Эльбрусоид :: Форум :: КЕЛИГИЗ ДЖЫРЛАЙЫКЪ

Эрине къаргъыш этген къатын, эрнин къабар.
Ата – баланы уясы.
Тилчиден кери бол.
Терек ауса, отунчу – кёб.
Чабакъгъа акъыл, табагъа тюшсе келеди.
Айтхан сёзюне табылгъан.
Экеу тутушса, биреу джыгъылыр.
Эски джаугъа ышанма.
Байлыкъ келсе, акъыл кетер.
Джырчы джырчыгъа – къарнаш.
Джаш къарыу бла кючлю, къарт акъыл бла кючлю.
Сютню башын джалагъан къутулур, тюбюн ичген тутулур.
Хатерли къул болур.
Чомартны къолу берекет.
Ёлюк кебинсиз къалмаз.
Баш – акъыл ючюн, акъылман – халкъ ючюн.
Игини сыйлагъан адетди.
Эки къатын алгъан – эки ташны ортасына башын салгъан.
Ашхы сёз таш тешер.
Кёбге таш атма.
Ариуну – ауруу кёб.
Тойчу джашха къарама, къойчу джашха къара.
Чакъырылмагъан къонакъ къачан кетерин сормаз.
Кенгеш болса, уруш болмаз.
Адамны артындан къара сабан сюрме.
Душманны тышы – акъ, ичи – къара.
Сакъ юйюне сау барыр.
Аз айтсам, кёб ангылагъыз.
Сёлеш деб шай берген, тохта деб, сом берген.
Булут кёкге джарашыу, уят бетге джарашыу.
Келинни – келгинчи, бёркню кийгинчи кёр.
Байны оноуу, джарлыгъа джарамаз.
Тил – миллетни джаны.
Аман адам элни бир-бирине джау этер.
Кёб къычыргъандан – къоркъма, тынч олтургъандан – къоркъ.
Тешигини къатында, чычхан да батыр болур.
Иги бла джюрюсенг, джетерсе муратынга, аман бла джюрюсенг, къалырса уятха.
Ишин билген, аны сыйын чыгъарады.
Ариу джол аджал келтирмез.
Аманнга игилик этсенг, юйюнге сау бармазса.
Байны къызы баймакъ болса да, юйде къалмаз!
Кёпюр салгъан кеси ётер, уру къазгъан кеси кетер.
Киштикге къанат битсе, чыпчыкъ къалмаз эди.
Кёл – къызбай, къол – батыр.
Ашлыкъны арба юйге келтирир, чана базаргъа элтир.
Элге къуллукъ этмеген, элге ие болмаз.
Насыблы элин сюер, насыбсыз кесин сюер.
Таш бла ургъанны, аш бла ур.
Таякъ этден ётер, тил сюекден ётер.
Айранын берсенг, челегин да къызгъанма.

RSS

КЕЛИГИЗ ДЖЫРЛАЙЫКЪ

Faida

Гость

#201

Джаратама0

18.06.2010 00:17:12

"Джюрегимди джолоучу"
Ёзденланы Альберт

Нек келеме бюгюн салыб шахаргъа,
Узакъ элден,иш чыгъарыб кесиме?
Келемеми эркин,джарыкъ солургъа?
Огъай,келмейд бу зат мени эсиме.

Бек билеме,шош боллукъду джюрегим,
Не этейим,кесим аны излейме...
Анда джокъду ,эртде кетгенд мёлегим,
Джюз болмаздан бир болса деб тилейме.

Къагъыучума эшиклерин юч къакъсам,
Чыгъарыкъмыд ышарылыб аллыма?
Къараучума,кёзлерине къарасам,
Джылытырмы къолум тийиб къолуна?

Сагъышларым созсала да джолуму,
Сюелгенме атлауучну юсюне,
Акъырынчыкъ узатама къолуму
Эшигине,тюнюм ушай тюшюме...

Эшитилмейди "бусагъат" деген таууш,
Джюрегимде къууанчымы кериучю.
Амалсыздан джюрек этген "терс джумуш",
Буду бирде меннге себеб бериучю.

