Эльбрусоид :: Форум :: Келигиз, тил байлыгъыбызны сакълайыкъ!

Джарлы эскисин джамаса, къууаныр.
Уллу суу бла уллу ауруудан башынгы сакъла.
Адамны бетине къарама, адетине къара.
Ач къарным, тынч къулагъым.
Олтуруб кёрюнмей эди да, ёрге туруб кёрюне эди.
Ишленмеген джаш – джюгенсиз ат, ишленмеген къыз – тузсуз хант.
Тик ёргени, тик энгишгеси да болады.
Аш кетер да бет къалыр.
Сакъ юйюне сау барыр.
Тилчиден кери бол.
Эл ауузу – элия.
Аш хазыр болса, иш харам болур.
Чыкълы кюнде чыкъмагъан, чыкъса къуру кирмеген.
Адеб базарда сатылмаз.
Ханнга да келеди хариблик.
Хаухну атма, ёнгкючню сатма.
Эринчекни аурууу – кёб.
Баргъанынга кёре болур келгенинг.
Ётюрюкчюню шагъаты – къатында.
Аманнга да, игиге да оноусуз къатышма.
Джолда аягъынга сакъ бол, ушакъда тилинге сакъ бол.
Бастасын ашагъан, хантусун да ичер.
Ушамагъан – джукъмаз.
Гыдай эчки суугъа къараб, мюйюзле кёрмесе, джашма алкъын, дегенди.
Булут кёкге джарашыу, уят бетге джарашыу.
Аман киши кеси юйюнде – къонакъ.
Эшекге миннген – биринчи айыб, андан джыгъылгъан – экинчи айыб.
Этим кетсе да, сюегим къалыр.
Джолунга кёре – джюрюшюнг, джагъанга кёре – юлюшюнг.
«Ёгюз, джаргъа джууукъ барма, меннге джюк боллукъса», - дегенди эшек.
Кёбге таш атма.
Къошда джокъгъа – юлюш джокъ.
Эл элде бирер малынг болгъандан эсе, бирер тенгинг болсун.
Атынг аманнга чыкъгъандан эсе, джанынг тамагъынгдан чыкъсын.
Ашарыкъда сайлагъаннга – чий гырджын.
Ишге юренсин къоллары, халкъ бла болсун джоллары.
Чомартны къолу берекет.
Акъыл неден да кючлюдю.
Таш бла ургъанны, аш бла ур.
Бети къызарыучу адамны, джюреги харам болмаз.
Уллу къазанда бишген эт, чий къалмаз.
Ким бла джюрюсенг, аны кёзю бла кёрюнюрсе.
Бет бетге къараса, бет да джерге къарар.
Джарашыу сюйген – джалынчакъ.
Оюмсуз атлагъан, аджалсыз ёлюр.
Башы джабылгъан челекге, кир тюшмез.
Ачылгъан эт джабылыр, кёрген кёз унутмаз.
Тюзлюк шохлукъну бегитир.
Зарда марда джокъ.
Къумурсхала джыйылсала, пилни да джыгъадыла.

RSS

Келигиз, тил байлыгъыбызны сакълайыкъ!

Кергелен

Гость

#551

Джаратама0

24.03.2008 19:44:42

Ала ,Минги-Тауну теппесин къазыб ,белкъау этиб .ачыуланыб ,гыйы-гыйы къаяланы къобара тургъан ДЖелмаузну кередиле. Ариу Кюнкъыз, нюр чырайын тийириб, Минги-Тауну ортасын айры эте, от солуй тургъан ДЖелмаузну уютуб,къарышдырыб ,солугъан отун сууутханды. Нарт уланы да сегизатар садкъдан сегиз окъну учургъанды. Отлу окъла тийген ДЖелмауз кебюб дингиз болуб ,къызыб атылыб джарылгъанды. Минги-Тау да андан бери эки башлы болуб къалгъанды дейдиле.

Сибил нарла да чаба джорта ,Сибилтиге джетгендиле,
Сибилтиде къонушлары Минги-Таугъа келгендиле,
Тауну айрысын керюб ,нек болгънын билгендиле,
Къууанч тоюн къура , Къала-Тауна киргендиле,
Туугъан нарт уланнга Ерюзмек аталыб,
Бир кюннге есюб ,деу нарт болгъанын кергендиле.
Эркли асселикде туууб есген Ерюзмек,
Къала-Тауда ишлейд кесине ерюз ,теджюк керек,
ДЖолгъа чыгъаргъа керек кюннге болурча бек.
Сонгура не эрки, не асселиги болмагъан биреу--
ОЛ а Бурунгук --тилеб Къала-Тауна киргенди,
Излей келиб кесине джалынчакъ кюннге тиреу,
Ерюзмекни да ким болгънын ол алайда билгенди,
Ерюзмекден джанына джашау турукъ тилегенди,
Тарыкъ джерими да сеннге берейим дегенди,
Аны келюн чапырыр дыгаласла излегенди.
Алай а Ерюзмек аны да хош ,табу кермегенди.

