Ёксюзню къалачы уллу кёрюнюр.
Байлыкъ болгъан джерде, тынчлыкъ джокъду.
Байны оноуу, джарлыгъа джарамаз.
Къууут – джелге, берне – бошха.
Эм ашхы къайын ана мамукъ бла башынгы тешер.
Къолу уллу – асыу, аягъы уллу – джарсыу.
Малны кют, джерни тюрт.
Адам туугъан джеринде, ит тойгъан джеринде.
Ашыкъгъан cуу, тенгизге джетмез.
Айран тёгюлсе, джугъусу къалыр.
«Ма», - дегенни билмесенг, «бер», - дегенни билмезсе.
Алим болгъандан эсе, адам болгъан къыйынды.
Нафысынгы айтханын этме, намысынгы айтханын эт.
Тойгъан джерден туугъан джер игиди.
Арыгъан къош чамчы болур.
Аманнга да, игиге да оноусуз къатышма.
Ариу сёз – джаннга азыкъ, аман сёз – башха къазыкъ.
Кёб къычыргъандан – къоркъма, тынч олтургъандан – къоркъ.
Джумушакъ терекни къурт ашар.
Юйюнгден чыкъдынг – кюнюнгден чыкъдынг.
Адам бла мюлк юлешмеген эсенг, ол адамны билиб бошагъанма, деб кесинги алдама.
Адеб джокъда, намыс джокъ.
Магъанасыз сёз – тауушсуз сыбызгъы.
Ат да турмайды бир териде.
Эки элинги тыйсанг, джети элде махталырса.
Джиби бир къат джетмей эди да, эки къат тарта эди.
Джарлыны тону джаз битер.
Ётюрюк хапар аякъ тюбю бла джюрюйдю.
Аман хансны – урлугъу кёб.
Тил джюрекге джол ишлейди.
Зарда марда джокъ.
Адамгъа аман кюн соруб келмейди.
Ётюрюкню башын керти кесер.
Тойгъан джерге джети къайт.
Къуллукъчума, деб махтанма, къуллукъ – хаух джамчыды!
От кюйдюрген, сау болса да, тот кюйдюрген, сау болмаз.
Акъыл бла адеб эгизледиле.
Адамны сабийин сюйген джюреги, бычакъча, джитиди.
Танг атмайма десе да, кюн къоярыкъ тюйюлдю.
Абынмазлыкъ аякъ джокъ, джангылмазлыкъ джаякъ джокъ.
Къарт болгъан джерде, берекет болур, сабий болгъан джерде, оюн болур.
Аз айтсам, кёб ангылагъыз.
Айтханы чапыракъдан ётмеген.
Дженгил джетерикме деб, узун джолну къоюб, къысхасын барма.
Къонагъы джокъну – шоху джокъ.
Эки къатын алгъан – эки ташны ортасына башын салгъан.
Эркиши – от, тиширыу – суу.
Тас болгъан бычакъны сабы – алтын.
Джаз бир кюнню джатсанг, къыш талай кюнню абынырса.
Джюрек кёзден алгъа кёрюр.