Кёрюнсе да хар атламым оюмсуз,
Такъырлыкъны къондурмайма эсиме,
Сюйген джюрек бола болмаз болумсуз?-
Дей,барама,мен кёл эте кесиме.

ХАНГОГУШ Гость	#202 Джаратама0 20.06.2010 16:26:50 Омар Отаровну эски жырларын къалай табсын адам болушугъуз!!!!!

ХАНГОГУШ

Гость

#203

Джаратама0

20.06.2010 20:35:34

Абдулкеримни джыры-Омар Отаров джырлайды.

Балыкъ айланчындан тизилип чыгъад
Бу эркечлени аллары.
Ол окъ тийгенлей, къырылып тюшгенд
Абдулкеримни санлары.

Абдулкеримим, мени Хызирим,
Малланы таудан аудургъан.
Ой, Бекки улучукъ, алай а кёреме,
Бизге къара къанла жаудургъан.

Ол Беккяланы ол Рамазан,
Къуууп, ызларындан жетгенди.
Ол Беккя улуну алай жангыз огъу
Былай тёртеуленден ётгенди.

Ол Беккяланы ол Рамазан,
Жыйырма жылы жетмеген,
Быллай сейир, тамаша, айтхылыкъ ким кёрюр,
Атхан огъу тюзге кетмеген?

Энди бир ушкокла чыкъгъандыла, кюнюм,
Ой, инчге болуп тешиги,
Бахсанчылагъа барып, кесинги ёлтюртмесенг,
Атангы малы жокъмеди?

Ол аман кюнде сауут алгъанед
Бу Беккя улучукъ къолуна.
Алай кесим кёпме, дел айтыученг, жазыкъ,
Бахсанчыланы онуна.

Кимледен эсе да уста тыныучуем
Абдулкеримни жашлыгъын.
Ах кюнюм, кимле тешип алдыла
Къан жугъу болгъан башлыгъын?

Сюрген малларынгы сюрюп баралла
Ол Бургусантда базаргъа.
Мен орус писарь болуб'а къалгъыем
Протоколунгу жазаргъа.

Протоколунгу мен жазсам эди,
Женгил битеред ишлеринг.
Алай багъыр окъла санагъандыла, ах кюнюм,
Нанымы къозу тишлерин.

Ой, къолумдагъы къобузум, алан,
Ол калиндордан кетерик.
Ол Беккя улучукъ ёлтюргенди, дейле,
Кезиую анга жетерик.

Ол Балыкъ бла Бахсанны арасы,
Ой, адам ётмез тау болсун.
Уручуланы къырып къойгъан эсе,
Ол Беккя улучукъ сау болсун.

Абдулкеримге окъ тийгенд, дейле,
Ой, анга дарман жарамаз.
Ол окъ тийгеннге дарман жарамайды,
Сют баш гыбытха кьарамаз.

Faida Гость	#204 Джаратама0 20.06.2010 23:43:07 ХАНГОГУШ Тамбла Аллах буюрса салыргъа кюреширме

Faida

Гость

#205

Джаратама0

21.06.2010 20:24:18

ХАНГОГУШ
"Джёрме"
Чам джыр

Ой да джёрме,аллай джёрме,
Быллай джёрме,ой,ой,
Мени джёрмем аллай джёрме,
Къаллай джёрме,ой,ой.
Тыш чегиси джети арбагъа джиб болады,
Джиб болады,ой,ой.
Аны урлагъан дуниядан тюп болады,
Тюп болады,ой,ой.
Мени джёрмем тас болгъанды,
Кёрюрмегиз,ой,ой.
Аны ашаргъа ол сагъатха
Бёрюмегиз,ой,ой.
аны ючюн элге,джолгъа
Келимегиз,ой,ой.
Андан къарылыб а
Биринг ёлюмегиз,ой,ой.
Мени джёрмем багъанадан
Базыкъ эди,ой,ой.
Аны ашаргъа бир къарыннга
Джазыкъ эди,ой.ой.
Мени джёрмем-джаулу джёрме,
Баулу джёрме,ой,ой.
Мени джёрмем ашагъаннга-
Даулу джёрме,ой,ой.
Джёрме барады,джаным,джашла,
Джаным бла,ой,ой.
Къан салгъанма джарлы юйюме
Къарным бла ой,ой.

