Къулакъдан эсе, кёзге ышан.
Таукел къуру къалмаз.
Баш болса, бёрк табылыр.
Намыс болмагъан джерде, насыб болмаз.
Бал чибинни ургъаны – ачы, балы – татлы.
Кёб ашасанг, татыуу чыкъмаз, кёб сёлешсенг, магъанасы чыкъмаз.
Джыгъылгъанны сырты джерден тоймаз.
Аллахдан тилесенг, кёб тиле.
Хоншуну тауугъу къаз кёрюнюр, келини къыз кёрюнюр.
Ашхы болсанг, атынг чыгъар, аман болсанг, джанынг чыгъар.
Тойгъа барсанг, тоюб бар, эски тонунгу къоюб бар.
Аманны тукъумуна къарама, игини тукъумун сорма.
Джарлы тюеге минсе да, ит къабар.
Зарда марда джокъ.
Адамны сыфатына къарама, сёзюне къара.
Телини эшигин, махтау джабар.
Акъыллы эркиши атын махтар, акъылсыз эркиши къатынын махтар.
От кюйдюрген, сау болса да, тот кюйдюрген, сау болмаз.
Шапа кёб болса, аш татымсыз болур.
Джукъу тёшек сайламайды.
Аман киши кеси юйюнде – къонакъ.
Эки къатын алгъанны къулагъы тынгнгаймаз.
Ёксюзню къалачы уллу кёрюнюр.
Игиге айтсанг – билир, аманнга айтсанг – кюлюр.
Айтылгъан сёз ызына къайтмаз.
Ётген ёмюр – акъгъан суу.
Сютден ауузу кюйген, суугъа юфгюре эди.
Къуллукъчума, деб махтанма, къуллукъ – хаух джамчыды!
Ашхылыкъ джерде джатмайды, аманлыкъ суугъа батмайды.
Иги сеники эсе да, сюйген кесимикин этеме.
Ата – билек, ана – джюрек!
Башынга джетмегенни сорма.
Аш иеси бла татлыды.
Минг тенг да азды, бир джау да кёбдю.
Татлы сёз – балдан татлы.
Ана кёлю – балада, бала кёлю – талада.
Арба аугъандан сора, джол кёргюзтюучю кёб болур.
Болджал ишни бёрю ашар.
Къарт болгъан джерде, берекет болур, сабий болгъан джерде, оюн болур.
Ариу сёз аурууунгу алыр.
Игилик игилик бла сингдирилиучю затды.
Тил – кесген бычакъ, сёз – атылгъан окъ.
Къартха ушагъан джаш – акъыллы, джашха ушагъан къарт – тели.
Ёлген ийнек сютлю болур.
Билеги кючлю, бирни джыгъар, билими кючлю, мингни джыгъар.
Суугъа – чабакъ, къаягъа – ыргъакъ.
Байлыкъ адамны сокъур этер.
Адам бла мюлк юлешмеген эсенг, ол адамны билиб бошагъанма, деб кесинги алдама.
Байлыкъдан саулукъ ашхыды.
Окъугъан озар, окъумагъан тозар.