Кесе Бурунгук да аны ангылаб, Тарыкъ таулада Бугъоулу ---Дорбунда джашырылыб тургъан, дуния сейири ариу Аргуну да берейим деб ,дагъыда джалыннганды . Ерюзмек да сибил нартланы бир белеги бла Тарыкъ таулагъа баргъанды . Бугъоу-Дорбунда кюн кермей джашагъан ариу Аргугъа бошлукъ бериб, алайда аны алыб джашай, тарыкъ сибил нартланы ерюзю болгъанды.
Кесе Бурунгукну уа сибил нартла ,накъутдан тойсун деб, Накъут-Дорбунда иштенекде ишлетир ючюн ,сау къойгъандыла.
Нартланы джурту КЪала-Тауну уа КЪонуш-ДЖуртда къала тюбю бюгюнлюкге деричин сакъланнганды дейдиле.

Акъыллычыкъ

Гость

#552

Джаратама0

24.03.2008 20:31:51

Сорвиголова Гость	#553 Джаратама0 24.03.2008 20:49:36 алчадакъ, бегеуюл, бекгич, шынтачы, белкъау

Девушка Гор Гость	#554 Джаратама0 24.03.2008 21:46:51 Сорвиголова бегеуюл- бегейиул- укрепление. шынтачы шынтаг дерге излеген болур эдинг- шынтаг-нитки, пряжа.

Девушка Гор Гость	#555 Джаратама0 24.03.2008 22:12:26 Кергелен Бек ариу таурух айтдынг сау бол Джангы сёзле да билдик, тюзюн айтсам мен бир-бирлерин сёзлюкде да табмадым

Акъыллычыкъ

Гость

#556

Джаратама0

24.03.2008 22:19:55

Кергелен
Байчы да , мычымай , танг аласы бла сибил нартлагъа , Бурунгукну хыйласын айтыб , ачы-ачы къычырыб , уллу той - оюндан сонгура соругъуб джукълагъан нартланы уятханды , сезюне тынгылатханды .
Танг аласы бла къычыргъан эшитсем, къарт анам, байчыды ол дегенлей турады. Ол байчыны юсюнденмиди, огъесе?

Кергелен

Гость

#557

Джаратама0

25.03.2008 17:21:13

Салам Таулула!

Таурухну иги окъудугъузму? ОКъугъан атыгъызны джаза кетигиз !

Кириб окъумай чыкъгънны керюб турама

Танг аласы бла къычыргъан эшитсем, къарт анам, байчыды ол дегенлей турады. Ол байчыны юсюнденмиди, огъесе?

Къарт анагъ тюз айтады.

Байчы къычырса --ОЙ , НЕ . ? --дерге джарамайды.
Байчы , Байчы ,--дерге керекди.

Кергелен

Гость

#558

Джаратама0

25.03.2008 17:58:24

ХАПАР.

Тау къышлыкълагъа джангы эл ишлеге чыкъгъан эдик. Чалкъы джетсе айтыучан эдиле алай. ДЖайлыкъда КЪоджакъ Тюбю деген джердебиз. Мен ийнекге ,бузоугъа къарайма, къалгаън ишге джарайма деб билмейме. Хаман да кереме : бир агъазчыкъ уясындан чыгъыб, эшикге чабады, сора- ызына. Къуру алай этиб турады, баласына къоркъгъанды да. Анга тийген киши да джокъду.
Бир кюн уллу джангур джауб , чалкъычыланы къошха джыйды.
ДЖашла эригиб , ойнаб , джырлаб тебредиле. Бирлери айтды: "Келигиз , агъазны баласын урлайыкъ, анга тийген сау къалмайды , дейдиле ,- бир сынайыкъ"--деб. Марлаб туруб , агъаз джанлагъанлай , баласын урлайдыла. ДЖарлы ана бир къайгъыгъа кириу этеди, баласын кермегенинде. Чыртданда чыдам табалмай, адамланы аралары бла да чабады. Бичен баш четен къошчугъубузну юй тюбюнден аркъауун кетлюрюб тургъан быкъы бар эди , агъаз , анга миниб, сютбашы челекге тамызады. Тамадабыз урушду, разы болдугъзму энди деб. Агъазны къабханы, тамызгъаны да ууду, билебиз. ДЖашла акъыртын балачыкъны орнуна салдыла. Келиб баласын эслегенлей , быкъыгъа ерлеб челекни джантау баун ашаб, сютбашыны сютбашыны джерге ийиб чачды. Сейир- тамаша болгъан джашла , юй тюбюн сибириб алыб. сютбашыны таз бла элтиб ит тегенеге къуйдула. Итлени бири джетиб андан джалаб тебреди. Ийнаныгъыз, ашаб да бошагъынчы, ит елюб къалды.
Экинчи джашла агъазны баласына тиймей эдиле.

