Биреу къой излей, биреу той излей.
Кесине оноу эте билмеген, халкъына да эте билмез.
Къарын къуру болса, джюрек уру болур.
Уллу суу бла уллу ауруудан башынгы сакъла.
Джыланны къуйругъундан басарынг келсе, аны башы болгъанын унутма.
Аджалсыз ёлюм болмаз.
Окъугъан – асыу, окъумагъан – джарсыу.
Таукел къуру къалмаз.
Эки ойлашыб, бир сёлешген.
Эл элде бирер малынг болгъандан эсе, бирер тенгинг болсун.
Аллахха ийнаннган кишини, Аллах онгдурур ишин.
Акъыллы – эл иеси, тели – эл баласы.
Мухар, кеси тойса да, кёзю тоймаз.
Халкъгъа джарагъан, джарлы къалмаз.
Кёзден кетген, кёлден да кетеди.
Аджашханны ызындагъы кёреди, джангылгъанны джанындагъы биледи.
Нёгер болсанг, тенг бол, тенг болмасанг, кенг бол.
Ата – баланы уясы.
Сибиртки да сыйлы болду, кюрек да кюнлю болду.
Ашхы болсанг, атынг чыгъар, аман болсанг, джанынг чыгъар.
Накъырда – кертини келечиси.
Адам сёзюнден белгили.
Бал чибинни ургъаны – ачы, балы – татлы.
Адеб базарда сатылмаз.
Аманнга игилик этсенг, юйюнге сау бармазса.
Къан бла кирген, джан бла чыгъар.
Ат басханны джер билед.
Чакъырылмагъан къонакъ къачан кетерин сормаз.
Онгсузну – джакъла, тенгликни – сакъла.
Айран ичген – къутулду, джугъусун джалагъан – тутулду.
Дуния малгъа сатылма, кесингден телиге къатылма.
Арба аугъандан сора, джол кёргюзтюучю кёб болур.
Хазыр ашха – терен къашыкъ.
Кёб джашагъан – кёб билир.
Уруну арты – къуру.
Тёрени джагъы джокъ.
Тик ёргени, тик энгишгеси да болады.
Ургъан суудан башынгы сакъла.
Къайгъыны сюйген, къайгъы табар.
Намысы джокъну – дуниясы джокъ.
Иги адамны бир сёзю эки болмаз.
Аууз сакълагъан – джан сакълар.
Тойгъа алгъа да барма, тойда артха да къалма.
Сагъыш – къартлыкъгъа сюйюмчю.
Джаралыны джастыгъында сау ёлюр.
Сакъ юйюне сау барыр.
Аякъларынгы джууургъанынга кёре узат.
Таш бла ургъанны, аш бла ур.
Бек ашыкъгъан меннге джетсин, дегенди аракъы.
Окъумагъан сокъурду, сокъур ташха абыныр!