Отарланы Омар

Faida

Гость

#206

Джаратама0

21.06.2010 21:33:57

"Кулина"
Отарланы Омар

Эй,сенден ариу кёрмедим,Кулина,
Ой мен жашагъан журтлада.
Санга ушатыб,гокка хансланы
Басмай,жюрюйме сыртлада.

Э,сенден ариу кёрмедим,Кулина,
Да мен айланнган элледе.
Санга ушатыб,сапран чабакъланы
Излеп айланама кёлледе.

Эй,санга кимле да не айтадыла,
Ой,мени ариу Кулинам,
Сюйрелгенинги да мен эшитгенимде,
Къарангы болду дуниям.

Да санга кимле да не айтадыла,
Кулинам,юйюнг къурурукъ,
Ой,Кулинамы манга къоймайды
Бу шайтанаякъ гугурук.

Эй, жауум жаууп,кюн тийсе,жылтырайд
Огъары Мараны Ташлары.
Ма кулинамы да манга бермейле
Къанлы Мараны жашлары.

Не кюрешсем да,дарман тапмайма
Кулина салгъан жарагъа.
Ах, игисагъан, тюшюп къалгъаем
Кулина болгъан Марагъа.

Faida

Гость

#207

Джаратама0

23.06.2010 19:51:06

"Джаным къурман болсун Малкъаргъа"
Ёзденланы Альберт

Джюрегингде пелиуанлыкъ джашагъан,
Ариулукъ сюймекликге ушагъан,
Тау намысы ушаб тауда акъ къаргъа...
Джаным къурман болсун Джуртум Малкъаргъа!

Мен бетиме салсам къолун анамы,
Беш бармагъын Беш Тау Эли сунама,
Эринлерим сыласала аланы,
Сау Малкъарны уппа этген сунама!

Зар кёз тие кёк суууна,ташына,..
Ариулугъу душман бола башына,
Таш башында амал табхан джашаргъа,
Джаным къурман болсун таджал Малкъаргъа!

Мен бетиме салсам къолун анамы,
Беш бармагъын Беш Тау Эли сунама,
Эринлерим сыласала аланы,
Сау Малкъарны уппа этген сунама!

Тешдиртмеген тинин зорлукъ садакъа,
Сюргюнде да тилемеген садакъа,
Дерт тутмагъан Аллах берген къадаргъа,
Джаным къурман болсун шыйых Малкъаргъа!

Мен бетиме салсам къолун анамы,
Беш бармагъын Беш Тау Эли сунама,
Эринлерим сыласала аланы,
Сау Малкъарны уппа этген сунама!

Джаным саудан ачхан джандет эшигим,
Ёлсем,рахат джукълар топуракъ бешигим,
Ата Джуртум,Ана Сютюм,Къадарым-
Джаным къурман болсун санга,Малкъарым!

Мен бетиме салсам къолун анамы,
Беш бармагъын Беш Тау Эли сунама,
Эринлерим сыласала аланы,
Сау Малкъарны уппа этген сунама!

ХАНГОГУШ Гость	#208 Джаратама0 23.06.2010 21:04:30 Бек аламат жырла faida сау бол энтда андан арыда излеик!

Faida Гость	#209 Джаратама0 23.06.2010 23:42:14 ХАНГОГУШ

ХАНГОГУШ Гость	#210 Джаратама0 25.06.2010 09:41:24 Келигиз бир жырны 2 кере къайтармаиыкъ ."Жерме".

