Эри аманны, къатыны – аман.
Джиби бир къат джетмей эди да, эки къат тарта эди.
Джахил болса анасы, не билликди баласы?
Адамны бетине къарама, адетине къара.
Айныгъанлы алты кюн, тогъайгъанлы тогъуз кюн.
Ёпкелегенни ашы татлы болады.
Айранны сюйген, ийнек тутар.
Огъурлуну сёзю – суу, огъурсузну сёзю – уу.
Минг тенг да азды, бир джау да кёбдю.
Джумушакъ сёз къаты таякъны сындырыр.
Къарт болгъан джерде, берекет болур, сабий болгъан джерде, оюн болур.
Джигер – джаннга къыйынлыкъ.
Къайгъыны сюйген, къайгъы табар.
Ёксюзню къалачы уллу кёрюнюр.
Билимли ёлмез, билимсиз кёрмез.
Къумурсхала джыйылсала, пилни да джыгъадыла.
Акъыл аздырмаз, билим тоздурмаз.
Адеб этмеген, адеб кёрмез.
Мен да «сен», дейме, сен да «кесим», дейсе.
Аджашхан тёгерек айланыр.
Ач, тоймам, дейди, тойгъан, ач болмам, дейди.
Окъуусуз билим – джокъ, билимсиз кюнюнг – джокъ.
Эрни эр этерик да, къара джер этерик да, тиширыуду.
Бал ашаргъа сюе эсенг, чибин ургъаннга тёз.
Рысхысына кёре, джаш ёсер, къышлыгъына кёре, мал ёсер.
Тил – миллетни джаны.
Чомартха хар кюн да байрамды.
Къар – келтирди, суу – элтди.
Къуллукъчума, деб махтанма, къуллукъ – хаух джамчыды!
Ауругъанны сау билмез, ач къарынны токъ билмез.
Орундукъ тюбюнде атылсам да, орта джиликме, де да айлан.
Тюзлюк шохлукъну бегитир.
Соргъан айыб тюлдю, билмеген айыбды.
Къолу уллу – асыу, аягъы уллу – джарсыу.
Байлыкъдан саулукъ ашхыды.
Кесинге джетмегенни, кёб сёлешме.
Юйюнгден чыкъдынг – кюнюнгден чыкъдынг.
Билим насыб берир, билим джолну керир.
Джогъун бар этген, барын бал этген.
Кёл ашады да, кеси ашады.
Ётюрюк хапар аякъ тюбю бла джюрюйдю.
Ариу сёз – джаннга азыкъ, аман сёз – башха къазыкъ.
Джерни букъусу кёкге къонмаз.
Тилчи бир сагъатха айлыкъ хата этер.
Сакъламагъан затынга джолукъсанг, не бек къууанаса, не бек ачыйса.
Кёбге таш атма.
Ач келгенни – тойдур, кеч келгенни – къондур.
Намыс сатылыб алынмайды.
Ашатыргъа иш – ашхы, ишлетирге аш – ашхы.
Дженгил джетерикме деб, узун джолну къоюб, къысхасын барма.
