Мен да «сен», дейме, сен да «кесим», дейсе.
Акъыллы эркиши атын махтар, акъылсыз эркиши къатынын махтар.
Рысхысына кёре, джаш ёсер, къышлыгъына кёре, мал ёсер.
Элге къуллукъ этмеген, элге ие болмаз.
Нарт сёз къарт болмаз.
Дженгил джетерикме деб, узун джолну къоюб, къысхасын барма.
Онгсузну – джакъла, тенгликни – сакъла.
Эл элде бирер малынг болгъандан эсе, бирер тенгинг болсун.
Кёб джат да, бек чаб.
Ашаса, ашамаса да, бёрюню ауузу – къан.
Ауурну тюбю бла, дженгилни башы бла джюрюген.
Джарлыны тону джаз битер.
Къонакъ аз олтурур, кёб сынар.
Кёрмегеннге кебек – танг, битмегеннге сакъал – танг.
Джети тилни билген джети кишиди.
Киштикге къанат битсе, чыпчыкъ къалмаз эди.
Тил бла келеди джыр да.
Хунаны тюбюн къазсанг, юсюнге ауар.
Къарт болгъан джерде, берекет болур, сабий болгъан джерде, оюн болур.
Юйюнгден чыкъдынг – кюнюнгден чыкъдынг.
Джыйырма къойну юч джыйырма эбзе кюте эди.
Ашатыргъа иш – ашхы, ишлетирге аш – ашхы.
Къызгъанчдан ычхыныр, мухардан ычхынмаз.
Аджал соруб келмез, келсе, къайтыб кетмез.
Ишин билген, аны сыйын чыгъарады.
Эринчекге кюн узун.
Эркишини аманы тиширыуну джылатыр.
Адамны сабийин сюйген джюреги, бычакъча, джитиди.
Ёгюзню мюйюзлери ауурлукъ этмейдиле.
Ишни аллы бла къууанма да, арты бла къууан.
Дуния аламаты сен эсенг да, игиме деб айтма.
Акъылсызны джууукъгъа алма, акъыллыны кенгнге салма.
Ата Джуртуму башы болмасам да, босагъасында ташы болайым.
Уруну арты – къуру.
Адеб этмеген, адеб кёрмез.
Садакъачыны джаны – къапчыгъында.
Сёз – кюмюш, джыр – алтын.
Тюкюрюк баш джармаз, налат кёз чыгъармаз!
Уясында не кёрсе, учханында аны этер.
Ачыкъ джюрекге джол – ачыкъ.
Намыс болмагъан джерде, насыб болмаз.
Джарлы джети элни сёзюн этер.
Къайгъы тюбю – тенгиз.
Аурууну келиую тынч, кетиую – къыйын.
Ашына кёре табагъы, балына кёре къалагъы.
Билимсиз иш бармаз.
Ашхы – джыяр, аман – джояр.
Аманнга игилик этсенг, юйюнге сау бармазса.
Айтхан – тынч, этген – къыйын.
Иги адам абынса да, джангылмаз.