Faida

Гость

#211

Джаратама0

25.06.2010 10:35:35

"Жантуугъан"
Алим Апаев

Басхан элде тёре болду марал бала марагъан,
Жантуугъан а Тар Ауузда айыу бала къоймагъан.
Басхан тауда аз болгъанды Апсатыны маллары.
Жантуугъанны сакълай эди Апсатыны налаты,
Жантуугъан а чамландыргъанд Апсатыны къызларын.
Жаш уучула,малтамагъыз акъсакъалны ызларын.
Жантуугъанннга тийген болур Апсатыны налаты,
Кеси аллына келген эди аны миниучю аты.
Жаш уучула,малтамагъыз Апсатыны ызларын,
Кесигизни къаргъатмагъыз сары чачлы къызларын.
Апсаты уа бек сакълайды маралларын,малларын,
Уучуладан бек алады кийиклени къанларын:
Апсаты уа кертичиди сюрюуне,сёзюне:
Аман уучу терк тюшеди аны эки кёзюне.
Жантуугъан а умут этди Адыл бойнун сакъларгъа,
Къарча ташда ант этгенед акъ маралла мараргъа.
Огъурсуздан марал бала айыу ана жилятхан,
Къарча айтханнга тынгламагъан Жантуугъан.
Апсаты уа болуучу эди кийиклени ёкюлю,
Къая ыранда къалгъан эди Жантуугъанны ёлюгю.

Faida

Гость

#212

Джаратама0

26.06.2010 01:51:47

"Болуб сенсиз"
Ёзденланы Альберт

Болуб сенсиз,билдим сени
Меннге кемсиз кереклинги.
Алай а мен,энди,сени
Джюрегингден кетгеними
Къайтарыргъа мадар къайда?
Къыйналгъандан,айт,не пайда?

Сенсиз джашау къыйынд меннге,
Алай а мен,энди,сеннге
Атарыкъма джашаууму,
Джазарыкъма хар назмуму
Сеннге атаб,джангыз сеннге,
Сени джомакъ иннетинге!

Джуртну кемсиз сюйгенинге
Къууаннгандан джыларыкъма,
Тангны менсиз кёргенинге
Къыйналгъандан джырларыкъма,
Себеб излеб джюрегиме,
Джангы джырла джазарыкъма.

Faida

Гость

#213

Джаратама0

26.06.2010 02:07:06

ТОЙ-ОЮН ДЖЫРЛА

Орайдала

О-райда,О-о-орайда,
Келинибизни беригиз,кетген этебиз!
Сууукъдан,ашдан да къырылдыкъ,
Беригиз,кетген этебиз.
О-райда,О-о-орайда!
Хайда,сау къалыгъыз ,джанларым,
Тилегенибизни беригиз,
Аллах да сизни тилегенигизни берсин!
Келин келсин юйге огъур аякъ бла,
Чыкъгъан джеринде да огъур аякъ къойсун!

Faida

Гость

#214

Джаратама0

26.06.2010 02:11:48

Орайда,орайда,ашыгъабыз,
Орайда,орайда,ашыгъабыз.
Кеч болгъанды,кетейик.
Биз келгенбиз Минги таудан,
Атланайыкъ кюн аллына.
Элтирикбиз келлябызгъа алтын саугъа,
Уллу аммагъа да кёрпе бота,
Гитче къызлагъа кёк чындайла,
Джашчыкълагъа да-чурукъ баула,
Къартлагъа да джалбауурла.
Орайда,орайда,ашыгъабыз,
Кеч болгъанды,кетейик,
Орайда,орайда,ашыгъабыз,кетейик!

Faida

Гость

#215

Джаратама0

03.07.2010 21:15:10

"Светофорну тюбюнде"
Ёзденланы Альберт

Соруума джууаб бермей,суратынг,
Юйден чыкъдым,джууаб излеб кесиме.
Кёз аллымда кетиб баргъан сыфатынг,
Кел-деб,мени чакъырады кесине.

Бир джауады джашил джангу,
Бир джауады сары джангур,
Бир джауады къызыл джангур.
Терезенги джууад джангур-
Мутхуз джангур.Сюелеме,
(Светофорну тюбюндеме)
Былайчыгъы болад себеб,
Келсем джашлыгъымы излеб.

Тиедиле суу тамчыла бетиме,
Тамадыла эниш тута джолларын,
Саркъадыла асыу бола этиме,
Сылагъанча сени ингил къолларынг.

