Иги сеники эсе да, сюйген кесимикин этеме.
Нёгер болсанг, тенг бол, тенг болмасанг, кенг бол.
Айныгъанлы алты кюн, тогъайгъанлы тогъуз кюн.
Аман адамны тепсинге олтуртсанг, къызынгы тилер.
Тиширыусуз юй – отсуз от джагъа.
Ариу сёз джыланны орнундан чыгъарыр.
Эрни эр этерик да, къара джер этерик да, тиширыуду.
Ёнгкюч къууана барыр, джылай келир.
Терек ауса, отунчу – кёб.
Ханнга да келеди хариблик.
Акъдан къара болмаз.
Окъуу – билимни ачхычы, окъуу – дунияны бачхычы.
Гугурук къычырмаса да, тангны атары къалмаз.
Тешик этген тынчды, аны джамагъан къыйынды.
Таукел адам тау тешер.
Эм ашхы къайын ана мамукъ бла башынгы тешер.
Айранын берсенг, челегин да къызгъанма.
Хаухну атма, ёнгкючню сатма.
Суу ичген шауданынга тюкюрме.
Ата Джуртун танымагъан, атасын да танымаз.
Ауругъанны сау билмез, ач къарынны токъ билмез.
Ач отунчуну ачыуу – бурнунда.
Къарнынг тойгъунчу аша да, белинг талгъынчы ишле.
Чабакъгъа акъыл, табагъа тюшсе келеди.
Башынга джетмегенни сорма.
Ана кёлю – балада, бала кёлю – талада.
Тойгъа алгъа да барма, тойда артха да къалма.
Айтылгъан буйрукъ, сёгюлмез
Келинни – келгинчи, бёркню кийгинчи кёр.
Суугъа – таянма, джаугъа – ийнанма.
Келинин тута билмеген, къул этер, къызын тута билмеген, тул этер.
Акъыллы – эл иеси, тели – эл баласы.
Аджалсыз ёлюм болмаз.
Тюкюрюк баш джармаз, налат кёз чыгъармаз!
Aдам боллукъ, сыфатындан белгили.
Къартны сыйын кёрмеген, къартлыгъында сыйлы болмаз.
Насыблы элин сюер, насыбсыз кесин сюер.
Къонакъ хазыр болгъанлыкъгъа, къонакъбай хазыр тюлдю.
Чакъырылмагъан джерге барма, чакъырылгъан джерден къалма.
Ачлыкъ отха секиртир.
Келгинчи, къонакъ уялыр, келгенден сора, къонакъбай уялыр.
Къонакъ болсанг, ийнакъ бол.
Акъыл къартда, джашда тюйюлдю – башдады.
Тилчи бир сагъатха айлыкъ хата этер.
Арпа, будай – ащды, алтын, кюмюш а – ташды.
Ариу – кёзге, акъыл – джюрекге.
Ашхы тенг джолгъа салыр, аман тенг джолдан тайдырыр.
Ишге юренсин къоллары, халкъ бла болсун джоллары.
Эли джокъну – кёлю джокъ.
Джыгъылгъанны сырты джерден тоймаз.
