Къоркъакъны кёзю экили кёрюр.
Ата – баланы уясы.
Ашхы адам – халкъ байлыгъы, ашхы джер – джашау байлыгъы.
Джауумдан сора, кюн кюйдюрюр, ётюрюкден сора, айыб кюйдюрюр.
Тойгъа алгъа да барма, тойда артха да къалма.
Эринчекни аурууу – кёб.
Чакъырылмагъан къонакъ – орунсуз.
Бети – къучакълар, джюреги – бычакълар.
Тешигини къатында, чычхан да батыр болур.
Арыгъан къош чамчы болур.
Къайтырыкъ эшигинги, къаты уруб чыкъма.
Ётюрюкню башын керти кесер.
Айтхан сёзюне табылгъан.
Адамны сабийин сюйген джюреги, бычакъча, джитиди.
Къалгъан ишге къар джауар.
Гугурук къычырмаса да, тангны атары къалмаз.
Хар сёзню орну барды.
Аурууну келиую тынч, кетиую – къыйын.
Ишлегенде эринме, ишде чолакъ кёрюнме.
Гугук кесини атын айтыб къычыргъанча, мен, мен деб нек тураса?
Ариу сёз джыланны орнундан чыгъарыр.
Иши джокъну, сыйы джокъ.
Гыдай эчки суугъа къараб, мюйюзле кёрмесе, джашма алкъын, дегенди.
Адеб джокъда, намыс джокъ.
Чакъырылгъанны аты, чакъырылмагъанны багъасы болур.
Суугъа – чабакъ, къаягъа – ыргъакъ.
Уллу сёзде уят джокъ.
Тиширыусуз юй – отсуз от джагъа.
Къобан да къуру да къобханлай турмайды, адам да къуру да патчахлай турмайды.
Джукъу тёшек сайламайды.
Туз, гырджын аша, тюзлюк бла джаша.
Шапа кёб болса, аш татымсыз болур.
Къызын тута билмеген, тул этер, джашын тута билмеген, къул этер.
Баш болса, бёрк табылыр.
Аман къатын сабий табса, бий болур…
Келинин тута билмеген, къул этер, къызын тута билмеген, тул этер.
Къонакъ аман болса, къонакъбай джунчур
Игиге айтсанг – билир, аманнга айтсанг – кюлюр.
Джети тилни билген джети кишиди.
Къая джолда джортма, ачыкъ сёзден къоркъма.
Сагъыш – къартлыкъгъа сюйюмчю.
Эртде тургъан джылкъычыны эркек аты тай табар.
Къарнынг бла ёч алма.
Къарны аманнга къазан такъдырма, къолу аманнга от джакъдырма.
Элни кючю – эмеген.
Къаллай салам берсенг, аллай джууаб алырса.
Оюмсуз атлагъан, аджалсыз ёлюр.
Джарлыны эшигин махтагъан джабар.
Нафысынгы айтханын этме, намысынгы айтханын эт.
Мал кёб болса, джууукъ кёб болур.