Девушка Гор Гость	#559 Джаратама0 25.03.2008 20:42:57 Кергелен Бу хапарны мен да билеме! Къарнашларым чалкъыны юсюнден хапар айтсала, бу хапарны да айтыучандыла.

Акъыллычыкъ Гость	#560 Джаратама0 25.03.2008 21:14:51 агъаз - ласка ушайды? Алыб къарасанг ётюрюк хапарды дерге да боллукъду, алай а, ата-бабаларыбыздан келген хапар эсе, бюгюн да джаш адамла аны биле эселе, тюз болур. Къалай сейирди джашау!

Акъыллычыкъ

Гость

#561

Джаратама0

25.03.2008 21:26:44

Кергелен
Байчы къычырса --ОЙ , НЕ . ? --дерге джарамайды.
Байчы , Байчы ,--дерге керекди.
А ой, не десенг не болады? Къарт анам айтханнга кёре, джукъ айтсанг, неда эшикге чыкъсанг ол ауазгъа адам акъылындан тюрленирге боллукъду дейди.

Игиликге къычыр - дерге керекди дейди ання. Сора дагъыда, танг аласы бла байчы къычыргъандыда, бир бек къоркъуб турама кишиге джукъ болмай къалгъа эди, дегенлени талай кере эшитгенме.

Кергелен

Гость

#562

Джаратама0

25.03.2008 21:36:44

Акъыллычыкъ
Аннячыгъынъ тюз айтады.
Байчы билдирген этеди ,сакъ бол деб.
Кече арасында зат да къычырыб, адам ешикге чыгъаргъа боллкъду,къоркъаргъа боллукъду, Байчы къычырса тюнюнъдеча къычырады. ДЖуукъ адамча къчырыргъа бо.ллукъду.

Кергелен Гость	#563 Джаратама0 25.03.2008 21:37:57 А ой, не десенг не болады? Ырысды.

Акъыллычыкъ Гость	#564 Джаратама0 26.03.2008 19:47:35 Кергелен Сау бол, билдим энди кимге сора турургъа. Ансын аннямы башын къайнатханма.

Акъыллычыкъ

Гость

#565

Джаратама0

26.03.2008 20:46:02

Кергелен
Мен да бир джазайым окъугъан хапарларымдан бирин, керти сейир хапарды бу:
Айю бек акъыллы джаныуарды. Хар затны да эсеблеб джюрюйдю. Аны ючюн айтадыла, былай этер ишин джашырыб, хар затны алгъадан билиб тургъан адамны юсюнден ол айю акъыллыды деб. Ол да, адамча, нени да ашайды - этни да, кёгетлени да.
Айю алгъын тиширыу болгъанды деучю эдиле къартла. Не хата, не гюнях иш этген эсе да, Тейрини чамландыргъанды да, ол аны джаныуар этиб къойгъанды. Ма аны себебли айю тиширыулагъа тиймейди. Айю тиширыуну ашайма деб чабса да, ол анга ёшюнюн ачханлай, аны тиширыу болгъанын билиб, тохтаб къалады деучю эдиле, керти, ётюрюк эсе да.

Кергелен

Гость

#566

Джаратама0

27.03.2008 00:43:55

Салам ана тилин сюйгенлеге!!!!Акъыллычыкъ

Аламат хапарчыкъ. Ма алай аз -аз джаза турсакъ бек да ашхы боллукъ эди.
Адам бир-эки зат окъгъанлай болгъанны да билиб къоялмайды ,иги билир ючюн 4-5 кере талай замандан окъургъа керекди.