Бир джауады джашил джангу,
Бир джауады сары джангур,
Бир джауады къызыл джангур.
Терезенги джууад джангур-
Мутхуз джангур.Сюелеме,
(Светофорну тюбюндеме)
Былайчыгъы болад себеб,
Келсем джашлыгъымы излеб.

Сыфатанг а терезеден чакъырад,
Кёзбау оюн кёрюнмейин меннге зор.
Мен атларгъа тебрегенлей,олсагъат
Сен тас болуб, къызыл джанад светофор.

Бир джауады джашил джангу,
Бир джауады сары джангур,
Бир джауады къызыл джангур.
Терезенги джууад джангур-
Мутхуз джангур.Сюелеме,
(Светофорну тюбюндеме)
Былайчыгъы болад себеб,
Келсем джашлыгъымы излеб.

Faida Гость	#216 Джаратама0 06.07.2010 22:45:56 ...Узденов Альберт

Faida Гость	#217 Джаратама0 06.07.2010 22:48:54 ...Алим Газаев...

Faida Гость	#218 Джаратама0 06.07.2010 22:51:28 ...Омар Отаров и Алим Газаев...

Faida Гость	#219 Джаратама0 06.07.2010 23:12:28 ... гр.Учкекен ))

rodnik

Гость

#220

Джаратама0

08.07.2010 21:52:40

асыры бек арюдан
нюр чачады чыраинг
тохта тохта ашыкъма
бир кесекни къараим...

старая песня такая, (Хубиев что ли исполнял), на кассете еще за песней Белая лебедь" шла...голос очень красивый, мужественный, мотив типа вальса на раз-два-три ))

Faida

Гость

#221

Джаратама0

12.07.2010 02:43:29

"Биринчи толкъунда"
Ёзденланы Альберт

Джайгъы Къобанча къобхан заманны
Толкъунларында чулгъана,
Тазалыкъ,кирлик да барады бирге,
Бирча бояугъа булгъана.

Кёзлери сау да джукъ кёрмейди,
Не айыб сора сокъургъа?
Аман,игии да боза бетлиди,
Мадар джокъ джолну окъургъа.

Сыйыналмайын джагъадан чыкъгъан,
Биреуге бушуу элтеди,
Неуа,ол кесибир кёлчюк болуб,
Джокъ болады да кетеди.

Джагъадан чыкъмай алгъа баралгъан,
Ол джетер мурат тенгизге.
Мурат насыбды,насыб къайдады?
Белгисизд алкъын ол бизге.

Заман сюзюлсе,кирлик тюб болур,
Тазалыкъ къалкъыр башына.
Биринчи толкъунда баргъанны джолу,
Къыблама болур джашына!

Faida Гость	#222 Джаратама0 12.07.2010 23:21:28 http://www.youtube.com/watch?v=FksUHaC14tI http://www.youtube.com/watch?v=SbTqe7sMRUc http://www.youtube.com/watch?v=XEelXZB9eOU Солтан Байкулов

Faida

Гость

#223

Джаратама0

12.07.2010 23:58:18

"Къарачай"
Ёзденланы Альберт

Игинге джюрекден къууана,
Булутдан чыкъгъан кюнча джаншай,
Мен джырлайма санга ийнана,
Тиними Меккясы-Къарачай!

Аманынг болгъанда къыйнала,
Кючюкню макъамын мурулдай,
Мен джырлайма санга ийнана,
Насыбсыз насыбым-Къарачай!

Башха болмай,джюрек джюрюшюм
Къагъытха тюшгеннге ушагъан
Тауларым-Аллахдан юлюшюм!-
Дей,насыбны меннге джашагъан.

Аманынг болгъанда къыйнала,
Кючюкню макъамын мурулдай,
Мен джырлайма санга ийнана,
Насыбсыз насыбым-Къарачай!

Тынгылайма джарыкъ мыдахлыкъ
Джырына къошулгъан Къобаннга.
Кёрюмю къырдышын сыларыкъ
Аязынг да къууанчды манга!

