Къарт болгъан джерде, берекет болур, сабий болгъан джерде, оюн болур.
Эски джаугъа ышанма.
Айырылгъанланы айю ашар, бёлюннгенлени бёрю ашар.
Ишин билген, аны сыйын чыгъарады.
Ач да бол, токъ да бол – намысынга бек бол.
Урама да – ёледи, сатама да – келеди.
Къарнынг ауруса, ауузунгу тый
Терек ауса, отунчу – кёб.
Керек ташны ауурлугъу джокъ.
Къызгъанчдан ычхыныр, мухардан ычхынмаз.
Кёлсюзден сёзсюз тууар.
Ашхы тенг джолгъа салыр, аман тенг джолдан тайдырыр.
Джукъу тёшек сайламайды.
Ашлыкъ – бюртюкден, джюн – тюкден.
Адеб этмеген, адеб кёрмез.
Эки итни арасына сюек атма, эки адамны арасында сёз чыгъарма.
Къайгъыны сюйген, къайгъы табар.
Дууулдаса – бал чибин, къонса – къара чибин.
Сабийликде юретмесенг, уллу болса – тюзелмез.
Биреу ашаб къутулур, биреу джалаб тутулур.
Къыйынлы джети элге оноу этер.
Баш – акъыл ючюн, акъылман – халкъ ючюн.
Къатын къылыкъсыз, эр тынчлыкъсыз.
Сёз садакъдан кючлюдю.
Джашлыкъ этмеген, башлыкъ этмез.
Къоркъакъны кёзю экили кёрюр.
Кюн кёрмеген, кюн кёрсе, кюндюз чыракъ джандырыр.
Къонакъ кёб келюучю юйню, къазаны отдан тюшмез.
Аман киши кеси юйюнде – къонакъ.
Билеги кючлю, бирни джыгъар, билими кючлю, мингни джыгъар.
Аман къатын алгъан, арыр, иги къатын алгъан джарыр.
Уллу айтханны этмеген – уллаймаз.
Бетинги сатма, малынгы сат.
Арбаз къынгырды да, ийнек сауалмайма.
Таукел тауну аудурур.
Эм ашхы къайын ана мамукъ бла башынгы тешер.
Иесиз малны бёрю ашар.
Тин – байлыгъынг, терен саулугъунг.
Джаш къарыу бла кючлю, къарт акъыл бла кючлю.
Ауругъанны сау билмез, ач къарынны токъ билмез.
Джолда аягъынга сакъ бол, ушакъда тилинге сакъ бол.
Джюрекден джюрекге джол барды.
Бозаны арты дауур болур.
Джеринден айырылгъан – джети джылар, джуртундан айырылгъан – ёлгюнчю джылар.
Аман адамны тепсинге олтуртсанг, къызынгы тилер.
Зар адамны насыбы болмаз.
Ашха уста, юйюнде болсун
Аллахха ийнаннган кишини, Аллах онгдурур ишин.
Чыбыкълыкъда бюгюлмеген, къазыкълыкъда бюгюлмей эди.
Ата Джуртун танымагъан, атасын да танымаз.
