Элде адам къалмаса, ит тахтагъа минер.
Ёнгкюч къууана барыр, джылай келир.
Тил бла келеди джыр да.
Джигер – джаннга къыйынлыкъ.
«Ма», - дегенни билмесенг, «бер», - дегенни билмезсе.
Эшекге миннген – биринчи айыб, андан джыгъылгъан – экинчи айыб.
Адамны аманы адамны бети бла ойнар.
Къонакъ аман болса, къонакъбай джунчур
Мураты болгъанны джюрек тебюую башхады.
Уллу къашыкъ эрин джыртар.
Намысы болмагъанны, сыйы болмаз.
Асхат ашлыкъ сата, юйдегиси ачдан къата.
Къызбайны юйюне дери сюрсенг, батыр болур.
Ашлыкъны арба юйге келтирир, чана базаргъа элтир.
Аз сёлешген, къайгъысыз турур.
Аманны къуугъан, аманлыкъ табар.
Биреуге аманлыкъ этиб, кесинге игилик табмазса.
Таякъ этден ётер, тил сюекден ётер.
Ашда – бёрю, ишде – ёлю.
Атлыны кёрсе, джаяуну буту талыр.
Джаралыны джастыгъында сау ёлюр.
Къатын къылыкъсыз, эр тынчлыкъсыз.
Кюлме джашха – келир башха.
Адеб джокъда, намыс джокъ.
Тойгъан джерге джети къайт.
Билмегенинги, билгеннге сор.
Узун джолну барсанг, бюгюн келирсе, къысха джолну барсанг, тамбла келирсе.
Джарлыны эшигин махтагъан джабар.
Иги адам абынса да, джангылмаз.
Арбаз сайлама да, хоншу сайла.
Билеги кючлю, бирни джыгъар, билими кючлю, мингни джыгъар.
Халкъгъа джарагъан, джарлы къалмаз.
Чакъырылмагъан къонакъ тёрге атламаз.
Ауругъан – джашаудан умутчу.
Ишлегенден, къарагъан уста.
Баргъанынга кёре болур келгенинг.
Элни кючю – эмеген.
Суу ичген шауданынга тюкюрме.
Джыйырма къойну юч джыйырма эбзе кюте эди.
Суу кетер, таш къалыр.
Азыкъ аз болса, эртде орун сал.
Тил – кесген бычакъ, сёз – атылгъан окъ.
Бир абыннган – минг сюрюнюр.
Сагъыш – къартлыкъгъа сюйюмчю.
Тай асырагъан, атха минер.
Ишге юренсин къоллары, халкъ бла болсун джоллары.
Къыз чыгъаргъан – къызыл къымжа.
Эрни эр этерик да, къара джер этерик да, тиширыуду.
Адебни адебсизден юрен.
Рысхысына кёре, джаш ёсер, къышлыгъына кёре, мал ёсер.
