутса, кес да къач.
Нарт сёз къарт болмаз.
Ач келгенни – тойдур, кеч келгенни – къондур.
Уясында не кёрсе, учханында аны этер.
Башынга джетмегенни сорма.
Ишленмеклик адамлыкъды.
Мадар болса, къадар болур.
Джиби бир къат джетмей эди да, эки къат тарта эди.
Орундукъ тюбюнде атылсам да, орта джиликме, де да айлан.
Ана къолу ачытмаз.
Тойчу джашха къарама, къойчу джашха къара.
Джылкъыдан – ат чыгъар, тукъумдан – джаш чыгъар.
Берекет берсин деген джерде, берекет болур.
Адам боллукъ, атламындан белгили болур.
Къатын байлыкъны сюер, эр саулукъну сюер.
Ауругъаннга – кийик саулукъ, джетген къызгъа – чилле джаулукъ.
Ач – эснер, ат – кишнер.
Эртде тургъан бла эртде юйленнген сокъуранмаз.
Соргъан айыб тюлдю, билмеген айыбды.
Тойгъандан сора, ашны сёкме.
Атлыны ашхысы, ат тизгининден билинир
Тилчи тилден къаныкъмаз.
Билим къая тешер.
Мени джылытмагъан кюн, меннге тиймесин!
Ишни ахырын ойламай, аллын башлама.
Сакъламагъан затынга джолукъсанг, не бек къууанаса, не бек ачыйса.
Ата – баланы уясы.
Сабыр джетер муратха, сабырсыз къалыр уятха.
Тёрени джагъы джокъ.
Чакъырылмагъан къонакъ тёрге атламаз.
Джюз элде джюз ёгюзюм болгъандан эсе, джюз джууугъум болсун.
Сютден ауузу кюйген, суугъа юфгюре эди.
«Ёгюз, джаргъа джууукъ барма, меннге джюк боллукъса», - дегенди эшек.
Экиндини кеч къылсанг, чабыб джетер ашхам.
Ашаса, ашамаса да, бёрюню ауузу – къан.
Къарт болгъан джерде, берекет болур, сабий болгъан джерде, оюн болур.
Кюн – узун, ёмюр – къысха.
Чомартны къолу берекет.
Огъурлуну сёзю – суу, огъурсузну сёзю – уу.
Билмегенинги, билгеннге сор.
Кийимни бичсенг, кенг бич, тар этген къыйын тюлдю.
Кирсизни – саны таза, халалны – къаны таза.
От кюйдюрген, сау болса да, тот кюйдюрген, сау болмаз.
Айран ичген – къутулду, джугъусун джалагъан – тутулду.
Тойну къарнашы – харс, джырны къарнашы – эжиу.
Аман хансны – урлугъу кёб.
Адеб базарда сатылмаз.
Дуния малгъа сатылма, кесингден телиге къатылма.
Бал чибинни ургъаны – ачы, балы – татлы.
Джаш болсун, къыз болсун, акъылы, саны тюз болсун.