Болмай тот хар чалкъынг,орагъынг
Чалсынла бойсуна заманнга!
Санларым къошуллукъ топурагъынг
Алтындан багъалыды манга!

"Хасаука"бла "Умар" джырларынг,
Джазылгъанча къараб Къураннга,
Кёрню кёрмесин джыр бурагъынг,
Чырт бойсунмасын ол заманнга!

Джюрегинг къууанчдан джырласын,
Джылагъан да керек болгъанда,
Чайыры асламдан джыласын
Тамызыкъ чырагъынг тыбырда!

Аманынг болгъанда къыйнала,
Кючюкню макъамын мурулдай,
Мен джырлайма санга ийнана,
Насыбсыз насыбым-Къарачай!

Болалсам да уста джюрютген
Илкерге учаргъа кемени,
Хунангы тешигин бегитген
Мен бармакъ ташчыгъынгма сени!

Аманынг болгъанда къыйнала,
Кючюкню макъамын мурулдай,
Мен джырлайма санга ийнана,
Насыбсыз насыбым-Къарачай!
Байкулов Солтан

http://www.youtube.com/watch?v=LchYcGFpW-4&feature =related
"Кертиме Антыма " Байкулов Солтан

Faida

Гость

#224

Джаратама0

14.07.2010 12:57:38

"Кертиме антыма"

Джарыкъды кёлюм,джырлайд джюрегим,
Ангыла сен мени.
Элде ариула кёб болсала да,
Сюеме мен сени.

Уялма менден,джанлама кенгден,
Джууукъ кел къатыма.
Кёр болумуму,тутдур къолунгу,
Кертиме антыма.

Башханы кёрюб,артыкъ сый бериб,
Мыдах этмем сени.
Атанг,анангы,къарнашларынгы
Болсам кюёулери.

Уялма менден,джанлама кенгден,
Джууукъ кел къатыма.
Кёр болумуму,тутдур къолунгу,
Кертиме антыма.

Адамлагъынга,ариулугъунга,
Махтауду хар сёзюм.
Бер джууабынгы, тауусулгъанды
Чыдамсыз -тёзюмюм.

Уялма менден,джанлама кенгден,
Джууукъ кел къатыма.
Кёр болумуму,тутдур къолунгу,
Кертиме антыма.

Айланчы бери,къыйнамай мени,
Сюйген джюрегими
Сыйлы адамны,къууанчда джыры,
Болсанг а энди мени.

Уялма менден,джанлама кенгден,
Джууукъ кел къатыма.
Кёр болумуму,тутдур къолунгу,
Кертиме антыма.

Байкулов Солтан

Faida Гость	#225 Джаратама0 26.07.2010 12:33:15 "Тёз" Ёзденланы Альберт Онглу бабаны ёксюз баласы- Шам Къарачайым-Малкъарым, Сени бушуунг башындан басыб, Кюуге ушайды бу джырым. Хей,зорлукъ отда къызаргъан халкъым, Тёшде темирча тюйюлдюнг! Бир кишини да къалмазча хакъы, Белингден эки юзюлдюнг. Онгсузларынгы ачлыкъгъа элтиб, Ёлтюргенлесе тёздюнг сен, Сын ташларынгдан атлаууч этиб, Теблегенлеге тёздюнг сен. Кёчген хапарны билмей,кёб джашынг Урушдан юйге къайтдыла, Хар къайтхан джашны юздюрюб башын, "Сатлыкъ!"-деб,къралгъа сатдыла. Тёзгенсе,халкъым,таза атынга Къара тамгъаны ургъаннга. Тёз,халкъым,бюгюн туугъан Джуртунга Ёгеге санаб тургъаннга! Тёз,таджал халкъым,зауукъ сендеди, Бек тутсанг тёзген адетни! Тёз,тёзюмю бла ёлчеленеди Къыйынлыгъы миллетни.

Читают тему (гостей: 2)

Логин:
Пароль:
	Запомнить меня на этом компьютере

Забыли свой пароль?
Регистрация