Уллу айтханны этмеген – уллаймаз.
Джырына кёре эжиую.
Ач къалгъандан, кеч къалгъан къолай.
Гугук кесини атын айтыб къычыргъанча, мен, мен деб нек тураса?
Сютню башын джалагъан къутулур, тюбюн ичген тутулур.
Джаралыны джастыгъында сау ёлюр.
Иги бла джюрюсенг, джетерсе муратынга, аман бла джюрюсенг, къалырса уятха.
Къумурсхала джыйылсала, пилни да джыгъадыла.
Къаллай салам берсенг, аллай джууаб алырса.
Къуллукъчума, деб махтанма, къуллукъ – хаух джамчыды!
Бозанг болмагъан джерге, къалагъынгы сукъма.
Байны къызы баймакъ болса да, юйде къалмаз!
Телиге от эт десенг, юйюнге от салыр.
Тилчи бир сагъатха айлыкъ хата этер.
Къулакъдан эсе, кёзге ышан.
Арба аугъандан сора, джол кёргюзтюучю кёб болур.
Насыб бютеу халкъны юлюшюдю.
Сескекли кесин билдирир.
Ариу – кёзге, акъыл – джюрекге.
Эли джокъну – кёлю джокъ.
Къуру гыбыт бек дыгъырдар.
Шайтан алдады, тюзлюк къаргъады.
Къарнынг тойгъунчу аша да, белинг талгъынчы ишле.
Ишлерге уял да, ашаргъа табма.
Къая джолда джортма, ачыкъ сёзден къоркъма.
Итли къонакъ джарашмаз.
Джумушакъ терекни къурт ашар.
Баланы адам этген анады.
Къралынгы – душмандан, башынгы от бла суудан сакъла.
Мухардан ач ычхынмаз.
Татлы сёз – балдан татлы.
Иесиз малны бёрю ашар.
Айырылмаз джууугъунга, унутмаз сёзню айтма.
Сютден ауузу кюйген, суугъа юфгюре эди.
Абынмазлыкъ аякъ джокъ, джангылмазлыкъ джаякъ джокъ.
Этни да ашады, бетни да ашады.
Ач отунчуну ачыуу – бурнунда.
Къонагъынгы артмагъын алма да, алгъышын ал.
Ач бёрюге мекям джокъ.
Билмезни кёзю кёрмез, этмезни къулагъы эшитмез.
Джылкъыдан – ат чыгъар, тукъумдан – джаш чыгъар.
Ишни ахырын ойламай, аллын башлама.
Таукел адам тау тешер.
Тёрдеги кюлсе, эшикдеги ышарыр.
Къызны минг тилер, бир алыр.
Суу кетер, таш къалыр.
Аман адам элни бир-бирине джау этер.
Айыбны суу бла джууалмазса.
Чабакъсыз кёлге къармакъ салгъанлыкъгъа, чабакъ тутмазса.
Тёзгеннге, джабылгъан эшик ачылыр.