Девушка Гор

Гость

#567

Джаратама0

27.03.2008 13:52:31

Акъыллычыкъ
Айю алгъын тиширыу болгъанды деучю эдиле къартла. Не хата, не гюнях иш этген эсе да, Тейрини чамландыргъанды да, ол аны джаныуар этиб къойгъанды.
Эшитмеген эдим тоба быллай хапар

Сейир затны айтдынг. Бу миф болса да сагъышландырырчады, уучулагъа бир сорургъа керекди

Кергелен

Гость

#568

Джаратама0

27.03.2008 14:09:35

ЗИЙДАННГА АТЫУ.

КЪарачайда аман айланнган адамланы зийданнга атхандыла неда, бетлерин къазан къара бла бояб ,эшекге миндириб( экисин да бир эшекге, сыртларын бир-бирине тиреб миндиргендиле) орамда айландыргъандыла,-ыйлыкъдырыргъа.
1814 джыл ДЖазлыкъда ДЖаухарат деб бир тышырыуну зийданнга атхандыла. Зийдан хуюча, терен, адам кенглиги сыйынырча бир къазылгъанды. Терслик этген аны ичинде ерге туруб тургъанлайына , хар озгъан бир таш атыб , башын джабхандыла.
Таш атмай озгъан адамны кесин зийданнга атхандыла. ДЖаухаратны Зийданнга атханларындан сора ,аны атын сабийлеге атамагъандыла , ол джашагъан юйню юсю бла озсала, Астагъафируллах деб бетлерин джабыб озгъандыла.

Акъыллычыкъ Гость	#569 Джаратама0 27.03.2008 19:33:39 Девушка Гор уучулагъа бир сорургъа керекди Бизге да бир джазарса аланы айтханларын, мен да сейир болгъанма.

Кергелен

Гость

#570

Джаратама0

27.03.2008 21:40:00

КЪАРА БАГЪАНА.

КЪара багъанагъа Къарачайда къуру эркишилени сюегендиле. Къара багъангъа амнлыкъ этген адамны байлагъандыла.
Бир джолда Чеккуланы Наурузну джашы Акъчыкъ ,сабий заманында, озуб бара, къара багъанагъа байланыб тургъан бир адамны эслегенди . Бир мыртазакъ да аны сакълаб тура, арлакъда ,эригиб, баш къагъа.
---ДЖашчыкъ, хазыр орнумда юч сомум барды, аны да ал, мени да ары бир ий,- деб шыбырдагъанды къара багъанагъа байланыб турган адам.
ДЖашчыкъ, Чекку улу Акъчыкъ,юч сомну да алады, тасманы тешиб, багънагъа урулгъанны бошлайды, кеси къачыб кетеди. Ол адам бир сыртлыкъны ерге къачады. КЪобандан етюб, кюн бет бла Дууут таба мыллык атады. Сау эл аны ызындан сюреди,джеталмайдыла, энди ол джерни аты КЪачхан сыртды.

Акъыллычыкъ Гость	#571 Джаратама0 27.03.2008 21:40:54 ЗИЙДАННГА АТЫУ- зидан - темница дегенликлеримиди

Кергелен Гость	#572 Джаратама0 28.03.2008 00:40:08 Акъыллычыкъ зидан - темница Огъай, ол анданбытдырды.

Акъыллычыкъ Гость	#573 Джаратама0 28.03.2008 17:21:39 Кергелен Огъай, ол анданбытдырды. Ол дегенинг? Айтмазчамыды адамгъа?

Кергелен

Гость

#574

Джаратама0

28.03.2008 17:32:32

Салам .

Акъыллычыкъ
Ол дегенинг? Айтмазчамыды адамгъа

ДЖаным темницагъа атсала адамны- гырджын , суу бергендиле.

Башинда хапарны иги окъу .
Адам сыйынырча чуннъур къазыб , сора хар къаты бла етген таш атыб баргъанды. Алай адам джаны саулай ташла бла бастырылыб къалгъанды.

Девушка Гор

Гость

#575

Джаратама0

28.03.2008 17:39:54

Адам сыйынырча чуннъур къазыб , сора хар къаты бла етген таш атыб баргъанды. Алай адам джаны саулай ташла бла бастырылыб къалгъанды.
Ол къатылыкъгъа бир къара. Алай а, анга кёре ол сагъатны адамлары адетледен таймагъандыла, адеблерин кючлю сакълагъандыла.

	# Джаратама0

	# Джаратама0

	# Джаратама0

	# Джаратама0

	# Джаратама0

	# Джаратама0

Читают тему (гостей: 4)

Логин:
Пароль:
	Запомнить меня на этом компьютере

Забыли свой пароль?
Регистрация