Эрине къаргъыш этген къатын, эрнин къабар.
Тюзню ётмеги тюзде къалса да, тас болмаз.
Таукелге нюр джауар.
Къолунгдан къуймакъ ашатсанг да, атаны борчундан къутулмазса.
Къызын тута билмеген, тул этер, джашын тута билмеген, къул этер.
Иги болса, тамадама – махтау, аман болса, меннге – айыб.
Сёлеш деб шай берген, тохта деб, сом берген.
Чыкълы кюнде чыкъмагъан, чыкъса къуру кирмеген.
Айран тёгюлсе, джугъусу къалыр.
Соргъан айыб тюлдю, билмеген айыбды.
Магъанасыз сёз – тауушсуз сыбызгъы.
Чомартха хар кюн да байрамды.
Бек ашыкъгъан меннге джетсин, дегенди аракъы.
Атадан ёксюз – бир ёксюз, анадан ёксюз – эки ёксюз.
Экиндини кеч къылсанг, чабыб джетер ашхам.
Джашны джигитлиги сорулур, къызны джигерлиги сорулур.
Нарт сёз – тилни бети.
Джеринден айырылгъан – джети джылар, джуртундан айырылгъан – ёлгюнчю джылар.
Сакъламагъан затынга джолукъсанг, не бек къууанаса, не бек ачыйса.
Байлыкъ адамны сокъур этер.
Атлыны кёрсе, джаяуну буту талыр.
Къонакъ аз олтурур, кёб сынар.
Онгсузну – джакъла, тенгликни – сакъла.
Насыб бютеу халкъны юлюшюдю.
Зар адам ашынгы ашар, кесинги сатар.
Артына баргъанны, къатына барма.
Ачылгъан эт джабылыр, кёрген кёз унутмаз.
Чакъырылмай келген къонакъ сыйланмай кетер.
Намыс болмагъан джерде, насыб болмаз.
Ёлюр джаннга, ёкюл джокъ.
Тойгъан джерден туугъан джер игиди.
Аш иеси бла татлыды.
Сибиртки да сыйлы болду, кюрек да кюнлю болду.
Азыкълы ат арымаз, къатыны аман джарымаз.
Ач бёрюге мекям джокъ.
Кёрмегеннге кебек – танг, битмегеннге сакъал – танг.
Дуния аламаты сен эсенг да, игиме деб айтма.
Кимни – тили, тиши онглу, кимни – къолу, иши онглу.
От этилмеген джерден тютюн чыкъмайды.
Чомарт бергенин айтмаз.
Джаз бир кюнню джатсанг, къыш талай кюнню абынырса.
Ёлген аслан – сау чычхан.
Ана – юйню кюн джарыгъы.
Байлыкъдан саулукъ ашхыды.
Aдам боллукъ, сыфатындан белгили.
Узун джолну барсанг, бюгюн келирсе, къысха джолну барсанг, тамбла келирсе.
Къошда джокъгъа – юлюш джокъ.
Къыз келсе, джумуш эте келеди, къатын келсе, ушакъ эте келеди.
Къумурсхала джыйылсала, пилни да джыгъадыла.
Ойнай билмеген, оюн бузар.
